Si Pablo ya escribi: “Por causa del Ley muerto ya yo na Ley para, ansina, ay puede yo vivi para con el Dios.”—Gal. 2:19.

El cosa ya escribi si Pablo conectao na un importante punto que ta hace le na maga congregacion na provincia de Galacia na Roma. El maga falso maestro ya puede influencia con el cuanto maga Cristiano. Este maga gente ta enseña que para salva, el un persona necesita sigui con el Ley de Moises, particularmente el ley na capada. Pero, sabe si Pablo que el Dios nuay mas manda capa con el de suyu maga siervo. Na maka-convinci manera, ya dale le prueba que falso ese maga enseñanza y ya hace fuerte con el fe del maga hermano na rescate de Jesucristo.—Gal. 2:4; 5:2.

El Biblia claro ya habla que si muri el un persona, no sabe mas le ni nada y nuay mas cosa puede afecta con ele. (Ecl. 9:5) Cuando ya habla si Pablo: “Muerto ya yo na Ley,” quierre decir le que el Ley de Moises nuay mas efecto na de suyu vida. Gane, asigurao si Pablo que por medio na de suyu fe na rescate, ya “puede [le] vivi para con el Dios.”

Ya cambia el situacion de Pablo “por causa del Ley.” Na cosa manera? Nuevo lang le ya habla que “el gente gendeh ta queda noay culpa por medio del obediencia del Ley, sino por medio del fe con Cristo Jesus.” (Gal. 2:16) Deveras, tiene cosa importante ya puede hace el Ley. Si Pablo ya explica con el maga de Galacia: “Ya dale se para hace claro el maga culpa hasta ay llega el descendencia para con quien ya hace el Promesa.” (Gal. 3:19) El Ley ya hace claro que el maga imperfecto gente gendeh gayot puede sigui con el Ley na perfecto manera y necesita sila un perfecto sacrificio. Poreso, el Ley ya guia con el maga gente con “el descendencia,” el Cristo. Si el un persona demonstra fe con Jesucristo, hay queda le recto na ojos del Dios. (Gal. 3:24) Ya puede se habla si Pablo cay por medio na Ley, ya puede le acepta y demonstra fe con Jesus. Na ese manera, si Pablo ya queda “muerto . . . na Ley” y ya “vivi para con el Dios.” El Ley nuay mas efecto con ele sino el Dios ya.

Semejante con ese el cosa ya habla si Pablo na de suyu carta na maga de Roma. “Ansina tamen, ustedes dimio maga hermano y hermana, ya queda ustedes muerto para na Ley por medio del cuerpo de Cristo. . . . Libre ya kita con el Ley, cay ya muri kita para sirvi na maga cosa-cosa que estaba ta hace canaton preso.” (Roma 7:4, 6) Este texto y el Galacia 2:19 ta revela que gendeh tan cuento si Pablo acerca na de suyu muerte como un condenao pecador bajo na Ley. Sino, tan cuento le acerca si paquemodo le ya queda librao. Ele y el otro igual con ele gendeh mas bajo na Ley. Ya queda sila librao por causa na diila fe na rescate del Cristo.