POR manada año, el maga Israelita anad dale sen para suporta con el deverasan adoranza. Pero na tiempo de Jesus, el maga Judio necesita paga manada impuesto que ya hace dificil con el diila vida.

Como un manera para suporta con el adoranza na santuario del Dios, el todo adulto Judio hombre necesita paga media siclo (dos dracma). Del primer siglo, aquel impuesto ya usa para mentena y para na maga sacrificio na templo que ya construi si Herodes. El cuanto maga Judio ya pregunta con Pedro si ta paga ba si Jesus con ese impuesto y el Cristo ya habla que gendeh malo paga con ese. Gane, ya habla le con Pedro que busca sencillo para paga con ese.—Mat. 17:24-27.

El maga siervo del Dios de antes ta necesita tambien paga diez por ciento del diila maga cosecha o na diila incuntrada. (Lev. 27:30-32; Num. 18:26-28) El maga religioso lider ya insisti que necesita gayot el maga gente paga con ese impuesto na cada gulay, maskin na “menta, anis, pati kalingga.” Nuay habla si Jesus que malo paga diez por ciento pero ya condena le con el custumbre del maga escriba y Fariseo.—Mat. 23:23.

Pero aquel tiempo, ta necesita tambien el maga Judio paga manada impuesto na maga Romano quien ta rula kanila. Por ejemplo, el maga dueño del tierra necesita paga impuesto por medio de sen o maga producto. Asegun pa, necesita sila paga 20 hasta 25 por ciento. Tiene tambien tributo que necesita paga el maga Judio. Amo se el impuesto que ya pregunta el maga Fariseo con Jesus. Ya dale le mira si cosa debe el diaton mirada na pagada del impuesto cuando ya habla le: “Devolve con Cesar el maga cosa-cosa de Cesar y devolve tamen con Dios el maga cosa-cosa de Dios.”—Mat. 22:15-22.

Ta necesita tambien sila paga tarifa si tiene entra o sale maga producto. Ta colecta con ese maga impuesto na maga pantalan, puente, crossing o entrada del pueblo o tianggue.

Bien pesao para na maga gente el todo impuesto que debe sila paga bajo na rulanza del maga Romano. Asegun con el un Romano historian que si Tacitus, durante el rulanza de Emperador Tiberio cuando taqui si Jesus na tierra, “el maga de Siria y Judea ya pidi que menora el impuesto cay ya queda este pesao para kanila.”

Ya queda mas pesao el pagada del impuesto por causa na manera del colectada de este. El quien ta colecta con ese amo el persona quien ya ofrece mas manada sen para hace con ese trabajo. Ese persona ta hace ganancia na maga impuesto. Y el otro con quien tambien le ya trata para colecta, ta hace tambien ganancia. Ta sale que si Zaqueo tiene ansina maga colector. (Luc. 19:1, 2) Poreso, el maga gente no quierre con el cosa sila ta hace y rabiao con aquellos ta colecta impuesto kanila.