1. Cosa miedo tiene el cuanto?

 PENSA acerca con este maga circumstancia que el cuanto maga Testigo de Jehova ya experiencia. Si Nestor y de suyu mujer que si María quierre sirvi onde tiene grande necesidad. * Pero para puede se hace, necesita sila hace simple con el diila vida. Pero, ya tiene sila miedo que baka gendeh gayot sila queda deverasan alegre si nuay sila tanto sen. Cuando si Biniam ya queda uno del maga Testigo de Jehova na un nacion donde tan contra con el diaton trabajo, ele ya realiza que como uno del maga siervo del Dios posible con ele persigui. Ya tiene le miedo por causa con ese. Pero mas ta tiene le miedo acerca si cosa el reaccion del de suyu familia si hay sabe sila acerca na de suyu nuevo religion. Tiene grabe clase de cancer si Valérie y tan dificil le busca doctor quien ta respeta con el de suyu creencia acerca na sangre. Ya tiene le miedo que baka muri le.

2. Porque kita necesita hace esfuerzo para enfrenta con el diaton miedo?

² Ya experiencia ba tu ansina clase de miedo? Manada kanaton el ya puede ya. Si gendeh kita aprende controla con el diaton maga miedo, posible hace kita maga mal decision que puede pa gane tene negativo efecto na diaton relacion con Jehova. Amo se el cosa quierre si Satanas. Ta pricura tambien le usa con el diaton miedo para desobedece kita con el maga ley de Jehova, incluido el mandamiento que predica con el buen noticia. (Rev. 12:17) Malo, nuay lastima y poderoso si Satanas. Pero, puede tu protege con el de tuyu mismo cuerpo contra con ele. Paquemodo?

3. Cosa puede ayuda kanaton para enfrenta con el diaton miedo?

³ Si convincido kita que si Jehova ta ama y pirmi ta suporta  kanaton, gendeh puede hace miedo kanaton si Satanas. (Sal. 118:6) Por ejemplo, el escritor del Salmo 118 ya enfrenta maga bien grabe problema. Ya tiene le manada contrario, incluido el cuanto maga prominente gente (versiculo 9, 10). Na cuanto ocasion, ya experiencia le grabe lingasa (versiculo 13). Y ya ricibi le pesao disciplina estaba con Jehova (versiculo 18). Maskin pa ansina, el salmista ya puede canta: “Gendeh yo tene miedo.” Porque le ya sinti protegido? Sabe le que maskin ya disciplina con ele si Jehova, el de suyu Tata na cielo ta ama gayot con ele. Convincido el salmista que maskin cosa man le situacion ta experiencia, el de suyu amable Dios pirmi preparao ayuda con ele.​—Sal. 118:29.

4. Si convincido kita que ta ama kanaton el Dios, cosa maga miedo kita puede enfrenta?

⁴ Necesita kita queda convincido que ta ama kanaton si Jehova como individual. Si tiene kita ese clase de conviccion, este hay ayuda kanaton para enfrenta con el tres comon miedo: (1) miedo que baka gendeh puede dale el necesidad del diaton familia, (2) miedo na gente y (3) miedo na muerte. El maga individual que ya menciona na primer parapo ya puede enfrenta con el diila maga miedo cay convincido sila que ta ama kanila el Dios.

5. Cosa maga situacion posible causa lingasa na un cabeza del familia? (Mira con el letrato na cover.)

⁵ El un Cristiano cabeza del familia ta pricura cumpli el responsibilidad que dale el material necesidad del de suyu familia. (1 Tim. 5:8) Si etu un cabeza del familia, posible durante del pandemic, tan lingasa tu que baka hay perde el de tuyu trabajo. Posible, ta pensa tu que baka gendeh tu puede dale comida o un lugar onde esta para na de tuyu familia. Posible ta tiene tambien tu miedo que si perde el de tuyu trabajo, baka gendeh tu puede incuntra otro trabajo. O igual con kanda Nestor y María que ya menciona enante, posible tan alang-alang tu hace cambio na de tuyu secular trabajo que hay afecta con el de tuyu vida. Si Satanas ya puede hace descanza con el manada gente que sirvi con Jehova cay tiene sila ansina clase de miedo.

6. Cosa ta pricura manda creé kanaton si Satanas?

⁶ Ta pricura manda creé kanaton si Satanas que gendeh kanaton ta ama si Jehova como individual y que gendeh le ayuda kanaton para cuida con el diaton familia. Como resulta, posible kita pensa que debe kita hace el todo para puede kita esta na diaton trabajo. Posible pa gane kita ignora maga principio na Biblia.

7. Cosa ta asigura kanaton si Jesus?

⁷ Si Jesus, quien conoce gayot con el Tata contra con maskin quien, ta asigura kanaton que el diaton Dios “sabe ya el cosa [kita] ta necesita antes de pidi [kita] con Ele.” (Mat. 6:8) Y sabe si Jesus que preparao si Jehova dale el diaton maga necesidad. Como maga Cristiano, miembro kita na familia del Dios. Puede kita asigura que como Cabeza del familia, si Jehova hay sigui con el principio que ya dale le na 1 Timoteo 5:8.

8. (a) Cosa el puede ayuda kanaton para enfrenta con el miedo que baka gendeh kita puede dale el necesidad del diaton familia? (Mateo 6:31-33) (b) Paquemodo kita puede imita con el un maridable na letrato quien ta lleva comida con el un hermana?

⁸ Si convincido kita que ta ama kanaton si Jehova y que ta ama le con el diaton familia, puede kita asigura que hay tene kita el maga cosas que necesita kita. (Le con el Mateo 6:31-33.) Quierre dale kanaton si Jehova el diaton necesidad y deverasan gayot le amable y bondadoso! Cuando ya crea le con el tierra, nuay lang le basta dale kanaton el maga cosas  que necesita kita para vivi. Ya llena tambien le con el tierra de maga cosas que puede kanaton dale grande alegria. (Gen. 2:9) Maskin tiene vez exacto lang el cosa kita tiene na cosa kita necesita, debe kita acorda que nuay kita falta cay ta dale si Jehova el diaton necesidad. (Mat. 6:11) Debe kita pirmi acorda que maskin cosa pa el sacrificio que ta hace kita ahora, el diaton amable Dios hay dale kanaton mas pa que con ese​—ahora y na futuro. Amo se el cosa ya realiza si Nestor y María.​—Isa. 65:21, 22.

9. Cosa tu ya aprende na ejemplo de Nestor y María?

⁹ Tiene comfortable vida si Nestor y María na Colombia. “Ya pensa kame que hace simple con el diamon vida y hace pa mas na ministerio,” sila ya habla, “pero tiene kame miedo que baka gendeh kame queda alegre si nuay kame tanto sen.” Cosa ya ayuda kanila para enfrenta con el diila miedo? Ya pensa sila acerca el manada manera que ya dale mira si Jehova el de suyu amor kanila. Cay ya queda sila convincido que pirmi le cuida kanila, ya deja sila con el diila maga trabajo que tiene grande sueldo. Ya vende sila con el diila casa y ya cambia na un lugar na diila nacion donde tiene mas grande necesidad de maga predicador. Cosa sila ya sinti na decision que ya hace sila? Si Nestor ya habla: “Ya puede kame mira que deverasan el Mateo 6:33. Nuay gayot kame falta na financial y mas alegre ya el diamon vida ahora.”

10. Porque gendeh maka-estraña que el maga gente ta tiene miedo con uno y otro?

¹⁰ Desde antes, el maga gente ta causa ya peligro con uno y otro. (Ecl. 8:9) Por ejemplo, el maga gente ta usa con el diila autoridad na gendeh justo manera, el maga criminal ta comete violencia, el maga estudiante ta insulta y ta hace miedo con el diila maga classmate, y gane el cuanto ta maltrata con el maga miembro del diila familia. Poreso, gendeh maka-estraña que el maga gente ta tiene miedo con otro maga gente! Paquemodo si Satanas ta usa con este miedo contra kanaton?

11-12. Paquemodo si Satanas ta usa con el miedo na gente?

¹¹ Ta usa si Satanas con el miedo na gente para causa kanaton para man compromiso y descanza predica. Bajo na influencia de Satanas, el maga gobierno ya prohibi con el diaton trabajo y ya persigui kanaton. (Luc. 21:12;  Rev. 2:10) Na mundo de Satanas, manada gente el ta hace calayat maga falso informacion y imbusterias acerca na maga Testigo de Jehova. Aquellos quien ta creé con ese maga imbusterias posible gangguia kanaton o hace pa gane kanaton sinti duele. (Mat. 10:36) Nuevo ba para kanaton este maga tactica de Satanas? Gendeh. Ya usa ya le este del primer siglo.​—Act. 5:27, 28, 40.

¹² Gendeh lang el miedo na oposicion de gobierno el ta usa si Satanas. Para na cuanto, mas tiene sila miedo na reaccion del diila familia na verdad contra na abuso na fisical. Ta ama gayot sila con el diila maga pariente y quierre que conoce sila y ama con Jehova. Ta sinti sila triste si ta oi sila con el diila maga pariente que ta habla mal cosas acerca na verdadero Dios y na de suyu maga siervo. Pero, tiene maga pariente quien yan contra del una el ya guinda na verdad. Pero paquemodo si ya desconoce kanaton el diaton familia por causa na diaton nuevo creencia? Cosa kita hace?

13. Si convincido kita na amor del Dios, paquemodo se puede ayuda si tan contra kanaton el diaton familia? (Salmo 27:10)

¹³ Puede kanaton dale comforta el maga palabra na Salmo 27:10. (Le.) Si acorda kita si paquemodo de grande el amor de Jehova kanaton, gendeh kita hay tene miedo maskin man contra kanaton el diaton familia. Tiene kita confianza que hay premia le kanaton si aguanta kita. Compara con maskin quien, mas puede dale si Jehova el diaton fisical, emocional y espiritual necesidad. Amo se el cosa ya experiencia si Biniam que ya menciona enante.

14. Cosa tu ya aprende na ejemplo de Biniam?

¹⁴ Ya queda un Testigo de Jehova si Biniam maskin sabe le que posible le enfrenta grabe persecucion. Considera si paquemodo le ya puede enfrenta con el miedo na gente cay sabe le que ta ama con ele si Jehova. “El persecucion mas grabe pa na cosa yo ya imagina,” ele ya habla. “Pero, mas ta tiene yo miedo na oposicion del de mio familia contra na persecucion del gobierno. Ya tiene yo miedo que baka por causa cay ya queda yo uno del maga Testigo de Jehova, hay queda triste el de mio tata que gendeh Testigo y queda desmayao el de mio familia.” Pero, convincido si Biniam que pirmi ta cuida si Jehova con aquellos con quien Le ta ama. Si Biniam ya habla: “Ya medita yo si paquemodo si Jehova ya ayuda con otro para enfrenta con el maga problema na  financial, injusticia y violencia. Sabe yo que si esta yo fiel con Jehova, hay bendici le conmigo. Cuando ya arresta conmigo manada beses y yan torture, ya experiencia yo mismo que pirmi ayuda kanaton si Jehova si esta kita fiel con ele.” Si Jehova ya queda deverasan Tata con Biniam y el De Suyu maga siervo ya queda de suyu deverasan familia.

15. Porque normal lang que tiene kita miedo na muerte?

¹⁵ El Biblia ta dale mira que el muerte amo un enemigo. (1 Cor. 15:25, 26) Posible tan lingasa kita si ta pensa acerca na muerte, especialmente si bien enfermo kita o el diaton familia o amigo. Porque kita ta tiene miedo na muerte? Cay ya crea kanaton si Jehova que tiene el deseo que vivi hasta para cuando. (Ecl. 3:11) Pero, el miedo na muerte puede ayuda kanaton para protege con el diaton vida. Por ejemplo, puede este motiva kanaton para hace maga buen decision acerca na diaton comida y ejercicio, para anda na doctor y toma medicina si necesita, y para evita que pone con el diaton vida na peligro.

16. Paquemodo si Satanas ta usa con el diaton miedo na muerte?

¹⁶ Sabe si Satanas que precioso kanaton el diaton vida. Pero, ta clama le que hay sacrificia kita con el maskin cosa kita tiene​—incluido el diaton amistad con Jehova—​para lang preserva con el diaton vida. (Job 2:4, 5) Gendeh gayot justo si Satanas! Pero ciendo ele el “quien tiene poder sobre con el muerte,” ta pricura si Satanas usa con el diaton miedo na muerte para causa kanaton que abandona con Jehova. (Heb. 2:14, 15) Tiene vez, ta usa si Satanas con otro para amenaza mata con el maga siervo de Jehova si gendeh sila deja con el diila creencia. O si na peligro el diaton vida, posible usa si Satanas con ese situacion para causa kanaton que man compromiso. El maga doctor o familia que gendeh Testigo posible man pressure kanaton para acepta abonada de sangre, maskin pa ta viola se con el ley del Dios. O el cuanto posible convinci kanaton que acepta un curada que contra na maga principio na Biblia.

17. Base na Roma 8:37-39, porque kita gendeh necesita tene miedo na muerte?

¹⁷ No quierre kita muri pero sabe kita que ama siempre kanaton si Jehova maskin sucede man se. (Le con el Roma 8:37-39.) Si ta muri el maga amigo de Jehova, ta esta sila na de suyu memoria que dol vivo siempre sila. (Luc. 20:37, 38) Bien quierre le que hace vivi kanila otravez. (Job 14:15) Grande el cosa ya sacrificia si Jehova para kita “ay tene Vida hasta para cuando.” (Juan 3:16) Sabe kita que ta ama gayot kanaton si Jehova. Poreso en vez de abandona con Jehova si enfermo kita o na peligro el diaton vida, ta confia kita que hay dale le kanaton comforta, sabeduria y fuerza. Amo se el cosa ya hace si Valérie y el de suyu marido.​—Sal. 41:3.

18. Cosa tu ya aprende na ejemplo de Valérie?

¹⁸ Cuando 35 año le, ya puede sabe que tiene si Valérie un grabe clase de cancer. Considera si paquemodo el amor ya puede ayuda con ele para enfrenta con el miedo na muerte. Ele ya habla: “Cuando ya sabe yo que tiene yo cancer, ya cambia gayot el diamon vida. Necesita conmigo opera. Ya consulta yo na manada doctor pero todo sila no quierre hace con el operacion si gendeh abona sangre. Ya tiene yo miedo. Pero por causa na ley del Dios, sabe yo que gendeh yo acepta abonada de sangre. Na de mio entero vida, ya dale mira si Jehova que ta ama gayot le conmigo. Ahora, tiene yo oportunidad para dale mira el de mio amor con ele. Cada vez ta ricibi yo mal noticia estaba  na maga doctor, mas ta queda yo determinao que hace alegre con Jehova y gendeh deja que ganá si Satanas. Na uliji, ya puede conmigo opera que nuay abona sangre. Maskin tiene siempre yo problema na salud, pirmi ta dale si Jehova el cosa kame necesita. Por ejemplo, na diamon miting na congregacion antes yo puede sabe acerca el de mio enfermedad, ya considera kame con el articulo ‘Meeting Today’s Adversities With Courage.’ * Este articulo ya puede gayot dale kanamon comforta. Manada beses kame con este ya le. El maga articulo que igual con este y el buen espiritual rutina ya puede ayuda kanamon del de mio marido para tene paz na pensamiento, esta balance y hace maga buen decision.”

19. Cosa el cerca ya sucede?

¹⁹ Na ayuda de Jehova, el maga Cristiano na entero mundo ta puede enfrenta con el maga dificil situacion y ta resisti con el Diablo. (1 Ped. 5:8, 9) Puede tambien tu se hace. Gendeh dura, si Jehova hay manda con Jesus y con aquellos quien rula junto con ele que “destroza el maga trabajo del demonio.” (1 Juan 3:8) Despues se sucede, el maga siervo del Dios na tierra “gendeh [mas] . . . tene miedo na maskin cosa.” (Isa. 54:14; Miq. 4:4) Pero mientras tanto, necesita kita hace esfuerzo para enfrenta con el diaton maga miedo.

20. Cosa puede ayuda kanaton para enfrenta con el diaton maga miedo?

²⁰ Debe kita continua hace fuerte con el diaton confianza que ta ama y ta protege si Jehova con el de suyu maga siervo. Puede se kita hace si medita kita y man cuento con otro acerca si paquemodo si Jehova ya protege con el de suyu maga siervo de antes. Puede tambien kita hace acorda con el diaton mismo cuerpo si paquemodo si Jehova personal kanaton ya ayuda para enfrenta con el maga dificil situacion. Na ayuda de Jehova, puede kita enfrenta con el diaton maga miedo!​—Sal. 34:4.