1. (a) Cosa esperanza ya dale kanaton si Jehova? (b) Cosa quierre decir que “esperanza con Jehova”? (Mira con el “Si Cosa Quierre Decir.”)

 YA DALE si Jehova un bonito esperanza con aquellos quien ta ama con ele. Gendeh dura, hay termina le con el enfermedad, tristeza y muerte. (Rev. 21:3, 4) Hay ayuda le con “el maga sumiso” quien ta esperanza que hace le paraiso con el tierra. (Sal. 37:9-11) Y hace le posible que el cada uno kanaton hay tene un personal relacion con ele que mas pa na cosa kita tiene ahora. Que bien bonito ese esperanza! Pero, porque kita puede creé que hay cumpli el maga promesa del Dios? Pirmi ta cumpli si Jehova con el de suyu promesa. Poreso, tiene kita buen razon para “esperanza con Jehova.” * (Sal. 27:14) Ta dale se kita mira si ta espera kita con paciencia y con alegria que cumpli el diaton Dios con el de suyu proposito.​—Isa. 55:10, 11.

2. Cosa ya si Jehova ya hace?

² Ya dale ya prueba si Jehova que ta cumpli le con el de suyu maga promesa. Considera con el un bonito ejemplo. Na libro de Revelacion, ya promete si Jehova que na diaton tiempo, hay hace le junto con el maga gente de diferente nacion, tribo y lengguaje, y queda sila unido na verdadero adoranza. Ahora, conocido con este grupo de maga gente como el “grande grupo.” (Rev. 7:9, 10, NWT) Maskin pa diferente el diila  edad, raza, lengguaje y background, tiene sila paz y unidad como un familia. (Sal. 133:1; Juan 10:16) Puera con ese, activo tambien sila ta predica. Pirmi sila preparao converza acerca el diila esperanza con aquellos quien quierre oi kanila. (Mat. 28:19, 20; Rev. 14:6, 7; 22:17) Si parte tu del grande grupo, asigurao que ese esperanza bien precioso contigo.

3. Cosa quierre si Satanas?

³ Quierre el Diablo que perde el de tuyu esperanza. Quierre le que pensa tu que nuay queber contigo si Jehova y gendeh Le cumpli con el de suyu maga promesa. Si puede se hace si Satanas, hay perde el diaton coraje y gane, baka descanza kita sirvi con Jehova. Como cosa kita hay aprende, ya hace manera el Diablo para perde el esperanza de Job y descanza le sirvi con Jehova.

4. Cosa kita hay considera na este articulo? (Job 1:9-12)

⁴ Na este articulo, hay examina kita con el maga manera que ya usa si Satanas para causa que hace quebra si Job con el de suyu integridad. (Le con el Job 1:9-12.) Hay discuti tambien kita si cosa kita puede aprende na ejemplo de Job y si porque kita necesita acorda que ta ama kanaton el Dios y hay cumpli Le con el de suyu maga promesa.

5-6. Cosa ya sucede con Job?

⁵ Enbuenamente el vida de Job. Tiene le buen amistad con Jehova. Tiene le un grande y alegre familia, y bien rico ele. (Job 1:1-5) Pero na un dia lang, ya perde halos el todo cosa con Job. Una, ya perde el de suyu riqueza. (Job 1:13-17) Despues, ya muri el todo de suyu maga anak. Pensa con aquel tragedia. Duele para na mayores si muri el uno na diila maga anak. Poreso, imagina si paquemodo de duele con Job y con el de suyu mujer cuando ya sabe sila que ya muri el todo diez diila maga anak. Poreso, gendeh maka-estraña que ya hace rompe si Job con el de suyu ropa y ya hinca!​—Job 1:18-20.

⁶ Despues, ya ataca si Satanas con el salud de Job y ya hace perde con el de suyu dignidad. (Job 2:6-8; 7:5) Del una, ta respeta gayot el maga gente con Job na diila comunidad. Ta anda sila con ele para pidi guia. (Job 31:18) Pero ahora, ta evita sila con ele. No quierre mas con ele el de suyu maga hermano, maga amigo y maskin el de suyu maga ayudante!​—Job 19:13, 14, 16.

7. (a) Para con Job, cosa el razon del de suyu sufrimiento pero cosa le nuay hace? (b) Paquemodo el un Cristiano posible enfrenta probanza que semejante na cosa puede mira na letrato?

⁷ Quierre si Satanas que pensa si Job que ta sufri le cay nuay mas le el favor de Jehova. Por ejemplo, ya usa si Satanas un fuerte viento para destroza con el casa donde ta come junto el diez anak de Job. (Job 1:18, 19) Ya hace tambien le cae fuego estaba na cielo para mata con el maga animal de Job y con aquellos quien ta cuida con ese. (Job 1:16) Ciendo el viento y fuego ya sale na cielo, ya pensa si Job que estaba se con Dios Jehova. Como resulta, ya creé si Job que tiene le cosa ya hace que nuay gusta si Jehova. Maskin pa ansina, nuay maldici si Job con el de suyu Tata na cielo. Nuay le ulvida que manada le buen cosas ya ricibi estaba con Jehova adentro de manada año. Poreso, ya pensa le que debe preparao le ricibi gendeh lang con el bueno sino con el malo tambien. Ele ya habla: “Continua alaba el nombre de Jehova.” (Job 1:20, 21; 2:10) Hasta na ese punto, ya puede enfrenta si Job con ese maga grabe probanza na financial, emocional y na fisical. Pero, gendeh lang ese el cosa quierre hace si Satanas.

8. Cosa sunod ya hace si Satanas con Job?

 ⁸ Tiene pa otro manera que ya usa si Satanas con Job. Ya influencia le con el tres falso amigo de Job para manda con ele sinti que nuay le valor. Este maga hombre ya clama que ta sufri si Job cay manada le mal cosas ya hace. (Job 22:5-9) Ya pricura tambien sila convinci con ele que maskin paquemodo de manada el buen cosas que ya hace le, nuay valor con Dios el de suyu maga esfuerzo. (Job 4:18; 22:2, 3; 25:4) Vene cae, ta pricura sila hace manera para man duda si Job que ta ama con ele el Dios, que ta cuida Le con ele y que importante con Dios el de suyu servicio. El cosa sila ya habla posible ya manda sinti con Job que dol nuay mas esperanza el de suyu situacion.

9. Cosa ya ayuda con Job para tene coraje y fuerza?

⁹ Imagina con el ecsena. Mientras ta sinta na ceniza, ta sufri si Job na dolor. (Job 2:8) El de suyu maga falso amigo ta continua acusa con ele y ta pricura hace malo con el de suyu reputacion. Ta sinti le el pesades del probanza que ta enfrenta le mientras dolorido le cay ya muri el de suyu maga anak. Del primero, silencio si Job. (Job 2:13–3:1) Si ta pensa el maga falso amigo de Job que hay deja le con Jehova, alli sila yan kamali. Na un ocasion, si Job​—posible mientras ta mira con el de suyu maga falso amigo—​ya habla: “Hasta hay muri yo, gendeh yo hace perde el de mio integridad!” (Job 27:5) Cosa ya ayuda con Job para tene coraje y fuerza maskin pa na de suyu maga sufrimiento? Nuay perde el de suyu esperanza que el de suyu amable Dios hay ayuda con ele. Sabe le que si muri le, hay resucita con ele si Jehova.​—Job 14:13-15.

10. Cosa kanaton ta enseña el istoria acerca con Job?

¹⁰ El istoria acerca con Job ta enseña kanaton que si Satanas gendeh puede forza kanaton  para abandona con Jehova y que sabe si Jehova el todo situacion. El experiencia de Job puede tambien ayuda kanaton para mas entende si cosa el envuelto si ta enfrenta kita maga probanza. Considera con el cuanto maga especifico leccion que puede kita aprende con Job.

11. Si continua kita confia con Jehova, cosa kita puede asigura? (Santiago 4:7)

¹¹ Ya dale prueba si Job que si continua kita confia con Jehova, puede kita aguanta con el maskin cosa probanza y resisti con Satanas. Y cosa el resulta? El Escritura ta asigura kanaton que el Diablo hay desaleja kanaton.​—Le con el Santiago 4:7.

12. Paquemodo el esperanza de resureccion ya hace fuerte con Job?

¹² Necesita kita tene fuerte fe na esperanza de resureccion. Como cosa ya menciona del ya pasa articulo, ta usa si Satanas con el miedo na muerte para causa kanaton que hace quebra con el diaton integridad. Na situacion de Job, ya clama si Satanas que hace si Job el todo​—maskin descanza le sirvi con Jehova—​para lang salva con el de suyu vida. Pero, mali si Satanas. Maskin pa ta pensa si Job que hay muri le, nuay le man compromiso. El de suyu confianza na pagka-bueno de Jehova y el de suyu fuerte esperanza que tiene cosa hace si Jehova na de suyu situacion ya ayuda con ele para aguanta. Tiene fe si Job que si gendeh man con ele ayuda si Jehova mientras vivo le, el Dios hay resucita con ele na futuro. Para con Job, deverasan gayot el resureccion. Si deverasan tambien se esperanza para kanaton, maskin el muerte gendeh puede causa kanaton para hace quebra con el diaton integridad.

13. Porque kita necesita vicia con el maga manera que ya usa si Satanas con Job?

¹³ Necesita kita vicia con el maga manera que ya usa si Satanas con Job cay ese mismo el cosa le ta usa kanaton ahora. Nota con el acusacion de Satanas: “Hay dale el un gente [gendeh lang si Job] todo cosa que tiene le para na de suyu vida.” (Job 2:4, 5) Vene cae, ta clama si Satanas que gendeh kita deverasan ta ama con Dios Jehova y si guinda na peligro el diaton vida, hay abandona kita con Ele. Mas pa, ta clama si Satanas que gendeh kanaton ta ama el Dios y gendeh Le ta nota con el diaton maga esfuerzo para sirvi con Ele. Ciendo sabe kita si cosa si Satanas ta pricura hace, gendeh kita ta creé con el de suyu maga imbusterias.

14. Cosa el maga probanza puede revela acerca kanaton? Ilustra.

¹⁴ Debe kita mira con el maga probanza como oportunidad para conoce pa kita mas con el diaton mismo cuerpo. El maga probanza que ya enfrenta si Job ya ayuda con ele para mira si cosa el de suyu maga mal inclinacion y corecta con ese. Por ejemplo, ya aprende le que necesita pa le queda mas humilde. (Job 42:3) Puede tambien kita conoce mas con el diaton mismo cuerpo si bajo kita na probanza. El un hermano que si Nikolay, * con quien ya pone na preso maskin pa tiene ele grabe enfermedad, ya habla: “El preso igual na un X-ray. Puede se dale mira si cosa el adentro​—el deverasan personalidad—​del un Cristiano.” Si ya puede kita mira si cosa el diaton mal inclinacion, puede kita hace esfuerzo para corecta con ese.

15. Con quien kita debe oi y porque?

¹⁵ Necesita kita oi con Jehova y gendeh con el diaton maga enemigo. Cuando ta converza si Jehova con Job, ya oi le enbuenamente. Ya usa el Dios maga pregunta para ayuda con Job mira que ta ama Le con ele. Dol ta habla Le: ‘Gendeh ba tu ta puede mira con el de mio  poder por medio na de mio creacion? Sabe yo el todo cosa que ya sucede contigo. Ta mira tu, gendeh yo puede ayuda contigo?’ Como resulta, ya contesta si Job con humildad y hondo apresacion na pagka-bueno de Jehova. Ya habla le: “El de mio maga orejas ya puede oi acerca contigo, pero ahora, el de mio maga ojos ta puede mira contigo.” (Job 42:5) Cuando ya habla le ese maga palabra, posible sintao siempre si Job na ceniza, el de suyu cuerpo lleno de irida y dolorido siempre le cay ya muri el de suyu maga anak. Maskin pa ansina, ya asigura si Jehova que ta ama Le con Job y tiene le el De Suyu favor.​—Job 42:7, 8.

16. Asegun na Isaias 49:15, 16, cosa kita debe pone na diaton pensamiento si ta enfrenta maga probanza?

¹⁶ El maga gente tambien ahora posible insulta kanaton y trata kanaton que dol nuay kita valor. Baka hay pricura sila destroza con el diaton reputacion o del organizacion y “habla todo clase de chismis contra” kanaton. (Mat. 5:11) Ya aprende kita na istoria de Job que ta confia si Jehova que hay esta kita leal con ele maskin tiene maga probanza. Ta ama kanaton si Jehova y nunca le abandona con aquellos quien ta esperanza con ele. (Le con el Isaias 49:15, 16.) No pone atencion con el maga imbusterias que ta habla el maga enemigo del Dios! Si James, un hermano de Turkey que el familia ya enfrenta grabe probanza, ya habla: “Ya realiza kame que si oi kame con el maga imbusterias que ta habla el otro acerca na maga siervo del Dios, hay man luya kame. Poreso, yan focus kame na diamon esperanza y ya esta activo na servicio con Jehova.  Como resulta, ya puede kame esta alegre.” Igual con Job, oi con Jehova! El maga imbusterias que ta habla el diaton maga enemigo nunca puede destroza con el diaton esperanza.

17. Cosa tu ya puede aprende na ejemplo del maga fiel hombre y mujer que ya menciona na Maga Hebreo 11?

¹⁷ Uno lang si Job na maga siervo de Jehova quien ya continua tene coraje y fuerza maskin tiene maga grabe probanza. Na carta de apostol Pablo para na maga Hebreo, ya menciona le con el manada pa otro y ya llama le kanila como “bien manada . . . maga testigo.” (Heb. 12:1) Todo sila ya experiencia grabe probanza pero ya puede sila esta fiel con Jehova. (Heb. 11:36-40) Yan sayang ba el cosa sila ya hace? Nuay gayot! Maskin pa nuay sila puede mira el cumplimiento del todo promesa del Dios cuando vivo sila, ya continua sila esperanza con Jehova. Y ciendo asigurao sila que tiene sila el favor de Jehova, tiene sila confianza que puede sila mira con el cumplimiento del de suyu maga promesa. (Heb. 11:4, 5) El diila ejemplo puede hace fuerte con el diaton determinacion que continua esperanza con Jehova.

18. Cosa tu determinao hace? (Maga Hebreo 11:6)

¹⁸ Ta vivi kita ahora na un mundo que donde mas ta queda grabe el situacion. (2 Tim. 3:13) Ta continua siempre si Satanas pone na probanza con el maga siervo del Dios. Maskin cosa man probanza que posible kita enfrenta na futuro, ojala queda kita determinao continua sirvi con Jehova y no man lingasa “cay ya pone kita el diaton confianza con el Dios vivo.” (1 Tim. 4:10) Acorda que el bendicion que ya dale el Dios con Job ta dale prueba que “lastimoso . . . el Señor [Jehova].” (Sant. 5:11) Ojala hay esta tambien kita leal con Jehova y no man duda que hay premia le “con aquellos quien ta busca con Ele.”​—Le con el Maga Hebreo 11:6.