ARTICULO 24
Nuay Igual con Jehova si Ta Perdona
“Etu, O Jehova, bueno y preparao para perdona; abundancia tu de amor leal para con todo quien ta llama contigo.”—SAL. 86:5.
CANCION 42 The Prayer of God’s Servant
PREVIEW *
1. Cosa ta enseña kanaton si Rey Solomon na Eclesiastes 7:20?
SI Rey Solomon ya escribi: “Nuay maskin un recto gente na tierra el pirmi ta hace bueno y gendeh ta comete pecado.” (Ecl. 7:20) Bien deverasan gayot se! Todo kita pecador. (1 Juan 1:8) Poreso, necesita kita el perdon estaba con Dios y con otro maga gente.
2. Cosa tu ya sinti cuando ya perdona contigo el de tuyu cerca amigo?
2 Asigurao, ta acorda tu el tiempo cuando ya puede tu ofende con el de tuyu cerca amigo. Quierre tu queda de suyu amigo otravez poreso sincero tu ya pidi despensa con ele. Cosa tu ya sinti cuando ya perdona le contigo? Aliviao? Si y alegre tambien!
3. Cosa kita hay discuti na este articulo?
3 Quierre kita que queda diaton de con todo cerca Amigo si Jehova pero tiene vez, ta puede kita habla o hace cosas que ta ofende con ele. Pero, porque kita puede asigura que quierre perdona kanaton si Jehova? Cosa el diferencia si ta perdona si Jehova con el un persona y si ta perdona kita? Y uliji, quien puede ricibi el perdon del Dios?
PREPARAO PERDONA SI JEHOVA
4. Porque kita puede asigura que preparao perdona si Jehova?
4 El Palabra del Dios ta asigura kanaton que preparao perdona si Jehova. Cuando ya revela si Jehova con el de suyu mismo cuerpo con Moises na Monte de Sinai, ya imbia Le un angel para habla: “Jehova, Jehova, un Dios lastimoso y tiene compasion, gendeh pronto rabia y abundancia de amor leal y verdad, quien ta dale mira amor leal con el miles de maga gente, ta perdona con el kamali, culpa y pecado.” (Ex. 34:6, 7) Un bueno y lastimoso Dios si Jehova quien pirmi preparao perdona con el maga pecador quien ya arripinti.—Neh. 9:17; Sal. 86:15.
Sabe si Jehova el todo cosa que ya sucede kanaton que ya hace kanaton si quien kita ahora (Mira con el parapo 5)
5. Asegun na Salmo 103:13, 14, cosa ta hace si Jehova cay conoce gayot le con el maga gente?
5 Como diaton Creador, si Jehova sabe el todo cosas acerca kanaton. Pensa este: Sabe le el todo detalle acerca na cada persona na este tierra. (Sal. 139:15-17) Poreso, ta puede le mira el todo maga imperfeccion que ya hereda kita na diaton maga mayores. Mas pa, sabe tambien le si cosa ya sucede na diaton vida que ya hace kanaton si cosa clase de gente kita ahora. Cosa ta hace si Jehova cay conoce gayot le kanaton? Ta manda este move con ele para dale mira lastima kanaton.—Sal. 78:39; le con el Salmo 103:13, 14.
6. Paquemodo ya dale prueba si Jehova que quierre gayot le perdona kanaton?
6 Ya dale prueba si Jehova que quierre gayot le perdona kanaton. Sabe le que por causa na maga accion del primer hombre, si Adan, todo kita ya queda bajo na pecado y muerte. (Roma 5:12) Nuay maskin cosa que puede libra kanaton o con el otro persona na pecado y muerte. (Sal. 49:7-9) Pero, el diaton amable Dios ya dale mira compasion y ya hace manera para puede kita queda librao. Cosa le ya hace? Como cosa ya revela na Juan 3:16, si Jehova ya imbia con el de suyu unico Anak para muri para kanaton. (Mat. 20:28; Roma 5:19) Ya ricibi si Jesus el castigo de muerte—que conviene era para kanaton—para libra con maskin quien ta demonstra fe con ele. (Heb. 2:9) Bien duele gayot para con Jehova que mira con el de suyu unico Anak que muri na duele y maka-huya manera! Asigurao, gendeh permiti si Jehova que muri el de suyu Anak si no quierre Le perdona kanaton.
7. Quien el cuanto maga ejemplo na Biblia con quien ya perdona si Jehova?
7 Na Biblia, tiene manada ejemplo del maga individual con quien ya perdona si Jehova. (Ef. 4:32) De quien ejemplo tu ta puede pensa? Posible, ta pensa tu acerca con Rey Manases. Mal gente le quien ya culpa con Jehova na grabe manera. Ya adora le maga falso dios y ya anima con otro que hace tambien se. Ya mata le con el de suyu mismo maga anak y ya ofrece kanila como maga sacrificio para na maga falso dios. Ya pone pa gane le imagen del falso dios na sagrao templo de Jehova. Acerca con ele, el Biblia ya habla: “Ya hace le maga cosas que bien malo na mirada de Jehova para manda rabia con ele.” (2 Cron. 33:2-7) Pero cuando ya dale mira si Manases que deverasan le ta arripinti, ya perdona con ele si Jehova. Gane, ya permiti el Dios que queda le rey otravez. (2 Cron. 33:12, 13) Baka ta pensa tambien tu acerca con Rey David quien ya comete maga serioso culpa contra con Jehova, igual na adulterio y matanza. Pero cuando ya admiti y sincero ya arripinti si David na de suyu culpa, ya perdona tambien con ele si Jehova. (2 Sam. 12:9, 10, 13, 14) Si, puede kita asigura que quierre gayot perdona si Jehova. Y como cosa kita puede mira, tiene diferencia si ta perdona si Jehova compara si ta perdona el maga gente.
EL MANERA SI PAQUEMODO SI JEHOVA TA PERDONA
8. Ciendo si Jehova el de con todo buen Juez, paquemodo se ta afecta con el manera si paquemodo le ta perdona?
8 Si Jehova “el Juez del entero tierra.” (Gen. 18:25) Para queda un buen juez, el un persona debe ta entende gayot con el ley. Ansina si Jehova cay puera que ele el diaton Juez, ele tambien el ta dale kanaton ley. (Isa. 33:22) Nuay quien bien sabe acerca si cosa el bueno y malo igual con Jehova. Cosa pa necesita para queda un buen juez? Necesita le considera con el todo detalle del un caso antes hace un decision. Cay sabe si Jehova el todo detalle, ele el de con todo buen Juez.
9. Cosa informacion el ta considera si Jehova si ta decidi si perdona ba con el un persona?
9 Gendeh igual na maga gente, pirmi si Jehova sabe el todo detalle acerca na maskin cosa caso. (Gen. 18:20, 21; Sal. 90:8) Gendeh le ta juzga base lang na cosa el maga gente ta puede mira o ta oi. Sabe le el maga calidad que ya hereda el un persona na de suyu mayores, si onde y paquemodo le ya engranda, y el de suyu emocion y pensamiento que posible ta influencia con el de suyu maga accion. Ta puede tambien si Jehova le con el corazon. Ta entende gayot le el maga intencion, deseo y si porque el un persona ta hace con el un cosa. Nuay kita maskin cosa que puede esconde con Jehova. (Heb. 4:13) Poreso, si ta decidi si Jehova que perdona, base se na todo informacion que sabe le acerca na situacion.
Tiene justicia si Jehova y gendeh le tan afavor. Gendeh con ele puede dale suborno (Mira con el parapo 10)
10. Porque kita puede habla que pirmi tiene justicia el maga juzgamiento de Jehova? (Deuteronomio 32:4)
10 El maga juzgamiento de Jehova pirmi tiene justicia. Nuay gayot le con quien tan afavor. Gendeh le ta perdona base na ichura, riqueza, pagka-prominente o abilidad del un persona. (1 Sam. 16:7; Sant. 2:1-4) Nuay quien puede man pressure o dale suborno con Jehova. (2 Cron. 19:7) El de suyu rabia o emocion gendeh ta influencia con el de suyu maga decision. (Ex. 34:7) Cay ta entende le el todo acerca kanaton y na diaton situacion, si Jehova el de con todo buen Juez.—Le con el Deuteronomio 32:4.
11. Porque diferente el manera si paquemodo ta perdona si Jehova contra na maga gente?
11 Aquellos quien ya escribi con el Hebreo Escritura sabe que diferente el manera si paquemodo si Jehova ta perdona contra na maga gente. Na cuanto situacion, ya usa sila con el un Hebreo palabra que asegun na un referencia “ta usa lang para refiri con el perdon del Dios na un pecador y gendeh ta usa con ese palabra para refiri con el perdon que ta extende el un persona na otro persona.” Si Jehova lang el tiene autoridad para completamente perdona con el un pecador quien ta arripinti. Cosa el resulta si ta perdona si Jehova kanaton?
12-13. (a) Cosa puede experiencia el un persona si perdona con ele si Jehova? (b) Paquemodo kanaton ta perdona si Jehova?
12 Si ta acepta kita que ya perdona kanaton si Jehova, ta “sinti libiano el [diaton] resuello.” Ta tene kita paz na pensamiento y limpio conciencia. Hay sinti lang kita se si ricibi kita el perdon que ta sale “con Dios.” (Act. 3:19, El Nuevo Testamento) Si ta perdona si Jehova kanaton, ta bira el diaton buen relacion con ele que dol nuay kita comete culpa.
13 Despues perdona kanaton si Jehova, nunca le kanaton acusa o castiga otravez por causa con ese culpa. (Isa. 43:25; Jer. 31:34) Ta pone le lejos con el diaton culpa igual “si paquemodo de lejos el subida del sol na abajada de este.” * (Sal. 103:12) Si ta pensa kita acerca si paquemodo de grande el perdon de Jehova, ta puede gayot kita aprecia con ele. (Sal. 130:4) Pero, con quien si Jehova ta perdona?
CON QUIEN SI JEHOVA TA PERDONA?
14. Cosa kita ya aprende acerca na perdon de Jehova?
14 Como cosa kita ya aprende, ta perdona si Jehova gendeh base si grande o diutay el diaton culpa. Mas pa, ya aprende kita que si ta decidi si Jehova si perdona ba le con el un persona, ta usa le con el de suyu saber como diaton Creador, el quien ta dale kanaton ley y el diaton Juez. Cosa ta considera si Jehova si ta perdona le?
15. Asegun na Lucas 12:47, 48, cosa el un cosa que ta considera si Jehova?
15 El un cosa que ta considera si Jehova amo si sabe ba el un persona que mali el cosa le ya hace. Ya hace este claro si Jesus, como cosa ta habla na Lucas 12:47, 48. (Le.) Si el un persona ya plaña hace un cosa que sabe le que gendeh aceptable con Dios y ya hace le se, ya comete le un serioso culpa. Posible que gendeh con ele perdona si Jehova. (Mar. 3:29; Juan 9:41) Pero tiene vez, sabe kita que mali el cosa kita ya hace. Puede pa ba gaha perdona kanaton? Si! Cay tiene pa otro cosa que ta considera si Jehova si ta perdona le.
Puede kita confia que perdona kanaton si Jehova si deverasan kita ta arripinti (Mira con el parapo 16-17)
16. Cosa el arripintimiento y porque este importante para perdona kanaton si Jehova?
16 El otro cosa que ta considera si Jehova amo si deverasan ba ta arripinti el un persona. Cosa quierre decir que arripinti? Este quierre decir que “cambia el persona con el de suyu pensamiento, custumbre o proposito.” Incluido aqui el idea que ta sinti gayot triste el un persona acerca na maga mal cosas que ya puede le hace o na maga justo cosas que nuay le puede hace. El un persona quien ta arripinti ta queda triste gendeh lang por causa cay ya puede le hace maga kamali. Sino, triste tambien le cay ya deja le que man luya el de suyu espiritualidad que ya causa con ele para puede hace mal cosas. Acorda que si Rey Manases y si Rey David ya comete maga serioso culpa pero ya perdona kanila si Jehova cay sincero sila ya arripinti. (1 Rey 14:8) Claro que ta perdona lang si Jehova si ta puede le mira que ta arripinti kita. Pero, gendeh bastante que sinti lang kita triste acerca na maga culpa que ya comete kita. Debe kita hace accion. * Y ese el otro pa cosa que ta considera si Jehova.
17. Cosa quierre decir del hacida de maga cambio y porque este importante si quierre kita evita repiti con el diaton maga culpa? (Isaias 55:7)
17 El otro cosa que ta considera si Jehova amo el hacida de maga cambio. Este quierre decir que el un persona debe descanza hace con el maga mal cosas y principia vivi asegun na manera que quierre si Jehova. (Le con el Isaias 55:7.) Debe le hace cambio na de suyu pensamiento y sigui na guia de Jehova. (Roma 12:2; Ef. 4:23) Debe le descanza pensa y hace maga mal cosas. (Col. 3:7-10) Siempre, el deverasan razon si porque si Jehova ta perdona kanaton y ta quita con el diaton maga culpa amo por causa na diaton fe na sacrificio del Cristo. Hay perdona kanaton si Jehova base na ese sacrificio si ta puede le mira que ta hace kita esfuerzo para cambia con el diaton conducta.—1 Juan 1:7.
CONFIA NA PERDON DE JEHOVA
18. Cosa kita ya puede aprende acerca na perdon de Jehova?
18 Man repaso kita unrato con el cuanto importante punto que ya discuti kita. Nuay quien igual con Jehova si ta perdona. Porque kita se puede habla? Una, pirmi le preparao perdona. Ika-dos, sabe le el todo acerca kanaton. Conoce gayot le kanaton y ele gayot el quien puede determina si deverasan kita ta arripinti. Y ika-tres, completamente ta perdona si Jehova que dol nuay kita comete culpa. Por causa con ese, ta puede kita tene limpio conciencia y buen relacion con ele.
19. Maskin imperfecto kita y hay continua kita culpa, porque kita puede queda alegre?
19 Siempre, mientras imperfecto kita, hay continua kita culpa. Pero, puede kita tene comforta na maga palabra na Insight on the Scriptures, Volume 2, pagina 771: “Ciendo lastimoso si Jehova y ta considera le con el pagka-mahina del de suyu maga siervo, gendeh sila necesita pirmi queda bien triste na maga kamali que ta puede sila hace por causa na imperfeccion que ya hereda sila. (Sal 103:8-14; 130:3) Si ta hace sila el todo para sigui con el maga manera del Dios, puede sila queda alegre. (Fil 4:4-6; 1Jn 3:19-22).” Puede gayot se anima kanaton!
20. Cosa kita hay considera na sunod articulo?
20 Ta rindi kita gracias cay preparao si Jehova perdona kanaton si deverasan kita ta arripinti na diaton maga culpa. Pero, paquemodo kita puede imita con el perdon de Jehova? Na cosa manera semejante el diaton perdon na perdon de Jehova pero na cosa manera este diferente? Porque importante que sabe kita ese diferencia? El sunod articulo hay contesta con ese maga pregunta.
CANCION 45 The Meditation of My Heart
^ Na de suyu Palabra, si Jehova ta asigura kanaton que preparao le perdona con el maga pecador quien ya arripinti. Pero posible, tiene vez ta sinti kita que gendeh kanaton debe perdona. Na este articulo, hay discuti kita si porque kita puede asigura que el diaton Dios pirmi preparao perdona kanaton si deverasan kita ta arripinti na maga culpa que ya hace kita.
^ Mira con el libro Draw Close to Jehovah, cap. 26, par. 9.
^ SI COSA QUIERRE DECIR: Si “ta arripinti” el un persona, quierre decir que ta cambia le con el de suyu pensamiento y ta sinti gayot triste acerca na de suyu manera de vida de antes, maga kamali que ya puede le hace o maga cosas que nuay le puede hace. Si deverasan le ta arripinti, ta hace le maga cambio.