MANADA el sabe que ya clava con Jesus na estaca entre medio na dos criminal. (Mat. 27:35-38) Pero, el cuanto gendeh ta creé que exacto el cosa ta habla el Biblia que despues le muri, ya prepara con el de suyu cuerpo y ya pone na un tumba.​—Mar. 15:42-46.

El cuanto critico del maga Evangelio ta creé que gendeh ta permiti que entera con el cuerpo del un criminal. El un journalist que si Ariel Sabar, quien ya escribi na magasin Smithsonian, ya explica si porque ansina ta creé el cuanto: “Como castigo, ta crucifica con el maga bien mal gente na sociedad y el cuanto maga experto ta habla que imposible para na maga Romano que dale mira dignidad con ese maga gente y permiti que entera kanila enbuenamente.” Quierre el maga Romano que hace huya con el maga criminal. Poreso mas mucho, ta deja sila con el maga cuerpo na estaca para come el maga animal. Despues, el cosa ya queda na cuerpo del criminal ta buta sila na un sepultura junto na otro maga muerto.

Pero, el arqueologia ta revela que otro el cosa ya hace con el cuerpo del cuanto maga Judio con quien ya mata na ansina manera. Del 1968, tiene ya incuntra maga bukuk del un hombre con quien ya mata del primer siglo. Ya puede con este incuntra na un cajon de bukuk na un tumba cerca na Jerusalem. Incluido aqui el bukuk na talon del persona. Clavao este na un palo usando el un clavo de hierro que tiene largor de 11.5 centimetro. Si Sabar ya habla: “El talon del un hombre que si Yehochanan ya dale prueba que posible justo el cosa ya habla na Evangelio que ya pone con Jesus na tumba.” Claro, “el talon de Yehochanan amo un ejemplo que ta permiti el maga Romano que entera na manera del maga Judio con el un persona con quien ya crucifica na tiempo de Jesus.”

Por causa na este bukuk na talon, ya tiene manada opinion acerca si paquemodo ya clava con Jesus na estaca. Pero, el cosa claro kita puede mira amo que ya permiti entera con el cuanto maga criminal y nuay lang basta buta na un sepultura junto na otro maga muerto. Puede gayot kita creé na cosa ta habla el Biblia que ya prepara con el cuerpo de Jesus y ya pone na un tumba. El evidencia ta dale mira que deverasan se.

Mas importante, ya predicta si Jehova que pone con Jesus na tumba del un rico gente y nuay quien ya puede sangga para cumpli ese palabra del Dios.​—Isa. 53:9; 55:11.