PARA na maga Hebreo na Tierra Prometido, ta principia el año si ta ara y ta siembra sila​—que Septiembre/Octubre na diaton tiempo ahora.

El maga gente ta determina con el largor del mes asegun na luna que tiene 29 o 30 dia el largor. Ta determina sila el largor del año por medio na sol. Pero, el año que base na luna mas corto si compara na año que tan base na sol. Poreso, necesita sila busca manera para man tupajan ese dos. Para hace se, ta omenta sila maga dia o mes, posible antes principia el sunod año. Na ese manera, el calendario hay man tupajan na tiempo de siembrada y cosecha.

Pero na tiempo de Moises, el Dios ya habla con el De Suyu maga siervo que hay principia el diila año na mes de Abib o Nisan​—que Marzo/Abril na diaton tiempo ahora. (Ex. 12:2; 13:4) Tiene fiesta ta hace na ese mes que donde envuelto el cosecha de cebada.​—Ex. 23:15, 16.

“Bien simple lang para determina si necesita ba omenta mes o gendeh,” asegun na un scholar, si Emil Schürer, na de suyu libro The History of the Jewish People in the Age of Jesus Christ, (175 B.C.–A.D. 135). “El fiesta de Pascua que ta celebra cuando entero el luna na mes de Nisan (Nisan 14) debe pirmi tupa despues el dia del spring equinox . . . Poreso, si ya puede nota na fin del año que el Pascua hay tupa antes el spring equinox, el maga Judio ta omenta [ika-13] mes antes el Nisan.”

El maga Testigo de Jehova ta usa con ese manera para determina si cuando el fecha para comemora con el Cena del Señor. Ta hace se na mes del Marzo/Abril que ta tupa na Nisan 14 na calendario del maga Hebreo. Adelantao ta informa con el maga congregacion na entero mundo acerca con ese fecha. *

Pero, paquemodo ta sabe el maga Hebreo si cuando termina el un mes y principia ya el nuevo mes? Ahora mira lang tu na calendario, puede ya tu se sabe. Pero na tiempo de Biblia, gendeh ansina de simple.

Na tiempo del Grande Avenida, el maga mes tiene largor de 30 dia. (Gen. 7:11, 24; 8:3, 4) Pero na uliji, na calendario del maga Hebreo, gendeh pijo que 30 dia el cada mes. Na ese calendario, ta principia el mes si claro ya puede mira con el nuevo luna. Ta sucede se 29 o 30 dia despues principia el ya pasa mes.

Na un ocasion, tan cuento si David y Jonatan acerca na principio del nuevo mes. Si David ya habla: “Nuevo luna mañana.” (1 Sam. 20:5, 18) Poreso, ta sale que durante el ika-11 siglo B.C.E., adelantao ya ta determina con el maga mes. Paquemodo el maga ordinario Israelita puede determina si cuando principia el nuevo mes? Tiene cuanto informacion el Mishnah que un coleccion del maga ley y tradicion del maga Judio. Asegun alli, despues bira el maga Judio estaba na Babilonia, tiene cosa ta hace el Sanhedrin (el alto corte del maga Judio). Durante el siete meses que donde ta celebra con el maga fiesta, el maga miembro de ese corte temprano tan junto na ika-30 dia del mes. Este maga hombre el quien ta determina si cuando principia el sunod mes. Cosa el diila basejan?

El maga hombre con quien ya pone na maga alto lugar alrededor del Jerusalem ta vicia si cuando abuya el nuevo luna. Si ya puede se sila mira, hay informa dayun sila na Sanhedrin. Si aquellos na corte ya mira que tiene sila bastante prueba que ya abuya ya el nuevo luna, hay anuncia sila que principia ya el nuevo mes. Pero, paquemodo si aquellos quien ta vicia gendeh claro ta puede mira si ya abuya ya el nuevo  luna por causa na celaje? Hay declara el Sanhedrin que tiene 30 dia el presente mes y principia ya el nuevo mes alamañana.

Asegun na Mishnah, para declara con el decision del Sanhedrin, ta arde sila fuego na Monte del Maga Olivo cerca na Jerusalem. Ta arde tambien fuego na otro maga alto parte del Israel para puede sabe el otro acerca con ese. Mas pa, ta imbia tambien maga mensajero. Na ese manera, hay sabe el maga Judio na Jerusalem, na entero Israel y na otro maga lugar que hay principia ya el nuevo mes. Como resulta, el todo puede celebra con el maga fiesta na igual tiempo.

Puede contigo ayuda el chart abajo para entende con el maga mes, fiesta y tiempo del Hebreo calendario.