1-2. Igual con Lot, cosa maga dificultad ta enfrenta el maga Cristiano ahora?

 SI TA mira kita con el bajo principio na moral del maga gente, ta sinti kita igual na cosa ya sinti si Lot. “Ya sufri [le] na di suyo corazon por causa del . . . maga mal gente” y diila conducta cay sabe le que no quierre se el diaton Tata na cielo. (2 Ped. 2:7, 8, El Nuevo Testamento) Cay tiene le hondo respeto y miedo con Dios, nuay si Lot sigui na maga imoral conducta del maga gente alrededor con ele. Manada tambien na maga gente alrededor kanaton el nuay respeto na maga principio de Jehova na moral. Maskin pa ansina, puede kita esta limpio na moral si mentena kita el diaton amor con Dios y tene justo miedo con ele.—Prov. 14:2.

² Para ayuda kanaton, ya dale si Jehova maga consejo por medio na libro de Proverbio. Todo maga Cristiano, hombre man o mujer, joven man o de edad, puede beneficia na consejo na este libro.

3. Asegun na Proverbio 17:3, cosa el un razon si porque necesita kita protege con el diaton corazon? (Mira tambien con el letrato.)

³ El un importante razon si porque necesita kita protege con el diaton figurativo corazon amo cay ta examina con ese si Jehova. Ta puede le mira mas pa na cosa ta puede mira el otro y sabe le si cosa clase gayot kita de persona. (Le con el Proverbio 17:3.) Hay ama le kanaton si continua kita pensa con el de suyu maga consejo. (Juan 4:14) Si hace kita se, gendeh puede influencia kanaton el maga imbusterias y bajo moralidad que estaba con Satanas y con el de suyu mundo. (1 Juan 5:18, 19) Mientras ta queda kita mas cerca con Jehova, hay queda mas  grande el diaton amor y respeto con ele. Cay no quierre kita hace sinti duele con el diaton Tata, gendeh gayot kita hace maga mal cosas o maskin pensa lang que hace con ese. Si ta enfrenta kita tentacion, pregunta con el diaton mismo cuerpo, ‘Porque man yo intencional hace sinti duele con el Persona quien ya dale mira grande amor conmigo?’—1 Juan 4:9, 10.

4. Paquemodo el miedo con Jehova ya protege con el un hermana desde na tentacion?

⁴ Si Marta, un hermana na Croatia quien ya enfrenta un tentacion que comete imoralidad, ya escribi: “Yan dificil yo pensa enbuenamente y resisti con el deseo que hace con el un cosa que malo. Pero, el miedo con Jehova ya protege conmigo.” b Paquemodo el miedo con Dios ya puede ayuda con ele? Ya habla si Marta que ya medita le con el maga resulta si hace le mal decision. Puede tambien se kita hace. El de con todo mal resulta amo que puede kita hace triste con Jehova y gendeh puede sirvi con ele hasta para cuando.—Gen. 6:5, 6.

5. Cosa tu ya aprende na experiencia de Leo?

⁵ Si ta tiene kita miedo con Jehova, gendeh kita ta pensa que dol aceptable lang el mal cosas que ta hace el otro. Si Leo quien ta queda na Congo ya aprende tambien con ese leccion. Cuatro año despues del suyu bautismo, yan amigo le con aquellos quien ta hace maga mal cosas. Ya pensa le que basta gendeh le ta hace maga mal practica, gendeh le ta culpa con Jehova. Pero nuay dura, ya influencia con ele el de suyu maga amigo que toma por demas y comete imoralidad. Despues del cuanto tiempo, ya principia le pensa acerca na cosa ya enseña con ele el de suyu Cristiano mayores y el alegria que tiene le de antes. Cosa el resulta? Ya puede le realiza con el de  suyu kamali. Na ayuda del maga anciano, ya bira le con Jehova. Ahora, alegre le ta sirvi como un anciano y special pioneer.

6. Cosa ta representa el dos mujer que hay discuti kita ahora?

⁶ Considera kita con el Proverbio capitulo 9, donde puede kita le acerca na dos mujer—el uno kanila ta representa con el sabeduria y el uno con el pagka-estupido. (Compara na Roma 5:14; Galacia 4:24.) Acorda que el mundo de Satanas lleno de imoralidad y pornografia. (Ef. 4:19) Poreso, bien importante que continua kita cultiva con el diaton miedo con Dios y evita con el cosas malo. (Prov. 16:6) Entonces, todo kita, hombre man o mujer, puede beneficia na cosa ta enseña este capitulo. Ya menciona que el cada uno na ese dos mujer ta invita con aquellos nuay experiencia o “aquellos falta entendimiento.” Dol ta habla el cada uno diila, ‘Vene na de mio casa y come aqui.’ (Prov. 9:1, 5, 6, 13, 16, 17) Pero bien diferente el resulta del cada invitacion.

7. Asegun na Proverbio 9:13-18, cosa hay sucede con aquellos quien acepta con el invitacion del estupido mujer? (Mira tambien con el letrato.)

⁷ Considera con el invitacion del “estupido mujer.” (Le con el Proverbio 9:13-18.) Con gana gayot le ta invita con aquellos quien falta entendimiento para anda na de suyu casa y come junto con ele. Cosa hay sucede con aquellos quien acepta con ese invitacion? Hay experiencia sila el cosa ta habla el Proverbio: “Lleno de muerto el de suyu casa.” Posible ya puede tu acorda el maga semejante expresion na maga primer capitulo de Proverbio. Ya dale kanaton aviso contra na “mal mujer” y “imoral mujer.” Ya habla kanaton: “Ta sumi para na muerte el de suyu casa.” (Prov. 2:11-19) Na Proverbio 5:3-10, ya dale tambien kanaton aviso contra na otro “mal mujer” de quien “pies ta abaja para na muerte.”

8. Cosa decision kita necesita hace?

⁸ Aquellos quien ya puede oi con el invitacion del “estupido mujer” necesita hace un decision: Acepta ba sila con ese o gendeh? Posible necesita tambien kita hace ansina clase de decision. Si tiene kanaton quien ya invita que hace imoral cosas o si bigla lang ya abuya el maga letrato de pornografia mientras tan internet kita, cosa kita hace?

9-10. Cosa el cuanto razon si porque kita debe evita hace maga imoral cosas?

⁹ Tiene gayot maga buen razon si porque kita debe evita hace maga imoral cosas. Ya menciona que el “estupido mujer” ya habla: “Dulce el rubao agua.” Cosa el “rubao agua”? El Biblia ya  compara con el sexo entre na man maridable na agua que ta puede refresca. (Prov. 5:15-18) El marido y mujer puede tene alegria na sexo adentro na diila matrimonio. Pero, bien diferente con ese el “rubao agua.” Puede este refiri na imoral clase de sexo. Mas mucho, ta hace con este pa-secreto igual si paquemodo el un ladron ta ruba pa-secreto. Para con aquellos quien ta hace con ese, dol dulce el “rubao agua” cay ta pensa sila que nuay quien hay sabe acerca na cosa sila ya hace. Pero gendeh gayot se deverasan! Ta puede se todo mira si Jehova. Mapait gayot si perde el de suyu favor kanaton poreso claro que nuay gayot cosa “dulce” na maga imoral conducta. (1 Cor. 6:9, 10) Pero tiene pa se otro mal consequencia.

¹⁰ Si comete el un persona sexual imoralidad, puede se causa para man huya le, sinti que nuay le valor, man priñada nuay na plano y tene maga problema na familia. Claro que el cosa bueno para hace amo que no acepta con el invitacion del estupido mujer. Puera que ya perde el diila relacion con Jehova, manada na maga imoral gente el ya tiene maga enfermedad que posible causa muerte. (Prov. 7:23, 26) El versiculo 18 del capitulo 9 ta habla: “El de suyu maga visita talla na hondura del Sepultura.” Si ansina, porque manada el ta acepta con el de suyu invitacion maskin ta resulta este na tragedia?—Prov. 9:13-18.

11. Porque bien peligroso el pornografia?

¹¹ El un comon trampa que debe kita evita amo el pornografia. El cuanto ta pensa que nuay peligro si mira sila con este. Pero, peligroso y maka-addict el pornografia, y ta causa este para perde el respeto del un persona na de suyu mismo cuerpo y con otro. Si ya mira el un persona maga imoral letrato, dificil se para quita na de suyu pensamiento. Mas pa, el pornografia gendeh ta hace perde con el mal deseo sino ta hace pa mas fuerte con ese. (Col. 3:5; Sant. 1:14, 15) Si, manada de aquellos quien ta mira pornografia ta comete ya imoralidad na uliji.

12. Paquemodo kita ta dale mira que ta evita kita con el pornografia?

¹² Como maga Cristiano, cosa kita debe hace si bigla lang ya abuya maga letrato de pornografia na diaton gadget? Debe kita dayun evita mira con ese. Mas facil se kita puede hace si acorda kita que bien precioso el diaton relacion con Jehova. El deverasan, maskin gendeh ta considera como pornografia con el cuanto maga letrato posible siempre este causa kanaton para tene maga imoral deseo. Porque kita debe evita con ese? Cay no quierre kita maskin pensa lang gane acerca na maga imoral cosas. (Mat. 5:28, 29) El un anciano na Thailand que si David ya habla: “Ta pregunta yo na de mio mismo cuerpo: ‘Maskin gendeh ta considera como pornografia con este maga letrato, hay queda ba alegre si Jehova si continua yo mira con este?’ Este pregunta ta puede ayuda conmigo para hace buen decision.”

13. Cosa puede ayuda kanaton para hace maga buen decision?

¹³ Puede kita hace maga buen decision si tiene kita el miedo que hace triste con Jehova. El miedo con Dios amo “el principio” o fundacion “del sabeduria.” (Prov. 9:10) Puede se kita mira na primer parte del Proverbio capitulo 9 donde ya compara con “el deverasan sabeduria” na otro mujer.

14. Cosa otro invitacion el ya menciona na Proverbio 9:1-6?

¹⁴ Le con el Proverbio 9:1-6. Aqui puede kita le con el invitacion del Tuburan y Fundacion del deverasan sabeduria, el diaton Creador. (Prov. 2:6; Roma 16:27) Ta menciona este acerca na un grande casa que tiene siete  arigui. Ta dale este mira que bondadoso si Jehova y ta acepta le con el todo quien quierre aplica con el de suyu sabeduria na diila vida.

15. Cosa el Dios ta invita kanaton que hace?

¹⁵ Bondadoso si Jehova y ta dale le kanaton manada buen cosas. Puede se kita mira na ejemplo del mujer quien ta representa con el “deverasan sabeduria” na Proverbio capitulo 9. Ya menciona que este figurativo mujer ya prepara con el carne, ya mezcla con el vino y ya arregla con el mesa na de suyu casa. (Prov. 9:2, ftn.) Mas pa, asegun na versiculo 4 y 5: “Ya habla le con el persona quien falta entendimiento: ‘Vene, come con el de mio pan.’” Porque kita debe acepta con el invitacion de este mujer? Quierre si Jehova que queda sabio y esta protegido el de suyu maga anak. No quierre le que hace kita maga kamali que causa kanaton para sufri y arripinti na uliji. Poreso, “ta ajunta le practical sabeduria para na maga recto.” (Prov. 2:7) Si tiene kita justo miedo con Jehova, quierre kita que hace alegre con ele. Ta oi kita con el de suyu maga buen consejo y alegre ta aplica con ese.—Sant. 1:25.

16. Paquemodo el miedo con Dios ya puede ayuda con Alain para hace buen decision y cosa el resulta?

¹⁶ Considera si paquemodo ya puede hace un buen decision si Alain cay tiene le miedo con Dios. Este anciano y maestro na escuela ya habla, “Para na manada del de mio maga uban, el maga salida de pornografia amo un manera lang para aprende acerca na sexo.” Pero sabe si Alain que gendeh se deverasan. Ele ya habla: “Cay tiene yo justo miedo y amor con Jehova, nuay gayot yo conforma que mira ansina maga salida. Ya explica tambien yo el razon na de mio maga uban.” Ya aplica le con el consejo del “deverasan sabeduria” que “camina na camino de entendimiento.” (Prov. 9:6) Yan bilib gayot con Alain el cuanto del de suyu maga uban maestro y ahora, ta estudia ya sila con el Biblia y ta atende na maga miting.

17-18. Cosa maga bendicion ta ricibi aquellos quien ya acepta con el invitacion del “deverasan sabeduria” y cosa sila puede esperanza? (Mira tambien con el letrato.)

¹⁷ Ya usa si Jehova con el ejemplo de aquel dos mujer para dale mira si paquemodo kita puede tene buen futuro. Aquellos ta acepta con el invitacion del alboroto y “estupido mujer” ta pricura busca alegria na maga imoral cosas. El deverasan, ta pricura lang sila tene alegria ahora y gendeh ta pensa acerca na diila futuro. El cosa sila ta hace hay resulta gayot na muerte.—Prov. 9:13, 17, 18.

¹⁸ Bien diferente el futuro de aquellos quien ta acepta con el invitacion del “deverasan sabeduria”! Alegre sila ahora ta ricibi manada maga sabroso espiritual comida. (Isa. 65:13) Por medio con profeta Isaias, si Jehova ya  habla: “Oi enbuenamente conmigo y come con el cosa bueno, y puede ustedes tene grande alegria na maga sabroso comida.” (Isa. 55:1, 2) Ta aprende kita ama con el cosa ta ama si Jehova y odia con el cosa le ta odia. (Sal. 97:10) Y alegre kita ta invita con otro que beneficia tambien na “deverasan sabeduria.” Dol aquel kita ta “anda na maga alto lugar na ciudad para grita: ‘Manda vene con maskin quien que nuay experiencia.’” Gendeh lang para na diaton presente tiempo el maga beneficio que puede kita ricibi y aquellos quien acepta con el invitacion. Sino, hay tene kita el oportunidad que “vivi” hasta para cuando mientras ta “camina na camino de entendimiento.”—Prov. 9:3, 4, 6.

19. Como cosa ta menciona el Eclesiastes 12:13, 14, cosa kita debe determinao hace? (Mira tambien con el cajon “ Ta Beneficia Kita na Miedo con Dios.”)

¹⁹ Le con el Eclesiastes 12:13, 14. Ojala el miedo con Dios hay continua guarda con el diaton corazon y ayuda kanaton para esta limpio na moral y espiritual na este ultimo maga dia. Ese justo miedo hay motiva kanaton para invita con el mas manada maga gente que busca con el “deverasan sabeduria” y beneficia con ese.