1. Cosa kita debe hace para salva na dia de Jehova?

 SI TA menciona el Biblia acerca na “dia de Jehova,” ta refiri este con el tiempo cuando hay castiga y destroza si Jehova con el de suyu maga enemigo y salva con el de suyu maga siervo. Ya castiga si Jehova con el cuanto maga nacion de antes. (Isa. 13:1, 6; Eze. 13:5; Sof. 1:8) Na diaton tiempo, el “dia de Jehova” hay principia cuando hay ataca con el Grande Babilonia y hay termina este na guerra de Armagedon. Para salva na ese “dia,” necesita kita queda preparao ahora. Ya enseña kanaton si Jesus que gendeh lang kita debe queda preparao para na “grande calamidad” o tribulacion sino queda tambien “firmi preparao” para con ese.—Mat. 24:21; Luc. 12:40.

2. Cosa el beneficio si considera kita con el 1 Tesalonica?

² Na de suyu primer carta para na maga de Tesalonica, si apostol Pablo ya usa cuanto ilustracion para ayuda con el maga Cristiano que queda pirmi preparao para na dia de juzgamiento de Jehova. Sabe si Pablo que gendeh llega el dia de Jehova na aquel tiempo. (2 Tes. 2:1-3) Maskin pa ansina, ya anima le con el de suyu maga hermano que prepara para na ese dia que dol llega quel mañana. Puede tambien kita aplica con el de suyu consejo. Considera kita si cosa le ya habla acerca si: (1) paquemodo llega el dia de Jehova, (2) quien gendeh salva na ese dia y (3) cosa kita puede hace para salva.

3. Na cosa manera hay llega el dia de Jehova como un ladron del noche? (Mira tambien con el letrato.)

³ “Como un ladron del noche.” (1 Tes. 5:2) Este el primer ilustracion que ya usa si Pablo para enseña kanaton acerca na  llegada del dia de Jehova. Mas mucho, paspas ta move el maga ladron y ta anda sila ruba durante el noche cuando el maga gente gendeh ta expecta kanila. Bigla tambien llega el dia de Jehova donde el mayoria del maga gente gendeh ta expecta con ese. Maskin el maga verdadero Cristiano posible hay espanta si paquemodo de paspas sucede el maga suceso. Pero gendeh igual na maga malo, gendeh kanaton destroza.

4. Na cosa manera el dia de Jehova igual na dolor que ta sinti el un priñada?

⁴ “Igual como ta llega el dolores con un mujer preñada.” (1 Tes. 5:3) El un nana quien cerca ya pari no sabe el exacto tiempo si cuando le pari. Pero, asigurao le que hay sucede se. Y si para pari ya gayot le, bigla lang se hay sucede y gendeh con ese puede sangga. Na igual manera, no sabe kita si cuando el dia y hora que hay principia el dia de Jehova. Pero asigurao kita que hay llega gayot este y que bigla lang sucede el juzgamiento del Dios na maga malo y gendeh sila puede escapa.

5. Na cosa manera el grande tribulacion igual na madrogada?

⁵ Igual na madrogada. El ika-tres ilustracion de Pablo ya menciona ya tambien acerca con el maga ladron que ta ruba si denoche. Pero na este ilustracion, dol ya compara si Pablo con el dia de Jehova na madrogada. (1 Tes. 5:4) Posible que el maga ladron que ta anda ruba denoche gendeh ta puede vicia con el hora. Y si madrogada ya y ta queda ya claro, posible puede cuji kanila. Na igual manera, na grande tribulacion, hay puede mira con aquellos quien, igual na maga ladron, ta continua na diila maga mal trabajo. Gendeh igual kanila, puede kita queda preparao para na ese dia si gendeh kita hace el maga cosas que no quierre si Jehova y si hace kita el “todo maga cosa-cosa  bueno, el santidad y el verdad.” (Ef. 5:8-12) Ya usa tambien si Pablo dos ilustracion para enseña kanaton acerca con aquellos quien gendeh salva.

6. Na cosa manera durmido el mayoria del maga gente ahora? (1 Tesalonica 5:6, 7)

⁶ “Maga durmilon.” (Le con el 1 Tesalonica 5:6, 7.) Ya compara si Pablo con aquellos quien gendeh salva na dia de Jehova na maga gente quien ta durmi. No sabe sila si cosa ta pasa alrededor y si cosa hora ya. Poreso, no sabe sila si tiene cosa importante ya sucede y nuay tambien sila reaccion con ese. Mayoria del maga gente ahora el durmido na espiritual. (Roma 11:8) Gendeh sila ta creé que el maga cosas que ta sucede ahora amo evidencia que ta vivi ya kita na “ultimo maga dia” y que bien cerca ya sucede el grande tribulacion. Si tiene maga grande suceso na mundo, el cuanto ta dispierta o ta queda interesao na mensaje del Reino. Pero, el manada kanila ta durmi lang otravez en vez de esta dispierto. Gane, maskin ta creé el cuanto na dia de juzgamiento, ta pensa sila que bien tarda pa se llega. (2 Ped. 3:3, 4) Pero gendeh kita ansina. Ta creé kita que mientras ta pasa el tiempo, ta queda mas importante que esta kita dispierto.

7. Na cosa manera igual na maga burrachon aquellos con quien hay destroza el Dios?

⁷ “Maga borachon.” Ya compara el apostol con aquellos con quien hay destroza el Dios na maga burrachon. El maga tomao gendeh dayun ta puede responde na cosa ta sucede alrededor kanila y gendeh sila ta puede hace maga buen decision. Na igual manera, el maga malo gendeh ta responde na maga aviso del Dios. Ta continua sila hace maga mal cosas que hay resulta na diila destrozo. Pero, ya habla ya daan con el maga Cristiano que debe sila esta alerto y gendeh tomao na espiritual. (1 Tes. 5:6) Asegun na un scholar de Biblia, el un persona quien gendeh tomao na espiritual ta puede esta calmao, gendeh tan panic y ta puede le pensa enbuenamente poreso ta puede le hace justo decision. Porque kita debe esta calmao? Cay mientras ta queda mas cerca el dia de Jehova, mas ta queda fuerte el pressure que entramete na maga issue acerca na politica o na sociedad. Pero si calmao kita, gendeh kita entramete alli. Mas pa, gendeh kita debe man lingasa acerca si cosa kita hace. El espiritu del Dios puede ayuda kanaton para queda calmao, pensa enbuenamente y para puede kita hace maga justo decision.—Luc. 12:11, 12.

8. Paquemodo el 1 Tesalonica 5:8 ta dale mira si cosa el maga calidad que puede ayuda kanaton para esta dispierto y alerto? (Mira tambien con el letrato.)

⁸ “Visti kita el camisa de hierro . . . y pone kita el helmet.” Ya compara kanaton si Pablo na maga soldao quien alerto y preparao para na guerra. (Le con el 1 Tesalonica 5:8.) El maga gente ta expecta que el maga soldao pirmi preparao que anda na guerra maskin cosa hora. Igual kanila, ta esta tambien kita preparao para na dia de Jehova. Poreso, ta visti kita con el camisa de hierro de fe y amor y el helmet de esperanza. Este maga calidad puede gayot ayuda kanaton.

9. Paquemodo el diaton fe ta protege kanaton?

⁹ El camisa de hierro ta protege con el corazon del un soldao. El fe y amor ta protege con el diaton figurativo corazon. Puede este ayuda kanaton para continua sirvi con Dios y sigui con Jesus. Por causa na diaton fe, asigurao kita que hay premia kanaton si Jehova cay ta busca kita con ele con todo corazon. (Heb. 11:6) Hay motiva este kanaton que esta leal con el diaton Lider, si Jesus, maskin pa posible  hay enfrenta kita maga dificultad. Si estudia kita con el ejemplo del maga individual na moderno tiempo quien ya mentena con el diila integridad maskin pa ya enfrenta persecucion o dificultad na financial, puede se hace fuerte con el diaton fe para puede kita aguanta con el maskin cosa dificultad. Y puede kita evita queda materialistico si imita kita con aquellos quien ya hace simple el diila vida para puede hace una con el Reino. b

10. Paquemodo el amor para con Dios y para na maga gente puede ayuda kanaton para aguanta?

¹⁰ Importante tambien el amor para puede kita esta dispierto y alerto. (Mat. 22:37-39) El amor para con Dios puede ayuda kanaton para continua predica maskin pa posible kita experiencia maga problema por causa con ese. (2 Tim. 1:7, 8) Ta ama kita maskin con aquellos quien gendeh ta sirvi con Jehova poreso ta continua kita predica maskin por medio de telefono y carta. Gendeh ta perde el diaton esperanza que algun dia, hay cambia el maga gente y hace sila si cosa el justo.—Eze. 18:27, 28.

11. Paquemodo el amor para na maga hermano y hermana puede ayuda kanaton? (1 Tesalonica 5:11)

¹¹ Ta ama tambien kita con el diaton maga hermano y hermana. Poreso, ta “dale [kita] animo con uno y otro, y [tan] ayudajan para puede crici na fe.” (Le con el 1 Tesalonica 5:11.) Igual na maga soldao quien tan ayudajan na guerra, ta anima kita con uno y otro. Posible, el un soldao puede hace sinti duele con el de suyu uban durante na guerra pero gendeh gayot le se intencional hace. Na igual manera, gendeh gayot kita intencional hace sinti duele con el diaton maga hermano y hermana o man balus kanila. (1 Tes. 5:13, 15) Ta dale tambien kita mira el diaton amor si ta respeta kita con el maga hermano quien ta guia na diaton congregacion. (1 Tes. 5:12) Cuando ya escribi si Pablo con este carta, nuay pa un año el congregacion de Tesalonica. Posible nuay pa tanto experiencia el maga anciano alla y ta puede hace maga kamali. Maskin pa ansina, conviene kanila respeta. Mientras ta queda mas cerca el grande tribulacion, posible mas necesita kita depende na diaton maga local anciano para na  maga direccion. Baka gendeh kita puede man contact con el world headquarters y branch office; poreso, importante que ahora pa lang cultiva ya kita amor y respeto para na diaton maga anciano. Maskin cosa pa sucede, no man focus na diila maga imperfeccion sino acorda que ta guia kanila si Jehova por medio con el Cristo.

12. Paquemodo el diaton esperanza ta puede protege con el diaton pensamiento?

¹² Igual si paquemodo el helmet ta protege con el cabeza del soldao, el diaton esperanza de salvacion ta protege con el diaton pensamiento. Cay asigurao el diaton esperanza, sabe kita que nuay valor el cosa ta ofrece este mundo. (Fil. 3:8) Mas pa, ta ayuda tambien se para esta kita calmao. Ese el cosa ya experiencia kanda Wallace y Laurinda quien ta sirvi na Africa. Adentro lang na tres semana, ya muri el nana de Laurinda y el tata de Wallace. Por causa na COVID-19 pandemic, nuay sila puede bolbe na diila familia. Si Wallace ya escribi: “Por causa na esperanza de resureccion, si ta pensa yo kanila, ta puede yo imagina que dol na nuevo mundo ya sila y gendeh yo ta pensa acerca el tiempo cuando cerca ya sila muri. Este esperanza ta puede ayuda conmigo para queda calmao si ta sinti yo bien triste.”

13. Cosa kita hace para ricibi sagrao espiritu?

¹³ “No apaga con el fuego del espiritu.” (1 Tes. 5:19, NWT) Ya compara si Pablo con el sagrao espiritu na un fuego adentro kanaton. Si tiene kita el espiritu del Dios, bien con gana kita hace si cosa el justo y sirvi con Jehova. (Roma 12:11) Cosa kita puede hace para ricibi sagrao espiritu? Puede kita pidi con ese na rezo, estudia con el Palabra del Dios y asocia na de suyu organizacion. Si hace kita se, puede se ayuda para cultiva kita con el “fruta del Espiritu.”—Gal. 5:22, 23.

14. Cosa kita debe evita para puede continua ricibi con el espiritu del Dios? (Mira tambien con el letrato.)

¹⁴ Despues kanaton dale sagrao espiritu el Dios, debe kita queda con cuidao que “[gendeh] apaga con el fuego del espiritu.” El Dios ta continua dale el de suyu espiritu con aquellos lang quien ta mentena limpio pensamiento y conducta. Gendeh mas le dale kanaton el de  suyu espiritu si continua kita pensa y hace maga mal cosas. (1 Tes. 4:7, 8) Para continua ricibi sagrao espiritu, gendeh tambien kita debe “desprecia el cosa ta habla el maga profeta” que na ese texto, ta refiri na maga mensaje que ya dale kanaton si Jehova por medio na de suyu sagrao espiritu. (1 Tes. 5:20) Incluido aqui el maga cosas acerca na dia de Jehova y si paquemodo de cerca ya ese dia. Gendeh kita ta pensa que el Armagedon gendeh llega na diaton tiempo sino pirmi kita ta pensa que cerca ya ese dia. Ta dale se kita mira si ta mentena kita buen conducta y ta esta ocupao na diaton “vida de devocion con Dios” cada dia.—2 Ped. 3:11, 12, El Nuevo Testamento.

15. Cosa kita hace para gendeh kanaton puede engaña el maga propaganda del maga demonio? (1 Tesalonica 5:21)

¹⁵ Gendeh mas tarda, el maga enemigo del Dios hay declara “que tiene paz y seguridad.” (1 Tes. 5:3, El Nuevo Testamento) Hay man calayat na entero tierra el maga propaganda que estaba na maga demonio y hay engaña este con el mayoria del maga gente. (Rev. 16:13, 14) Quetal kita? Gendeh este puede engaña kanaton si “pensa [o examina] anay” kita con el todo cosas. (Le con el 1 Tesalonica 5:21.) El Griego palabra que yan translate “pensa anay” ya usa tambien para refiri con el manera si paquemodo el maga gente ta examina con el maga metal para sabe si deverasan este. Entonces, debe kita examina una si deverasan ba el cosa kita ta oi o ta le. Importante se para na maga de Tesalonica de antes y mas importante se para kanaton ahora ciendo mas ta queda cerca el grande tribulacion. En vez de creé dayun con el cosa ta habla el otro, debe kita pensa enbuenamente y compara con el cosa kita ta le o ta oi na cosa ta habla el Biblia y el organizacion de Jehova. Si hace kita se, gendeh kanaton puede engaña el maskin cosa propaganda del maga demonio.—Prov. 14:15; 1 Tim. 4:1.

16. Cosa el diaton esperanza y cosa kita determinao hace?

¹⁶ Como un grupo, el maga siervo del Dios hay salva na grande tribulacion. Pero si acerca con el cada uno kanaton, no sabe kita si cosa exacto sucede. (Sant. 4:14) Maskin pa ansina, salva man kita na grande tribulacion o muri antes se sucede, hay tene kita vida eterna si esta kita fiel. El maga iscujido hay man junto con el Cristo na cielo. El otro maga carnero hay vivi na paraiso tierra. Ojala todo kita hay man focus na diaton bonito esperanza y esta preparao para na dia de Jehova!