1. Cosa ya ayuda con el maga siervo de Jehova para continua sirvi con ele maskin pa na maga problema?

 “AY TENE maga dificultad na ultimo maga dia.” Ese el cosa ya menciona el Biblia acerca na tiempo onde kita ta vivi ahora. (2 Tim. 3:1) Puera na maga dificultad que comon na este mundo, el maga siervo de Jehova ta enfrenta tambien maga oposicion y persecucion. Porque kita ta puede continua sirvi con Jehova maskin pa na este maga problema? El uno na maga razon amo cay ya puede kita conoce con Jehova como “el vivo Dios.”—Jer. 10:10; 2 Tim. 1:12.

2. Porque kita puede habla que si Jehova el vivo Dios?

² Un deverasan Persona si Jehova quien ta ayuda kanaton na diaton maga probanza y ta busca le oportunidad para suporta kanaton. (2 Cron. 16:9; Sal. 23:4) Si acorda kita que si Jehova el vivo Dios, puede se ayuda kanaton para enfrenta con el maskin cosa probanza. Considera si paquemodo se ya experiencia si Rey David.

3. Cosa quierre decir de David cuando ya habla le que “vivo si Jehova”?

³ Conoce si David con Jehova y ya confia con Ele. Cuando ya pricura con ele mata el de suyu maga enemigo, incluido si Rey Saul, ya pidi ayuda si David con Jehova na rezo. (Sal. 18:6) Despues contesta el Dios con el de suyu rezo y salva con ele, ya habla si David: “Vivo si Jehova!” (Sal. 18:46) Na este maga palabra, nuay lang basta habla si David que ta existi el Dios. El un referencia ya habla que na este texto, ta hace claro si David que si Jehova amo “un vivo Dios quien pirmi ta ayuda con el de suyu maga siervo.” Base na experiencia de  David, convincido le que vivo el Dios y ya hace se fuerte con el de suyu determinacion para sirvi y alaba con Jehova.—Sal. 18:28, 29, 49.

4. Cosa el beneficio si convincido kita que si Jehova el vivo Dios?

⁴ Si convincido kita que si Jehova el vivo Dios, puede se ayuda kanaton para queda mas activo na diaton adoranza. Puede tambien se ayuda kanaton para enfrenta con el maga probanza y motiva kanaton para continua hace esfuerzo na servicio con ele. Mas pa, hay queda tambien kita determinao que esta cerca con Jehova.

HAY HACE FUERTE CONTIGO EL VIVO DIOS

5. Porque kita puede asigura que puede kita enfrenta con el diaton maga probanza? (Filipo 4:13)

⁵ Puede kita aguanta na maskin cosa probanza, diutay man o grande, si acorda kita que vivo si Jehova y talli le para ayuda kanaton. Gane, si compara con el diaton Dios, nuay lang para con ele el diaton maga problema. Ele el Todopoderoso y puede le dale kanaton el poder para aguanta. (Le con el Filipo 4:13, NWT.) Como resulta, tiene kita el confianza que puede kita enfrenta con el maskin cosa probanza. Y si ya ayuda kanaton si Jehova na maga diutay problema, puede kita confia que talli le para kanaton si ta enfrenta kita maga grabe probanza.

6. Cosa ya experiencia si David que ya hace mas fuerte con el de suyu confianza con Jehova?

⁶ Considera con el dos experiencia que ya hace mas fuerte con el confianza de David con Jehova. Cuando joven si David, ya saca el un leon y oso con el un carnero del de suyu tata. Na ese dos ocasion, con coraje ya hace apas si David con el maga animal y ya salva con el carnero. Pero nuay le pensa que ya puede le quel hace na de suyu mismo abilidad. Sabe le que ya ayuda con ele si Jehova. (1 Sam. 17:34-37) Nuay ulvida si David con aquel maga experiencia. Cay ya medita le con aquel, ya tiene le el confianza que na futuro, hay ayuda tambien con ele el vivo Dios.

7. Na cosa yan focus si David y paquemodo se ya ayuda con ele para ganá contra con Goliat?

⁷ Despues del cuanto tiempo, posible cuando teenager si David, ya anda le visita na campo del maga Israelita. Ya sabe le que ya tiene miedo el maga soldao cay el un gigante Filisteo que si Goliat, ya gangguia y ‘ya convida man guerra con el maga soldao del Israel.’ (1 Sam. 17:10, 11) Ya tiene miedo el maga soldao cay yan focus sila na grandor del gigante y con el cosa este ta habla. (1 Sam. 17:24, 25) Pero otro el mirada de David na este situacion. Ta gangguia si Goliat, gendeh con el maga soldao de Israel, sino con el “maga soldao del vivo Dios.” (1 Sam. 17:26) Ta pensa si David con Jehova. Sabe si David que el Dios quien ya ayuda con ele cuando un pastor le, hay ayuda tambien con ele na este tiempo. Ciendo asigurao si David que ayuda con ele el Dios, yan guerra le contra con Goliat y ya ganá le!—1 Sam. 17:45-51.

8. Paquemodo kita queda mas convincido que ayuda kanaton si Jehova si ta enfrenta kita maga probanza? (Mira tambien con el letrato.)

⁸ Puede tambien kita enfrenta con el maskin cosa probanza si acorda kita que preparao ayuda kanaton el diaton vivo Dios, si Jehova. (Sal. 118:6) Puede kita hace fuerte con el diaton confianza que ayuda le kanaton si pensa kita si cosa le ya hace de antes. Le maga istoria na Biblia acerca si paquemodo si Jehova ya salva con el de suyu maga siervo. (Isa. 37:17, 33-37) Puede tambien tu mira maga noticia na jw.org acerca si paquemodo si Jehova ya ayuda con el diaton maga hermano y hermana na moderno tiempo. Mas  pa, pensa con el maga tiempo que ya ayuda contigo si Jehova. Pero, baka sinti tu que gendeh tu igual con David quien ya ganá contra na un leon y oso. Maskin pa ansina, puede tu asigura que ta ayuda gayot contigo si Jehova. Na cosa manera? Ya invita le contigo para queda de suyu amigo. (Juan 6:44) Gane, si Jehova el razon si porque tu na verdad siempre hasta ahora. Poreso, pidi con ele que ayuda contigo acorda con el maga tiempo que ya contesta le con el de tuyu rezo, ya ayuda contigo na tiempo que bien necesita tu o ya ayuda contigo aguanta na un dificultad. Si pensa tu con el maga experiencia igual ansina, hay queda tu mas convincido que hay continua contigo ayuda si Jehova.

9. Cosa debe el diaton mirada na diaton maga probanza? (Proverbio 27:11)

⁹ Si ta creé kita que un vivo Persona si Jehova, puede se ayuda kanaton para tene el justo mirada na diaton maga problema. Puede kita realiza que el diaton maga probanza parte lang del un grande issue entre con Jehova y con Satanas. Ta clama el Diablo que hay deja kita con Jehova si enfrenta kita maga dificultad. (Job 1:10, 11; le con el Proverbio 27:11.) Pero si ta esta kita leal con Jehova, ta dale kita mira el diaton amor para con ele y ta dale prueba que imbustero el Diablo. Ta enfrenta ba tu oposicion estaba na gobierno, problema na financial, negativo reaccion na ministerio o otro pa maga probanza? Si ansina, acorda que tiene tu el oportunidad para hace alegre con el corazon de Jehova. Acorda tambien que gendeh le permiti que experiencia tu probanza que mas pa na cosa tu puede aguanta. (1 Cor. 10:13) Hay ayuda gayot le contigo.

HAY PREMIA CONTIGO EL VIVO DIOS

10. Cosa hace el vivo Dios para con aquellos quien ta adora con ele?

¹⁰ Ta premia si Jehova con aquellos quien ta adora con ele. (Heb. 11:6) Ta ayuda le kanaton ahora para tene paz y queda contento y hay dale le kanaton vida hasta para cuando na futuro. Puede kita confia que hay premia  kanaton si Jehova cay tiene le el deseo y poder para hace con ese. Como resulta, quierre kita esta ocupao na diaton servicio igual na cosa ya hace el de suyu maga fiel siervo de antes. Ese el cosa ya hace si Timoteo del primer siglo.—Heb. 6:10-12.

11. Cosa ya motiva con Timoteo para hace grande esfuerzo na congregacion? (1 Timoteo 4:10)

¹¹ Le con el 1 Timoteo 4:10. Tiene confianza si Timoteo que hay premia con ele el vivo Dios. Poreso, ta hace gayot le esfuerzo para con Jehova y con otro. Cosa le ya hace? Ya anima con ele si apostol Pablo que progresa na de suyu enseñada na ministerio y na congregacion. Necesita tambien le dale mira buen ejemplo na maga hermano y hermana, joven man o de edad. Y ya ricibi tambien le maga pesao assignment. Por ejemplo, necesita le dale amable consejo pero franca con aquellos quien necesita con ese. (1 Tim. 4:11-16; 2 Tim. 4:1-5) Convincido si Timoteo que maskin pa nuay quien ta puede mira o ta aprecia con el de suyu esfuerzo, hay premia con ele si Jehova.—Roma 2:6, 7.

12. Cosa puede motiva con el maga anciano para continua cumpli con el diila assignment? (Mira tambien con el letrato.)

¹² Ahora, puede tambien asigura el maga anciano que ta mira y ta aprecia si Jehova con el diila buen trabajo. Puera pa na shepherding, enseñada y predicacion, manada anciano el ta suporta tambien na maga proyecto de construida y na disaster relief. El otro ta sirvi na maga Patient Visitation Group o Hospital Liaison Committee. Sabe el maga anciano que de Jehova el congregacion y gendeh del maskin quien gente. Poreso, con todo corazon sila ta cumpli con el diila maga assignment y ta confia que hay premia kanila el Dios na cosa sila ta hace.—Col. 3:23, 24.

13. Cosa ta sinti si Jehova na cosa kita ta hace para con ele?

¹³ Gendeh todo el ta sirvi como maga  anciano. Pero todo kita tiene cosa puede dale con Jehova. Ta aprecia le si ta hace kita el todo para sirvi con ele. Ta nota le si ta dale kita maga donacion maskin paquemodo man se de diutay. Alegre le si ta alza kita mano para man comento na maga miting maskin pa ta tiene kita huya y si ta perdona kita con otro. Si ta sinti tu que gendeh tu ta puede hace el cosa tu quierre, puede tu asigura que ta aprecia si Jehova con el cosa tu ta puede hace. Ta ama le contigo y hay premia le contigo.—Luc. 21:1-4.

ESTA CERCA CON EL VIVO DIOS

14. Si tiene kita buen relacion con Jehova, paquemodo se puede ayuda kanaton para esta fiel? (Mira tambien con el letrato.)

¹⁴ Mas facil para kanaton que esta fiel con Jehova si deverasan ele para kanaton. Considera con el ejemplo de Jose. Nuay le comete imoralidad. Deverasan para con ele el Dios y no quierre le hace triste con Ele. (Gen. 39:9) Para queda deverasan kanaton si Jehova, necesita kita dale tiempo para reza con ele y estudia con el de suyu Palabra. Si hace kita se, hay queda mas hondo el diaton relacion con ele. Si tiene kita buen amistad con Jehova igual con Jose, nunca kita hace maskin cosa que puede hace triste con Ele.—Sant. 4:8.

15. Cosa leccion kita puede aprende na cosa ya sucede con el maga Israelita na desierto? (Maga Hebreo 3:12)

¹⁵ Facil lang desobedece con Jehova aquellos quien ta ulvida que ele el vivo Dios. Considera si cosa ya sucede con el maga Israelita cuando talla sila na desierto. Maskin sabe sila que ta existi si Jehova, ya principia sila man duda si hay dale ba le con el diila necesidad. Gane, ya habla sila: “Junto ba kanaton si Jehova o gendeh?” (Ex. 17:2, 7) Como resulta, yan rebelde sila contra con Dios. Asigurao, no quierre gayot kita queda igual kanila.—Le con el Maga Hebreo 3:12.

16. Cosa puede pone na probanza con el diaton fe?

¹⁶ Posible dificil para kanaton que esta cerca con Jehova por causa na cosa kita ta mira  na mundo. Por ejemplo, manada el gendeh ta creé que ta existi el Dios. Mas pa, mas mucho de aquellos quien ta ignora con el maga ley del Dios dol tiene buen vida. Si ese el cosa kita ta puede mira, puede se pone na probanza con el diaton fe. Maskin pa ta creé kita que ta existi el Dios, baka man duda kita si ayuda ba le kanaton. Ese tambien el cosa ya sinti el quien ya escribi con el Salmo 73. Ya mira le que tiene siempre buen vida aquellos quien ta ignora con el maga ley del Dios. Poreso, ya principia le pensa que envano lang que sirvi con Dios.—Sal. 73:11-13.

17. Cosa puede ayuda kanaton para esta cerca con Jehova?

¹⁷ Cosa el ya puede ayuda con el salmista para corecta con el de suyu mirada? Ya medita le si cosa sucede con aquellos ta ulvida con Jehova. (Sal. 73:18, 19, 27) Ya medita tambien le si cosa el maga beneficio si ta sirvi con Dios el un persona. (Sal. 73:24) Puede tambien kita pensa con el maga bendicion que ya dale kanaton si Jehova. Imagina si cosa el diaton vida si nuay kita sirvi con ele. Si hace kita con ese, puede se ayuda kanaton para esta fiel con Jehova. Y igual con el salmista, puede tambien kita habla: “Bueno para conmigo que queda cerca con Dios.”—Sal. 73:28.

18. Porque kita puede enfrenta con el futuro con confianza?

¹⁸ Puede kita enfrenta con el maskin cosa probanza durante na este ultimo maga dia cay “maga servidor [kita] del Dios vivo y deverasan.” (1 Tes. 1:9) Un deverasan Persona el Dios con quien kita ta adora y hay ayuda gayot le kanaton. Ya experiencia se el de suyu maga siervo de antes y ta experiencia tambien kita se ahora. Gendeh dura, hay llega ya el grande tribulacion. Pero gendeh kita solo enfrenta con ese cay junto kanaton si Jehova. (Isa. 41:10) Ojala, puede kita todo “habla con comfianza: El Señor amo el quien ta ayuda conmigo. Gendeh yo ay tene miedo.”—Heb. 13:5, 6.