ARTICULO 23
CANCION 28 Queda Amigo de Jehova
Quierre si Jehova que Queda Kita De Suyu Visita
“El de mio tolda hay esta entre kanila; hay queda yo el diila Dios.”—EZE. 37:27.
SI COSA PUEDE APRENDE
Sabe si cosa quierre decir que queda visita na figurativo tolda de Jehova y mira si paquemodo le ta cuida kanaton.
1-2. Cosa el invitacion de Jehova na de suyu maga leal siervo?
SI TIENE quien pregunta, ‘Quien si Jehova para contigo?’ cosa tu contesta? Posible habla tu, ‘Si Jehova el de mio Tata, de mio Dios y de mio Amigo.’ Tiene pa otro maga titulo o maga palabra que puede tu habla acerca con Jehova. Pero ta mira ba tambien tu con ele como un persona quien ta invita contigo?
2 Ya compara si Rey David con el relacion de Jehova na De Suyu maga leal siervo na amistad que tiene el un persona na de suyu maga visita. Ya pregunta le: “O Jehova, quien puede visita na de tuyu tolda? Quien puede queda na de tuyu sagrao monte?” (Sal. 15:1) Na este maga palabra, ya puede kita aprende que puede kita queda maga visita de Jehova o de suyu maga amigo. Gendeh ba un bien bonito invitacion gayot este estaba con Jehova?
QUIERRE SI JEHOVA QUE QUEDA KITA DE SUYU MAGA VISITA
3. Quien el primer visita de Jehova y cosa sila ya sinti na uno y otro?
3 Solo lang si Jehova del una. Pero ya llega el tiempo, ya crea le con el de suyu unico Anak. Na ese tiempo, dol ya invita si Jehova con el de suyu primer visita na de suyu tolda y bien alegre le hace con ese. Ya revela el Biblia que “quierre-quierre [si Jehova] man junto” con el de suyu Anak. Y este Anak, “alegre . . . adelante con [Jehova] todo el tiempo.”—Prov. 8:30.
4. Quien pa el ya queda maga visita na tolda de Jehova?
4 Despues, ya crea si Jehova maga angel. Ya invita tambien le kanila para queda de suyu maga visita. Ya llama kanila “maga anak del Dios” y ya menciona el Biblia que alegre sila man junto con Jehova. (Job 38:7; Dan. 7:10) Por manada año, amigo de Jehova aquellos lang quien ta queda na cielo junto con ele. Pero na uliji, ya invita tambien le na de suyu tolda con el maga gente na tierra. Incluido na este maga visita kanda Enoc, Noe, Abraham y Job. Ya refiri con este maga fiel siervo como maga amigo del Dios o quien ya camina “junto con el verdadero Dios.”—Gen. 5:24; 6:9; Job 29:4; Isa. 41:8.
5. Cosa kita puede aprende na profecia que puede le na Ezequiel 37:26, 27?
5 Por manada siglo, ya continua si Jehova invita con el de suyu maga amigo para queda de suyu maga visita. (Le con el Ezequiel 37:26, 27.) Por ejemplo, ya aprende kita na profecia de Ezequiel que quierre gayot el Dios que tene buen relacion con ele el de suyu maga leal siervo. Ya promete le que hace le “un contrata de paz entre kanila.” Ese profecia ta refiri na tiempo cuando aquellos quien tiene esperanza na cielo y aquellos quien tiene esperanza na tierra hay queda unido bajo na de suyu tolda como “un turil.” (Juan 10:16) Ahora ya ese tiempo!
TA CUIDA KANATON EL DIOS MASKIN ONDE KITA TA QUEDA
6. (a) Paquemodo el un persona puede queda visita na tolda de Jehova? (b) Onde puede incuntra con el tolda de Jehova?
6 Na tiempo del Biblia, el tolda amo un lugar onde ta descanza el un persona y ta sirvi este como un proteccion para con ele. Puede expecta el maga visita na ese tolda que hay cuida gayot kanila. Cuando ya dedica kita diaton vida con Jehova, ya queda kita maga visita na de suyu figurativo tolda. (Sal. 61:4) Ta ricibi kita manada espiritual comida y ta puede man junto con aquellos quien ya queda tambien visita de Jehova. Gendeh lang na un locacion el de suyu figurativo tolda. Posible ya puede ya tu anda na otro nacion para atende un especial convencion y ya conoce con otro quien maga visita tambien na tolda del Dios. Si fiel kita ta sirvi con Jehova, puede kita queda visita na de suyu tolda maskin onde man kita ta queda.—Rev. 21:3.
7. Porque kita puede habla que maga visita siempre de Jehova el de suyu maga fiel siervo quien ya muri ya? (Mira tambien con el letrato.)
7 Quetal aquellos maga fiel siervo quien ya muri ya? Puede ba kita habla que maga visita siempre sila na tolda de Jehova? Si, cay vivo sila na memoria de Jehova. Si Jesus ya explica: “Si Moises ganeh mismo ya dale entende que el maga muerto ta resucita cuando . . . ta llama le con el Señor el Dios de Abraham, el Dios de Isaac y el Dios de Jacob. Gendeh Le un Dios del maga muerto, sino del maga vivo, cay para con Ele todo el maga gente vivo.”—Luc. 20:37, 38.
Maskin aquellos maga fiel siervo quien ya muri ya puede siempre queda maga visita na tolda del Dios (Mira con el parapo 7)
MAGA BENEFICIO Y RESPONSIBILIDAD DIATON
8. Cosa el maga beneficio cay visita kita na tolda de Jehova?
8 El un literal tolda puede queda un lugar onde descanza el un persona y sirvi proteccion para con ele. Na igual manera, el tolda de Jehova ta protege con el de suyu maga visita na espiritual peligro y ta dale esperanza kanila. Si esta kita cerca con Jehova, gendeh si Satanas puede causa permanente peligro kanaton. (Sal. 31:23; 1 Juan 3:8) Na nuevo mundo, hay continua protege si Jehova con el de suyu maga fiel amigo gendeh lang na espiritual peligro sino pati na muerte.—Rev. 21:4.
9. Cosa ta expecta si Jehova con el de suyu maga visita?
9 Un grande privilegio gayot que queda visita na tolda de Jehova y tene cerca relacion con ele hasta para cuando. Cosa kita debe hace si quierre kita continua queda de suyu visita? Si invita contigo na casa el un persona, asigurao quierre tu queda un buen visita. Por ejemplo, baka quierre le que quita tu con el de tuyu sapatos antes tu entra y siempre hace tu con ese. Na igual manera, quierre tambien kita sabe si cosa ta pidi si Jehova con aquellos quien quierre continua queda visita na de suyu tolda. El diaton amor con Jehova el manda move kanaton para “hace con Ele alegre na todo maga cosa-cosa.” (Col. 1:10) Pero maskin ta trata kita con Jehova como diaton Amigo, sabe kita que ele tambien el diaton Dios y Tata con quien kita debe respeta. (Sal. 25:14) Gendeh kita debe ulvida con ese. Si tiene kita hondo respeto con ele, puede este ayuda kanaton para evita hace maga cosas que no quierre le. Asigurao quierre kita “camina con humildad” junto con el diaton Dios.—Miq. 6:8.
IGUAL EL TRATAMIENTO DE JEHOVA NA MAGA ISRAELITA
10-11. Na de suyu tratamiento na maga Israelita na desierto de Sinai, paquemodo si Jehova ya dale mira que nuay le con quien tan afavor?
10 Igual el tratamiento de Jehova na todo de suyu maga visita. (Roma 2:11) Puede se kita mira na manera si paquemodo le ya trata con el maga Israelita na desierto de Sinai.
11 Despues le libra con el de suyu maga siervo na Egipto, ya iscuji si Jehova maga sacerdote para sirvi na tabernaculo. Ya iscuji tambien le maga Levita para hace con el otro trabajo alla. Mas ya cuida ba si Jehova con aquellos quien ta sirvi na tabernaculo o con aquellos quien cerca ta queda alli contra con otro? Gendeh, cay igual el tratamiento de Jehova con todo.
12. Na de suyu tratamiento na nacion de Israel, paquemodo si Jehova ya dale mira que nuay le con quien tan afavor? (Exodo 40:38) (Mira tambien con el letrato.)
12 El cada Israelita puede queda amigo de Jehova, maskin cosa pa el diila privilegio o maskin onde sila ta queda. Por ejemplo, ya asigura si Jehova que puede mira el entero nacion con el arigui de celaje y con el arigui de fuego que talli arriba del tabernaculo. (Le con el Exodo 40:38.) Si principia move el celaje para na otro direccion, ta puede mira con ese maskin aquellos bien lejos na tabernaculo. Como resulta, puede sila arregla con el diila maga gamit, recuji con el diila maga tolda y sigui junto na otro maga Israelita. (Num. 9:15-23) Puede oi el todo con el sonor del dos trompeta que ta dale aviso que principia ya sila cambia campo. (Num. 10:2) Entonces, gendeh quierre decir que si el un persona ta queda cerca na tabernaculo, mas cerca le con Jehova. Sino, el todo Israelita puede queda visita de Jehova y puede sila ricibi el de suyu direccion y proteccion. Na igual manera, maskin onde pa kita ta queda ahora, puede kita beneficia na proteccion y amable cuidada de Jehova.
El arreglamiento de Jehova acerca na tabernaculo ta dale mira que igual el de suyu tratamiento con todo (Mira con el parapo 12)
IGUAL EL TRATAMIENTO DE JEHOVA NA MAGA GENTE AHORA
13. Cosa el un manera que ta dale mira si Jehova que igual le ta trata con todo?
13 El cuanto siervo del Dios ahora ta queda cerca na world headquarters o na branch office del maga Testigo de Jehova. Gane, el cuanto ta sirvi na ese maga facilidad. Como resulta, ta puede sila participa na maga trabajo que ta hace na ese maga lugar y ta puede man junto con aquellos quien ta guia na organizacion. El cuanto ta sirvi como maga traveling overseer o na otro forma de special full-time service. Maskin pa nuay tu ese maga assignment, puede tu asigura que ta ama si Jehova con el todo de suyu visita. Y ta dale le kanila todo el cosa sila necesita. (1 Ped. 5:7) El todo siervo de Jehova ta ricibi espiritual comida, direccion y proteccion que necesita sila.
14. Cosa el otro ejemplo que ta dale mira que igual el tratamiento de Jehova con todo?
14 El otro ejemplo que ta dale mira que igual el tratamiento de Jehova con todo amo cuando ya asigura le que el todo gente na mundo puede beneficia con el Biblia. Ya escribi con el Sagrao Escritura na tres lengguaje: na Hebreo, Aramaico y Griego. Mas cerca ba con Jehova aquellos quien ta puede le con el Biblia na original lengguaje contra con aquellos gendeh ta puede le con ese? Gendeh.—Mat. 11:25.
15. Cosa prueba que igual si Jehova ta trata con todo? (Mira tambien con el letrato.)
15 El amistad de Jehova kanaton gendeh ta depende na diaton secular educacion o si sabe kita le con el Biblia na original lengguaje. El todo maga gente na tierra puede beneficia na sabeduria de Jehova, gendeh lang aquellos quien tiene alto educacion. Ya puede man translate con el de suyu Palabra, el Biblia, na miles de maga lengguaje. Poreso, el maga gente na entero mundo puede beneficia na de este enseñanza y aprende si paquemodo sila queda de suyu amigo.—2 Tim. 3:16, 17.
Porque el Biblia un prueba que igual el tratamiento del Dios con todo? (Mira con el parapo 15)
ESTA ACEPTABLE CON JEHOVA
16. Asegun na Maga Actividad 10:34, 35, paquemodo kita esta aceptable con Jehova?
16 Bien grande gayot privilegio que queda maga visita de Jehova na de suyu figurativo tolda. Ele el de con todo bueno, amable y hospitable persona. Mas pa, igual le ta trata con todo maskin cosa pa el diila cultura, educacion, raza, tribo, edad, hombre man o mujer, o maskin de onde pa sila. Pero aquellos lang quien ta sigui con el de suyu maga principio el puede queda de suyu maga visita.—Le con el Maga Actividad 10:34, 35.
17. Onde kita puede incuntra otro informacion acerca si paquemodo esta aceptable con Jehova?
17 Na Salmo 15:1, ya pregunta si David: “O Jehova, quien puede visita na de tuyu tolda? Quien puede queda na de tuyu sagrao monte?” Ya usa si Jehova con ese salmista para contesta con ese maga pregunta. El siguiente articulo hay discuti con el cuanto cosas que debe kita hace para esta aceptable con Jehova.
CANCION 32 Esta na Lao de Jehova!
