Para hace alegre con Jehova, debe kita tiene fe. Pero ya habla el Biblia que “gendeh todo el maga gente tiene fe.” (2 Tes. 3:2) Cuando ya habla este si Pablo, ta refiri le con el “maga gente malo” quien ta persigui con ele. Pero aplicable tambien na otro maga gente el cosa le ya habla acerca na fe. El cuanto maga gente ya ignora con el maga claro evidencia que tiene Creador. (Roma 1:20) El otro ta creé que tiene Dios. Pero ese creencia gendeh bastante para hace alegre con Jehova.

Debe kita queda convincido que ta existi si Jehova y “ta premia” le con aquellos quien tiene fuerte fe. (Heb. 11:6) El fe amo un aspeto del fruta del sagrao espiritu del Dios. Puede kita ricibi el sagrao espiritu si pidi kita se con Jehova na rezo. (Luc. 11:9, 10, 13) El otro manera para ricibi con ese espiritu amo si le kita con el Biblia. Despues, puede kita medita con el cosa kita ya le y pricura aplica con el cosa kita ya aprende. Na ese manera, el espiritu de Jehova puede ayuda kanaton que tene el clase de fe que ta hace alegre con ele.