Ya nace yo del Deciembre 22, 1929, na Noville. Un diutay barrio este que tiene nueve simentera que cerca na Bastogne, un ciudad na Belgium. Alegre yo ya engranda alla na simentera junto con el de mio maga mayores. Iyo pati el de mio menor hermano que si Raymond todo el dia ta saca leche na diamon maga vaca y ta ayuda kame na cosecha na diamon simentera. Na diamon barrio, todo kame tan ayudajan.

El de mio mayores que si Emile y Alice maga devoto Catolico. Ta anda sila na misa cada Domingo. Pero del maga 1939, tiene maga pioneer que estaba na England el quien ya anda na diamon barrio. Ya ofrece sila con el de mio tata el magasin Consolation (ahora ta llama Awake!) que regular le puede ricibi. Ya puede dayun realiza de mio tata que deverasan el cosa le ta le poreso ya principia tambien ele le con el Biblia. Del primero, enbuenamente el tratamiento del diamon maga vecinos kanamon. Pero cuando nuay mas atende misa si Papang, ya principia sila man contra kanamon. Tan pressure sila con ele que esta na Catolico y grabe el diila discusion acerca con este.

Ta sinti gayot yo triste si ta mira yo que tan pressure sila con Papang poreso con todo corazon yo ya reza con Dios y ya pidi con el De Suyu ayuda como cosa ya menciona na principio de este articulo. Alegre gayot yo cuando ya descanza ya man pressure el diamon maga vecinos con el de mio tata. Ya queda yo convincido que si Jehova “el quien ta oi con el rezo.”

El Nazi Germany ya ataca con el Belgium del Mayo 10, 1940. Como resulta, manada maga gente el ya anda na otro nacion. El diamon familia ya evacua na sur parte del France. Mientras ta viaja,  ta pasa kame na maga peligroso lugar donde tan guerra el maga soldao de Germany y de France.

Cuando ya bira kame na diamon simentera, ya puede kame mira que mayoria del diamon maga las cosas el ya perde. El diamon perro lang que si Bobbie el ya queda alla. Poreso, ya puede yo pensa, ‘Porque tiene sufrimiento y guerra aqui na mundo?’

Na aquel tiempo, ya beneficia gayot kame na visitada de Hermano Emile Schrantz, a un pioneer anciano. Ya usa le con el Biblia para explica si porque tiene sufrimiento y ya contesta tambien le con el otro pa de mio maga pregunta. Mas ya queda hondo el de mio relacion con Jehova y ya queda convincido que ele el Dios de amor.

Maskin antes pa acaba el guerra, pirmi ta puede asocia el diamon familia na maga hermano. Del Agosto 1943, si Hermano José-Nicolas Minet ya visita kanamon para dale un talk. Ya pregunta le, “Quien quierre bautiza?” Ya alza mano de mio tata y iyo tambien. Ya bautiza kame na un diutay rio.

Del Deciembre 1944, el maga soldao de Germany ya hace el diila ultimo ataque na oeste parte del Europe. Ya llama con este Battle of the Bulge. Ta queda kame cerca onde ta sucede el guerra poreso maga un mes kame ya esta na diamon basement. Un dia cuando ya sale yo para dale come con el maga animal, tiene maga grande bala el ya rebenta na techo del diamon camarin. Tiene un Americano soldao ya grita, “Hapa!” Ya corre yo y yan hapa cerca con ele. Despues, ya pone le de suyu helmet na de mio cabeza para protege conmigo.

Despues del guerra, regular kame ta puede comunica con el maga hermano y hermana na congregacion na Liège, maga 90 kilometro de lejos kanamon. Nuay dura, ya puede kame forma un diutay grupo na Bastogne. Ya principia yo trabaja na oficina de impuesto y ya tiene yo el oportunidad que estudia law. Despues, ya trabaja yo na un oficina de gobierno. Del 1951, ya organiza kame un diutay asemblea de circuito na Bastogne. Maga ciento gente el ya atende, incluido el un pioneer hermana que si Elly Reuter. Yan  bike le por 50 kilometro para puede atende. Despues del cuanto tiempo, ya queda kame man novio y novia, y ya pensa casa. Ya ricibi si Elly un invitacion para atende na Gilead School na United States. Ya escribi le na world headquarters para explica si porque le gendeh puede acepta con el invitacion. Si Hermano Knorr, quien ta guia con el maga siervo de Jehova na aquel tiempo, ya contesta na carta y ya habla que baka llega el tiempo, puede le atende na Gilead junto con el de suyu marido. Ya casa kame del Febrero 1953.

Na ese mismo año, ya atende kame de Elly na New World Society Assembly que ya hace na Yankee Stadium, New York. Na aquel tiempo, ya conoce yo con el un hermano quien ya ofrece conmigo un buen trabajo y ya invita le conmigo que cambia na United States. Despues kame reza con Jehova acerca con ese, ya decidi kame de Elly que gendeh acepta con ese trabajo y bira na Belgium para suporta con el un diutay grupo na Bastogne que tiene maga diez publisher. Pagka-sunod año, ya tiene kame un anak hombre, si Serge. Pero maka-triste cay despues del siete meses, ya enferma si Serge y ya muri. Ya habla kame con Jehova si paquemodo kame de dolorido y ya hace kanamon fuerte el esperanza de resureccion.

Del Octubre 1961, ya puede yo incuntra un part-time trabajo que ta permiti conmigo man pioneer. Pero, na aquel mismo dia, ya llama conmigo el branch servant na Belgium. Ya pregunta le conmigo si puede ba yo sirvi como un circuit servant (ahora ta llama circuit overseer). “Puede ba kame sirvi una como maga pioneer antes acepta con ese assignment?” ya pregunta yo. Ya conforma el branch office. Despues sirvi como maga pioneer por ocho meses, ya principia kame sirvi na circuit work del Septiembre 1962.

Despues sirvi na circuit work por dos año, ya invita kanamon que sirvi na Bethel na Brussels. Ya principia kame sirvi alla del Octubre 1964. Na diamon nuevo assignment, ya ricibi kame manada bendicion. Corto tiempo despues visita si Hermano Knorr na Bethel del 1965, ya iscuji conmigo para sirvi como el branch servant. Despues del cuanto tiempo, ya invita kanamon de Elly que atende na ika-41 clase de Gilead School. Ya sucede gayot el cosa ya habla si Hermano Knorr 13 año ya el ya pasa! Despues gradua, ya bira kame na Belgium Bethel.

Por manada año, ya puede yo usa con el de mio saber na law para ayuda defende con el diaton libertad de adoranza na Europe y na otro pa maga lugar. (Fil. 1:7) Como resulta, ya puede yo conoce manada oficial na mas de 55 nacion donde ya prohibi o ya pone restriccion con el diaton trabajo. En vez de habla acerca na de mio experiencia na law, ta introduci yo con el de mio mismo cuerpo como “un siervo del Dios.” Pirmi yo ta pidi el guia de Jehova cay sabe yo que “el corazon del rey [o del juez] dol igual na agua que ta corre na mano  de Jehova. Ta causa Le con este para guinda na direccion onde Le quierre.”—Prov. 21:1.

Ta acorda pa yo con el de mio experiencia cuando yan cuento yo con el un miembro del European Parliament. Manada beses ya pidi yo que man cuento con ele y na uliji, ya conforma le con ese. Ele ya habla, “Cinco minuto lang yo puede man cuento contigo.” Ya agacha yo y ya principia reza. Ya nervia le y ya pregunta conmigo si cosa yo ta hace. Ya mira yo con ele y ya habla, “Ya rindi yo gracias con Dios cay uno tu del de suyu maga ministro.” Ya pregunta le, “Cosa tu quierre decir?” Ya dale yo mira con ele el Roma 13:4. Un Protestante le poreso ya queda le interesao con ese texto. Como resulta, media hora kame ya puede man cuento y ya tiene buen exito el diamon miting. Gane, ya habla le que ta aprecia le con el trabajo que ta hace el maga Testigo de Jehova.

Por manada año, manada caso ya enfrenta el maga siervo de Jehova na Europe acerca na neutralidad, child custody, pagada de impuesto y otro pa. Un privilegio gayot que personal puede mira si paquemodo si Jehova ya ayuda para ganá kame na maga caso. Ya ganá ya mas de 140 caso el maga Testigo de Jehova na European Court of Human Rights!

Del maga 1990, yan ayudajan kame de Hermano Philip Brumley, de world headquarters, y de Hermano Valter Farneti, de Italy, para ayuda con el maga hermano na Cuba para tene mas libertad ciendo tiene restriccion el diaton trabajo alla. Ya escribi yo na embassy de Cuba na Belgium y ya puede yo man cuento con el un oficial. Durante el diamon primer maga miting, nuay kame puede solva el problema que ya causa con el gobierno para pone restriccion con el diaton trabajo alla.

Despues pidi el direccion de Jehova na rezo, ya pidi kame permiso para imbia 5,000 Biblia na Cuba y ya permiti kanamon. Ya llega enbuenamente el maga Biblia y ya puede distribui con el maga hermano poreso puede kame habla que ta bendici si Jehova con el diamon maga esfuerzo. Poreso, ya pidi kame otravez permiso que imbia pa 27,500 Biblia. Ya conforma tambien se el gobierno. Alegre gayot yo cay ya puede yo ayuda con el maga hermano y hermana na Cuba que tene un personal copia del Biblia.

Manada beses yo ya visita na Cuba para ayuda con el maga hermano y hermana que tene mas libertad na diila adoranza. Por causa con ese, ya tiene yo buen relacion na maga oficial de gobierno alla.

Del 1994, mas de 1,000,000 gente el ya muri por causa na grabe violencia contra na maga Tutsi na Rwanda. Maka-triste cay ya muri el cuanto del diaton maga hermano y hermana. Nuay dura, ya pidi con el un grupo del maga hermano que extende ayuda na maga hermano y hermana na ese nacion.

Cuando ya llega el diamon grupo na Kigali, el centro del Rwanda, ya puede kame mira que manada tiro de bala el maga pader del translation office y el lugar onde ta pone diaton maga publicacion. Ya oi kame manada istoria acerca na maga hermano y hermana con quien ya mata de bolo. Pero, ya oi tambien kame maga istoria si paquemodo el maga hermano y hermana ya dale mira amor con uno y otro. Por ejemplo, ya conoce kame con el un Tutsi hermano con quien ya protege el un familia que maga Hutu Testigo y ya esconde con ele na tierra por 28 dia. Durante na un miting na Kigali, ya dale kame comforta y ya anima con el mas de 900 hermano y hermana.

Despues, ya anda kame na Zaire (que Democratic Republic of the Congo ahora) para busca con el maga hermano y hermana de Rwanda quien ya evacua na refugee camp cerca na ciudad de Goma. Gendeh kame ta puede incuntra kanila poreso ya reza kame con Jehova que guia kanamon para kanila. Despues, tiene un hombre quien ya atraca kanamon y ya pregunta kame con ele si tiene ba le conoce maga Testigo de Jehova. “Un Testigo iyo,” ya habla le. “Lleva yo con ustedes na maga hermano quien ta atende kanamon.” Despues man cuento con este maga hermano, ya anda kame con el maga 1,600 hermano y hermana para dale comforta y anima kanila. Ya le tambien kame kanila el carta estaba na Cuerpo Gobernante. Alegre gayot sila cuando ya oi con este maga palabra: “Incluido ustedes pirmi na diamon maga rezo. Sabe kame que gendeh gayot si Jehova deja con ustedes.” Deverasan gayot el cosa ya habla el Cuerpo Gobernante cay ahora, mas de 30,000 Testigo ya el alegre ta sirvi con Jehova na Rwanda!

Despues del cerca 58 año de casao, ya muri el de mio amable mujer que si Elly del 2011. Ya habla yo con Jehova na rezo si paquemodo yo de dolorido y ya dale le comforta conmigo. Ya ayuda tambien conmigo cuando ya habla yo con otro el buen noticia acerca na Reino.

Maskin pa mas de 90 año ya yo, ta participa siempre yo na ministerio cada semana. Alegre yo puede ayuda na Legal Department aqui na branch na Belgium, cunta con otro de mio experiencia y anima con el maga jovenes na Bethel.

Maga 84 año ya el ya pasa, ya reza yo con Jehova por primer vez. Alli ya principia el de mio cerca relacion con ele. Ta rindi gayot yo gracias cay na entero vida de mio, ya oi gayot si Jehova con el de mio maga rezo.—Sal. 66:19. b