1. Base na 1 Pedro 3:8, porque kita alegre man junto con el maga gente quien ta considera con el diaton sentido y ta pensa diaton bien?

ALEGRE kita man junto con el maga gente quien ta considera diaton sentido y ta pensa diaton bien. Ta pricura sila pone con el diila mismo cuerpo na diaton situacion para puede sila sabe si cosa kita ta pensa y ta sinti. Ta puede sila nota si cosa kita necesita y ta ayuda kanaton maskin antes pa kita pidi ayuda. Ta aprecia kita con aquellos quien ta dale mira “empatia” * kanaton.​—Le con el 1 Pedro 3:8, NW.

2. Porque necesita kita el esfuerzo para dale mira empatia?

² Como maga Cristiano, todo kita quierre dale mira empatia. Pero el deverasan, gendeh se pirmi facil para hace. Porque? El un razon amo cay imperfecto kita. (Rom. 3:23) Natural para kanaton que pensa lang con el diaton mismo cuerpo poreso necesita kita hace esfuerzo para pensa el bien del otro. Posible, dificil tambien para kanaton dale mira empatia por causa na manera si paquemodo kanaton ya hace engranda o na cosa ya pasa kanaton de antes. Mas pa, puede influencia kanaton el maga gente alrededor kanaton. Na este ultimo maga dia, manada el gendeh ta considera con el sentido del otro sino ta ama lang con el diila mismo cuerpo. (2 Tim. 3:1, 2) Maskin pa ansina, cosa puede ayuda kanaton para dale mira empatia?

3. (a) Paquemodo kita mas puede dale mira empatia? (b) Cosa kita considera na este articulo?

³ Si imita kita con Jehova y con el de suyu Anak, si Jesucristo, mas puede kita dale mira empatia. Si Jehova amo un Dios de amor y ya dale le el de con todo buen ejemplo si paquemodo  dale mira empatia con otro. (1 Juan 4:8) Ya puede gayot imita si Jesus con el personalidad del de suyu Tata. (Juan 14:9) Cuando taqui pa le na tierra, ya demonstra le si paquemodo el gente puede dale mira lastima. Na este articulo, considera kita una si paquemodo si Jehova y si Jesus ya dale mira empatia. Despues, discuti kita si paquemodo kita puede imita kanila.

4. Paquemodo el Isaias 63:7-9 ta dale mira que ta considera si Jehova con el sentido del de suyu maga siervo?

⁴ El Biblia ta enseña kanaton que ta considera si Jehova el sentido del de suyu maga siervo. Por ejemplo, considera si cosa ya sinti si Jehova cuando el maga Israelita ya experiencia maga probanza. Ya habla el Biblia: “Na todo diila maga sufrimiento, ya sinti le duele.” (Le con el Isaias 63:7-9.) Por medio de profeta Zacarias, ya habla si Jehova que si ta maltrata con el de suyu maga siervo igual lang se como ta maltrata con ele. Ele ya habla na de suyu maga siervo: “Si quien ta mete con ustedes, ta mete con el de mio ojos.” (Zac. 2:8) Tiene gayot empatia si Jehova na de suyu maga siervo!

5. Dale ejemplo si paquemodo si Jehova ya actua para ayuda con el de suyu maga siervo.

⁵ Gendeh lang basta ta sinti lastima si Jehova con el de suyu maga siervo quien ta sufri. Ta actua le para ayuda kanila. Por ejemplo, cuando el maga Israelita ya sufri como esclavo na Egipto, ya entende si Jehova con el diila dolor y quierre le alivia kanila. Si Jehova ya habla con Moises: “Ya puede yo mira el sufrimiento del de mio maga siervo . . . y ya oi yo con el diila llantos . . . Sabe gayot yo el dolor que ta sinti sila. Abaja yo para salva kanila na mano del maga Egipcio.” (Ex. 3:7, 8) Por causa cay ya sinti lastima si Jehova con el de suyu maga siervo, ya libra le kanila desde na Egipto. Cuanto siglo ya pasa, ya ataca el maga enemigo con el maga Israelita na tierra que ya promete kanila. Cosa ya sinti si Jehova? “Ya tiene lastima kanila si Jehova na diila maga llantos cay ta maltrata y ta abusa kanila.” Otravez, el empatia ya manda move con Jehova para ayuda con el de suyu maga siervo. Ya imbia le maga juez para salva con el maga Israelita na mano del diila maga enemigo.—Jue. 2:16, 18.

6. Dale ejemplo si paquemodo si Jehova ya dale mira consideracion con el sentido del un persona quien gendeh justo el pensamiento.

 ⁶ Ta dale mira consideracion si Jehova con el sentido del de suyu maga siervo maskin pa gendeh pirmi justo el cosa sila ta pensa. Considera el ejemplo de Jonas. Ya imbia si Jehova con este profeta para predica con el mensaje de juzgamiento para na maga Ninevita. Cuando ya arripinti sila, nuay kanila destroza el Dios. Pero gendeh alegre si Jonas na decicion de Jehova. “Bien rabiao” le por causa cay nuay cumpli el de suyu profecia que hay destroza con el Nineve. Pero si Jehova paciencioso con Jonas y ya ayuda con ele cambia de suyu pensamiento. (Jon. 3:10–4:11) Ya puede entende si Jonas si cosa ta enseña con ele si Jehova y ya usa pa gane con ele para escribi el de suyu istoria para na diaton beneficio.​—Rom. 15:4. *

7. Cosa kita puede asigura base na tratamiento de Jehova con el de suyu maga siervo?

⁷ El tratamiento de Jehova na de suyu maga siervo de antes ta dale kanaton asiguranza que tiene le empatia para na de suyu maga siervo. Sabe le el dolor y sufrimiento del cada uno kanaton. Si Jehova “deverasan sabe si cosa el na corazon del gente.” (2 Cron. 6:30) Ta entende le con el diaton maga limitacion y si cosa kita ta pensa y ta sinti. Y “gendeh Ele ay permiti que [kita] ay tene tentacion mas grande pa que con el [diaton] fuerza.” (1 Cor. 10:13) Ese promesa ta dale gayot comforta!

8-10. Cosa el maga razon si porque si Jesus ya puede dale mira empatia con otro?

⁸ Como un gente aqui na tierra, si Jesus tiene empatia con otro. Tiene tres razon si porque ya puede le dale mira ese sentido. Una, como ya menciona enante, ya puede gayot imita si Jesus con el personalidad del de suyu Tata. Igual con Jehova, ta ama si Jesus con el maga gente. Maskin alegre le na todo cosas que ya ayuda le con Jehova hace, “mas alegre [le] con el maga anak del maga gente.” (Prov. 8:31) El amor ya manda move con Jesus para considera el sentido del otro.

⁹ Ika-dos, igual con Jehova, ta puede si Jesus le con el corazon. Sabe le si cosa el maga motivo y sentido del maga gente. (Mat. 9:4; Juan 13:10, 11) Poreso cuando ya puede nota si Jesus con el maga gente que bien triste, el empatia ya manda move con ele para dale comforta kanila.​—Isa. 61:1, 2; Luc. 4:17-21.

¹⁰ Ika-tres, ya experiencia mismo si Jesus con el maga dificultad que ya enfrenta el maga gente. Por ejemplo, ya engranda si Jesus na un pobre familia. Cuando junto le ta trabaja con el de suyu tata-tata, si Jose, ya aprende si Jesus hace maga pesao trabajo. (Mat. 13:55; Mar. 6:3) Ta sale que ya muri si Jose antes el fin del ministerio de Jesus. Poreso, posible ya sinti si Jesus el dolor si muri el un persona que importante kanaton. Y sabe tambien si Jesus si cosa el situacion si el cuanto na familia otro-otro el creencia. (Juan 7:5) Ese maga circumstancia y otro pa ya puede ayuda con Jesus para entende el maga probanza y sentido del maga ordinario gente.

11. Cuando ya queda mas claro el empatia de Jesus? Explica. (Mira con el letrato na cover.)

¹¹ Mas ya queda claro el empatia de Jesus cuando ya hace le maga milagro. Nuay lang hace maga milagro si Jesus por causa cay necesita le se hace. “Ya tene lastima” si Jesus con aquellos quien ta sufri. (Mat. 20:29-34; Mar. 1:40-42) Por ejemplo, imagina si cosa ya  sinti si Jesus cuando ya lleva le con el un bungul lejos na grupo y ya cura con este o cuando ya resucita le con el unico anak del un viuda. (Mar. 7:32-35; Luc. 7:12-15) Tiene empatia si Jesus con aquellos maga gente y quierre le ayuda kanila.

12. Paquemodo el Juan 11:32-35 ya dale mira que si Jesus tiene empatia con Marta y Maria?

¹² Ya dale mira empatia si Jesus con Marta y Maria. Cuando ya puede le mira que dolorido sila por causa cay ya muri el diila hermano, si Lazaro, “si Jesus ya llora.” (Le con el Juan 11:32-35.) Nuay lang le llura por causa cay gendeh mas le puede man junto con el de suyu amigo ciendo sabe le que hay resucita le con Lazaro. Sino, ya llura si Jesus cay sabe le si paquemodo ta sufri el de suyu maga amiga na muerte de Lazaro.

13. Cosa el beneficio kanaton cay sabe kita que tiene empatia si Jesus para na maga gente?

¹³ Ta beneficia kita si ta aprende kita acerca na empatia de Jesus. Y ta ama kita con ele por causa cay ta trata le con empatia con otro. (1 Ped. 1:8) Alegre kita sabe que ta rula ya le ahora como Rey na Reino del Dios y ta puede este anima kanaton. Gendeh mas tarda, hay termina le con el todo sufrimiento. Por causa cay ya vivi si Jesus aqui na tierra como un gente, ele el de con todo cualificao para quita con el dolor y sufrimiento que ya causa el rulanza de Satanas. Un bendicion gayot que tiene kita un Rey que ta “puede sinti el paca-maluya diaton.”​—Heb. 2:17, 18; 4:15, 16.

14. Cosa kanaton manda move hace el Efeso 5:1, 2?

¹⁴ Si medita kita el ejemplo de Jehova y de Jesus, manda este move kanaton para mas dale mira empatia con otro. (Le con el Efeso 5:1, 2.) Gendeh kita ta puede le corazon igual kanila. Maskin pa ansina, puede kita pricura entende el sentido y maga necesidad del otro. (2 Cor. 11:29) Gendeh igual na maga gente na mundo que ta pensa lang el diila mismo cuerpo, ta pricura kita busca el interes gendeh lang del diaton mismo cuerpo sino el interes tambien del otro.​—Fil. 2:4.

15. Quien el mas necesita dale mira empatia?

¹⁵ El maga anciano na congregacion el mas necesita dale mira empatia. Sabe sila que responsable sila con Jehova si paquemodo sila ta cuida con el maga carnero. (Heb. 13:17) Para puede ayuda con el maga hermano y hermana, necesita tiene empatia el maga anciano. Paquemodo se sila puede dale mira?

16. Cosa ta hace el un buen anciano y porque este importante?

¹⁶ El un buen anciano ta dale tiempo con el maga hermano y hermana. Ta pregunta le y ta oi enbuenamente y con paciencia. Bien importante se si el un hermano quierre habla si cosa le ta pensa y ta sinti pero no sabe le si paquemodo se habla. (Prov. 20:5) Si el un anciano con todo corazon ta dale el de suyu tiempo para na maga hermano y hermana, ta tiene mas confianza, buen amistad y amor entre kanila.​—Act. 20:37.

17. Cosa calidad del maga anciano el bien importante para na manada maga hermano y hermana? Dale ejemplo.

¹⁷ Manada maga hermano y hermana ta habla que el empatia amo el bien importante calidad que puede tiene el maga anciano na congregacion. Porque? Si Adelaide ya habla: “Mas facil man cuento kanila cay sabe tu que hay entende sila contigo.” Ele ya omenta: “Si tan cuento tu kanila, puede tu mira na diila reaccion que tiene sila empatia contigo.” Un hermano quien ya aprecia el manera del tratamiento del un anciano, ya habla: “Ya puede yo mira que yan luha el un anciano cuando ya relata yo con ele de mio situacion.  Gendeh gayot yo con aquel puede ulvida.”​—Rom. 12:15.

18. Paquemodo kita puede cultiva el empatia con otro?

¹⁸ Siempre, gendeh lang el maga anciano el necesita dale mira empatia. Todo kita puede cultiva con este calidad. Paquemodo? Pricura entende el maga dificultad que ta enfrenta el diaton familia y maga hermano y hermana na fe. Dale mira que interesao tu con el maga teenager na congregacion, con el maga enfermo, maga de edad y aquellos quien tiene familia que ya muri. Pregunta si quetal sila. Oi enbuenamente si ta habla sila contigo si cosa sila ta sinti. Manda kanila sinti que deverasan tu ta entende diila situacion. Ofrece ayuda na maskin cosa manera posible. Si hace kita con este, ta dale kita mira que tiene kita deverasan amor.—1 Juan 3:18.

19. Porque necesita kita man adjust si ta pricura kita ayuda con otro?

¹⁹ Necesita kita man adjust si ta pricura kita ayuda con otro. Porque? Por causa cay diferente el reaccion del maga gente na maga dificultad. El los demas con gana man cuento pero el otro, no quierre man cuento acerca na diila maga problema. Quierre kita ayuda kanila pero debe kita evita maga pregunta que bien personal. (1 Tes. 4:11) Maskin ta habla sila kanaton si cosa sila ta sinti, posible gendeh kita pirmi uyun na cosa sila ta habla. Pero debe kita acorda que amo se sila ta sinti. Poreso, quierre kita oi anay kanila antes kita converza.​—Mat. 7:1; Sant. 1:19.

20. Cosa kita considera na siguiente articulo?

²⁰ Quierre kita dale mira empatia na congregacion pero quierre tambien kita demonstra con este bonito calidad na diaton ministerio. Paquemodo kita dale mira empatia si ta hace kita maga dicipulo? Considera kita con ese na siguiente articulo.