1. Cosa el uno na maga bonito aspeto del personalidad de Jesus? Explica.

UNO na maga bonito aspeto del personalidad de Jesus amo el de suyu abilidad entende con el maga dificultad que ta enfrenta el maga imperfecto gente. Cuando taqui le na tierra, ya queda le ‘alegre junto con aquellos quien alegre’ y ya “llora junto con aquellos ta llora.” (Rom. 12:15) Por ejemplo, cuando con alegria ya bira el de suyu maga dicipulo despues del diila predicacion, el sagrao espiritu “ya llena con Jesus de alegria.” (Luc. 10:17-21) Pero cuando ya mira si Jesus si paquemodo de triste el maga gente cay ya muri si Lazaro, “ya sinti gayot Le na su corazon y ya queda Le bien triste.”​—Juan 11:33.

2. Cosa ya ayuda con Jesus para dale mira empatia na maga gente?

² Cosa ya ayuda con este perfecto gente para queda bien lastimoso y tiene compasion na maga imperfecto gente? Una, ta ama si Jesus con el maga gente. Como cosa ya menciona na articulo que una con este, “mas alegre [le] con el maga anak del maga gente.” (Prov. 8:31) Ese amor amo el ya manda move con ele para ledia con el maga gente y queda familiar si paquemodo sila ta pensa. Si apostol Juan ya habla: “Sabe ya [si Jesus] si cosa sila tiene na diila corazon.” (Juan 2:25) Tiene empatia si Jesus con otro. El maga gente ya puede mira el de suyu amor para kanila y ya oi sila con el mensaje del Reino. Si tiene tambien kita igual empatia para na maga gente, mas puede kita ayuda con aquellos con quien kita ta predica.​—2 Tim. 4:5.

3-4. (a) Si tiene kita empatia, paquemodo kita mira con el diaton ministerio? (b) Cosa kita aprende na este articulo?

³ Sabe si apostol Pablo que necesita le predica y amo tambien se el diaton obligacion. (1 Cor. 9:16) Pero si tiene kita empatia, hay mira kita con el diaton ministerio gendeh lang como un obligacion. Quierre kita dale mira que ta pensa kita el bien  del maga gente y quierre kita ayuda kanila. Sabe kita que “mas grande el alegria de aquel quien ta dale contra con el quien ta recivi.” (Act. 20:35) Si ese el diaton mirada, mas man enjoy kita con el diaton ministerio.

⁴ Na este articulo, aprende kita si paquemodo dale mira empatia na diaton ministerio. Una, sabe kita si cosa kita puede aprende na cosa ta sinti si Jesus na maga gente. Despues, discuti kita con el cuatro manera que puede kita imita con el de suyu ejemplo.​—1 Ped. 2:21.

5-6. (a) Con quien si Jesus ya dale mira empatia? (b) Porque ya tiene lastima si Jesus con el maga gente con quien le ya predica, como cosa ya predicta na Isaias 61:1, 2?

⁵ Considera con el ejemplo si paquemodo ya dale mira empatia si Jesus. Na un ocasion, bien cansao si Jesus y el de suyu maga dicipulo cay ya predica sila el buen noticia sin descanso. Gane, “noay mas sila tiempo maskin para come.” Poreso, ya lleva le kanila na “un lugar silencio donde puede sila esta sila-sila lang” para “descansa un rato.” Pero, manada gente el ya anda na lugar onde quierre anda si Jesus y el de suyu maga dicipulo. Cuando ya llega si Jesus alla y ya mira con el maga gente, cosa el de suyu reaccion? “Ya tene Le lastima * canila, cay igual sila como maga carnero noay pastor. Y ya principia Le insiña canila por largo tiempo.”​—Mar. 6:30-34.

⁶ Nota si porque si Jesus ya tiene lastima o empatia con el maga gente. Ya puede le observa que “igual sila como maga carnero noay pastor.” Posible, ya mira si Jesus que el cuanto kanila pobre y necesita trabaja gayot para mantene con el diila familia. Baka el otro kanila bien triste cay tiene quien ya muri na diila familia. Si ese el razon, claro que ya entende  si Jesus el diila situacion. Como cosa ya discuti na articulo que una con este, posible que ya enfrenta si Jesus con el cuanto de este maga problema. Ta pensa le con el diila bien y quierre le dale comforta kanila.​—Le con el Isaias 61:1, 2.

7. Paquemodo kita puede imita con Jesus?

⁷ Cosa kita puede aprende con Jesus? Igual con ele, alrededor tambien kanaton ahora el maga gente que igual “como maga carnero noay pastor.” Ta enfrenta sila manada problema. Tiene kita el cosa sila necesita​—el mensaje acerca el Reino. (Rev. 14:6) Poreso igual con Jesus, ta predica kita el buen noticia cay tiene kita “lastima con el maga humilde y maga pobre.” (Sal. 72:13) Tiene kita compasion con el maga gente y quierre kita ayuda kanila.

8. Cosa el un manera que puede kita dale mira empatia na ministerio? Dale un ejemplo.

⁸ Paquemodo kita puede dale mira empatia con aquellos con quien kita ta predica? Necesita kita pone diaton mismo cuerpo na diila situacion y trata kanila na manera que quierre kita trata kanaton. * (Mat. 7:12) Discuti kita con el cuatro manera donde puede kita se hace. Una, considera el necesidad del cada individual. Si ta predica kita el buen noticia, semejante el cosa kita ta hace na cosa ta hace el un doctor. El un buen doctor ta considera el necesidad del cada paciente. Ta pregunta le y ta oi enbuenamente mientras ta habla el paciente si cosa el de suyu condicion o si cosa le ta sinti. En vez de dale dayun el doctor el medicina que ya puede le pensa, posible deja anay le pasa cuanto tiempo para observa con el condicion del paciente y despues dale el justo medicina. Na igual manera, gendeh debe igual-igual el diaton presentacion na todo gente con quien kita predica. Sino, ta considera kita el circumstancia y opinion del cada individual.

9. Cosa kita gendeh debe pensa? Explica.

⁹ Si tiene kita con quien ta predica, gendeh kita debe pensa que sabe ya kita el de suyu circumstancia o cosa le ta creé y porque le ta creé con ese. (Prov. 18:13) Sino, con respeto pregunta con ele. (Prov. 20:5) Si aceptable na de ustedes cultura, pregunta acerca na de suyu trabajo, familia, experiencia y de suyu opinion. Si ta pregunta kita, ta sabe kita si cosa sila deverasan necesita. Si ya puede ya kita se sabe, puede kita dale mira empatia kanila y dale el cosa sila necesita igual na cosa ya hace si Jesus.​—Compara na 1 Corinto 9:19-23.

10-11. Harmonia na 2 Corinto 4:7, 8, cosa el ika-dos manera que puede kita dale mira empatia? Dale un ejemplo.

¹⁰ Ika-dos, pruba imagina si cosa clase de vida sila posible tiene. Puede kita entende  el diila situacion cay como maga imperfecto gente, todo kita ta enfrenta maga problema. (1 Cor. 10:13) Sabe kita que dificil el vida na este presente sistema. Ta puede kita aguanta por causa lang na ayuda de Jehova. (Le con el 2 Corinto 4:7, 8.) Pero pensa con aquellos quien nuay buen relacion con Jehova. Bien dificil para kanila vivi na este mundo que nuay el de suyu ayuda. Igual con Jesus, tiene kita lastima kanila y quierre kita predica kanila el “buen noticia acerca na cosas que mas bueno.”​—Isa. 52:7.

¹¹ Considera el ejemplo del un hermano, si Sergey. Antes le sabe el verdad, huyain gayot le. Tan dificil le man cuento con otro. Na uliji, yan Bible study le. “Mientras ta estudia yo con el Biblia, ya aprende yo que el maga Cristiano necesita habla con otro el cosa sila ta creé,” ya habla si Sergey. “Ya sinti yo que gendeh gayot yo se puede hace.” Pero, ya realiza le si paquemodo de bien dificil el vida del maga gente cay no conoce sila con Jehova. “Ya dale conmigo alegria y paz na pensamiento el maga nuevo cosas que ta aprende yo,” ya habla le. “Sabe yo que necesita tambien el otro aprende con este maga verdad.” Mientras ta tiene mas empatia si Sergey, mas ta tiene tambien le coraje predica. “Nuay gayot yo expecta,” habla si Sergey, “que omenta el de mio confianza na cuerpo cay ta converza yo con otro acerca na Biblia. Ya hace tambien se fuerte con el de mio fe.” *

12-13. Porque kita necesita tiene paciencia con aquellos con quien kita ta enseña? Dale ilustracion.

¹² Ika-tres, tiene paciencia con aquellos con quien tu ta enseña. Acorda que posible nuevo para kanila el cuento verdad na Biblia que bien familiar kita. El otro, convincido gayot na cosa sila ta creé. Posible que importante para kanila el diila religion cay amo este ta hace unido con el diila familia, cultura y comunidad. Paquemodo kita puede ayuda kanila?

¹³ Considera este ilustracion: Cosa sucede si  necesita cambia con el buluk y daan puente? Mas mucho, ta usa anay con el daan puente mientras ta construi con el nuevo puente. Si puede ya usa con el nuevo puente, despues pa puede bungca con el daan. Na igual manera, si quierre kita que deja el maga gente con el diila “daan” creencia, necesita anay kita ayuda kanila tiene hondo apreciacion con el maga “nuevo” verdad​—maga enseñanza na Biblia que gendeh sila familiar del primero. Despues de ese, amo pa sila queda preparao abandona con el diila daan creencia. Posible, ta necesita tiempo para puede ayuda con el maga gente hace ese cambio.​—Rom. 12:2.

14-15. Paquemodo kita ayuda con aquellos no sabe tanto o nuay idea acerca na esperanza de vida eterna na paraiso tierra? Dale un ejemplo.

¹⁴ Si tiene kita paciencia na maga gente na ministerio, gendeh kita expecta que entende o acepta dayun sila con el verdad na Biblia maskin primer vez pa sila ya oi con ese. Sino, el empatia hay manda move kanaton para ayuda kanila hinay-hinay entende si cosa el Biblia ta habla. Como un ejemplo, considera si paquemodo kita ayuda con el un persona para entende el esperanza del vida eterna na paraiso tierra. Manada el no sabe tanto o nuay idea acerca con este enseñanza. Posible, ta creé sila que el muerte amo el fin del todo. O baka ta pensa sila que todo maga buen gente hay guinda na cielo. Paquemodo kita puede ayuda kanila?

¹⁵ Este el un manera si paquemodo el un hermano ya ayuda con otro para entende acerca con ese esperanza. Una, ya le ele con el Genesis 1:28. Despues, ya pregunta le con el householder si onde y na cosa condicion quierre el Dios que vivi el gente. Mayoria el ta contesta, “Na tierra y na buen condicion.” Acabar, le ele el Isaias 55:11 y pregunta si ya cambia ba el proposito del Dios. Mas mucho, contesta el maga householder, “Nuay.” Na uliji, le el hermano con el Salmo 37:10, 11 y pregunta si cosa el futuro del maga gente. Usando este manera, ya puede le ayuda con el cuanto individual para entende que quierre siempre el Dios que vivi na paraiso tierra el maga buen gente.

16-17. Harmonia na Proverbio 3:27, cosa el cuanto practical manera que puede kita dale mira empatia? Relata un experiencia.

¹⁶ Ika-cuatro, pensa maga practical manera que puede kita dale mira consideracion. Por ejemplo, paquemodo si ya puede kita predica con el gente na tiempo que gendeh con ele conveniente? Puede kita pidi despensa y habla que bira kita con ele na otro tiempo. Paquemodo si necesita ayuda el un householder? O paquemodo si tiene le cosa necesita hace apuera del casa pero gendeh le puede sale cay enfermo le o de edad? Na ese maga situacion, puede kita ayuda con el persona.​—Le con el Proverbio 3:27.

¹⁷ Tiene buen resulta cuando el un hermana ya hace un buen cosa que dol gendeh importante.  Por causa na empatia, ya escribi le carta con el un familia que tiene anak ya muri. Ya inclui le na carta cuanto texto estaba na Biblia. Cosa el efecto del carta na familia? “Bien triste yo del ayer,” ya escribi el nana. “Nuay tu idea si paquemodo ya puede ayuda kanamon el de tuyu carta. Gracias gayot cay ya dale este kanamon comforta. Mas de 20 beses yo ya le con el carta del ayer. Nuay yo expecta que anima gayot este kanamon. Con todo corazon kame ta rindi gracias contigo.” Asigurao, puede tambien kita experiencia maga buen resulta si ta pone kita diaton mismo cuerpo na situacion de aquellos quien ta sufri y ta hace cosa para ayuda kanila.

18. Base na 1 Corinto 3:6, 7, cosa balance mirada kita quierre tiene na diaton papel na ministerio?

¹⁸ Siempre, quierre kita tiene balance mirada na diaton papel na ministerio. El diaton papel amo ayuda con otro para aprende acerca con Dios. Pero, gendeh kita el ta hace con el de con todo importante parte del trabajo. (Le con el 1 Corinto 3:6, 7.) Si Jehova amo el quien ta guia con el maga gente na de suyu organizacion. (Juan 6:44) Na uliji, el cada individual hay decidi si acepta ba le con el buen noticia o gendeh, depende na condicion del de suyu corazon. (Mat. 13:4-8) Acorda que mayoria del gente nuay acepta con el mensaje de Jesus maskin ele el de con todo buen Maestro. Poreso, gendeh kita debe man luya si manada el no quierre oi con el diaton mensaje.

19. Cosa el maga beneficio si ta dale kita mira empatia na diaton ministerio?

¹⁹ Hay beneficia kita si ta dale kita mira empatia na diaton ministerio. Mas man enjoy kita na diaton predicacion. Hay experiencia kita mas grande alegria cay kita el ta dale. Y ta hace kita mas facil para con “aquellos quien tiene justo condicion de corazon para obtene vida eterna” que acepta con el buen noticia. (Act. 13:48, NW) Poreso, “mientras tiene kita el oportunidad, hace kita bueno con todo gente.” (Gal. 6:10) Como resulta, queda kita alegre cay ta dale kita gloria con el diaton Tata na cielo.​—Mat. 5:16.