QUIERRE kita todo que conoce kanaton como buen gente. Pero, dificil queda un buen gente ahora. Un razon amo que manada gente el “enemigo de todo maga cosa-cosa bueno.” (2 Tim. 3:3) Posible que ta sigui sila con el diila personal principio si cosa el justo y si cosa el gendeh. Para kanila, “el bueno amo el malo y el malo amo el bueno.” (Isa. 5:20) Y todo kita imperfecto y tiene maga mal experiencia de antes. Poreso posible ta sinti kita igual con Anne, * quien maskin pa cuanto decada ya ta sirvi con Jehova, ya puede habla, “Tan dificil yo creé que puede yo queda un buen persona.”

Alegre kita sabe que todo kita puede queda buen gente. El pagka-bueno amo un resulta del sagrao espiritu del Dios. Mas poderoso este espiritu contra con el diaton maga imperfeccion, mal experiencia o el maga negativo influencia na mundo. Examina kita ahora si cosa quierre decir del pagka-bueno y aprende kita si paquemodo kita mas puede demonstra este calidad.

El pagka-bueno amo el calidad del un buen gente. Ta inclui este que el un gente tiene alto principio na moral y nuay maskin cosa malo con ele. El un buen persona pirmi ta busca manera para ayuda con otro y ta hace buen cosas kanila.

Ya puede siguro tu observa que facil lang con el cuanto maga gente que hace buen cosas para na diila familia y amigo. Pero ese lang ba el cosa quierre decir del pagka-bueno? Siempre, nuay maskin uno kanaton el bueno na todo tiempo cay el Biblia ta habla que “nuay maskin un recto gente na tierra el pirmi ta hace bueno y gendeh ta comete pecado.” (Ecl. 7:20) Si apostol Pablo ya admiti: “Bien sabe yo que noay cosa bueno adentro conmigo.” (Rom. 7:18) Poreso bien claro que necesita kita aprende estaba con Jehova, el Tuburan de este calidad, para puede kita cultiva con este.

Si Dios Jehova el ta determina si cosa el bueno. Ta habla el Biblia acerca con Jehova: “Bueno tu y bueno el de tuyu maga trabajo. Enseña conmigo el de tuyu maga ley.” (Sal. 119:68) Examina kita ahora el dos aspeto del pagka-bueno de Jehova na este versiculo.

Bueno si Jehova. Imposible para con Jehova que hace si cosa el malo cay ele bien bueno. El de suyu pagka-bueno tiene coneccion na de suyu otro maga calidad. Considera si cosa ya sucede cuando ya habla si Jehova con Moises: “Hay pasa iyo enfrente de tuyu y puede tu mira si paquemodo iyo de bueno.” Cuando ya dale mira si Jehova el de suyu gloria incluido el de suyu pagka-bueno, ya oi si Moises este maga palabra: “Jehova, Jehova, un Dios lastimoso y tiene compasion, gendeh pronto rabia, y abundancia de amor leal y verdad, quien ta dale mira amor leal con el miles de maga gente, ta perdona con el kamali, culpa y pecado pero ta asigura que hay castiga con el maga malo.” (Ex. 33:19; 34:6, 7) Ta hace este claro que si Jehova bien bueno na todo aspeto. Maskin pa si Jesus el de con todo buen gente que ya vivi, ya habla le: “Noay ganeh bueno sino el Dios lang.”​—Luc. 18:19.

 Bueno el maga trabajo de Jehova. Puede mira na todo cosa ta hace si Jehova que ele bueno. “Bueno si Jehova con todo y puede mira con el de suyu lastima na todo de suyu trabajo.” (Sal. 145:9) Bueno y imparcial si Jehova. Ya dale le vida con todo maga gente y el diila necesidad para continua vivi. (Act. 14:17) Puede tambien mira que bueno le cay ta perdona le kanaton. El salmista ya escribi: “Etu, O Jehova, bueno y preparao para perdona.” (Sal. 86:5) Puede kita asigura que “si Jehova gendeh man alang-alang dale maskin cosa bueno con aquellos quien ta mentena diila integridad.”​—Sal. 84:11.

Ya crea kanaton na imagen del Dios poreso puede kita queda maga buen gente y hace si cosa el bueno. (Gen. 1:27) Pero maskin pa ansina, el Palabra del Dios ta anima con el de suyu maga siervo que “aprende hace si cosa el bueno.” (Isa. 1:17) Pero paquemodo kita puede cultiva con este calidad? Considera kita con el tres manera.

Una, pidi el sagrao espiritu por medio na rezo. Puede este ayuda con el maga Cristiano para queda bueno na ojos del Dios. (Gal. 5:22, NW) El espiritu del Dios puede kanaton ayuda para aprende ama si cosa el bueno y desaleja con el malo. (Rom. 12:9) Gane, el Biblia ta habla que si Jehova puede kanaton hace “fuerte para hace todo buen trabajo y accion, y para habla todo el maga buen palabra.”​—2 Tes. 2:16, 17, El Nuevo Testamento.

Ika-dos, debe kita le con el Palabra del Dios. Si hace kita se, si Jehova hay enseña kanaton si cosa el bueno y prepara kanaton para hace “todo clase de trabajo bueno.” (2 Tim. 3:17; Prov. 2:9) Si le y medita kita con el Biblia, ta llena kita diaton corazon de maga buen cosas acerca con Dios y de suyu voluntad que puede kanaton ayuda na uliji.​—Luc. 6:45; Ef. 5:9.

Ika-tres, ta pricura kita “imita con el maga cosa-cosa bueno.” (3 Juan 11) Puede kita incuntra maga buen ejemplo na Biblia que puede kita imita. Siempre, el de con todo buen ejemplo amo si Jehova y si Jesus. Pero tiene tambien otro quien buen ejemplo de pagka-bueno. Dos de ese amo si Tabita y Bernabe. (Act. 9:36; 11:22-24) Puede tu estudia si cosa el Biblia ta habla acerca kanila y nota si cosa sila ya hace para ayuda con otro. Pensa si cosa tu puede hace para ayuda con el de tuyu familia y con otro na congregacion. Mira tambien si cosa el resulta del pagka-bueno de Tabita y Bernabe. Puede tambien tu beneficia igual kanila.

Puede tambien kita pensa otro ejemplo de pagka-bueno na diaton tiempo ahora. Uno de ese amo el maga anciano na congregacion quien ta ama  si cosa el bueno. Talli tambien el maga fiel hermana quien “ejemplo de buen custumbre” na palabra y accion. (Tito 1:8; 2:3) Un hermana, si Roslyn, ya habla: “Ta hace gayot esfuerzo el de mio amiga para ayuda y anima con otro na congregacion. Ta pensa le si cosa el diila situacion y ta dale kanila simple regalo o ta ayuda kanila na otro practical manera. Para conmigo, un buen hermana gayot le.”

Ta anima si Jehova con el de suyu maga siervo que “busca si cosa el bueno.” (Amos 5:14) Si hace kita se, ayuda se kanaton para ama con el maga principio de Jehova y manda este move kanaton para hace si cosa el bueno.

Para queda kita buen persona, gendeh necesita que hace kita maga grande sacrificio o dale caro regalo. Por ejemplo, el un pintor gendeh lang una vez o dos beses ta hace pasa con el brush de pintura para hace un painting sino ta hace le pasa con este diutay-diutay y manada beses. Na igual manera, si ta hace kita manada diutay accion para ayuda con otro, ta dale kita mira que kita deverasan bueno.

Ta anima kanaton el Biblia que queda “preparao” hace si cosa el bueno. (2 Tim. 2:21; Tito 3:1) Si alerto kita na circumstancia del otro, puede kita mira si paquemodo kita puede hace alegre “y ayuda canila para ay queda sila mas fuerte.” (Rom. 15:2) Posible, puede kita man share kanila si cosa kita tiene. (Prov. 3:27) Puede tambien kita invita kanila na un simple comida y asosacion. Si tiene quien enfermo, puede kita imbia card, visita o llama con ele. Puede kita busca manada oportunidad para habla “el maga palabra que conviene habla na cada situacion, para ayuda crici el fe de los demas y para aprovecha aquellos quien ta oi [kanaton].”​—Ef. 4:29.

Igual con Jehova, quierre kita hace si cosa el bueno con todo maga gente. Poreso, gendeh kita ta trata con el maga gente con parcialidad. Uno na maga de con todo buen manera que puede kita se hace amo por medio de predicacion del buen noticia acerca na Reino con todo maga gente. Como cosa ya manda si Jesus, quierre kita hace si cosa el bueno con otro maskin pa con aquellos quien ta odia kanaton. (Luc. 6:27) Pirmi gayot justo que trata enbuenamente y hace si cosa el bueno con otro cay “contra na ese maga cosas nuay ley.” (Gal. 5:22, 23, NW) Si bueno kita con otro maskin pa malo el diila tratamiento kanaton o ta enfrenta kita problema, posible queda interesao el otro acerca na verdad y dale gloria con Dios.​—1 Ped. 3:16, 17.

“El un buen gente hay cosecha con el premio del cosa le ta hace.” (Prov. 14:14) Cosa el cuanto del maga premio? Si bueno kita con otro, mas grande el posibilidad que bueno tambien sila kanaton. (Prov. 14:22) Maskin pa gendeh bueno el diila tratamiento kanaton, posible cambia el diila custumbre si continua kita trata enbuenamente kanila.​—Rom. 12:20.

Manada el ya habla que ya puede sila beneficia cay ya hace sila si cosa el bueno y ya desaleja na cosa malo. Considera el experiencia de Nancy. “Ya engranda yo que nuay queber, imoral y nuay respeto,” ya habla le. “Pero cuando ya aprende yo si cosa el principio del Dios acerca si cosa el bueno y ya obedece con ele, ya queda yo mas alegre. Ahora, tiene yo respeto na de mio mismo cuerpo.”

El de con todo importante razon si porque kita quierre cultiva con el calidad de pagka-bueno amo cay ta hace este alegre con Jehova. Gendeh ta puede mira el otro con el cosa kita ta hace pero si Jehova ta puede mira con ese. Ta nota le cada vez kita pensa y hace buen cosas. (Ef. 6:7, 8) Cosa el resulta? “El buen gente ta obtene el favor de Jehova.” (Prov. 12:2) Poreso, ojala continua kita cultiva ese calidad. Ta promete si Jehova que ele “ay dale gloria, honor y paz con todo con aquellos quien ta hace bueno.”​—Rom. 2:10.