1-2. (a) Paquemodo ta converza si Jehova con el maga gente? (b) Cosa kita considera na este articulo?

BIEN quierre converza kanaton si Jehova. Del antes, ya usa le maga profeta, angel y con el de suyu Anak, si Jesucristo, para manda sabe kanaton si cosa le ta pensa. (Amos 3:7; Gal. 3:19; Rev. 1:1) Ahora, ta converza le kanaton por medio na de suyu Palabra, el Biblia. Ya dale le este kanaton para puede kita sabe si cosa le ta pensa y para entende si paquemodo le ta hace maga cosas.

² Cuando na tierra si Jesus, tres beses ya converza si Jehova estaba na cielo. Considera kita ahora si cosa ya habla si Jehova, si cosa kita puede aprende na cosa le ya habla y si paquemodo kita beneficia con el cosa le ya habla.

3. Como cosa kita puede le na Marcos 1:9-11, cosa ya habla si Jehova cuando ya bautiza si Jesus y cosa quel ta enseña kanaton?

³ Escribido na Marcos 1:9-11 si cosa ya sucede na primer vez que ya converza si Jehova estaba na cielo. (Le.) Ya habla le: “Tu amo el dimio Anak hombre, con quien ta ama gayot Yo. Bien alegre Yo contigo.” Asigurao que alegre gayot si Jesus cuando ya oi le que ta ama y ta aproba con ele el de suyu tata. El maga palabra de Jehova ta enseña kanaton tres importante verdad acerca con Jesus. Una, Anak de suyu si Jesus. Ika-dos, ta ama si Jehova con el de suyu Anak. Y ika-tres, bien alegre o ta aproba si Jehova con el de suyu Anak. Discuti kita con el cada uno de ese.

4. Durante el bautismo de Jesus, cosa nuevo relacion le ya tiene con Dios?

⁴ “Tu amo el dimio Anak.” Por medio de ese maga palabra,  ya dale mira si Jehova que el de suyu Anak, si Jesus, ya tiene nuevo relacion con Ele. Cuando na cielo si Jesus, Anak ya le del Dios. Pero na de suyu bautismo, ya queda le Anak del Dios na nuevo manera. Ya iscuji con ele por medio del sagrao espiritu y ya tiene le el esperanza que bira na cielo para queda el iscujido Rey y Alto Sacerdote del Dios. (Luc. 1:31-33; Heb. 2:17) Poreso puede kita entende si porque, durante el bautismo de Jesus, ya habla si Jehova: “Tu amo el dimio Anak.”​—Luc. 3:22.

5. Paquemodo kita dale mira amor y apreciacion igual con Jehova?

⁵ “Con quien ta ama gayot Yo.” Si Jehova ya habla que ta ama y ta aprecia le con Jesus. Ta hace este acorda kanaton que busca oportunidad para puede kita anima con otro. (Juan 5:20) Alegre kita si el persona importante kanaton ta dale mira amor y ta dale comendacion na maga buen cosas que ta hace kita. Na igual manera, el diaton maga hermano y hermana na congregacion y diaton familia necesita amor y alegre sila si anima kita kanila. Si ta dale kita comendacion con otro, ta hace kita fuerte con el diila fe y ta ayuda kita kanila esta fiel con Jehova. Tiene grande responsibilidad el maga mayores para anima con el diila maga anak. Si ta dale sila comendacion y ta dale mira cariño, ta ayuda sila con el diila maga anak queda alegre y progresa na espiritual.

6. Porque kita puede tiene confianza con Jesus?

⁶ “Bien alegre Yo contigo.” Este maga palabra ta dale mira que tiene confianza si Jehova que puede hace si Jesus el voluntad del de suyu Tata. Tiene confianza si Jehova con el de suyu Anak poreso puede tambien kita confia que puede gayot hace si Jesus el todo que ya promete si Jehova. (2 Cor. 1:20) Si pensa kita con el ejemplo de Jesus, queda kita mas  determinao aprende con ele y sigui con el de suyu buen ejemplo. Tiene tambien confianza si Jehova que el de suyu maga siervo hay continua aprende con el de suyu Anak.​—1 Ped. 2:21.

7. Asegun na Mateo 17:1-5, na cosa ocasion ya converza si Jehova estaba na cielo y cosa le ya habla?

⁷ Le con el Mateo 17:1-5. El ika-dos vez que ya converza si Jehova estaba na cielo amo cuando “el ichura de Jesus ya cambia.” Ya invita si Jesus con Pedro, Santiago y Juan que sigui con ele na monte. Mientras talla sila, ya mira sila un gendeh ordinario vision. Ya brilla el cara de Jesus y el de suyu ropa ya queda bien blanco igual na luz. Ya puede mira el maga apostoles que dol tiene dos persona, que ta representa con Moises y Elias, el tan cuento con Jesus acerca na de suyu muerte y resureccion. Maskin pa “bien con sueño” el tres apostoles, ya mira sila con este vision cuando dispierto ya sila. (Luc. 9:29-32) Despues, ya tapa kanila el un brillante celaje y ya oi sila con el voz del Dios na celaje. Igual na cosa ya hace si Jehova na bautismo de Jesus, ya habla le: “Este amo el dimio Anak con quien yo ta ama gayot. Bien alegre yo con Ele.” Pero ya omenta si Jehova: “Oi ustedes con Ele.”

8. Cosa el efecto del vision con Jesus y con el de suyu maga dicipulo?

⁸ El vision ya dale mira con el gloria y poder de Jesus na futuro como el Rey na Reino del Dios. Asigurao que ya anima gayot este con el Cristo y ya hace con ele fuerte y ya prepara con ele para na sufrimiento y muerte que hay experiencia le. El vision ya hace tambien fuerte con el fe del maga dicipulo. Ya ayuda este kanila para prepara na maga probanza que hay experiencia sila y el grande trabajo que necesita sila hace. Despues del maga 30 año, ya menciona si apostol Pedro este vision que ta dale mira que fresco pa este na de suyu memoria.​—2 Ped. 1:16-18.

9. Cosa importante consejo el ya dale si Jesus con el de suyu maga dicipulo?

⁹ “Oi ustedes con Ele.” Ya hace claro si Jehova que quierre le que oi kita con el palabra del de suyu Anak y obedece con ese. Cosa ya habla si Jesus cuando taqui le na tierra? Manada le bien importante cosas que ya habla. Por ejemplo, ya enseña le con el de suyu maga siguidores si paquemodo predica con el buen noticia y pirmi le ya hace acorda kanila que esta alerto. (Mat. 24:42; 28:19, 20) Ya anima tambien le kanila que hace esfuerzo y no descanza na diila servicio. (Luc. 13:24) Ya hace claro si Jesus que el de suyu maga siguidores necesita ama con uno y otro, esta unido y obedece con el de suyu maga mandamiento. (Juan 15:10, 12, 13) Bien importante gayot el consejo que ya dale si Jesus! Aplicable este na diaton tiempo ahora igual cuando ya dale este si Jesus.

10-11. Paquemodo kita dale mira que ta oi kita con Jesus?

¹⁰ Si Jesus ya habla: “Todo el quien ta sigui na verdad ta oi conmigo.” (Juan 18:37) Ta dale kita mira que ta oi kita con Jesus si ta continua kita “aguanta y perdona con uno y otro.” (Col. 3:13; Luc. 17:3, 4) Ta dale tambien kita mira que ta oi kita con ele si activo kita ta predica con el buen noticia “na todo ocassion.”​—2 Tim. 4:2.

¹¹ Ya habla si Jesus: “Mi maga carnero ta oi el dimio voz.” (Juan 10:27) El maga siguidores del Cristo ta dale mira que ta oi sila con ele si ta pone sila atencion con el de suyu maga palabra y ta sigui con ese. Gendeh sila ta permiti que queda ocupao na “maga lingasa de este vida.” (Luc. 21:34) Sino, ta hace sila prioridad na diila vida que obedece con el maga mandamiento de Jesus maskin pa ta experiencia  sila maga dificultad. Manada hermano el ta experiencia grabe probanza igual como ataque estaba na diaton maga contrario, grabe pobreza y natural calamidad. Pero, ta esta sila fiel con Jehova maskin cosa pa sucede. Deverasan kanila el asiguranza que ya dale si Jesus: “Aquel quien ta recibi y ta obedece mi maga mandamiento amo el quien ta ama conmigo. Mi Tata ay ama con aquel quien ta ama conmigo.”​—Juan 14:21.

12. Cosa el otro manera que puede kita dale mira que ta oi kita con Jesus?

¹² El otro manera que puede kita dale mira que ta oi kita con Jesus amo si ta coopera kita con aquellos quien le ya iscuji para guia kanaton. (Heb. 13:7, 17) Na reciente maga año, el organizacion del Dios ya hace cuanto maga cambio. Incluido aqui el usada del maga nuevo tool y nuevo manera na ministerio, format del midweek miting y na manera si paquemodo kita ta construi, tan renovate y ta mentena diaton Kingdom Hall. Ta aprecia gayot kita con el diila amable guia y sabe kita que ya pensa gayot sila con este enbuenamente. Puede kita asigura que bendici si Jehova con el diaton esfuerzo para sigui con el maga direccion del organizacion.

13. Cosa el maga beneficio si oi kita con Jesus?

¹³ Beneficia kita si oi kita con el todo cosa que ya enseña si Jesus. Ya asigura le con el de suyu maga dicipulo que el de suyu maga enseñanza puede anima y hace fuerte kanila. “Ay encontra ustedes descanso para del de ustedes maga alma,” ya habla le. “Cay el dimio ayugo facil y el dimio carga liviano.” (Mat. 11:28-30) El Palabra del Dios, que ta inclui el cuatro Evangelio acerca na vida y ministerio de Jesus, ta hace bira diaton fuerza na servicio con Dios y ta hace kanaton sabio. (Sal. 19:7; 23:3) Ya habla si Jesus: “Mas alegre pa aquellos quien ta oi y ta obedece con el Palabra de Dios.”​—Luc. 11:28.

14-15. (a) Cosa el ika-tres ocasion que ya converza si Jehova estaba na cielo que ya escribi na Juan 12:27, 28? (b) Porque ya puede dale comforta con Jesus y ya hace fuerte con ele el cosa ya habla si Jehova?

¹⁴ Le con el Juan 12:27, 28. Escribido na Evangelio de Juan el ika-tres ocasion que ya converza si Jehova estaba na cielo. Cuanto dia antes el muerte de Jesus, talla le na Jerusalem para celebra con el de suyu ultimo Pascua. “El dimio alma bien triste ahora,” ya habla le. Despues, ya reza le: “Tata, dale gloria  con el de Uste Nombre.” Y ya contesta de suyu Tata estaba na cielo: “Ya dale ya Yo gloria, y ay dale pa yo otra vez.”

¹⁵ Bien triste y malingasa si Jesus cay sabe le que grande el de suyu responsibilidad para esta fiel con Jehova. Sabe si Jesus que latiga y mata con ele na brutal manera. (Mat. 26:38) Y mas pa, quierre si Jesus que dale gloria con el nombre del de suyu Tata. Ya acusa con Jesus que ya comete blasfemia y malingasa le que el de suyu muerte hay lleva insulto con Dios. Asigurao que el cosa ya habla si Jehova ya dale gayot confianza con Jesus! Puede le asigura que el de suyu sacrificio hay dale gloria con el nombre de Jehova. El palabra del de suyu Tata ya dale gayot comforta con Jesus y ya hace fuerte con ele na maga sufrimiento que hay experiencia le. Maskin pa posible que si Jesus lang el ya entende si cosa ya habla de suyu Tata aquel tiempo, ya asigura si Jehova que escribi con el De Suyu maga palabra para kanaton todo.​—Juan 12:29, 30.

16. Porque tiene vez posible tan lingasa kita acerca na insulto que puede lleva na nombre del Dios?

¹⁶ Igual con Jesus, posible que tan lingasa tambien kita na insulto que puede lleva na nombre de Jehova. Siguro igual con Jesus, ta trata tambien kanaton na gendeh justo manera. O baka malingasa kita cay el diaton maga contrario ta hace calayat maga gendeh justo istoria acerca kanaton. Ta puede kita pensa con el insulto que puede este lleva na nombre  de Jehova y na de suyu organizacion. Na ese maga tiempo, el cosa ya habla si Jehova con Jesus puede dale comforta kanaton. Gendeh kita necesita queda sobra de malingasa. Puede kita asigura que “el paz del Dios . . . ay guarda el [diaton] maga corazon y maga pensamiento unido con Cristo Jesus.” (Fil. 4:6, 7) Pirmi gayot ta dale gloria si Jehova con el de suyu nombre. Por medio del de suyu Reino, hay quita le con el mal efecto que ya hace si Satanas y este mundo con el De Suyu maga fiel siervo.​—Sal. 94:22, 23; Isa. 65:17.

17. Harmonia na Isaias 30:21, paquemodo kanaton ta converza si Jehova ahora?

¹⁷ Ta converza siempre kanaton si Jehova hasta ahora. (Le con el Isaias 30:21.) Deveras, gendeh kita ta puede oi con el voz del Dios estaba na cielo. Pero, ya dale le kanaton de suyu Palabra, el Biblia, donde puede kita le de suyu maga instruccion. Mas pa, el espiritu de Jehova ya manda move con “el fiel esclavo” para continua dale con el De Suyu maga siervo el diila espiritual comida. (Luc. 12:42, NW) Bien manada gayot kita maga printed y online publication incluido ya maga video y audio publication.

18. Na cosa manera el cosa ya habla si Jehova ta hace fuerte con el de tuyu fe y ta dale contigo coraje?

¹⁸ Acorda kita con el cosa ya habla si Jehova cuando taqui na tierra el de suyu Anak! Ojala el Palabra del Dios que escribido na Biblia hay dale kanaton confianza que ta mira si Jehova si cosa ta sucede y hay quita le con el mal efecto que ya causa si Satanas y este mal mundo. Y ojala queda kita determinao oi con el voz de Jehova. Si hace kita se, puede kita aguanta maskin cosa problema ahora y maga dificultad na futuro. Ta hace kanaton acorda el Biblia: “Necesita ustedes tene paciencia na maga sufrimiento, para ansina, ay puede ustedes cumpli el querer del Dios y gana el Promesa.”​—Heb. 10:36.