El palabra “amen” quierre decir “sucede se” o “asigurao.” Estaba este na Hebreo palabra que quierre decir “queda fiel,” “queda un persona con quien puede confia.” Tiene vez, ta usa con este na corte. Despues el un persona habla un promesa, ta habla le “amen” para dale asiguranza que exacto el cosa le ya habla y acepta ele el maga resulta del cosa le ya habla. (Num. 5:22) Cuando ya habla le “amen” na publico, ya queda le mas obligao cumpli de suyu promesa.​—Neh. 5:13.

Escribido na Deuteronomio capitulo 27 el un ejemplo del usada del palabra “amen.” Despues llega el maga Israelita na tierra que ya promete kanila, necesita sila man junto-junto entre medio del Monte de Ebal y Monte de Gerizim para oi con el lehida del Ley. Talla sila gendeh lang para oi sino para declara que ya acepta sila con el Ley. Para hace este, ta habla sila “Amen!” despues kanila le el maga resulta del desobediencia. (Deut. 27:15-26) Imagina el voz del miles de hombre, mujer y bata que bien suena ta contesta! (Jos. 8:30-35) Asigurao, nuay sila ulvida con el cosa sila ya habla de aquel dia. Y ya cumpli el maga Israelita con el diila promesa cay na Josue 24:31 ta habla: “El Israel ya continua sirvi con Jehova mientras vivo si Josue y mientras vivo el maga anciano que mas uliji ya muri contra con Josue y quien sabe el todo cosa ya hace si Jehova para na Israel.”

Ya usa tambien si Jesus con el palabra “amen” para dale asiguranza que deverasan el un cosa que ya habla le. Pero ya hace le este na especial manera. En vez de usa con este para contesta, ya usa le con el palabra “amen” para introduci cuanto verdad. * Por medio de este, ta dale le asiguranza con aquellos quien ta oi con ele que el de suyu  maga palabra amo el verdad. Puede gayot converza con confianza si Jesus cay ele el quien tiene autoridad para cumpli con el todo promesa del Dios.​—2 Cor. 1:20; Rev. 3:14.

Ta usa tambien el maga Israelita con el palabra “amen” si ta alaba y ta reza sila con Jehova. (Neh. 8:6; Sal. 41:13) Si ta habla con este expresion despues del rezo, ta dale mira aquellos quien ta oi que tan uyun sila con el rezo. Todo aquellos quien presente ta puede participa y adora con Jehova na ansina manera. Amo se el cosa ya pasa cuando ya lleva si Rey David con el Arka de Jehova na Jerusalem. Durante el celebracion, ya canta con el rezo de David que escribido na 1 Cronicas 16:8-36. Ya afecta gayot este con aquellos quien ya atende y como resulta, “todo maga gente ya habla, ‘Amen!’ y ya alaba sila con Jehova.” Si, alegre sila man junto-junto para adora con Jehova.

El maga Cristiano del primer siglo ta usa tambien con el palabra “amen” si ta alaba sila con Jehova. Manada beses con este ya inclui el maga escritor del Biblia na diila maga carta. (Rom. 1:25; 16:27; 1 Ped. 4:11) Gane, asegun na libro de Revelacion, el maga angel na cielo ta alaba con Jehova y ta habla: “Amen. Aleluya.” (Rev. 19:1, 4) El maga Cristiano de antes pirmi ta habla “amen” despues del rezo na maga miting. (1 Cor. 14:16) Pero gendeh este un palabra que basta lang sila habla.

Despues kita aprende si paquemodo ya usa el maga siervo de Jehova de antes con el palabra “amen,” ta puede kita mira si porque importante que habla con este na fin del un rezo. Si ta hace kita este na fin del diaton mismo rezo, ta dale kita mira que sincero kita na cosa kita ya habla. Y na fin del un rezo na publico, si ta habla kita “amen” maskin gendeh ta puede oi el  otro, ta dale kita mira que tan uyun kita na cosa ya habla na rezo. Considera kita otro pa maga razon si porque importante que habla kita “amen.”

Parte este del diaton adoranza. Durante el rezo, ta adora kita con Jehova gendeh lang por medio na diaton maga palabra sino na diaton accion tambien. Por causa cay quierre kita queda sincero si ta habla kita “amen,” ta manda este move kanaton para actua na justo manera y pone atencion na rezo.

Unido kita como maga siervo. Durante el rezo na publico, ta pone kita atencion na cosa ta puede oi el entero congregacion. (Act. 1:14; 12:5) Si ta habla kita “amen” junto na diaton maga hermano y hermana, suena man o na diaton pensamiento lang, mas ta queda kita unido. Ta dale tambien se mas razon con Jehova para contesta con el diaton maga pidimiento.

Ta alaba kita con Jehova. Ta nota si Jehova el todo cosa kita ta hace para alaba con ele. (Luc. 21:2, 3) Ta mira le el diaton motivo y si cosa el na diaton corazon. Maskin ta oi kita con el miting por medio na telefono, asigurao que ta nota siempre si Jehova con el diaton “amen.” Si ta habla kita “amen,” ta alaba kita con Jehova unido con aquellos presente na miting.

Maskin dol simple lang el palabra “amen,” bien importante este. “Por medio de este un palabra,” ya habla el un Bible encyclopedia, puede habla el maga siervo del Dios “con el diila confianza, esperanza na diila corazon y que tan uyun sila con el cosa ya habla.” Ojala el cada “amen” que ta habla kita, ta hace alegre con Jehova.​—Sal. 19:14.