1-2. Como cosa ta dale mira na Maga Actividad 8:27-31, 35-38, cosa ya manda move con el eunuco de Etiopia para bautiza?

QUIERRE ba tu bautiza y queda dicipulo del Cristo? El amor y apresacion amo el ya manda move con el manada para hace con ese decision. Considera con el ejemplo del un oficial quien ya sirvi con el reina de Etiopia.

² Ya actua dayun el eunuco de Etiopia con el cosa le ya aprende na Escritura. (Le con el Maga Actividad 8:27-31, 35-38.) Cosa el ya manda move con ele? Nuay duda, ya aprecia le con el Palabra del Dios. Ta le ele con el cuanto versiculo del libro de Isaias mientras ta munta na carruaje. Y cuando ya converza con ele si Felipe, ya cultiva le apresacion na cosa ya hace si Jesus para con ele. Pero, porque ese oficial ya viaja para na Jerusalem? Cay ya cultiva ya le amor con Jehova. Porque kita se sabe? Cay estaba le na Jerusalem para adora con Jehova. Ya deja le con el de suyu religion y ya principia adora con el verdadero Dios junto con el De Suyu maga siervo que dedicao con Ele. Este amor con Jehova amo tambien el ya manda move con ele para hace otro importante decision​—bautiza y queda dicipulo del Cristo.​—Mat. 28:19.

3. Cosa posible sangga con el un persona para bautiza? (Mira con el cajon “ Cosa el na De Tuyu Corazon?”)

³ El amor con Jehova puede manda move contigo para bautiza. Pero, posible amor tambien el puede sangga contigo para hace con ese. Paquemodo? Nota con este cuanto ejemplo. Posible, ta ama gayot tu con el de tuyu familia y maga amigo que gendeh Witness y tan lingasa tu que rabia sila contigo si bautiza tu. (Mat. 10:37) O baka quierre-quierre tu con el maga  practica que sabe tu ta odia el Dios y posible tan dificil tu deja con ese. (Sal. 97:10) O baka ya engranda tu que ta celebra con el maga celebracion que tiene que hace na falso religion. Y posible, ta puede tu acorda maga cosas que ta hace ustedes de antes si ta celebra con ese. Como resulta, tan dificil tu deja con ese maga celebracion que gendeh ta hace alegre con Jehova. (1 Cor. 10:20, 21) Poreso, el pregunta que debe tu contesta ahora amo: “Cosa o con quien ba yo mas ta ama?”

4. Cosa el de con todo importante razon para bautiza?

⁴ Posible, manada tu buen cosas que ta ama y ta aprecia. Por ejemplo, cuando nuay pa tu estudia con el Biblia junto con el maga Testigo de Jehova, posible tiene ya tu hondo apresacion na Biblia. Y posible, ya cultiva ya tu amor con Jesus. Ahora cay conoce ya tu con el maga Testigo de Jehova, posible quierre-quierre tu man junto kanila. Pero maskin pa ta ama tu con ese maga cosas, gendeh se quierre decir que quierre ya tu dedica con el de tuyu mismo cuerpo con Jehova y bautiza. El de con todo importante razon para bautiza amo el amor con Dios Jehova. Si ta ama tu con Jehova mas pa na todo maga cosas, gendeh tu permiti que tiene maskin cosa o maskin quien que sangga contigo para sirvi con ele. El amor con Jehova amo el manda move contigo para bautiza y ayuda tambien este contigo para esta fiel con ele despues del de tuyu bautismo.

5. Cosa maga pregunta kita considera?

⁵ Si Jesus ya habla que debe kita ama con Jehova con todo corazon, alma, pensamiento y fuerza. (Mar. 12:30) Paquemodo tu aprende ama y respeta con Jehova na ansina manera? Si pensa kita si paquemodo de grande el amor de Jehova kanaton, hay ayuda este para ama tambien kita con ele. (1 Juan 4:19) Cosa pa tu sinti y hace si ya puede tu cultiva con el de con todo importante amor? *

6. Asegun na Roma 1:20, cosa el un manera que puede tu aprende acerca con Jehova?

⁶ Aprende acerca con Jehova por medio na cosa le ya crea. (Le con el Roma 1:20, NWT; Rev. 4:11) Pensa con el maga siembra y animal que ya crea si Jehova y si paquemodo este ta dale mira con el de suyu sabeduria. Aprende acerca con el de tuyu mismo cuerpo y si paquemodo de maka-bilib este. (Sal. 139:14) Pensa acerca na poder que ya pone si Jehova na sol. Y el sol uno lang del billones de estrellas. * (Isa. 40:26) Si hace tu se, hay queda mas hondo el de tuyu respeto con Jehova. Importante que sabe tu que sabio y poderoso si Jehova. Pero, para queda fuerte el de tuyu amor con ele y queda de suyu cerca amigo, necesita tu sabe mas acerca con ele.

7. Para queda hondo el de tuyu amor con Jehova, na cosa tu necesita queda convincido?

⁷ Necesita tu queda convincido que ta ama gayot contigo si Jehova. Tan dificil ba tu creé que el Creador del cielo y del tierra sabe que ta existi tu y ta ama contigo? Si ansina, acorda que “gendeh Ele ta queda lejos canaton.” (Act. 17:26-28) “Ta examina si Jehova con el todo corazon” y ta promete le contigo que “si busca tu con ele, hay permiti le que incuntra tu con ele.” (1 Cron. 28:9) El deverasan, el razon si porque tu ta estudia con el Biblia ahora amo, como ya habla si Jehova, “Iyo ya hala contigo.” (Jer. 31:3) Si mas aprecia tu con el todo cosa ya hace si Jehova para contigo, mas queda hondo el de tuyu amor para con ele.

8. Paquemodo tu dale mira que ta rindi tu gracias na amor de Jehova?

 ⁸ El un manera para dale mira que ta rindi tu gracias na amor de Jehova amo si man cuento tu con ele na rezo. Queda hondo el de tuyu amor para con ele si habla tu con ele si cosa tu tan lingasa y rindi gracias con el todo cosa le ta hace para contigo. Y hay tiene ustedes mas buen amistad mientras ta mira tu si paquemodo si Jehova ta contesta con el de tuyu maga rezo. (Sal. 116:1) Hay queda tu convincido que ta entende le contigo. Pero para queda cerca con Jehova, necesita tu entende si paquemodo le ta pensa. Y necesita tu sabe si cosa le quierre que hace tu. El solamente manera para puede tu se sabe amo por medio de estudiada del de suyu Palabra, el Biblia.

9. Paquemodo tu dale mira que ta aprecia tu con el Biblia?

⁹ Aprende aprecia con el Palabra del Dios, el Biblia. El Biblia lang el ta contene verdad acerca con Jehova y na de suyu proposito para contigo. Ta dale tu mira que ta aprecia tu con el Biblia si ta le tu con ese cada dia, si ta estudia tu antes del Bible study y si ta aplica tu con el cosa tu ta aprende. (Sal. 119:97, 99; Juan 17:17) Tiene ba tu schedule para na personal lehida de Biblia? Ta sigui ba tu con ese schedule para asigura que ta le tu con el Biblia cada dia?

10. Cosa el un cosa que ta hace bien especial con el Biblia?

¹⁰ Un cosa que ta hace bien especial con el Biblia amo el maga report que ta contene este del maga gente quien ya mira con Jesus. Amo este el solamente deverasan libro que ta explica si cosa ya hace si Jesus para contigo. Mientras ta aprende tu con el cosa ya habla y ya hace si Jesus, manda se move contigo para queda cerca con ele.

11. Paquemodo tu aprende ama con Jehova?

¹¹ Aprende ama con Jesus y el de tuyu amor con Jehova hay queda mas hondo. Porque? Cay ya puede gayot imita si Jesus con el maga calidad del de suyu Tata. (Juan 14:9) Poreso, si aprende tu mas acerca con Jesus, mas entende y aprecia tu con Jehova. Pensa con el compasion que ya dale mira si Jesus na maga  gente con quien ta hace bajo el otro, igual con el maga pobre, enfermo y mahina. Pensa tambien con el practical consejo que ya dale le contigo y si paquemodo ya queda enbuenamente el de tuyu vida cuando ya aplica tu con ese.​—Mat. 5:1-11; 7:24-27.

12. Mientras ta aprende tu acerca con Jesus, cosa este posible manda move contigo para hace?

¹² Posible, el de tuyu amor con Jesus hay queda mas fuerte si pensa tu con el sacrificio que ya hace le para puede perdona con el diaton maga pecado. (Mat. 20:28) Si ya entende tu que conforme muri si Jesus para contigo, posible manda este move contigo para arripinti y pidi perdon con Jehova. (Act. 3:19, 20; 1 Juan 1:9) Y mientras ta ama tu con Jesus y con Jehova, mas quierre tu man junto con el maga gente quien ta ama tambien kanila.

13. Cosa contigo dale si Jehova?

¹³ Aprende ama con el familia de Jehova. Posible, el de tuyu familia quien gendeh Witness y maga amigo de antes gendeh entende si porque quierre tu dedica con el de tuyu mismo cuerpo con Jehova. O baka man contra pa gane sila contigo. Hay ayuda contigo si Jehova y dale contigo un espiritual familia. Si esta tu cerca con ese familia, hay puede tu sinti el amor y suporta que ta necesita tu. (Mar. 10:29, 30; Heb. 10:24, 25) Llega el tiempo, el de tuyu familia posible tambien sirvi con Jehova y sigui con el de suyu maga principio.​—1 Ped. 2:12.

14. Como cosa ya habla na 1 San Juan 5:3, cosa tu ya puede discubri acerca na maga principio de Jehova?

¹⁴ Aprende aprecia y aplica con el maga principio de Jehova. Antes tu conoce con Jehova, posible tiene ya tu de tuyu mismo principio si cosa el justo y malo. Pero ahora, ya puede tu mira que mas bueno el maga principio de Jehova. (Sal. 1:1-3; le con el 1 San Juan 5:3.) Pensa con el consejo del Biblia para na maga marido, mujer, mayores y anak. (Ef. 5:22–6:4) Mientras ta aplica tu con ese consejo, ya puede ba tu mira que ta queda mas enbuenamente el de ustedes familia? Cuando ya sigui tu con el direccion de Jehova que iscuji enbuenamente con el de tuyu maga amigo, ya queda ba tu buen persona? Mas alegre ba tu? (Prov. 13:20; 1 Cor. 15:33) Posible, positivo el de tuyu contestacion na ese maga pregunta.

15. Cosa tu hace si necesita tu ayuda si paquemodo aplica con el maga principio na Biblia?

¹⁵ Tiene vez, posible man dificil tu sabe si paquemodo aplica con el maga principio na Biblia que ya aprende tu. Poreso, ta usa si Jehova con el de suyu organizacion para dale contigo maga publicacion que base na Biblia que puede ayuda contigo determina si cosa el justo y malo. (Heb. 5:13, 14) Si le y estudia tu con ese maga publicacion, puede tu mira si paquemodo se de practical y especifico. Y posible, manda este move contigo para queda parte del organizacion de Jehova.

16. Paquemodo ya organiza si Jehova con el de suyu maga siervo?

¹⁶ Aprende ama y suporta con el organizacion de Jehova. Ya organiza si Jehova con el de suyu maga siervo na maga congregacion. Y el de suyu Anak, si Jesus, amo el cabeza de este todo. (Ef. 1:22; 5:23) Ya iscuji si Jesus un diutay grupo de maga iscujido hombre para guia na trabajo que quierre le hace ahora. Ya llama si Jesus con este grupo de maga hombre como el “fiel y sabio esclavo” y serioso sila na diila responsibilidad que dale come y protege contigo na espiritual manera. (Mat. 24:45-47, NWT) El uno del maga manera que este fiel esclavo ta cuida contigo amo por medio na maga cualificao anciano quien guia y protege contigo. (Isa. 32:1, 2; Heb. 13:17; 1 Ped. 5:2, 3) El maga anciano conforme hace el todo lo que puede para dale contigo comforta  y ayuda contigo queda mas cerca con Jehova. Pero, el uno del maga bien importante cosas que puede sila hace amo que ayuda contigo que enseña con otro acerca con Jehova.​—Ef. 4:11-13.

17. Asegun na Roma 10:10, 13, 14, porque kita tan cuento con otro acerca con Jehova?

¹⁷ Ayuda con otro que aprende ama con Jehova. Ya habla si Jesus con el de suyu maga siguidores que enseña con otro acerca con Jehova. (Mat. 28:19, 20) Puede kita obedece con ese mandamiento cay obligao kita sigui con ese. Pero, mientras ta queda hondo el de tuyu amor con Jehova, puede tu sinti igual con el cosa ya sinti si apostol Pedro y Juan quien ya habla: “No puede came promete que ay para came de habla el cosa came ya mira y ya oi.” (Act. 4:20) Queda kita bien alegre si puede kita ayuda con el un persona que ama con Jehova. Imagina si paquemodo de alegre si Felipe cuando ya puede le ayuda con el eunuco de Etiopia que aprende con el verdad na Escritura y ya bautiza! Si imita tu con Felipe y obedece con el mandamiento de Jesus que predica, ta dale tu mira que quierre tu queda uno del maga Testigo de Jehova. (Le con el Roma 10:10, 13, 14.) Posible, puede tu habla igual con el cosa ya habla el eunuco de Etiopia: “Tiene ba cosa ta sangga conmigo para recivi el bautismo?”​—Act. 8:36.

18. Cosa kita considera na siguiente articulo?

¹⁸ Ta hace tu con el de con todo importante decision na de tuyu vida si decidi tu bautiza. Cay un serioso decision este, necesita tu pensa enbuenamente si cosa quierre decir de este. Cosa tu necesita sabe acerca na bautismo? Cosa tu necesita hace antes y despues del bautismo? Ese maga pregunta hay contesta na siguiente articulo.