1. Cosa el especifico mandato que ya dale si Jesus con el de suyu maga dicipulo? (Mira con el letrato na cover.)

NA NOCHE antes muri si Jesus, ya dale le un especifico mandato con el de suyu maga dicipulo. Ele ya habla: “Igual como ta ama yo con ustedes, ansina tamen ustedes ama con uno y otro.” Despues, ya omenta le: “Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.”​—Juan 13:34, 35.

2. Porque bien importante que dale kita mira amor con uno y otro?

² Ya habla si Jesus que claro puede conoce con el de suyu maga deverasan dicipulo si dale sila mira amor igual na cosa le ya demonstra. Deverasan se del primer siglo y deverasan tambien se ahora. Poreso, bien importante que dale kita mira amor maskin pa dificil con este hace!

3. Cosa kita discuti na este articulo?

³ Por causa na diaton imperfeccion, dificil para kanaton dale mira deverasan amor con uno y otro. Maskin pa ansina, debe kita pricura imita con el Cristo. Na este articulo, hay discuti kita si paquemodo el amor puede ayuda kanaton para mentena con el paz, gendeh man afavor maskin con quien y queda hospitable. Mientras ta estudia tu con este, pregunta na de tuyu mismo cuerpo: ‘Cosa yo puede aprende na maga hermano y hermana quien ya continua demonstra amor con uno y otro maskin pa na maga dificultad?’

4. Asegun na Mateo 5:23, 24, porque kita debe busca manera para tiene paz con el un hermano quien rabiao kanaton?

⁴ Ya enseña kanaton si Jesus que importante que busca manera  para tiene paz con el un hermano quien rabiao kanaton. (Le con el Mateo 5:23, 24.) Ya hace le claro que necesita kita mentena con el diaton buen relacion con otro si quierre kita hace alegre con Dios. Alegre si Jehova si ta hace kita el todo lo que puede para tiene paz con el diaton maga hermano. Gendeh le acepta con el diaton adoranza si tan sentimiento kita y gendeh ta hace maskin diutay esfuerzo para mentena con el paz.​—1 Juan 4:20.

5. Porque yan dificil el un hermano para hace bira otravez con el paz na otro hermano?

⁵ Posible, dificil para kanaton que hace manera para tiene paz. Porque? Considera con el cosa ya sucede con Mark. * Ya sinti le duele cuando ya insulta con ele el un hermano y ya habla maga cosas gendeh bueno acerca con ele con otro na congregacion. Cosa ya hace si Mark? “Nuay yo puede controla con el de mio mismo cuerpo y ya ultraja yo con ele,” ya habla le. Pero despues de aquel, ya arripinti si Mark na cosa le ya hace y ya pidi despensa con el hermano para tiene sila otravez paz. Pero el hermano, nuay ricibi con ese. Del primero, ya pensa si Mark, ‘Porque pa yo hace manera para tiene kame paz si no quierre le?’ Pero, el circuit overseer ya anima con ele que continua na cosa le ta hace. Cosa ya hace si Mark?

6. (a) Cosa ya hace si Mark para tiene otravez paz na hermano? (b) Paquemodo ya aplica si Mark con el Colosa 3:13, 14?

⁶ Cuando ya analiza si Mark con el de suyu custumbre, ya realiza le que falta le humildad y tiene vez, ta pensa que mas bueno le contra con otro. Ya puede le realiza que necesita le cambia con el de suyu custumbre. (Col. 3:8, 9, 12) Con humildad le ya atraca otravez con el hermano y ya pidi despensa na cosa le ya hace. Ya escribi tambien le maga carta con el hermano y ya habla que ya arripinti gayot le na cosa le ya hace y ya pidi si puede ba sila queda amigo otravez. Ya dale pa gane regalo si Mark que ya pensa le que gusta el hermano. Pero maka-triste, tiene siempre con ele agrabio el  hermano. Maskin pa ansina, ya continua siempre obedece si Mark con el mandato de Jesus que ama con el de suyu hermano y continua perdona. (Le con el Colosa 3:13, 14.) Maskin pa gendeh ta acepta el otro con el diaton esfuerzo para tiene paz, pero si tiene kita amor na maga gente igual con Jesus, hay continua kita perdona kanila y reza que tiene siempre este positivo resulta.​—Mat. 18:21, 22; Gal. 6:9.

7. (a) Cosa kanaton ya enseña si Jesus que hace? (b) Cosa dificil situacion el ya enfrenta el un hermana?

⁷ Ya enseña kanaton si Jesus que continua trata con otro na manera que quierre kita trata kanaton. Ya habla tambien le que gendeh lang kita ama con aquellos quien ta ama kanaton. (Luc. 6:31-33) Maskin pa ralo lang este sucede, paquemodo si tiene na de ustedes congregacion el ta evita y gendeh ta hace caso contigo? Amo se el cosa ya experiencia si Lara. Ele ya habla: “Ya ignora conmigo el un hermana y no sabe yo si porque. Ya causa quel conmigo stress poreso gendeh ya yo tan enjoy anda na miting.” Del primero, ya pensa si Lara: ‘Nuay yo culpa. Maskin el otro na congregacion ta sinti tambien que otro gayot aquel hermana.’

8. Cosa ya hace si Lara para tiene paz y cosa kita puede aprende na de suyu experiencia?

⁸ Ya hace manera si Lara para tiene paz. Ya reza le con Jehova y ya decidi man cuento con el hermana. Yan cuento sila si cosa el problema, yan abrazajan y ya puede bira otravez el paz entre kanila. Dol enbuenamente ya el todo. Ya habla si Lara: “Despues de aquel, ya bira ya tambien el custumbre del hermana. Yan luya gayot yo.” Del primero, ya sinti si Lara que queda lang le alegre si cambia el custumbre del hermana. Pero ya realiza si Lara que el de con todo bueno que puede le hace amo continua ama con el hermana y “perdona” con ele. (Ef. 4:32–5:2) Ya acorda si Lara que el deverasan amor “ta olvida el malo ya hace con ele. El amor ta perdona todo, ta cree todo, ta espera todo y ta aguanta todo.” (1 Cor. 13:5, 7) Nuay mas man lingasa si Lara. Na uliji, mas enbuenamente ya el tratamiento del hermana con ele. Si ta hace tu manera para tiene paz con el de tuyu maga hermano  y hermana y ta continua ama kanila, puede tu asigura que “el Dios del amor y paz ay esta [contigo].”​—2 Cor. 13:11.

9. Asegun na Maga Actividad 10:34, 35, porque importante que nuay kita con quien tan afavor?

⁹ Si Jehova nuay con quien tan afavor. (Le con el Maga Actividad 10:34, 35.) Si nuay kita con quien tan afavor, ta dale kita mira que maga anak kita de suyu. Ta obedece kita con el mandato que ama con el diaton projimo igual na diaton mismo cuerpo y ta mentena kita con el paz entre na diaton espiritual familia.​—Roma 12:9, 10; Sant. 2:8, 9.

10-11. Paquemodo ya perde el negativo sentido del un hermana?

¹⁰ Posible, dificil para con el cuanto que trata na igual manera con el maga gente. Considera con el cosa ya sucede con el un hermana, si Ruth. Cuando teenager pa le, ya tiene le mal experiencia na un persona de otro nacion. Cosa el efecto de este con ele? Si Ruth ya admiti: “Nuay yo maskin un cosa que ya gusta na ese nacion. Ya pensa yo que igual-igual lang el maga gente estaba na aquel lugar, maskin el maga hermano y hermana.” Paquemodo ya puede quita si Ruth con el de suyu negativo sentido?

¹¹ Ya puede realiza si Ruth que tiene le cosa necesita hace para perde el de suyu negativo pensamiento. Ya le si Ruth maga experiencia y report na Yearbook acerca na aquel nacion. Ele ya habla: “Ya hace yo esfuerzo que pensa positivo acerca na maga gente na ese lugar. Ya puede yo observa que activo el maga hermano y hermana alla na servicio con Jehova. Ya queda claro conmigo que parte tambien sila del diaton espiritual familia na entero mundo.” Despues del cuanto tiempo, ya realiza si Ruth que tiene pa le cosa necesita hace. Ele ya explica: “Si ya puede yo conoce maga hermano y hermana estaba na aquel nacion, ta hace yo esfuerzo para trata kanila enbuenamente. Tan cuento yo kanila y mas ya puede yo conoce kanila.” Cosa el resulta? Si Ruth ya habla: “Ya llega el tiempo, ya perde el de mio negativo sentido.”

12. Cosa el problema del un hermana que si Sarah?

¹² El otro posible gendeh ta puede realiza que tan afavor ya sila con otro. Por ejemplo, pensaba si Sarah nuay le con quien tan afavor cay gendeh le ta juzga con el maga gente base na diila raza, estado na vida o responsibilidad na organizacion. Pero ya admiti le: “Ya puede yo realiza que tiene gale yo con quien tan afavor.” Na cosa manera? Educao el familia de Sarah y mas quierre le man junto con aquellos educao tambien. Ya puede le habla con el de suyu amigo: “Tan junto yo con el maga hermano y hermana que maga educao. Ta evita yo con aquellos gendeh igual ansina.” Claro lang que necesita cambia si Sarah con el de suyu custumbre. Paquemodo?

13. Cosa kita puede aprende si paquemodo ya cambia si Sarah con el de suyu custumbre?

¹³ El un circuit overseer ya ayuda con Sarah para analiza con el de suyu custumbre. Ele ya habla: “Ya dale conmigo comendacion el circuit overseer por causa na de mio fiel servicio, bonito comento y saber na Escritura. Despues, ya explica le conmigo que mientras ta omenta el diaton saber, necesita tambien kita cultiva maga buen calidad igual na humildad, pagka-modesto y lastima.” Ya aplica si Sarah con el cosa ya habla el circuit overseer. Ele ya habla: “Ya puede yo realiza que el de con todo importante amo que queda amable y trata enbuenamente con otro.” Como resulta, ya cambia el mirada de Sarah na maga hermano y hermana. Ele ya explica: “Ya pricura yo mira si cosa calidad sila tiene que ya hace kanila precioso con Jehova.” Quetal kita? No quierre gayot kita pensa que mas bueno kita  con otro por causa na educacion que tiene kita! Si deverasan kita ta ama con el diaton maga hermano y hermana, hay evita kita con el tendencia que man afavor con otro.​—1 Ped. 2:17.

14. Asegun na Maga Hebreo 13:16, cosa ta sinti si Jehova si hospitable kita con otro?

¹⁴ Bien alegre si Jehova si hospitable kita. (Le con el Maga Hebreo 13:16.) Ta considera le que parte este del diaton adoranza, especialmente si ta ayuda kita con aquellos tiene necesidad. (Sant. 1:27; 2:14-17) Poreso, el Biblia ta anima kanaton que “trata embuenamente con el mga visita.” (Roma 12:13) Si hospitable kita, ta dale kita mira con otro que deverasan kita interesao kanila, ta ama kanila y quierre queda diila amigo. Alegre si Jehova si ta dale kita merienda, cosa para toma, comida, diaton tiempo y atencion con otro. (1 Ped. 4:8-10) Pero, posible tiene cuanto cosas que ta sangga kanaton para queda hospitable.

15-16. (a) Porque posible el otro tan alang-alang queda hospitable? (b) Cosa ya puede ayuda con Edit para queda hospitable?

¹⁵ Posible, tan alang-alang kita queda hospitable por causa na diaton circumstancia. Considera con el ejemplo del un viuda, si Edit. Antes le queda Witness, no quierre le ledia na maga gente. Ya sinti le que mas puede cuida na maga visita el otro contra con ele.

¹⁶ Despues le queda Witness, ya cambia si Edit con el de suyu custumbre. Ya busca le manera para queda hospitable. Ele ya habla: “Cuando ta planta con el diamon nuevo Kingdom Hall, ya habla conmigo el un anciano que llega el un man maridable quien ayuda na construida. Ya pidi le conmigo si puede sila esta na de mio casa por dos semana. Ya acorda yo si paquemodo ya bendici si Jehova con el viuda de Sarepta.” (1 Rey 17:12-16) Ya conforma si Edit. Ya bendici ba con ele? Ele ya explica: “Nuay lang sila esta por dos semana sino por dos meses. Durante aquel tiempo, ya queda kame cerca con uno y otro.” Ya tiene  tambien si Edit maga cerca amigo y amiga na congregacion. Pioneer ya le ahora y alegre le invita con el maga hermano y hermana con quien le yan junto na ministerio para merenda na de suyu casa. Ele ya habla: “Alegre yo cay ta dale yo con otro! El deverasan, bien manada bendicion yo ya ricibi por causa con ese.”​—Heb. 13:1, 2.

17. Cosa ya puede realiza si Luke y de suyu mujer?

¹⁷ Posible, hospitable ya kita. Pero, puede ba kita hace mas pa que con ese? Por ejemplo, hospitable el man maridable que si Luke y de suyu mujer. Anad sila invita na diila casa con el diila maga mayores, pariente, amigo, amiga y con el circuit overseer y de suyu mujer. Pero ya habla si Luke, “Ya puede kame realiza que ta invita kame con quien lang kame bien conoce.” Cosa ya hace si Luke y de suyu mujer?

18. Cosa ya hace si Luke y de suyu mujer para queda mas hospitable?

¹⁸ Ya cambia si Luke y el de suyu mujer despues sila medita con el cosa ya habla si Jesus: “Si ta ama lang ustedes con aquellos quien ta ama con ustedes, cosa ba el de ustedes premio?” (Mat. 5:45-47) Ya puede sila realiza que necesita sila imita con Jehova, quien bondadoso con todo. Poreso, ya decidi sila que invita con el maga hermano y hermana quien nuay pa sila invita de antes. Si Luke ya habla: “Ahora, todo kame alegre na este maga ocasion. Ta ayuda este kanamon para queda mas cerca con uno y otro y con Jehova.”

19. Cosa kita hace para dale prueba que maga dicipulo kita de Jesus y cosa tu determinao hace?

¹⁹ Ya examina kita si paquemodo el diaton deverasan amor para con uno y otro puede ayuda kanaton hace manera para tiene paz, gendeh man afavor maskin con quien y queda hospitable. Debe kita quita con el maskin cosa negativo sentido que tiene kita y con todo corazon ama con el diaton maga hermano y hermana. Si hace kita se, hay queda kita alegre y puede kita dale prueba que deverasan kita maga dicipulo de Jesus.​—Juan 13:17, 35.