Tiene otro trabajo el cuanto maga Levita quien gendeh ta sirvi como maga sacerdote. El otro kanila ta sirvi como maga polis y bajo sila na direccion del capitan del templo. El un Judio escritor que si Philo ya habla acerca na maga trabajo de este maga oficial: “El cuanto de este [maga Levita] ta vicia na puerta donde ta entra el maga gente. El otro ta vicia na [templo mismo] enfrente del santuario para asigura que nuay quien puede entra na santuario que gendeh autorizao, maskin pa gendeh intencional. El cuanto tan patrolla na templo didia y denoche y ta releva kanila el otro.

El Sanhedrin puede pidi con el ayuda de este maga polis. Con este grupo de Judio lang ya permiti carga armas el maga Romano.

Asegun con el un scholar que si Joachim Jeremias, “el cosa ya habla si Jesus cuando ya arresta con ele, que todo el dia le ta enseña na Templo pero nuay con ele arresta (Mat. 26.55), claro ta dale mira que el maga polis na Templo el quien ya anda para arresta con ele.” Ese mismo escritor ta creé que el maga polis na templo tambien el quien ya anda arresta con Jesus del primero. (Juan 7:32, 45, 46) Na uliji, ya manda con el maga polis junto con el diila capitan que lleva con el maga apostoles na Sanhedrin. Y posible, el maga polis na templo tambien el quien ya lleva apuera del templo con apostol Pablo.​—Act. 4:1-3; 5:17-27; 21:27-30.