1. Cosa ta enseña kanaton el Eclesiastes 3:1, 7?

EL CUANTO kanaton quierre-quierre man cuento. Pero el otro quierre man silencio lang. Pero, como cosa ta dale mira el texto onde yan base este articulo, tiene tiempo para converza y tiempo para man silencio. (Le con el Eclesiastes 3:1, 7.) Maskin pa ansina, posible quierre kita que mas man cuento el cuanto del diaton maga hermano y hermana. Y quierre tambien kita que el otro menora el diila pagka-istoriador.

2. Quien el tiene derecho para determina si cuando y paquemodo kita debe converza?

² El abilidad que man cuento amo un regalo estaba con Jehova. (Ex. 4:10, 11; Rev. 4:11) Por medio na de suyu Palabra, ta ayuda le kanaton entende si paquemodo usa con este regalo na justo manera. Na este articulo, hay considera kita maga ejemplo na Biblia que puede ayuda kanaton sabe si cuando converza y si cuando man silencio. Considera tambien kita si cosa ta sinti si Jehova na cosa kita ta habla con otro. Pero discuti kita una si cuando kita debe converza.

3. Asegun na Roma 10:14, cuando kita debe preparao converza acerca con Jehova y con el de suyu Reino?

³ Debe kita preparao pirmi para converza con otro acerca con Jehova y con el de suyu Reino. (Mat. 24:14; le con el Roma 10:14.) Si hace kita se, ta imita kita con Jesus. Uno del maga razon si porque si Jesus ya vene aqui na tierra amo para habla con otro el verdad acerca con el de suyu Tata. (Juan 18:37) Pero, debe kita acorda que importante tambien si paquemodo kita ta converza. Poreso, si tan cuento kita con otro acerca con Jehova, debe kita “contesta embuenamente y con respeto” y dale mira  consideracion na cosa sila ta sinti y ta creé. (1 Ped. 3:15, 16) Si hace kita se, gendeh lang kita tan cuento kanila. Sino, ta enseña tambien kita kanila y posible puede kita alcanza con el diila corazon.

4. Como cosa ta habla na Proverbio 9:9, na cosa manera kita puede ayuda con otro si man cuento kita kanila?

⁴ Gendeh debe man alang-alang el maga anciano que converza si ta puede sila mira que ta necesita consejo el un hermano o hermana. Siempre, pensa sila justo tiempo si cuando man cuento con el persona para gendeh este tiene huya. Posible, espera anay sila hasta nuay mas otro quien puede oi. El maga anciano pirmi ta pricura converza na manera que ta dale dignidad con el quien ta oi kanila. Maskin pa ansina, gendeh sila tan alang-alang dale mira maga principio na Biblia que puede ayuda con otro para hace justo decision. (Le con el Proverbio 9:9.) Porque bien importante que tiene kita animo para man cuento si necesita? Considera con el dos diferente ejemplo. Na primer ejemplo, el un gente necesita corecta con el de suyu maga anak hombre. El otro ejemplo amo del un mujer quien necesita confronta con el un persona quien queda rey na futuro.

5. Del cuando debe converza si Eli pero nuay le hace?

⁵ El un alto sacerdote, si Eli, tiene dos anak hombre con quien ta ama gayot le. Pero, nuay respeto el de suyu maga anak con Jehova. Tiene sila importante responsibilidad como maga sacerdote na tabernaculo. Pero, ya usa sila con el diila autoridad na gendeh justo manera, nuay dale mira respeto na maga ofrecimiento para con Jehova y ya comete grabe sexual imoralidad. (1 Sam. 2:12-17, 22) Base na Ley de Moises, conviene mata con el dos anak hombre de Eli. Pero si Eli, ya regaña lang kanila y ya permiti siempre kanila que sirvi na tabernaculo. (Deut. 21:18-21) Cosa el mirada de Jehova na cosa ya hace si Eli na ese situacion? Si Jehova ya habla con Eli: “Porque mas ta honra pa tu con el de tuyu maga anak contra conmigo?” Si Jehova ya decidi mata con ese dos mal gente.​—1 Sam. 2:29, 34.

6. Cosa kita puede aprende con Eli?

⁶ Puede kita aprende un importante leccion con Eli. Si ya sabe kita que el un amigo o pariente diaton ya desobedece con el ley del Dios, debe kita man cuento con ele y hace con ele acorda el maga principio de Jehova. Despues, debe kita asigura que hay ricibi le el ayuda que necesita le estaba na maga representante de Jehova. (Sant. 5:14) No quierre gayot kita queda igual con Eli y mas honra con el diaton amigo o pariente contra con Jehova. Ta necesita  animo para confronta con el un persona quien ta necesita coreccion pero hay tiene gayot este buen resulta. Nota con el diferencia del ejemplo de Eli na ejemplo del un Israelita mujer que el nombre Abigail.

7. Porque ya converza si Abigail con David?

⁷ Si Abigail amo el mujer del un rico y dueño de tierra, si Nabal. Cuando si David y de suyu maga gente ta esconde cay quierre kanila mata si Rey Saul, ya esta sila junto por cuanto tiempo con aquellos quien ta vicia con el maga carnero de Nabal y ya protege con el maga carnero na maga bandido. Ya aprecia ba si Nabal con el diila ayuda? Nuay. Cuando ya pidi si David que dale un poco comida y agua con el de suyu maga gente, si Nabal ya rabia y ya insulta kanila. (1 Sam. 25:5-8, 10-12, 14) Como resulta, si David ya plaña mata con el todo hombre na casa de Nabal. (1 Sam. 25:13, 22) Paquemodo puede evita con ese problema? Ya realiza si Abigail que tiempo ya para converza. Poreso, con animo le ya anda hace encuentro con el 400 gente quien rabiao, con hambre y armao y yan cuento con David.

8. Cosa kita puede aprende na ejemplo de Abigail?

⁸ Cuando ya mira si Abigail con David, yan cuento le con animo, respeto y na manera que ya puede convinci con David. Maskin pa nuay culpa si Abigail, ya pidi le perdon con David. Ya habla le que sabe le que buen gente si David y hace le si cosa el justo. Ya confia tambien si Abigail que ayuda con ele si Jehova. (1 Sam. 25:24, 26, 28, 33, 34) Igual con Abigail, necesita kita tiene animo para converza si ta puede kita mira que tiene cosa ta hace el un persona que puede resulta na serioso culpa. (Sal. 141:5) Debe kita converza con respeto pero debe tambien kita tiene animo. Si ta conseja kita con el un persona na amable manera, ta dale kita mira que deverasan kita de suyu amigo.​—Prov. 27:17.

9-10. Cosa debe acorda el maga anciano si ta conseja con otro?

⁹ Bien importante que tiene animo el maga  anciano para converza con aquellos na congregacion quien ya puede hace kamali. (Gal. 6:1) Sabe el maga anciano que imperfecto tambien sila y posible, tiene tiempo, necesita tambien sila consejo. Pero gendeh este ta sangga con el maga anciano para dale consejo con aquellos ta necesita disciplina. (2 Tim. 4:2; Tito 1:9) Si ta conseja con el un persona, ta pricura sila usa con el diila abilidad converza para enseña con ele na buen manera y con paciencia. Ta ama sila con el diila hermano y ese amor ta manda move kanila para ayuda con ele. (Prov. 13:24) Pero el de con todo importante para kanila amo que honra con Jehova. Y puede se sila hace si sigui sila con el de suyu maga principio y protege con el congregacion na peligro.​—Act. 20:28.

¹⁰ Ya puede ya kita considera si cuando converza. Pero, tiene tiempo que mas bueno si esta kita silencio. Cosa maga dificultad kita posible puede enfrenta?

11. Cosa ilustracion ya usa si Santiago y porque este aplicable na converzada?

¹¹ Gendeh facil para controla con el diaton converzada. El escritor del Biblia, que si Santiago, ya usa un justo ilustracion acerca con este. Ele ya habla: “Si tiene gente quien gendeh ta comete culpa na disuyo conversada, ele un gente perfecto y ta puede ele controla el disuyo entero cuerpo.” (Sant. 3:2, 3) El palabra “controla” na este versiculo ta refiri con el amarro que ta usa para controla con el caballo. Ta pone con el amarro na cabeza y conectao este na un pedazo de metal que ta pone na boca del caballo. Si hala con el amarro, el quien ta munta puede guia con el animal o hace descanza con este. Si gendeh le agarra enbuenamente con el amarro, puede corre onde-onde el caballo y causa peligro con este mismo y con el quien ta munta. Na igual manera, si gendeh kita controla con el diaton converzada, puede este causa grande problema.  Considera kita con el cuanto situacion donde necesita kita controla con el diaton converzada y man silencio.

12. Cuando kita debe controla con el diaton converzada y man silencio?

¹² Cosa tu hace si el un hermano o hermana tiene informacion que gendeh puede habla na otro? Por ejemplo, si ya conoce tu un persona quien ta queda na un lugar donde ta prohibi con el diaton trabajo, quierre ba tu pregunta si paquemodo sila ta hace con el diaton trabajo na ese nacion? Asigurao, bueno el de tuyu motivo. Ta ama kita con el diaton maga hermano y interesao kita si cosa ta sucede kanila. Quierre tambien kita queda especifico si ta reza acerca kanila. Pero, este el tiempo que debe kita controla con el diaton converzada y man silencio. Si forza kita con el un persona quien tiene maga confidencial informacion, gendeh kita ta dale mira amor​—con ese mismo persona y con el maga hermano y hermana quien ta confia que gendeh se le habla con otro. Asigurao que nuay ni uno kanaton el quierre omenta na maga dificultad del diaton maga hermano y hermana quien ta queda na maga nacion donde ta prohibi con el diaton trabajo. Na igual manera, nuay hermano o hermana quien ta sirvi na ese maga nacion el quierre habla con otro si paquemodo sila ta conduci con el diila ministerio o otro teocratico actividad.

13. Como cosa ta habla el Proverbio 11:13, cosa debe hace el maga anciano y porque?

¹³ Bien importante que sigui el maga anciano con el principio na Proverbio 11:13. (Le.) Ta aplica sila con este si gendeh sila habla con otro el maga informacion que gendeh sila conviene sabe. Gendeh este facil especialmente con el maga casao anciano. El maga man maridable ta hace fuerte con el diila relacion si pirmi sila tan cuento con uno y otro y ta habla si cosa sila ta pensa, ta sinti y tan lingasa. Pero, el un anciano debe realiza que gendeh le debe habla con el de suyu mujer el maga “cosas confidencial” del maga hermano na congregacion. Si hace le se, gendeh mas sila confia con ele y queda malo el de suyu reputacion. Aquellos quien tiene responsibilidad na congregacion debe gendeh deshonesto. (1 Tim. 3:8) Quierre decir de este que gendeh sila debe engaña o man chismis con otro. Si el un anciano ta ama con el de suyu mujer, gendeh le habla maga informacion que gendeh necesita sabe el de suyu mujer.

14. Paquemodo el mujer del anciano puede ayuda mentena con el buen reputacion del de suyu marido?

¹⁴ El un mujer puede ayuda mentena con el buen reputacion del de suyu marido si gendeh le forza con ele para habla maga cosas confidencial. Si el un mujer sigui con este consejo, gendeh lang le ta suporta con el de suyu marido sino ta dale tambien le honor con aquellos quien ya habla maga privado cosas con el de suyu marido. Y el mas importante, ta hace le alegre con Jehova cay ta contribui le na paz y unidad del congregacion.​—Roma 14:19.

15. Cosa si Jehova ya sinti con el tres uban de Job y porque?

¹⁵ Manada kita cosa puede aprende na libro de Job acerca si paquemodo y cuando converza. Despues sufri si Job na manada calamidad, cuatro persona el ya anda para dale comforta y consejo con ele. Este maga persona ya dale grande tiempo para man silencio. Tres kanila amo kanda Elifaz, Bildad y Zofar. Puede mira na cosa sila ya habla que nuay sila usa con el tiempo para pensa si paquemodo sila ayuda con Job. En vez, ya pensa sila si paquemodo sila dale prueba que tiene cosa malo ya hace si Job. Justo el cuanto del cosa sila ya habla, pero duele y gendeh deverasan el mayoria del cosa sila ya habla acerca con Job y con Jehova. Ya acusa sila que mal persona si Job. (Job 32:1-3) Cosa si Jehova ya sinti acerca con ese? Ya rabia gayot  le con este tres persona. Ya llama le kanila maga nuay juicio y ya habla kanila que pidi con Job que reza para kanila.​—Job 42:7-9.

16. Cosa kita puede aprende na maga ejemplo de kanda Elifaz, Bildad y Zofar?

¹⁶ Puede kita aprende cuanto leccion na maga ejemplo de kanda Elifaz, Bildad y Zofar. Una, gendeh kita debe juzga con el diaton maga hermano. (Mat. 7:1-5) En vez, debe kita oi enbuenamente kanila antes kita converza. Puede lang kita entende con el diila situacion si hace kita se. (1 Ped. 3:8) Ika-dos, si ta converza kita, debe kita asigura que bueno el diaton maga palabra y justo el cosa kita ta habla. (Ef. 4:25) Y el ika-tres, bien interesao si Jehova na cosa kita ta habla con otro.

17. Cosa kita puede aprende na ejemplo de Elihu?

¹⁷ El ika-cuatro persona que ya visita con Job amo si Elihu, un pariente de Abraham. Ya oi le mientras tan cuento si Job y el tres gente. Claro que ya pone gayot le atencion na cosa sila tan cuento cay ya puede le dale bueno pero directa consejo que ya puede ayuda con Job para corecta con el de suyu pensamiento. (Job 33:1, 6, 17) El de con todo importante con Elihu amo que alaba con Jehova y gendeh con el de suyu mismo cuerpo o con el otro gente. (Job 32:21, 22; 37:23, 24) Puede kita aprende na ejemplo de Elihu que tiene tiempo para man silencio y para oi. (Sant. 1:19) Ya aprende tambien kita que si dale kita consejo, el de con todo importante kanaton amo que alaba con Jehova y gendeh con el diaton mismo cuerpo.

18. Paquemodo kita dale mira que ta aprecia kita con el regalo de converzada?

¹⁸ Puede kita dale mira que ta aprecia kita con el regalo de converzada si sigui kita con el consejo del Biblia acerca si cuando y si paquemodo kita converza. El Dios ya guia con Rey Solomon para escribi: “El palabra que ya habla na justo tiempo amo como manzanas de oro na un bandejao que hacido de plata.” (Prov. 25:11) Si oi kita enbuenamente na cosa ta habla el otro y pensa antes converza, el diaton maga palabra hay queda igual na manzanas de oro​—valuable y bonito. Y maskin poco o manada man kita cosa habla, el diaton maga palabra puede anima con otro y puede kita hace alegre con Jehova. (Prov. 23:15; Ef. 4:29) Este el de con todo buen manera para dale mira apresacion con este regalo estaba con Dios!