El Biblia ta habla que despues lleva con Jose el maga Midianita na Egipto, el patriarca que si Jacob y de suyu familia ya transfiri estaba na Canaan para na Egipto. Ya esta sila na un region de Egipto que ta llama Gosen, na punta del Rio de Nilo que conectao na mar. (Gen. 47:1, 6) El maga Israelita ‘ya continua queda bien manada y ya queda mafuerza.’ Poreso, el maga Egipcio ya tiene miedo con el maga Israelita y ya hace kanila maga esclavo.​—Ex. 1:7-14.

El cuanto maga critico ya gangguia con el cosa ta habla el Biblia y ya habla que gendeh este deverasan. Pero, tiene evidencia que el maga Semita * ya queda maga esclavo na Egipto.

Por ejemplo, el maga arqueologo ya puede discubri na norte parte del Egipto cuanto maga lugar onde ya queda el maga gente de antes. Si Dr. John Bimson ya habla que tiene maga 20 o mas pa maga Semitico comunidad na ese lugar. Mas pa, el Egyptologist que si James K. Hoffmeier ya habla: “Na maga año 1800 hasta 1540 B.C., el Egipto amo un lugar donde bonito esta para na maga gente quien ta converza Semitico que estaba na oeste parte del Asia.” Ya omenta le: “Este largor de tiempo amo tambien el tiempo del maga patriarca y igual se na tiempo y situacion que puede kita le na Genesis.”

Tiene pa omento evidencia estaba na sur parte de Egipto. Un papiro (papyrus) que estaba na maga año 2000 hasta maga 1600 B.C.E. ta contene maga nombre del maga esclavo quien ya trabaja na un casa na sur parte de Egipto. Mas de 40 del maga nombre alla amo Semitico. Este maga esclavo o trabajador ta cuci, ta teje y ta sirvi como trabajante. Si Hoffmeier ya habla: “Ciendo mas de cuarenta Semita el ya trabaja na un casa lang na Thebaid [sur parte de Egipto], posible que manada Semita na entero Egipto, especialmente na punta rio.”

Si David Rohl que un arqueologo ya escribi que el cuanto maga nombre del maga esclavo na lista “ta semeja con el maga nombre que puede le na Biblia.” Por ejemplo, el papiro ta contene maga nombre que semejante na maga nombre Isacar, Aser y Sipra. (Ex. 1:3, 4, 15) “Un deverasan evidencia este que el maga Israelita ya queda maga esclavo na Egipto,” ya habla si Rohl.

Si Dr. Bimson ya habla: “Tiene deverasan basejan na historia el cosa ta habla el Biblia acerca na pagka-esclavo del maga Israelita na Egipto y na salida diila aqui.”