1-2. Quien puede ayuda con el Bible study progresa para na bautismo?

“YA GUSTA gayot yo con el cosa yo ya aprende cuando ya estudia yo con el Biblia,” ya habla si Amy quien ta queda na Fiji. “Sabe yo que amo este el verdad. Pero, ya puede lang yo realiza que necesita yo hace maga cambio y progresa para na bautismo cuando ya principia yo man junto con el maga hermano y hermana.” El experiencia de Amy ta enseña kanaton este importante verdad: Grande el posibilidad que continua progresa el Bible study para na bautismo si ayuda con ele el congregacion.

² El cada publisher puede ayuda para queda parte del congregacion el maga interesao persona. (Ef. 4:16) El un pioneer que si Leilani, quien ta queda na Vanuatu, ya habla: “Asegun con otro, necesita el ayuda del un barrio para hace engranda con el un bata. Para conmigo, ansina tambien si ta hace maga dicipulo. Necesita el ayuda del congregacion para guinda na verdad el un persona.” Necesita el ayuda del maga miembro na familia, amigo y maestro para ayuda con el bata queda mature. Puede sila hace con este si anima sila con el bata y enseña con ele maga importante leccion. Na igual manera, el maga publisher puede dale consejo, anima y dale mira buen ejemplo con el maga Bible study y ayuda kanila progresa para na bautismo.​—Prov. 15:22.

3. Cosa tu ya aprende na cosa ya habla si Ana, Dorin y Leilani?

³ Porque el publisher quien ta conduci Bible study debe ricibi el ayuda del otro maga publisher? Nota si cosa ya habla si Ana, un special pioneer na Moldova, “Bien dificil para na un persona para dale el todo necesidad del un Bible study.” Si Dorin, un special pioneer na ese mismo nacion, ya habla, “Mas  mucho, tiene cosa ta puede habla el otro maga publisher que ta puede alcanza na corazon del Bible study, cosas que nuay gayot yo puede pensa.” Si Leilani ya menciona otro razon: “El amor que sinti el Bible study puede ayuda con ele para realiza que maga siervo de Jehova gayot kita.”​—Juan 13:35.

4. Cosa kita discuti na este articulo?

⁴ Pero posible pensa tu, ‘Paquemodo yo puede ayuda con el un Bible study que progresa si gendeh iyo el quien ta conduci con el estudiada?’ Considera kita si cosa kita puede hace si pidi kanaton man uban na estudiada y si cosa kita puede hace si el Bible study ya principia ya atende miting. Mira tambien kita si paquemodo el maga anciano puede ayuda con el maga Bible study que progresa para na bautismo.

5. Cosa el de tuyu papel si pidi contigo man uban na Bible study?

⁵ Durante el estudiada, responsibilidad del quien ta conduci que ayuda con el Bible study que entende con el Palabra del Dios. Si este publisher pidi man uban contigo na estudiada, talla tu para suporta con ele. (Ecl. 4:9, 10) Cosa tu puede hace para puede ayuda durante el Bible study?

6. Si man uban tu na estudiada, paquemodo tu puede aplica con el principio na Proverbio 20:18?

⁶ Prepara para na estudiada. Una, pidi con el publisher un poco detalle acerca con el Bible study. (Le con el Proverbio 20:18.) Puede tu pregunta: “Cosa el background del Bible study? Cosa topico ustedes discuti? Cosa tu quierre que aprende el Bible study na este estudiada? Tiene ba yo cosa debe o gendeh debe hace o habla durante el estudiada? Cosa yo puede hace para anima con el Bible study para progresa?” Siempre, gendeh contigo habla el publisher maga confidencial informacion pero puede ayuda el detalle que dale le. Ese el cosa ta discuti si Joy, un misionario, con aquellos quien man uban con ele na Bible study. Ele ya habla: “El maga informacion que dale yo con el de mio uban puede ayuda para queda le interesao con el de mio Bible study y para sabe le si cosa habla durante el estudiada.”

7. Si man uban tu na Bible study, porque tu necesita prepara con el leccion?

⁷ Si pidi contigo man uban na Bible study, mas bueno si puede tu prepara con el leccion que hay discuti. (Esd. 7:10) Si Dorin, el hermano que ya menciona enante, ya habla: “Ta aprecia yo si el de mio uban ta prepara para na diamon estudiada. Como resulta, tiene le cosa bonito ta puede contribui.” Mas pa, tiene posibilidad que nota el Bible study si igual ustedes preparao y hay dale este buen ejemplo con ele. Gendeh man tu tanto puede prepara con el leccion pero bueno si dale  tu tiempo para saca con el maga importante punto.

8. Cosa tu hace para asigura que especifico el de tuyu rezo na Bible study?

⁸ Un importante parte del Bible study el rezo poreso pensa adelantao si cosa tu habla si pidi contigo reza. Si hace tu se, hay queda mas especifico el de tuyu rezo. (Sal. 141:2) Si Hanae, quien ta queda na Japan, ya acorda con el rezo que ya dale el un hermana quien ya sigui con el quien tan Bible study con ele. Ele ya habla: “Ya sinti yo que tiene le buen amistad con Jehova y quierre yo queda igual con ele. Ya sinti tambien yo que ta ama le conmigo cuando ya inclui le con el de mio nombre na rezo.”

9. Asegun na Santiago 1:19, cosa tu puede hace para queda un buen uban durante el estudiada?

⁹ Suporta con el quien ta conduci el estudiada. “El un buen uban ta oi enbuenamente durante el estudiada,” ya habla si Omamuyovbi, un special pioneer na Nigeria. “Ta dale le maga buen comento pero gendeh le pirmi tan cuento, cay sabe le que gendeh ele el quien ta conduci con el estudiada.” Paquemodo tu sabe si cuando y si cosa tu habla durante el estudiada? (Prov. 25:11) Oi enbuenamente mientras tan cuento el quien ta conduci y el Bible study. (Le con el Santiago 1:19.) Si hace tu se, hay queda tu preparao ayuda na justo tiempo. Pero siempre, debe tu pensa antes de converza. Por ejemplo, gendeh tu por demas man cuento, man sabat mientras ta explica el quien ta conduci o introduci otro topico. Sino, por medio na un corto comento, ilustracion o pregunta, puede tu ayuda hace claro con el punto que ya discuti. Tiene vez, posible tu sinti que nuay mas tu cosa puede omenta. Pero, si dale tu comendacion con el Bible study y dale mira personal interes con ele, puede tu ayuda con ele progresa.

10. Paquemodo posible puede ayuda el de tuyu experiencia con el un Bible study?

¹⁰ Relata de tuyu experiencia. Si puede ayuda con el de tuyu Bible study, puede tu dale corto detalle si paquemodo tu ya aprende con el verdad, si paquemodo tu ya enfrenta con el un dificultad o si paquemodo tu ya puede mira que ya ayuda contigo si Jehova. (Sal. 78:4, 7) Posible, amo gayot este el cosa necesita oi el Bible study. Baka puede este hace fuerte con el de suyu fe o anima con ele para continua progresa para na bautismo. Y posible, ayuda este con ele si paquemodo enfrenta con el un probanza que ta experiencia le. (1 Ped. 5:9) Si Gabriel, quien ta queda na Brazil y quien ta sirvi ahora como un pioneer, ya acorda si paquemodo le ya beneficia cuando ya estudia le con el Biblia. Ele ya habla: “Cuando ya oi yo con el experiencia del maga hermano, ya aprende yo que ta mira si Jehova con el diaton maga dificultad. Y si ya puede sila enfrenta con ese, puede tambien yo.”

11-12. Porque kita debe man welcome enbuenamente con el un Bible study quien ta atende na maga miting?

¹¹ Para progresa para na bautismo el un Bible study, debe le atende regular na maga miting na congregacion. Puede se ayuda con ele. (Heb. 10:24, 25) Posible, invita el quien tan Bible study con ele para atende na miting por primer vez. Si atende le, todo kita puede anima con ele para continua atende na Kingdom Hall. Paquemodo kita hace con ese?

¹² Man welcome enbuenamente con el Bible study. (Roma 15:7) Si sinti el Bible study que tan welcome con ele na maga miting, grande el posibilidad que continua le anda na Kingdom Hall. Man greet enbuenamente con el Bible study y introduci con ele na otro mientras ta asigura que comfortable le. Man cuento con ele cay posible, nuay pa llega el quien tan Bible study con ele o baka ocupao na otro responsibilidad na Kingdom Hall. Oi enbuenamente con el cosa ta habla el Bible study y dale mira personal interes con ele. Cosa posible el efecto si man welcome tu enbuenamente con el un Bible study? Nota con el experiencia de Dmitrii, quien ya bautiza cuanto año pa lang el ya pasa y ta sirvi ahora como un siervo ministerial. Ya acorda le con el primer vez que ya atende le na miting y ya habla: “El un hermano ya mira conmigo que ta nervia mientras ta espera apuera del Kingdom Hall y ya lleva le conmigo adentro. Manada el quien ya atraca para man greet conmigo. Nuay gayot yo quel expecta. Ya gusta gayot yo quel y gane ya pensa yo que era todo el dia tiene miting. Nuay pa gayot yo se experiencia maskin onde.”

13. Cosa posible el efecto del de tuyu conducta na un Bible study?

¹³ Dale mira buen ejemplo. El de tuyu conducta puede ayuda para convinci con el Bible study que ya incuntra le con el verdad. (Mat. 5:16) Si Vitalii, quien ta sirvi ahora como un pioneer na Moldova, ya habla: “Ya puede yo observa con el manera de vida del otro na congregacion y si paquemodo sila ta pensa y ta actua. Ya convinci este conmigo que el maga Testigo de Jehova amo el deverasan religion.”

14. Paquemodo posible puede ayuda el de tuyu ejemplo con el un persona para continua progresa?

¹⁴ Para queda cualificao na bautismo, el un Bible study necesita aplica con el cosa le ta aprende. Gendeh este pirmi facil. Pero si puede mira el Bible study si paquemodo tu ya beneficia cay ya aplica tu con el maga principio na Biblia, posible manda este move con ele para imita contigo. (1 Cor. 11:1) Considera con el experiencia de Hanae que ya menciona enante. Ele ya habla: “El maga hermano y hermana ta aplica con el maga cosas que ta aprende yo. Ya mira yo si paquemodo yo puede anima con otro, perdona y dale mira amor. Pirmi  bueno el cosa sila ta habla acerca con otro. Quierre yo imita kanila.”

15. Paquemodo kita puede aplica con el Proverbio 27:17 na maga Bible study?

¹⁵ Queda un buen amigo con el Bible study. Mientras ta continua atende miting el Bible study, continua dale mira personal interes con ele. (Fil. 2:4) Puede tu man cuento con ele para mas conoce con ele. Mientras ta evita pregunta acerca na privado cosas, puede tu comenda con ele na maga positivo cambio que ya hace le y pregunta con ele acerca na de suyu estudiada na Biblia, de suyu familia y de suyu trabajo. Puede este ayuda para queda ustedes mas cerca na uno y otro. Si queda tu un buen amigo con el Bible study, ta ayuda tu con ele progresa para na bautismo. (Le con el Proverbio 27:17.) Si Hanae ta sirvi ahora como un regular pioneer. Ya acorda le cuando ya principia le atende na miting y ya habla le: “Mientras ta tiene yo maga amigo y amiga na congregacion, ya principia yo queda excited na maga miting y ta atende yo maskin pa cansao. Alegre yo man junto con el de mio maga nuevo amigo y ya ayuda este para gendeh mas yo man amigo con aquellos quien gendeh ta adora con Jehova. Quierre yo queda mas cerca con Jehova y na maga hermano y hermana. Poreso, ya decidi yo bautiza.”

16. Cosa pa tu puede hace para ayuda con el un Bible study para queda alegre na congregacion?

¹⁶ Mientras el Bible study ta continua progresa y ta hace maga cambio, ayuda con ele para sinti le que parte le del congregacion. Puede tu este hace si hospitable tu. (Heb. 13:2) Si Denis, quien ta sirvi na Moldova, ya acorda con el tiempo cuando tan Bible study pa le. Ele ya habla: “Manada beses ya invita conmigo y con el de mio mujer para man junto na maga hermano. Ya habla sila kanamon si paquemodo kanila ya ayuda si Jehova y ya anima gayot este kanamon. Este maga ocasion ya ayuda kanamon para queda convincido que quierre kame sirvi con Jehova y hay tiene kame un alegre vida si hace kame se.” Si el un Bible study ya queda ya cualificao como un publisher, puede tambien tu invita con ele que man junto contigo na ministerio. Si Diego, un publisher na Brazil, ya habla: “Manada hermano el ya invita conmigo que man junto kanila na ministerio. Amo este el de con todo buen manera para mas conoce kanila. Cay ya hace yo se, manada yo cosa ya aprende y ya sinti yo que mas cerca yo con Jehova y con Jesus.”

17. Paquemodo el maga anciano puede ayuda con el maga Bible study?

¹⁷ Dale tiempo para na maga Bible study. Maga anciano, puede ustedes ayuda con el maga Bible study que progresa para na bautismo si dale ustedes mira kanila amor y personal interes. Puede ba ustedes regular man cuento  kanila na miting? Puede sila sinti que interesao ustedes kanila si acorda ustedes con el diila nombre, especialmente si principia sila man comento. Puede ba ustedes arregla con el de ustedes schedule para puede ustedes sigui con el un publisher na de suyu Bible study? Posible, nuay tu idea si paquemodo de grande tu puede ayuda con el Bible study. Si Jackie, un pioneer quien ta queda na Nigeria, ya habla: “Manada Bible study el ya espanta cuando ya sabe sila que el quien yan uban conmigo na estudiada amo un anciano. El un Bible study ya habla: ‘Gendeh gayot se hace el diamon pastor. Ta visita le con el maga rico lang y si ta paga sila con ele.’” Ese Bible study ta atende ya ahora na maga miting.

18. Paquemodo el maga anciano puede cumpli con el diila responsibilidad na Maga Actividad 20:28?

¹⁸ Man train y anima con el maga publisher. Maga anciano, tiene ustedes un importante responsibilidad que ayuda con el maga publisher para queda efectivo na diila ministerio, incluido ya si paquemodo sila ta conduci Bible study. (Le con el Maga Actividad 20:28.) Si tan huya el publisher que conduci con el estudiada, ofrece que etu el conduci. Si Jackie que ya menciona enante, ya habla: “El maga anciano regular ta pregunta acerca na de mio maga Bible study. Si ta enfrenta yo maga dificultad na de mio maga Bible study, ta dale sila maga bonito consejo.” Grande gayot el cosa puede hace el maga anciano para anima con el maga publisher que continua. (1 Tes. 5:11) Si Jackie ya omenta: “Quierre-quierre gayot iyo si el maga anciano ta anima y ta habla conmigo que ta aprecia sila con el de mio esfuerzo. El diila maga palabra ta refresca conmigo igual na un baso de agua frio si caliente el sol. El diila comendacion ya dale conmigo confianza y ya omenta con el de mio alegria mientras ta continua yo conduci Bible study.”​—Prov. 25:25.

19. Cosa alegria kita todo puede tiene?

¹⁹ Maskin pa gendeh kita ta conduci Bible study ahora, puede siempre kita ayuda con el un persona para progresa na espiritual. Maskin pa gendeh kita manada cosa habla, puede kita suporta con el quien ta conduci por medio na diaton maga comento que ya prepara kita. Puede kita queda un buen amigo kanila si ta anda sila na Kingdom Hall y dale mira buen ejemplo kanila. Y el maga anciano puede ayuda con el maga Bible study si dale sila tiempo para kanila. Puede tambien sila ayuda con el maga publisher si man train y comenda sila kanila. Hay queda gayot kita alegre si tiene kita cosa puede hace maskin paquemodo de diutay para ayuda con el un persona ama y sirvi con Jehova.