1. Asegun na Mateo 24:9, porque gendeh mas kita debe estraña si ta odia kanaton el mundo?

YA CREA kanaton si Jehova para ama con otro y tiene el deseo que ama tambien sila kanaton. Poreso, si tiene quien ta odia kanaton ta sinti kita duele y baka ta tiene pa gane miedo. Por ejemplo, el un hermana que si Georgina, quien ta queda na Europe, ya habla: “Cuando 14 año yo, ya rabia gayot conmigo el de mio nana cay ta sirvi yo con Jehova. Ya sinti yo bien triste y solo, y ya principia yo pensa que baka gendeh yo un buen persona.” * El un hermano que si Danylo ya escribi: “Cuando el maga soldao ya gulpia, ya insulta y ya amenaza conmigo cay uno yo del maga Testigo de Jehova, ya tiene yo miedo y ya sinti huya.” Duele si ta odia kanaton el otro pero gendeh mas kita ta estraña. Si Jesus ya predicta que hay odia kanaton.​—Le con el Mateo 24:9.

2-3. Porque ta odia con el maga siguidores de Jesus?

² El mundo ta odia con el maga siguidores de Jesus. Porque? Cay igual con Jesus, “gendeh [kita] del mundo.” (Juan 15:17-19) Como resulta, maskin pa ta respeta kita con el maga gobierno del gente, gendeh kita ta adora kanila o con el maga cosas que ta representa kanila. Ta dale kita el diaton exclusivo devocion con Jehova. Ta suporta kita con el derecho del Dios para rula con el maga gente​—el derecho que ta cuestiona si Satanas y el de suyu “descendiente.” (Gen. 3:1-5, 15) Ta predica kita que el Reino del Dios amo el solamente esperanza del maga gente y gendeh mas dura, ese Reino hay destroza con el todo quien tan contra con este. (Dan. 2:44; Rev. 19:19-21) Buen noticia se para con el maga sumiso pero mal noticia se para con el maga malo.​—Sal. 37:10, 11.

 ³ Ta odia tambien kanaton cay ta vivi kita asegun na maga justo principio del Dios. Este maga principio bien diferente na bajo moralidad del mundo. Por ejemplo, aceptable lang na manada gente ahora el maga bien imoral practica, el igual razon si porque ya destroza el Dios con el Sodoma y Gomorra! (Jud. 7) Cay ta sigui kita con el maga principio na Biblia acerca na ese maga practica, manada maga gente el ta gangguia kanaton y ta habla que gendeh kita ta acepta con el mirada del otro.​—1 Ped. 4:3, 4.

4. Cosa maga calidad el puede hace fuerte kanaton si ta odia kanaton el otro?

⁴ Cosa puede ayuda kanaton para aguanta si el maga gente ta odia y ta insulta kanaton? Necesita kita tiene fuerte fe que si Jehova hay ayuda kanaton. Igual na un defensa, el diaton fe ta “hace apaga con el maga pana de fuego del Demonio.” (Ef. 6:16) Pero, mas pa na fe el cosa kita necesita. Necesita tambien kita tiene amor. Porque? Cay “el amor gendeh ta rabia.” Ta aguanta este con el todo cosas que ta hace kanaton sinti duele. (1 Cor. 13:4-7, 13) Considera kita ahora si paquemodo el amor para con Jehova, amor para na diaton maga hermano y hermana, y amor maskin para na diaton maga enemigo puede ayuda kanaton para aguanta si ta odia kanaton.

5. Paquemodo el amor de Jesus para con el de suyu Tata ya hace fuerte con ele?

⁵ Na noche antes con ele mata el de suyu maga enemigo, si Jesus ya habla con el de suyu maga leal siguidores: ‘Ta ama yo con el Tata poreso ta hace yo el cosa el Tata ya manda conmigo.’ (Juan 14:31) El amor de Jesus para con Jehova ya hace fuerte con ele para enfrenta con el maga probanza que hay experiencia le. El diaton amor para con Jehova puede tambien ayuda kanaton na ansina manera.

6. Asegun na Roma 5:3-5, cosa ta sinti el maga siervo de Jehova cay ta odia kanila el mundo?

⁶ El amor con Dios pirmi ta ayuda con el maga siervo de Jehova para aguanta na persecucion. Por ejemplo, cuando el poderoso corte suprema del maga Judio ya manda descanza predica con el maga apostoles, el amor con Dios ya manda move kanila para “obedece con Dios, y gendeh con el maga gente.” (Act. 5:29; 1 Juan 5:3) Este fuerte amor con Dios amo tambien el ta ayuda con el diaton maga hermano ahora para esta fiel maskin pa ta persigui kanila el maga brutal y poderoso gobierno. En vez queda maluya, ta mira kita como un privilegio que aguanta con el rabia del mundo.​—Act. 5:41; le con el Roma 5:3-5.

7. Cosa kita debe hace si tan contra kanaton el diaton familia?

⁷ Posible, el uno na de con todo dificil probanza amo si el diaton mismo familia man contra kanaton. Cuando ya principia kita dale mira interes na verdad, el cuanto na diaton familia posible pensa que ya engaña kanaton. El otro posible pensa que ya queda ya kita loco. (Compara na Marcos 3:21.) Posible pa gane sila man contra kanaton. Gendeh mas kita debe espanta na diila negativo reaccion. Si Jesus ya habla: “El mismo maga parriente de un gente amo ay queda disuyo maga contrario.” (Mat. 10:36) Siempre, maskin paquemodo man kanaton ta mira el diaton maga pariente, gendeh kita ta trata kanila como el diaton maga enemigo. Sino, mientras ta queda hondo el diaton amor para con Jehova, ta queda tambien hondo el diaton amor para na maga gente. (Mat. 22:37-39) Pero, nunca kita desobedece con el maga ley y principio na Biblia para lang ganá el favor del otro gente.

8-9. Cosa ya puede ayuda con el un hermana para aguanta na grabe oposicion?

⁸ Si Georgina que ya menciona enante, ya puede aguanta maskin pa na grabe oposicion  del de suyu nana. Si Georgina ya explica: “Iyo pati el de mio nana ya principia estudia con el Biblia junto na maga Witness. Pero despues del seis meses cuando quierre yo atende miting, bigla lang ya cambia el custumbre del de mio nana. Ya puede yo sabe que tan cuento le na maga apostata y ta usa le con el diila maga falso acusacion si tan cuento le conmigo. Ta insulta tambien le conmigo, ta hala de mio pelo, ta hace cuga conmigo y ta buta con el de mio maga literatura. Cuando 15 año yo, ya bautiza yo. El de mio nana ya pricura conmigo hace descanza sirvi con Jehova y ya pone conmigo na un casa junto na maga teenager que el cuanto yan droga y ya comete maga crimen. Mas dificil enfrenta con el oposicion si estaba este na un persona quien debe era ama y cuida contigo.”

⁹ Cosa ya puede ayuda con Georgina? Ele ya habla: “El dia cuando ya principia man contra conmigo el de mio nana, nuevo lang yo ya acaba le con el entero Biblia. Ahora, bien convincido yo que ya puede ya yo incuntra con el verdad y ya sinti yo bien cerca con Jehova. Ta reza yo con ele pirmi y ta oi le conmigo. Cuando ta queda yo na ese casa, el un hermana ya invita conmigo na de suyu casa y ya estudia kame junto con el Biblia. Na ese tiempo, ya hace tambien fuerte conmigo el maga hermano y hermana na Kingdom Hall. Ya trata sila conmigo como diila familia. Iyo mismo ya puede mira que mas mafuerza si Jehova que con el diaton maga contrario, maskin quien man sila.”

10. Cosa kita puede asigura que hace si Jehova, el diaton Dios?

¹⁰ Si apostol Pablo ya escribi que nuay maskin cosa puede “separta canaton na amor del Dios que Ele ya dale mira por medio de Jesucristo el diaton Señor.” (Roma 8:38, 39) Maskin pa posible kita sufri por cuanto tiempo, pirmi junto kanaton si Jehova para dale comforta y hace fuerte kanaton. Y como cosa ta dale mira el experiencia de Georgina, ta ayuda tambien kanaton si Jehova por medio na diaton precioso espiritual familia.

11. Paquemodo el amor que ya menciona si Jesus na Juan 15:12, 13 puede ayuda con el de suyu maga dicipulo? Dale un ejemplo.

¹¹ Na noche antes le muri, si Jesus ya hace acorda con el de suyu maga dicipulo que ama con uno y otro. (Le con el Juan 15:12, 13.) Sabe le que el amor puede ayuda kanila para esta unido y aguanta si odia kanila el mundo. Considera con el ejemplo del congregacion na Tesalonica. Desde na tiempo cuando ya forma  con este, ya persigui con el maga miembro de este. Maskin pa ansina, el maga hermano y hermana alla ya queda ejemplo de integridad y amor. (1 Tes. 1:3, 6, 7) Si Pablo ya anima kanila que continua dale mira amor y “hace mas grande progreso” na ese aspeto. (1 Tes. 4:9, 10) El amor hay manda move kanila para anima con el maga depress y suporta con el maga maluya. (1 Tes. 5:14) Ya sigui sila con el instruccion de Pablo cay na de suyu segundo carta que ya escribi maga un año despues, si Pablo ya puede habla kanila: “El amor que tiene ustedes con uno y otro firmi ta omenta.” (2 Tes. 1:3-5) El diila amor ya puede ayuda kanila para aguanta con el dificultad y persecucion.

12. Cuando tiene guerra, paquemodo el maga hermano y hermana na un nacion ya dale mira amor para na uno y otro?

¹² Considera con el experiencia de Danylo que ya menciona enante y del de suyu mujer. Cuando el guerra ya alcanza na diila lugar, ya continua sila atende na maga miting, ya hace el todo para puede predica y ya dale comida con el diila maga hermano y hermana. Despues un dia, tiene maga armao soldao el ya atraca con Danylo. “Ya habla sila conmigo que descanza yo sirvi como un Witness,” ya habla si Danylo. “Cuando nuay yo conforma, ya gulpia sila conmigo y ya pretende sila que tira conmigo pero ya tira sila arriba lang na de mio cabeza. Antes sila sale, ya amenaza sila que hay bira sila para man rape con el de mio mujer. Pero, el maga hermano ya manda dayun kanamon munta tren para na otro barrio. Nunca gayot yo ulvida con el amor de este maga amable hermano. Y cuando ya llega kame na otro barrio, el maga hermano alla ya dale kanamon comida y ya ayuda conmigo busca trabajo y onde esta. Como resulta, ya puede tambien kame manda esta na diamon casa con el maga hermano quien ya evacua.” Ese experiencia ta dale mira que el diaton amor para na uno y otro puede ayuda kanaton para aguanta si ta odia kanaton.

13. Paquemodo el sagrao espiritu puede ayuda kanaton para continua na diaton servicio con Jehova maskin ta odia kanaton el otro?

¹³ Si Jesus ya habla con el de suyu maga siguidores que ama con el diila maga enemigo. (Mat. 5:44, 45) Facil lang ba este hace? Siempre gendeh! Pero, posible se na ayuda del sagrao espiritu del Dios. El fruta del espiritu del Dios ta inclui el amor, paciencia, hacida de bueno con otro, pagka-calmao y control na cuerpo.  (Gal. 5:22, 23, NWT) Este maga calidad puede ayuda kanaton para aguanta si ta odia kanaton. Manada gente el ya descanza man contra kanaton cay el diila Witness marido, mujer, anak o vecinos ya dale mira ese maga calidad. Gane, manada kanila ya queda diaton hermano y hermana. Poreso si tan dificil tu ama con aquellos quien ta odia contigo cay ta sirvi tu con Jehova, reza para na sagrao espiritu. (Luc. 11:13) Y confia que el obediencia con Dios amo pirmi el de con todo bueno cosa para hace.​—Prov. 3:5-7.

14-15. Paquemodo el Roma 12:17-21 ya ayuda con Yasmeen para dale mira amor na de suyu marido maskin pa tan contra este con ele?

¹⁴ Considera el ejemplo de Yasmeen, quien ta queda na Middle East. Cuando ya queda le uno del maga Testigo de Jehova, el de suyu marido ya pensa que ya engaña con ele y ya pricura con ele sangga para sirvi con Dios. El de suyu marido ya insulta con ele y ya anima con el maga pariente pati con el un clero y un surujano para amenaza con ele y acusa que ta destroza le con el de suyu familia. Gane, ya insulta el de suyu marido con el maga hermano durante na un miting na congregacion! Manada beses ta llura si Yasmeen cay gendeh con ele ta trata enbuenamente.

¹⁵ Na Kingdom Hall, el espiritual familia de Yasmeen ya dale con ele comforta y ya hace fuerte con ele. El maga anciano ya anima con ele que aplica con el consejo que puede incuntra na Roma 12:17-21. (Le.) “Gendeh quel facil,” ya habla si Yasmeen. “Pero, ya pidi yo ayuda con Jehova y ya hace yo el todo para aplica con el cosa ta habla el Biblia. Poreso si intencional hace buling el de mio marido na cucina, ta limpia yo con este. Si ta insulta le conmigo, ta contesta yo enbuenamente. Y si enfermo le, ta cuida yo con ele.”

16-17. Cosa tu ya aprende na ejemplo de Yasmeen?

¹⁶ Ya tiene buen resulta cay ya dale mira amor si Yasmeen con el de suyu marido. Ele ya habla: “Ya principia conmigo mas confia el de mio marido cay sabe le pirmi yo ta habla el verdad. Ta oi ya le conmigo con respeto si tan cuento kame acerca na religion y ya conforma le que gendeh mas kame man peleajan. Ahora, ta anima ya le conmigo atende na maga miting. Mas ya queda ya enbuenamente el diamon familia y tiene ya paz na casa. Ta esperanza yo que el de mio marido hay acepta con el verdad y man junto conmigo sirvi con Jehova.”

¹⁷ El ejemplo de Yasmeen ta dale mira que el amor “ta perdona todo, . . . ta espera todo y ta  aguanta todo.” (1 Cor. 13:4, 7) Poderoso el rabia y puede hace sinti duele pero mas mafuerza el amor. Ta puede este cambia con el corazon del un persona. Y ta dale este alegria na corazon de Jehova. Maskin pa ta continua kanaton odia el diaton maga contrario, puede siempre kita queda alegre. Paquemodo?

18. Porque kita puede queda alegre si ta odia kanaton?

¹⁸ Si Jesus ya habla: “Alegre ustedes cuando el maga gente ta odia . . . con ustedes.” (Luc. 6:22) Nuay kita iscuji que odia kanaton. Gendeh kita ta pricura queda martir. Pero porque kita puede queda alegre si ta odia kanaton? Considera con el tres razon. Una, si ta aguanta kita, ta ganá kita el favor del Dios. (1 Ped. 4:13, 14) Ika-dos, el diaton fe ta queda mas fuerte y valuable con Dios. (1 Ped. 1:7) Y ika-tres, hay ricibi kita un precioso premio​—el vida hasta para cuando.​—Roma 2:6, 7.

19. Porque alegre el maga apostoles despues kanila latiga?

¹⁹ Nuay dura despues resucita con Jesus, ya experiencia el maga apostoles el alegria que ya menciona le. Despues kanila latiga y ya manda descanza predica, ya queda sila alegre. Porque? “Cay ya pasa sila como un honor el verguenza que ya sufri sila por causa del Nombre de Jesus.” (Act. 5:40-42) Mas grande el diila amor para con Jesus que con el diila miedo na diila maga enemigo. Ya dale sila mira el diila amor cuando ‘nuay sila descanza’ predica con el buen noticia. Manada na diaton maga hermano ahora el ta continua sirvi fiel maskin pa na maga dificultad. Sabe sila que gendeh ulvida si Jehova con el diila trabajo y amor para na de suyu nombre.​—Heb. 6:10.

20. Cosa kita hay considera na siguiente articulo?

²⁰ Hay continua kanaton odia el mundo mientras ta queda kita na daan sistema. (Juan 15:19) Pero, gendeh kita necesita tiene miedo. Como cosa kita hay considera na siguiente articulo, si Jehova “hay dale . . . fuerza y ay protégé” con el de suyu maga leal siervo. (2 Tes. 3:3) Poreso, continua kita ama con Jehova, con el diaton maga hermano y hermana, y maskin con el diaton maga enemigo. Si sigui kita con ese consejo, hay esta kita unido y fuerte na espiritual, hay lleva kita honor con Jehova y hay dale kita prueba que el amor mas poderoso que con el rabia.