1. Porque ya pidi si Jesus con Jehova que protege con el de suyu maga dicipulo?

NA ULTIMO noche del vida de Jesus como un gente, ya pensa le con el maga dificultad que hay enfrenta el de suyu maga dicipulo. Por causa de suyu amor para na de suyu maga amigo, si Jesus ya pidi con el de suyu Tata que “proteje canila para hende sila ay cae bajo mando di Satanas.” (Juan 17:14, 15, El Nuevo Testamento) Sabe si Jesus que despues le bira na cielo, si Satanas Diablo hay continua man contra con maskin quien quierre sirvi con Jehova. Poreso, el maga siervo de Jehova necesita proteccion.

2. Porque kita puede asigura que hay contesta si Jehova con el diaton maga rezo?

² Ya contesta si Jehova con el rezo de Jesus cay ta ama Le con el De Suyu Anak. Si pricura kita hace el todo para hace alegre con Jehova, hay ama tambien le kanaton y hay dale le kanaton el ayuda y proteccion si pidi kita con ese na rezo. Como un amable Cabeza de familia, si Jehova hay continua cuida con el de suyu maga anak. Envuelto el de suyu nombre o el de suyu reputacion!

3. Porque kita necesita con el proteccion de Jehova ahora?

³ Mas necesita gayot kita ahora con el proteccion de Jehova. “Bien rabiao” si Satanas cay ya buta con ele aqui na tierra. (Rev. 12:12) Ya puede le convinci con el cuanto que si ta persigui sila kanaton, “ta honra sila con el Dios.” (Juan 16:2) El otro quien gendeh ta creé con Dios ta persigui kanaton cay diferente kita con el maga gente na este mundo. Maskin cosa pa el razon si porque sila ta persigui kanaton, puede kita tiene confianza. Porque? Cay el Palabra del Dios ya habla: “El Señor bien fiel, y Ele ay dale con ustedes fuerza y ay protégé con ustedes contra el demonio.” (2 Tes. 3:3) Paquemodo kanaton ta protege si Jehova? Hay discuti kita dos manera.

4. Asegun na Efeso 6:13-17, cosa ya dale si Jehova para protege kanaton?

⁴ Ya dale kanaton se Jehova un completo armadura que puede protege kanaton na maga ataque de Satanas. (Le con el Efeso 6:13-17.) Fuerte este espiritual armadura y puede gayot protege kanaton! Pero, hay queda lang kita protegido si usa kita con el cada pedazo de este armadura y gendeh quita con este. Na cosa ta representa el cada pedazo? Hay discuti kita con el cada uno de este.

5. Cosa el sintoron de verdad y porque kita debe usa con este?

⁵ El sintoron de verdad ta representa con el maga verdad que puede incuntra na Palabra del Dios, el Biblia. Porque kita debe usa con este sintoron? Cay si Satanas amo el “tata del imbusterias.” (Juan 8:44) Miles de año ya le tan imbusterias y ya puede le engaña “con el entero mundo”! (Rev. 12:9) Pero, el maga verdad na Biblia ta protege kanaton para gendeh kanaton puede engaña. Paquemodo kita ta usa con ese simbolico sintoron? Ta usa kita con este si ta aprende kita con el verdad acerca con Jehova, si ta adora kita con ele “na Espiritu y na verdad” y si honesto kita na todo cosas.​—Juan 4:24; Ef. 4:25; Heb. 13:18.

6. Cosa el sanggadura de pecho de pagka-recto y porque kita debe bisti con este?

⁶ El sanggadura de pecho de pagka-recto ta representa con el maga recto principio de Jehova. Porque kita debe bisti con ese sanggadura de pecho? Igual si paquemodo el sanggadura de pecho ta protege con el literal corazon del un soldao desde na lanciada, el sanggadura de pecho de pagka-recto ta protege con el diaton figurativo corazon o el diaton deverasan personalidad desde na maga mal influencia de este mundo. (Prov. 4:23) Ta expecta si Jehova que ama y sirvi kita con ele con todo corazon. (Mat. 22:36, 37) Poreso, ta pricura si Satanas dividi con el diaton corazon y ta hace manera para ama kita con el maga cosas de este mundo​—maga cosas que ta odia si Jehova. (Sant. 4:4; 1 Juan 2:15, 16) Y si gendeh este bale kanaton, hay persigui le kanaton para gendeh mas kita sigui con el maga principio de Jehova.

7. Cosa kita hace para bisti con el sanggadura de pecho de pagka-recto?

⁷ Ta bisti kita con el sanggadura de pecho de pagka-recto si ta sigui kita con el maga principio de Jehova acerca si cosa el justo y si cosa el mali, y si ta vivi kita harmonia con ese maga principio. (Sal. 97:10) El cuanto posible sinti que el maga principio de Jehova ta pone kanaton restriccion. Pero si gendeh mas kita aplica con el maga principio na Biblia na diaton vida, igual lang kita na un soldao quien ya quita con el sanggadura de pecho durante el guerra cay ta sinti le que bien pesao este. Gendeh gayot se justo para hace! Para con aquellos quien ta ama con Jehova, el de suyu maga mandamiento “gendeh pesao” sino ta salva con el diila vida.​—1 Juan 5:3.

8. Cosa quierre decir que bisti na diaton pies el sandallas de buen noticia de paz que preparao kita declara?

⁸ Ya anima tambien kanaton si Pablo que bisti na diaton pies el sandallas de buen noticia de paz que preparao kita declara. Quierre decir, debe kita pirmi preparao predica con el buen noticia del Reino. Si ta habla kita con otro el mensaje del Biblia, ta queda fuerte el diaton mismo fe. Ta puede gayot anima kanaton si ta mira kita si paquemodo el maga siervo de Jehova na entero mundo ta busca oportunidad para declara con el buen noticia​—si na trabajo, na escuela, na lugar de negocio y si ta predica na casa en casa, tan compra, ta visita maga pariente que gendeh Witness, tan cuento con el maga conoce y maskin si na casa lang. Si tiene kita miedo y descanza predica, hay queda kita  igual na un soldao quien ya quita con el de suyu sandallas durante el guerra; pronto lang iri el de suyu pies. Como resulta, man dificil le defende con el de suyu mismo cuerpo si ataca con ele y gendeh le puede sigui con el mandato del de suyu comandante.

9. Porque kita necesita carga con el grande defensa de fe?

⁹ El grande defensa de fe ta representa con el diaton fe con Jehova. Ta confia kita que hay cumpli le con el todo de suyu maga promesa. Ese fe hay ayuda kanaton “para hace apaga con el maga pana de fuego del Demonio.” Porque kita necesita carga con este grande defensa? Cay ta protege este kanaton para gendeh kanaton puede engaña el maga enseñanza del maga apostata y gendeh kita man luya si gangguia kanaton el otro. Si nuay kita fe, nuay kita el fuerza para resisti si el otro hay pricura man pressure kanaton que ignora con el maga principio de Jehova. Pero cada vez gendeh kita tan compromiso na trabajo o na escuela, ta carga kita con el diaton defensa. (1 Ped. 3:15) Cada vez gendeh kita ta acepta con el un trabajo que mas grande el sueldo que posible sangga con el diaton espiritual rutina, ta carga kita con el diaton defensa. (Heb. 13:5, 6) Y cada vez ta sirvi kita con Jehova maskin pa na oposicion, ta protege kanaton el diaton defensa.​—1 Tes. 2:2.

10. Cosa el helmet de salvacion y porque kita debe bisti con ese?

 ¹⁰ El helmet de salvacion amo el esperanza que ya dale kanaton si Jehova​—el esperanza que hay salva le kanaton na muerte y hay premia con el todo quien ta hace el de suyu voluntad. (1 Tes. 5:8; 1 Tim. 4:10; Tito 1:1, 2) Igual si paquemodo el literal helmet ta protege con el cabeza del un soldao, el esperanza de salvacion ta protege con el diaton pensamiento. Na cosa manera? Ese esperanza ta ayuda kanaton para esta focus na maga promesa del Dios y ta ayuda kanaton para tiene justo mirada na diaton maga problema. Paquemodo kita bisti con este helmet? Ta bisti kita con ese si ta asigura kita que el diaton pensamiento harmonia na pensamiento del Dios. Por ejemplo, ta pone kita con el diaton esperanza gendeh na maga riqueza que ta perde lang sino con Dios.​—Sal. 26:2; 104:34; 1 Tim. 6:17.

11. Cosa el espada del espiritu y porque kita necesita usa con este?

¹¹ El espada del espiritu amo el Palabra del Dios, el Biblia. Ese espada tiene el poder para curta con el todo clase de imbusterias y para libra con el maga gente quien ya queda esclavo na maga falso enseñanza y maga peligroso practica. (2 Cor. 10:4, 5; 2 Tim. 3:16, 17; Heb. 4:12) Ya aprende kita si paquemodo usa enbuenamente con ese espada por medio na diaton personal estudiada y por medio na training que ta ricibi kita na organizacion del Dios. (2 Tim. 2:15) Puera na completo armadura, ya dale tambien kanaton si Jehova otro cosa para protege kanaton. Cosa este?

12. Cosa pa kita necesita y porque?

¹² El un experienciao soldao sabe que gendeh le ganá na guerra contra na bien manada soldao na de suyu mismo cuerpo lang. Necesita le el ayuda del de suyu maga uban soldao. Na igual manera, gendeh kita puede ganá contra con Satanas y con el de suyu maga siguidores na diaton mismo cuerpo lang. Necesita kita el suporta del diaton maga hermano y hermana. Si Jehova ya dale kanaton bien manada uban na entero mundo quien puede ayuda kanaton.​—1 Ped. 2:17.

13. Asegun na Maga Hebreo 10:24, 25, cosa el maga beneficio si atende kita na diaton maga miting?

¹³ El un manera que puede kita ricibi ayuda amo si atende kita na diaton maga miting. (Le con el Maga Hebreo 10:24, 25.) Si tan luya kita​—como cosa kita todo ta sinti tiene vez—​el maga miting puede anima kanaton. Alegre kita oi con el maga buen comento del diaton maga hermano y hermana. El maga talk que base na Biblia y maga demonstracion que ta dale sila ta hace fuerte con el diaton determinacion para sirvi con Jehova. Y ta puede anima kanaton si tan cuento kita kanila antes y despues del miting. (1 Tes. 5:14) Mas pa, el diaton maga miting ta dale kanaton oportunidad para ayuda con otro y ta hace se kanaton alegre. (Act. 20:35; Roma 1:11, 12) El diaton maga miting ta ayuda tambien kanaton na otro maga manera. Ta ayuda este kanaton para queda mas efectivo na ministerio. Por ejemplo, ya aprende kita si paquemodo usa con el diaton maga tool na Teaching Toolbox na buen manera. Poreso, prepara enbuenamente para con el diaton maga miting na congregacion. Durante el miting, oi enbuenamente. Despues del miting, aplica con el training que ya ricibi tu. Si hace tu con este maga cosas, hay queda tu “un buen soldao de Cristo Jesus.”​—2 Tim. 2:3.

14. Cosa pa el otro ayuda que ya dale kanaton?

¹⁴ Tiene tambien kita el suporta del millones de maga poderoso angel. Pensa si cosa puede hace el un angel! (Isa. 37:36) Ahora, considera si cosa puede hace el un grupo de maga poderoso angel. Nuay maskin quien gente o maskin  quien demonio el ganá contra con el maga poderoso soldao de Jehova. Bien poderoso si Jehova. Poreso, si junto le kanaton hay queda kita mas poderoso contra con el diaton maga contrario maskin cuanto pa sila. (Juez 6:16) Deverasan gayot se! Pensa con el todo quien puede ayuda contigo si tan luya tu na cosa ya habla o ya hace el de tuyu uban na trabajo, na escuela o de tuyu pariente que gendeh Witness. Acorda que gendeh tu solo na este guerra. Ta sigui tu con el direccion de Jehova poreso hay suporta le contigo.

15. Asegun na Isaias 54:15, 17, porque gendeh descanza predica el maga siervo del Dios?

¹⁵ Manada razon el mundo que bajo na control de Satanas para odia kanaton. Ta esta kita neutral na politica y gendeh ta participa na guerra. Ta proclama kita con el nombre del Dios, ta predica que el de suyu Reino lang el puede lleva deverasan paz y ta sigui kita con el de suyu maga recto principio. Ta dale kita mira que el quien ta rula con este mundo amo un imbustero y ta causa el muerte del maga gente. (Juan 8:44) Y ta anuncia kita que bien cerca ya destroza con el mundo de Satanas. Pero, nunca kanaton puede sangga si Satanas y el de suyu maga siguidores. En vez, hay continua kita alaba con Jehova na todo manera que puede kita. Maskin paquemodo de poderoso si Satanas, nuay le puede sangga con el mensaje del Reino que llega con el maga gente na entero mundo. Ya queda lang se posible por causa na proteccion de Jehova.​—Le con el Isaias 54:15, 17.

16. Paquemodo salva si Jehova con el de suyu maga siervo durante el grande tribulacion?

¹⁶ Cosa sucede na futuro? Durante el grande tribulacion, hay salva kanaton si Jehova na dos manera. Una, hay salva le con el de suyu maga leal siervo durante el tiempo cuando hay causa le con el maga rey del tierra para destroza con el Grande Babilonia, el imperio del falso religion. (Rev. 17:16-18; 18:2, 4) Despues, hay salva le con el de suyu maga siervo cuando hay destroza le con el otro elemento del mundo de Satanas na Armagedon.​—Rev. 7:9, 10; 16:14, 16.

17. Cosa el beneficio si esta kita cerca con Jehova?

¹⁷ Si esta kita cerca con Jehova, gendeh puede hace un cosa si Satanas que puede causa kanaton permanente peligro. Gane, con ele destroza hasta para cuando. (Roma 16:20) Poreso, bisti con el completo armadura​​—y no quita con ese! No anda na guerra que solo-solo lang tu. Suporta con el de tuyu maga hermano y hermana. Y sigui con el direccion de Jehova. Si hace tu se, puede tu asigura que el de tuyu amable Tata na cielo hay hace fuerte y protege contigo.​—Isa. 41:10.