1. Cosa kita puede habla acerca con el diaton maga joven hermano?

MAGA joven hermano, puede gayot con ustedes usa na congregacion. Manada con ustedes el mafuerza na fisical. (Prov. 20:29) Ta puede ustedes ayuda con el de ustedes maga hermano y hermana. Posible, ta espera ustedes con el tiempo que iscuji con ustedes para sirvi como siervo ministerial. Pero, baka ta pensa ustedes que ta mira con ustedes el otro que bien joven pa o gendeh pa preparao para ricibi maga importante assignment. Maskin joven pa ustedes, tiene ustedes cosa puede hace ahora para ganá el respeto de aquellos na de ustedes congregacion.

2. Cosa kita hay considera na este articulo?

² Na este articulo, hay considera kita con el vida de Rey David. Hay discuti tambien kita unrato acerca con Asa y Josafat​—dos rey del Juda. Hay examina kita con el cuanto dificultad que ya enfrenta este tres hombre, si cosa sila ya hace para solva con ese y si cosa puede aprende el maga joven hermano na diila maga ejemplo.

3. Cosa el un manera que puede ayuda el maga jovenes con el maga de edad na congregacion?

³ Cuando joven pa si David, ya puede le tiene maga abilidad que ya aprecia el otro. Claro que un espiritual persona le. Ya hace le esfuerzo para queda un buen musiquero y ya usa con  ese abilidad para ayuda con Saul, el iscujido rey del Dios. (1 Sam. 16:16, 23) Maga joven hermano, tiene ba ustedes abilidad que puede ayuda con otro na congregacion? Manada con ustedes tiene abilidad. Por ejemplo, posible puede ustedes nota que el cuanto maga de edad ta aprecia gayot si el maga joven hermano ta ayuda kanila aprende si paquemodo usa con el diila maga tablet y otro maga gadget para na diila personal estudiada y na maga miting. Cay sabe ustedes usa con este maga tecnologia, puede gayot ustedes ayuda con el maga de edad.

4. Igual con David, cosa maga calidad el debe tiene el maga joven hermano? (Mira con el letrato na cover.)

⁴ Ya dale mira si David que responsable le y puede con ele confia. Por ejemplo cuando joven pa le, ya cuida gayot le enbuenamente con el maga carnero del de suyu tata. Peligroso este trabajo. Gane, ya habla si David con Rey Saul: “El de tuyu siervo ya queda pastor del maga carnero del de suyu tata y tiene ya llega leon y oso, y el cada uno kanila ya carga un carnero estaba na grupo del maga carnero. Ya hace yo apas y ya hace tumba con este y ya salva con el carnero na boca de este.” (1 Sam. 17:34, 35) Sabe si David que responsibilidad de suyu que cuida con el maga carnero y con coraje le ya protege kanila. El maga jovenes puede imita con David si hace sila enbuenamente con el maskin cosa assignment que ya dale kanila.

5. Asegun na Salmo 25:14, cosa el de con todo importante cosa que puede hace el maga joven hermano?

⁵ Tiene si David un cerca relacion con Jehova. Ese relacion mas importante que con el coraje de David o de suyu abilidad tuca instrumento de cuerdas. Si Jehova gendeh lang Dios de David sino de suyu cerca Amigo tambien. (Le con el Salmo 25:14.) Maga joven hermano, el de con todo importante que puede ustedes hace amo hace fuerte con el de ustedes relacion con el de ustedes Tata na cielo. Si hace ustedes se, posible ustedes ricibi omento privilegio.

6. Cosa el negativo mirada del otro acerca con David?

⁶ El otro tiene negativo mirada con David. Por ejemplo, cuando yan voluntario si David para anda man contra con Goliat, si Rey Saul ya pricura sangga con ele y ya habla: “Bata lang tu.” (1 Sam. 17:31-33) Antes con ese, el mismo hermano de David ya acusa con ele que iresponsable le. (1 Sam. 17:26-30) Pero, nuay pensa si Jehova que bata pa si David  o iresponsable. Bien conoce le con David. Y ya puede mata si David con Goliat cay ya confia le con el de suyu Amigo, si Jehova.​—1 Sam. 17:45, 48-51.

7. Cosa tu puede aprende na experiencia de David?

⁷ Cosa tu puede aprende na experiencia de David? Necesita tu queda paciencioso. Posible, necesita tiempo para mira contigo como un adulto aquellos quien conoce contigo desde bata pa tu. Pero, puede tu asigura que si Jehova gendeh lang ta mira con el de tuyu ichura. Conoce le contigo y sabe le si cosa tu puede hace. (1 Sam. 16:7) Hace fuerte el de tuyu relacion con Dios. Ya puede se hace si David cuando ya observa le con el maga creacion de Jehova. Ya medita si David si cosa este ta enseña acerca con el Creador. (Sal. 8:3, 4; 139:14; Roma 1:20, NWT) El otro cosa que puede tu hace amo que pidi con Jehova el fuerza que necesita tu. Por ejemplo, ta gangguia ba contigo el cuanto del de tuyu maga classmate cay uno tu del maga Testigo de Jehova? Si ansina, reza con Jehova que ayuda contigo enfrenta con ese dificultad. Y aplica con el maga practical consejo que puede incuntra na de suyu Palabra y na diaton maga publicacion y video. Cada vez puede tu mira que ta ayuda contigo si Jehova enfrenta con el dificultad, mas queda fuerte el de tuyu confianza con ele. Mas pa, si mira el otro que ta confia tu con Jehova, hay ganá tu con el diila confianza.

8-9. Cosa ya ayuda con David para espera con paciencia hasta queda le rey y cosa puede aprende el maga joven hermano na de suyu ejemplo?

⁸ Considera con el otro dificultad que ya enfrenta si David. Despues con ele iscuji para queda rey, necesita espera largo tiempo si David antes le principia rula como el rey del Juda. (1 Sam. 16:13; 2 Sam. 2:3, 4) Durante na ese tiempo, cosa ya puede ayuda con ele para espera con paciencia? En vez de man luya, yan focus si David na cosa le puede hace. Por ejemplo, mientras ta esconde si David na teritorio del maga Filisteo, ya usa le con el de suyu tiempo para anda man guerra con el maga enemigo del Israel. Por causa con ese, ya puede le protege con el maga teritorio del Juda.​—1 Sam. 27:1-12.

⁹ Cosa puede aprende el maga joven hermano na ejemplo de David? Usa con el de tuyu oportunidad que tiene tu para sirvi con el de tuyu maga hermano. Considera con el experiencia del un hermano que el nombre Ricardo. * Ya dura ya gayot le quierre sirvi como un regular pioneer. Pero, el maga anciano ya habla con ele que gendeh pa le preparao. En vez man luya o rabia, mas ya dale tiempo si Ricardo na ministerio. Ele ya habla: “Cuando ya pensa yo con el de mio pasada, ya realiza yo que necesita pa yo mas progresa. Ya asigura yo que puede yo bira con el todo maga interesao y prepara para na cada return visit. Ya puede pa gane yo conduci con el de mio primer Bible study. Mientras ta tiene yo experiencia, mas ta tiene yo confianza na cuerpo.” Ahora ta sirvi ya si Ricardo como un regular pioneer y un siervo ministerial.

10. Na un ocasion, cosa ya hace si David antes le hace un importante decision?

¹⁰ Considera con el otro pa suceso na vida de David. Cuando ele y el de suyu maga soldao ta esconde por causa con Rey Saul, ya deja sila con el diila familia para anda man guerra. Cuando talla sila na guerra, el maga enemigo ya anda ataca con el diila lugar y ya saca con el diila maga familia. Puede era pensa si David cay ciendo un experienciao soldao le, asigurao puede le hace plano si paquemodo  salva con el maga cautivo. Pero, nuay le se hace. Sino, ya pidi le guia con Jehova. Na ayuda del un sacerdote que si Abiatar, si David ya pregunta con Jehova: “Hace ba yo apas con el maga bandido?” Ya habla si Jehova con David que debe le se hace y ya asigura con ele que hay tiene le buen exito. (1 Sam. 30:7-10) Cosa tu puede aprende na este suceso?

11. Cosa tu puede hace antes hace maga decision?

¹¹ Pidi consejo con otro antes hace maga decision. Consulta con el de tuyu maga mayores. Puede tambien tu saca buen consejo na maga experienciao anciano. Ta confia si Jehova con este maga hermano y puede tambien tu confia kanila. Ta mira si Jehova kanila como “regalo” na congregacion. (Ef. 4:8) Puede tu beneficia si imita tu con el diila fe y oi con el diila maga buen sugestion que ta dale sila. Ahora, considera kita si cosa kita puede aprende con Rey Asa.

12. Cosa maga calidad tiene si Rey Asa cuando ya principia le rula?

¹² Cuando joven si Rey Asa, humilde y animoso le. Por ejemplo, cuando ya releva le con el de suyu tata si Abias, ya principia le un campaña contra con el idolatria. “Ya habla tambien le na Juda que busca con Jehova, el Dios del diila maga tatarabuelo y obedece con el Ley y el maga mandamiento.” (2 Cron. 14:1-7) Y cuando si Zera de Etiopia junto con el 1,000,000 maga soldao ya ataca con el Juda, si Asa ya pidi ayuda con Jehova y ya habla: “O Jehova, puede tu ayuda maskin con quien, manada man sila o poco. Ayuda kanamon, O Jehova diamon Dios, cay ta confia kame contigo.” Este bonito expresion ta dale mira si paquemodo de grande el confianza de Asa na abilidad de Jehova para salva con ele y con el maga de Juda. Ya confia si Asa con el de suyu Tata na cielo y “ya ayuda si Jehova . . . para hace perde con el maga de Etiopia.”​—2 Cron. 14:8-12.

13. Cosa ya sucede con Asa na uliji y porque?

¹³ Asigurao que man uyun tu que bien maka-miedo que anda man guerra contra na 1,000,000 soldao. Cay ya confia le con Jehova, ya ganá si Asa. Pero maka-triste, cuando ya enfrenta le gendeh bien dificil problema, nuay consulta si Asa con Jehova. Cuando ya hace miedo el mal rey de Israel que si Baasa, si Asa ya pidi ayuda con el rey de Siria. Ese  decision ya tiene mal resulta! Por medio con profeta Hanani, si Jehova ya habla con Asa: “Cay ya confia tu con el rey de Siria y gendeh con Jehova de tuyu Dios, el maga soldao del rey de Siria ya escapa na de tuyu mano.” Gane desde aquel tiempo, pirmi tiene guerra durante el rulanza de Asa. (2 Cron. 16:7, 9; 1 Rey 15:32) Cosa el leccion?

14. Paquemodo tu confia con Jehova y asegun na 1 Timoteo 4:12, cosa el resulta si hace tu se?

¹⁴ Esta humilde y continua confia con Jehova. Cuando ya bautiza tu, ya dale tu mira que tiene tu grande fe y confianza con Jehova. Y alegre si Jehova cuando ya dale le contigo el privilegio que queda miembro del de suyu familia. El cosa tu necesita hace ahora amo que continua confia con Jehova. Dol facil lang confia con Jehova si necesita tu hace maga grande decision. Pero quetal si na otro tiempo? Bien importante que confia tu con Jehova si ta hace tu maga decision, incluido ya si acerca na entretenimiento, secular trabajo y goal. No depende na de tuyu mismo sabeduria. Sino, busca maga principio na Biblia que aplicable na de tuyu circumstancia y despues aplica con ese direccion. (Prov. 3:5, 6) Si hace tu se, puede tu hace alegre con Jehova y puede tu ganá el respeto de aquellos na congregacion.​—Le con el 1 Timoteo 4:12.

15. Como escribido na 2 Cronicas 18:1-3; 19:2, cosa maga kamali ya hace si Rey Josafat?

¹⁵ Siempre igual con el todo kanaton, imperfecto tambien tu y tiene vez puede tu hace maga kamali. Pero, gendeh este debe sangga contigo para hace el todo cosa tu puede hace na servicio con Jehova. Considera el ejemplo de Rey Josafat. Manada le buen calidad. Cuando joven pa le, “ya busca le con el Dios del de suyu tata y ya sigui con el de suyu mandamiento.” Mas pa, ya imbia le maga principe na entero ciudad de Juda para enseña con el maga gente acerca con Jehova. (2 Cron. 17:4, 7) Pero, ya hace tambien si Josafat maga gendeh justo decision. Como resulta na uno de ese maga decision, ya conseja con Josafat el uno del maga representante de Jehova. (Le con el 2 Cronicas 18:1-3; 19:2.) Cosa leccion tu puede aprende na este istoria?

16. Cosa tu puede aprende na experiencia de Rajeev?

¹⁶ Acepta y aplica con el consejo que ya dale contigo. Posible, igual na manada joven hombre, tan dificil tu hace prioridad con el  servicio con Jehova. No man luya. Nota con el experiencia del un joven hermano que el nombre Rajeev. Ya acorda le cuando teenager pa le: “No sabe yo si cosa yo hace na de mio vida. Igual na manada maga jovenes, mas interesao yo na sport y man alegria contra anda na maga miting y na ministerio.” Cosa ya puede ayuda con Rajeev? El un anciano ya dale con ele consejo. Si Rajeev ya explica: “Ya ayuda le conmigo que pensa enbuenamente con el principio na 1 Timoteo 4:8.” Humilde ya acepta si Rajeev con el consejo y ya examina con el de suyu prioridad na vida. Ele ya habla: “Ya decidi yo que hace una con el de mio maga espiritual goal.” Cosa el resulta? “Cuanto año despues ricibi con el consejo,” si Rajeev ya explica, “ya queda yo cualificao para sirvi como un siervo ministerial.”

17. Cosa ta sinti el maga hermano y hermana acerca con el maga joven hombre quien ta sirvi con Jehova?

¹⁷ El maga hermano y hermana na congregacion ta aprecia gayot con ustedes maga joven hombre quien ta sirvi con Jehova “con unidad” junto kanila! (Sof. 3:9) Ta gusta gayot sila cay con gana y activo ustedes ta hace con el trabajo que ya dale con ustedes. Valoroso ustedes na diila ojos.​—1 Juan 2:14.

18. Como cosa ta habla na Proverbio 27:11, cosa ta sinti si Jehova acerca con el maga joven hombre quien ta sirvi con ele?

¹⁸ Maga joven hermano, no ulvida que ta ama y ta confia con ustedes si Jehova. Ele ya habla que durante na ultimo maga dia, tiene grande grupo de maga joven hombre quien preparao man voluntario para sirvi con ele. (Sal. 110:1-3) Sabe le que ta ama ustedes con ele y quierre dale el de con todo bueno para con ele. Poreso, tiene paciencia con otro y na de ustedes mismo cuerpo. Si puede ustedes hace kamali, acepta con el consejo y disciplina y mira con este como estaba con Jehova. (Heb. 12:6) Hace enbuenamente con el maskin cosa assignment que ya dale con ustedes. Y el mas importante, na todo cosa ustedes hace, hace alegre con el de ustedes Tata na cielo.​—Le con el Proverbio 27:11.