1. Cosa clase maga probanza el posible ta enfrenta el maga siervo de Jehova?

TA EXPERIENCIA ba tu dificil probanza ahora? Posible, tiene na congregacion el ya hace sinti duele contigo. (Sant. 3:2) O baka el de tuyu uban na trabajo o na escuela ta gangguia contigo cay ta sirvi tu con Jehova. (1 Ped. 4:3, 4) O posible el maga miembro na familia ta pricura contigo sangga para gendeh tu atende na maga miting o man cuento con otro acerca na de tuyu fe. (Mat. 10:35, 36) Si bien dificil el probanza, posible sinti tu que mas bueno si descanza ya lang sirvi con Jehova. Pero, puede tu asigura que maskin cosa probanza tu experiencia, si Jehova hay dale contigo sabeduria para enfrenta con ese y el fuerza para aguanta.

2. Asegun na Roma 15:4, paquemodo el lehida na Palabra del Dios puede ayuda kanaton?

² Na de suyu Palabra, ya inclui si Jehova maga detalle si paquemodo el maga imperfecto individual ya enfrenta con el maga dificil probanza. Porque? Para puede kita aprende na cosa sila ya hace. Amo se el cosa ya manda si Jehova con apostol Pablo que escribi. (Le con el Roma 15:4.) Si le kita con este, puede este dale kanaton comforta y esperanza. Pero para beneficia, gendeh bastante que le lang kita con el Biblia. Debe kita permiti con el Escritura que cambia el manera si paquemodo kita ta pensa y ta sinti. Cosa kita puede hace si necesita kita guia si paquemodo enfrenta con el un especifico dificultad? Puede kita hace con este cuatro cosas: (1) Reza, (2) Imagina, (3) Medita y (4) Aplica. Discuti kita si cosa el envuelto na cada uno de ese. * Despues,  usa kita con ese cuatro cosas para aprende na cosa ya sucede con Rey David y con apostol Pablo.

3. Antes tu principia le con el Biblia, cosa tu debe hace y porque?

³ (1) Reza. Antes tu le con el Biblia, pidi con Jehova que ayuda contigo mira si paquemodo tu beneficia na cosa tu le. Por ejemplo, si ta busca tu consejo si paquemodo enfrenta con el un problema, pidi con Jehova que ayuda contigo para puede incuntra con el maga principio na de suyu Palabra que puede guia contigo.​—Fil. 4:6, 7; Sant. 1:5.

4. Cosa puede ayuda contigo para queda mas real el cosa tu ta le na Biblia?

⁴ (2) Imagina. Ya dale kanaton si Jehova el abilidad para imagina. Para queda mas real el cosa tu ta le na Biblia, pruba imagina el ecsena y pensa que dol etu mismo el caracter. Pruba mira con el maga cosas que ta mira le y sinti con el cosa le posible ta sinti.

5. Cosa el meditacion y paquemodo tu puede medita?

⁵ (3) Medita. El meditacion quierre decir que pensa enbuenamente acerca na cosa tu ta le y si paquemodo el informacion puede aplica contigo. Ayuda este contigo para mira con el coneccion del maga idea y para mas entende con el cosa tu ta le. Si ta le kita con el Biblia y gendeh ta medita con ese, dol aquel lang kita ta mira con el maga pedazo de jigsaw puzzle na mesa pero gendeh tan assemble con ese. Si medita tu, igual se como ta hace tu junto-junto con el maga pedazo para puede mira con el entero letrato. Para ayuda contigo medita, puede tu pregunta y contesta con este maga pregunta igual: ‘Cosa ya hace el caracter na ese istoria para solva con el de suyu problema? Paquemodo con ele ya ayuda si Jehova? Paquemodo yo puede usa con el maga leccion que ya aprende yo para ayuda conmigo enfrenta con el maga probanza?’

6. Porque kita debe aplica con el cosa kita ta aprende?

⁶ (4) Aplica. Si Jesus ya habla que si gendeh kita aplica con el cosa kita ta aprende, igual kita con el un gente quien ta planta con el de suyu casa na arena. Ya trabaja le enbuenamente pero sayang lang el de suyu esfuerzo. Porque? Cay si llega el fuerte ulan y viento y man avenida, el de suyu casa hay tumba. (Mat. 7:24-27) Na igual manera, si reza kita, imagina y medita pero gendeh kita ta aplica con el cosa kita ta aprende, sayang lang el diaton esfuerzo. Si experiencia kita maga problema o persecucion, gendeh kita puede aguanta cay gendeh fuerte el diaton fe. Pero, si estudia y aplica kita con el cosa kita ta aprende, puede kita hace mas justo decision, tiene kita paz na pensamiento y queda mas fuerte el diaton fe. (Isa. 48:17, 18) Usando el cuatro cosas que nuevo lang kita ya discuti, mira kita si cosa kita puede aprende na cosa ya sucede con Rey David.

7. Cosa istoria na Biblia kita discuti ahora?

⁷ Ya hace ba contigo sinti duele el de tuyu amigo o miembro na familia? Si ansina, puede tu beneficia si estudia tu con el istoria del anak de Rey David que si Absalom, quien ya traiciona con el de suyu tata y ya pricura queda rey.​—2 Sam. 15:5-14, 31; 18:6-14.

8. Cosa tu puede hace para ricibi el ayuda de Jehova?

⁸ (1) Reza. Mientras ta pensa con ese istoria, habla con Jehova el cosa tu ta sinti acerca na gendeh buen tratamiento contigo. (Sal. 6:6-9) Queda especifico. Despues, pidi con Jehova que ayuda contigo mira con el maga principio que puede contigo guia mientras ta pricura tu enfrenta con este dificil situacion.

9. Cosa ya sucede con David y Absalom?

⁹ (2) Imagina. Pensa con el maga suceso na  este istoria y imagina si paquemodo este ya afecta con Rey David. El anak de David que si Absalom ya hace grande esfuerzo por cuanto año para ama con ele el maga gente. (2 Sam. 15:7) Cuando ya sinti si Absalom que justo tiempo ya, ya imbia le maga espia na entero Israel para prepara con el maga gente que acepta con ele como diila rey. Ya convinci pa gane le con el uno del maga cerca amigo y quien ta dale consejo con David que si Ahitofel, para man junto con ele na rebelion. Si Absalom ya declara con el de suyu mismo cuerpo como rey y despues ya pricura cuji y mata con David, quien posible bien enfermo na aquel tiempo. (Sal. 41:1-9) Ya sabe si David con el maga plano de Absalom y ya escapa na Jerusalem. Despues, yan guerra el maga soldao de Absalom contra na maga leal soldao de David. Ya perde na guerra el maga rebelde soldao y ya muri si Absalom.

10. Cosa era puede hace si Rey David?

¹⁰ Imagina si cosa ya sinti si David cuando ya sucede este todo con ele. Ta ama le con Absalom y ta confia con Ahitofel. Pero, este dos ya traiciona con ele. Ya hace gayot sila sinti duele con ele y ya pricura pa gane mata con ele. Puede era perde el confianza de David na de suyu otro maga amigo y suspecha que sila tambien yan junto man rebelde con Absalom. Puede tambien era le pensa con el de suyu mismo cuerpo lang y escapa solo-solo na ese nacion. O man luya ya lang na todo cosa ya sucede con ele. Pero, nuay hace si David ese maga cosas. Sino, ya puede le aguanta con este dificil probanza. Porque le se ya puede hace?

11. Cosa ya hace si David para enfrenta con este dificil situacion?

¹¹ (3) Medita. Cosa maga principio tu ya puede aprende na este istoria? Contesta con este pregunta, “Cosa ya hace si David para solva con el de suyu problema?” Nuay man panic si David y dayun-dayun decidi. Nuay tambien le queda bien malingasa que no sabe ya le cosa hace. Sino, ya pidi le ayuda con Jehova na rezo. Ya pidi tambien le ayuda con el de suyu maga amigo. Y ya actua dayun le para hace el cosa le ya decidi. Maskin pa ya sinti gayot duele si David, nuay quel causa con ele para rabia y gendeh mas confia con otro. Ya continua le confia con Jehova y na de suyu maga amigo.

12. Cosa ya hace si Jehova para ayuda con David?

¹² Paquemodo si Jehova ya ayuda con David? Si man research tu, puede tu sabe que si Jehova ya dale fuerza con David que necesita le para enfrenta con este probanza. (Sal. 3:1-8; superscription) Ya bendici si Jehova con el maga decision de David. Y ya suporta le con el maga leal amigo de David cuando yan guerra sila para protege con el diila rey.

13. Paquemodo tu puede imita con David si ya sinti gayot tu duele na cosa ya hace el un persona? (Mateo 18:15-17)

¹³ (4) Aplica. Pregunta con el de tuyu mismo cuerpo, ‘Paquemodo yo puede imita con David?’ Necesita tu actua dayun para solva con el de tuyu problema. Depende na circumstancia, puede tu aplica con el consejo de Jesus na Mateo capitulo 18 o el principio de este. (Le con el Mateo 18:15-17.) Pero, gendeh tu debe dayun-dayun decidi que base lang na emocion. Debe tu reza con Jehova que ayuda contigo queda calma y dale contigo sabeduria que necesita tu para enfrenta con ese situacion. No perde confianza na de tuyu maga amigo. Sino, queda preparao acepta con el ayuda que ta dale sila. (Prov. 17:17) El mas importante, sigui con el consejo de Jehova que ta dale le estaba na de suyu Palabra.​—Prov. 3:5, 6.

14. Na cosa maga situacion el 2 Timoteo 1:12-16; 4:6-11, 17-22, puede anima contigo?

¹⁴ Ta enfrenta ba tu oposicion estaba na de  tuyu familia? O ta queda ba tu na un nacion donde ya pone grabe restriccion con el trabajo del maga siervo de Jehova o ya prohibi pa gane con ese? Si ansina, puede contigo anima si le tu con el 2 Timoteo 1:12-16 y 4:6-11, 17-22. * Ya escribi este maga versiculo si Pablo cuando na preso le.

15. Cosa tu puede pidi con Jehova?

¹⁵ (1) Reza. Antes tu le con aquel maga versiculo, habla con Jehova el de tuyu problema y si cosa tu ta sinti acerca con ese. Queda especifico. Despues, pidi con Jehova que ayuda contigo busca maga principio na ese maga versiculo acerca na maga probanza de Pablo que ayuda contigo sabe si cosa tu debe hace para enfrenta con el de tuyu maga problema.

16. Cosa ya sucede con Pablo?

¹⁶ (2) Imagina. Imagina que talli tu na situacion de Pablo. Ya pone con ele cadena mientras preso le na Roma. Yan preso ya le de antes pero na este tiempo, asigurao le que hay mata con ele. El cuanto del de suyu maga uban ya abandona con ele y ya sinti le cansao.​—2 Tim. 1:15.

17. Cosa era puede hace si Pablo?

¹⁷ Puede era man focus si Pablo na cosa con ele ya sucede del antes y pensa que si otro decision le ya hace, gendeh era con ele arresta. Puede era le rabia con el maga hombre na distrito de Asia quien ya abandona con ele y gendeh mas confia con el de suyu otro maga amigo. Pero, nuay se hace si Pablo. Porque asigurao si Pablo que el de suyu maga amigo ya esta leal con ele y hay bendici con ele si Jehova?

18. Cosa ya hace si Pablo para enfrenta con este probanza?

¹⁸ (3) Medita. Contesta con este pregunta, “Cosa ya hace si Pablo para solva con el de suyu problema?” Maskin pa sabe si Pablo que cerca ya con ele mata, nuay le ulvida que bien importante que lleva gloria con Jehova. Y ya continua le pensa si paquemodo le puede anima con otro. Por medio na regular rezo, ya dale le mira que ta confia le con Jehova. (2 Tim. 1:3) En vez de sobra pensa acerca con aquellos quien ya abandona con ele, ya rindi le gracias con el amable suporta del de suyu maga amigo quien ya ayuda con ele na maga practical manera. Omento pa, ya continua si Pablo estudia con el Palabra del Dios. (2 Tim. 3:16, 17; 4:13) El mas importante, asigurao le que ta ama con ele si Jehova y si Jesus. Nuay sila abandona con ele y asigurao le que hay bendici sila con el de suyu leal servicio.

19. Paquemodo si Jehova ya ayuda con Pablo?

¹⁹ Ya habla ya daan si Jehova con Pablo que hay enfrenta le persecucion por causa cay un Cristiano le. (Act. 21:11-13) Paquemodo si Jehova ya ayuda con Pablo? Ya contesta le con el maga rezo de Pablo y ya dale con ele fuerza. (2 Tim. 4:17) Ya asigura con Pablo que hay ricibi le con el premio que ya hace le grande esfuerzo para obtene. Ya usa tambien si Jehova con el maga leal amigo de Pablo para dale con ele practical ayuda.

20. Paquemodo kita puede imita con el fe de Pablo que ya dale mira na Roma 8:38, 39?

²⁰ (4) Aplica. Pregunta na de tuyu mismo cuerpo, ‘Paquemodo yo puede imita con Pablo?’ Igual con Pablo, debe kita expecta que hay persigui tambien kanaton por causa na diaton fe. (Mar. 10:29, 30) Para mentena con el diaton integridad bajo na probanza, necesita kita continua reza con Jehova y estudia con el de suyu Palabra. Y debe kita pirmi acorda que uno del maga de con todo importante cosas que puede kita hace amo dale gloria con Jehova. Puede kita asigura que nunca kanaton abandona si Jehova y nuay cosa puede hace el maskin quien para quita con el de  suyu amor para kanaton.​—Le con el Roma 8:38, 39; Heb. 13:5, 6.

21. Cosa ya ayuda con Aya y Hector para enfrenta con el diila maga dificultad?

²¹ Maskin cosa pa man el diaton circumstancia, el maga ejemplo na Biblia puede kanaton ayuda para tiene fuerza que necesita kita para aguanta. Por ejemplo, si Aya que un pioneer na Japan, ya habla que el istoria de Jonas ya puede con ele ayuda para ganá con el miedo na public witnessing. Si Hector, un jovencito na Indonesia que el mayores gendeh ta sirvi con Jehova, ya habla que el ejemplo de Rut ya ayuda con ele para aprende acerca con Jehova y sirvi con ele.

22. Cosa tu hace para mas beneficia na maga drama na Biblia o na serie “Imitate Their Faith”?

²² Onde tu puede incuntra maga ejemplo na Biblia que puede hace fuerte contigo? El diaton maga video y audio drama, y el serie “Imitate Their Faith” puede ayuda para queda mas real el maga suceso na Biblia. * Antes tu mira, oi o le con este maga istoria, pidi con Jehova que ayuda contigo para puede incuntra con el maga especifico punto que puede tu aplica. Imagina que etu mismo quel caracter. Medita con el cosa ya hace este maga fiel siervo de Jehova y si paquemodo le ya ayuda kanila enfrenta con el diila maga dificultad. Despues, aplica con el maga leccion na de tuyu mismo situacion. Rindi gracias con Jehova na maga ayuda que ya dale le contigo. Y puede tu dale mira que ta aprecia tu con ese maga ayuda, si busca tu oportunidad para anima y suporta con otro.

23. Asegun na Isaias 41:10, 13, cosa ya promete si Jehova que hace para kanaton?

²³ Bien dificil el vida na este mundo que controlao de Satanas y tiene vez, no sabe kita si cosa hace. (2 Tim. 3:1) Pero, gendeh kita necesita man lingasa o tiene miedo. Sabe si Jehova si cosa maga problema kita ta experiencia. Si necesita kita ayuda, ele ya promete que hay agarra le kanaton usando el de suyu derecha mano. (Le con el Isaias 41:10, 13.) Asigurao kita que hay ayuda kanaton si Jehova y el Escritura hay dale kanaton el fuerza que necesita kita para enfrenta con el maskin cosa problema.