1. Cosa el ta influencia con el diaton personalidad?

 CUANTO dia pa lang man kita bautizao o por cuanto decada ya, todo kita quierre tene el clase de personalidad que ta gusta si Jehova. Para queda de ese clase de persona, necesita kita controla con el diaton pensamiento. Porque? Cay grande el influencia del cosa kita ta pensa na diaton personalidad. Si pirmi kita ta pensa si paquemodo hace alegre con el diaton mismo cuerpo, hay habla kita y hace maga cosas malo. (Ef. 4:17-19) Pero si llena kita con el diaton pensamiento de maga buen cosas, grande el posibilidad que hay converza y actua kita na manera que ta hace alegre con el diaton Tata, si Jehova.​—Gal. 5:16.

2. Cosa maga pregunta kita hay considera na este articulo?

² Como ya menciona del ya pasa articulo, gendeh kita puede completamente evita que entra el maga mal cosas na diaton pensamiento. Pero, puede kita iscuji que gendeh actua asegun con ese pensamiento. Antes kita bautiza, necesita kita descanza converza y actua na manera que ta odia si Jehova. Ese el primero y el de con todo importante cosa para puede quita con el daan personalidad. Pero para puede mas hace alegre con Jehova, debe tambien kita obedece el mandamiento: Visti el nuevo personalidad. (Col. 3:10) Na este articulo, hay contesta kita con el siguiente pregunta: Cosa el nuevo personalidad? Paquemodo kita visti el nuevo personalidad y gendeh quita con ese?

3. Base na Galacia 5:22, 23, cosa el nuevo personalidad y paquemodo el un persona ta visti con ese?

³ El nuevo personalidad amo el manera si paquemodo ta pensa y ta actua el un persona que ta reflecta el personalidad de Jehova.  El un persona ta visti con el nuevo personalidad si ta demonstra le el fruta del espiritu del Dios y ta permiti con el sagrao espiritu para influencia con el de suyu maga pensamiento, sentido y accion. (Le con el Galacia 5:22, 23, NWT.) Por ejemplo, ta ama le con Jehova y con el De Suyu maga siervo. (Mat. 22:36-39) Ese persona ta esta alegre maskin pa ta enfrenta maga probanza. (Sant. 1:2-4) Ta pricura le mentena paz con otro. (Mat. 5:9) Paciencioso le y ta trata bueno con otro. (Col. 3:13) Ta ama le el cosas bueno y ta hace con ese. (Luc. 6:35) Ta dale le mira por medio na de suyu maga accion que tiene le fuerte fe na de suyu Tata na cielo. (Sant. 2:18) Ta esta le calmao maskin pa ta manda con ele rabia el otro y tiene control na cuerpo si ta enfrenta tentacion.​—1 Cor. 9:25, 27; Tito 3:2.

4. Para visti el nuevo personalidad, puede ba kita cultiva uno-uno con el maga calidad que ya menciona na Galacia 5:22, 23? Explica.

⁴ Para visti el nuevo personalidad, necesita kita cultiva con el todo maga calidad que ya menciona na Galacia 5:22, 23 y na otro pa maga texto na Biblia. * Este maga calidad gendeh igual na maga pedazo de ropa que puede kita visti uno-uno. Gane, el maga aspeto de este maga calidad puede incuntra na otro maga calidad. Por ejemplo, si deverasan tu ta ama con el de tuyu projimo, hay queda tu paciencioso y hay trata tu con ele enbuenamente. Y para queda deverasan bueno, debe tu queda calmao y tene control na cuerpo.

5. Cosa quierre decir que “tiene el pensamiento de Cristo” y porque kita debe estudia el vida de Jesus? (1 Corinto 2:16)

⁵ Le con el 1 Corinto 2:16. Para visti el nuevo personalidad, necesita kita “tiene el pensamiento de Cristo.” Quierre decir, debe kita aprende si paquemodo ta pensa si Jesus y despues imita con ele. Ya demonstra si Jesus el fruta del espiritu del Dios na perfecto manera. Igual na un espejo que nuay defecto, ya reflecta gayot le el mismo maga calidad de Jehova. (Heb. 1:3) Si mas hay pensa kita igual con Jesus, mas hay actua kita igual con ele y mas hay puede kita dale mira el de suyu personalidad.​—Fil. 2:5.

6. Cosa kita debe acorda si ta pricura kita visti el nuevo personalidad?

⁶ Posible ba gayot que puede kita sigui el ejemplo de Jesus? Posible kita pensa: ‘Perfecto si Jesus. Gendeh gayot yo puede queda igual  con ele!’ Si ta sinti tu ansina, acorda este maga verdad. Una, ya crea contigo para queda igual con Jehova y con Jesus. Poreso, puede tu iscuji que imita kanila y puede tu se hace maskin gendeh na perfecto manera. (Gen. 1:26) Ika-dos, el sagrao espiritu del Dios amo el de con todo poderoso fuerza na universo. Na ayuda de este, puede tu hace con el maga cosas que posible gendeh tu puede hace na de tuyu mismo cuerpo lang. Ika-tres, gendeh contigo ta expecta ahora si Jehova que demonstra tu el fruta del espiritu na perfecto manera. Gane, ya dale 1,000 año el diaton amable Tata para queda perfecto aquellos tiene esperanza na tierra. (Rev. 20:1-3) El cosa ta pidi kanaton ahora si Jehova amo que pricura kita hace el diaton de con todo bueno y confia na de suyu ayuda.

7. Cosa kita ahora hay considera?

⁷ Paquemodo kita puede imita con Jesus? Hay examina kita unrato cuatro aspeto del fruta del espiritu del Dios. Na cada situacion, hay mira kita si cosa kita puede aprende na manera si paquemodo si Jesus ya dale mira ese maga calidad. Mientras ta hace se, hay considera kita cuanto pregunta que puede ayuda kanaton progresa para visti el nuevo personalidad.

8. Paquemodo si Jesus ya dale mira amor?

⁸ El grande amor de Jesus para con Jehova el ya manda move con ele para hace maga sacrificio para con el de suyu Tata y para kanaton. (Juan 14:31; 15:13) Ya dale mira si Jesus si paquemodo de grande el de suyu amor para na maga gente na manera si paquemodo le ya vivi aqui na tierra. Cada dia, ta dale le mira amor y compasion maskin pa el otro tan contra con ele. El un importante manera que ya dale le mira el de suyu amor para na maga gente amo cuando ya enseña le kanila acerca el Reino del Dios. (Luc. 4:43, 44) Por causa na amor de Jesus para con Dios y para na maga gente, preparao tambien le sufri un duele muerte na mano del maga pecador. Por causa de ese, todo kita puede obtene vida hasta para cuando.

9. Paquemodo kita dale mira amor igual con Jesus?

⁹ Ya dedica kita con el diaton mismo cuerpo con Jehova y ya bautiza cay ta ama kita con el diaton Tata na cielo. Poreso igual con Jesus, debe kita dale mira amor para con Jehova na manera si paquemodo kita ta trata con el maga gente. Si apostol Juan ya escribi: “Si gendeh le ta ama con su hermano o hermana con quien le ta puede mira, no puede tamen le ama con el Dios, con quien le no puede mira.” (1 Juan 4:20) Puede kita pregunta na diaton mismo cuerpo: ‘Tiene ba yo grande amor para na maga gente? Ta dale ba yo mira compasion con otro, maskin pa gendeh bueno el diila tratamiento conmigo? El amor ba ta manda move conmigo para usa con el de mio tiempo y otro pa cosa que tiene yo para ayuda con otro aprende acerca con Jehova? Preparao ba yo hace este maskin pa gendeh ta aprecia el mayoria con el de mio maga esfuerzo o tan contra pa gane conmigo? Puede ba yo busca manera para dale mas tiempo na hacida dicipulo?’​—Ef. 5:15, 16.

10. Paquemodo si Jesus ta pricura mentena paz con otro?

¹⁰ Si Jesus ta pricura mentena paz con otro. Cuando ya maltrata con ele el maga gente, nuay le man balus kanila. Pero, mas pa con ese el cosa le ya hace. Ya hace le iniciativo para tene paz y ya anima con otro para arregla con el diila problema. Por ejemplo, ya enseña le kanila que debe sila tene paz na diila hermano si quierre sila que acepta si Jehova el diila adoranza. (Mat. 5:9, 23, 24) Y cuanto beses le ya ayuda con el maga apostoles para descanza man purpiajan si quien el mas alto entre kanila.​—Luc. 9:46-48; 22:24-27.

11. Paquemodo kita pricura mentena paz con otro?

¹¹ Para mentena paz, gendeh lang kita basta ta evita que causa peleajan. Necesita kita tene el  iniciativo para tene paz con otro y anima con el diaton maga hermano y hermana para arregla el diila problema. (Fil. 4:2, 3; Sant. 3:17, 18) Puede kita pregunta na diaton mismo cuerpo: ‘Cosa yo preparao sacrificia para tene paz con otro? Si hace conmigo sinti duele el un hermano o hermana, ta guarda ba yo agrabio? Ta espera pa ba yo con el otro persona que ele el actua para hace bira el diamon paz o iyo una el ta actua, maskin pa ta sinti yo que el otro persona el ya causa con el problema? Si justo na situacion, ta anima ba yo con aquellos tiene problema con otro que hace bira el diila paz?’

12. Paquemodo si Jesus ya trata bueno con otro?

¹² Bueno el tratamiento de Jesus con otro. (Mat. 11:28-30) Ya dale le se mira cuando amable le y preparao man adjust, maskin pa na maga dificil circumstancia. Por ejemplo, cuando el un mujer de Fenicia ya pidi con ele que cura con el de suyu anak, nuay le conforma del primero. Pero cuando ya dale mira grande fe el mujer, amable ya cura si Jesus con el de suyu anak. (Mat. 15:22-28) Maskin pa bueno el tratamiento de Jesus con otro, nuay se sangga con ele para dale consejo. Gane na cuanto ocasion, ya dale le se mira cuando nuay le man alang-alang conseja con aquellos con quien le ta ama. Por ejemplo, cuando ya pricura sangga si Pedro con Jesus que hace el voluntad de Jehova, ya regaña con ele si Jesus adelante del otro maga dicipulo. (Mar. 8:32, 33) Ya hace le este, gendeh para hace huya con Pedro, sino para man train con ele y dale mira na otro maga dicipulo que gendeh bueno queda atribido. Asigurao, ya tiene huya si Pedro pero ya beneficia le na disciplina.

13. Paquemodo kita puede deverasan trata bueno con otro?

¹³ Para deverasan trata bueno con aquellos con quien tu ta ama, tiene vez posible necesita tu franca man cuento kanila. Si hace tu se, imita con Jesus. Man base el de tuyu consejo na maga principio que puede incuntra na Palabra del Dios. Hace con ese na amable manera. Pensa que quierre sila hace si cosa el justo y confia que aquellos quien ta ama con Jehova y contigo hay acepta con el de tuyu amable consejo. Pregunta na de tuyu mismo cuerpo: ‘Si tiene yo con quien ya puede mira que ta hace malo, tiene ba yo el coraje para converza con ele? Si necesita yo dale consejo, ta converza ba yo na amable manera o ta usa yo maga duele palabra? Cosa el de mio motivo si ta dale consejo? Ta dale ba yo se cay rabiao yo con el persona o cay quierre yo ayuda con ele?’

14. Paquemodo si Jesus ya dale mira pagka-bueno?

¹⁴ Sabe si Jesus si cosa el bueno y ta hace tambien con ese. Ta ama si Jesus con el de suyu Tata poreso pirmi le ta hace si cosa el justo con justo motivo. El un buen persona pirmi ta busca manera para ayuda con otro y ta hace cosas bueno para kanila. Gendeh bastante que sabe lang kita si cosa el justo para hace; debe kita hace con ese con justo motivo. Baka tiene quien pregunta, ‘Posible ba hace con el justo cosa con mal motivo?’ Si, posible. Por ejemplo, ya menciona si Jesus acerca con aquellos quien ta dale limosna na maga pobre pero ta asigura sila que sabe el otro acerca con el cosa sila ya dale. Ese maga trabajo, maskin pa dol bueno, diutay lang el valor para con Jehova.​—Mat. 6:1-4.

15. Paquemodo kita queda deverasan bueno?

¹⁵ Puede kita queda deverasan bueno si hace kita el justo cosa con justo motivo. Poreso, puede tu pregunta na de tuyu mismo cuerpo: ‘Si sabe yo si cosa el justo para hace, ta hace ba yo con ese? Cosa el de mio motivo si ta hace yo buen cosas?’

16. Cosa kita debe hace cada dia y porque?

¹⁶ Gendeh kita debe pensa que despues del bautismo, gendeh mas kita necesita hace esfuerzo para visti el nuevo personalidad. Igual  na un nuevo ropa, debe kita mentena na buen condicion con el diaton nuevo personalidad. El un manera para hace se amo si busca kita manera cada dia para dale mira el fruta del espiritu del Dios. Porque? Cay si Jehova amo un Dios de accion y el de suyu espiritu amo un activo fuerza. (Gen. 1:2) Poreso, el cada aspeto del fruta del espiritu puede y debe manda move kanaton para actua. Por ejemplo, si dicipulo Santiago ya escribi: “El fe ta muri si noay maga trabajo bueno.” (Sant. 2:26) Ansina tambien el otro maga aspeto del fruta del espiritu del Dios. Cada vez ta dale kita mira con ese, prueba este que tiene kita el espiritu del Dios.

17. Cosa kita debe hace si nuay kita puede demonstra el fruta del espiritu?

¹⁷ Maskin pa manada año ya bautizao el un Cristiano, posible siempre le gendeh puede demonstra el fruta del espiritu. Pero el importante, gendeh kita descanza que pricura demonstra con ese maga calidad. Considera este ilustracion. Si yan tastas el de tuyu favorito ropa, hay buta ba dayun tu con ese? Gendeh. Grande el posibilidad que hay compone tu con ese y despues hay queda ya tu mas con cuidao na sunod. Na igual manera, no man luya si tiene tiempo que nuay tu puede actua na amable y buen manera, o queda paciencioso con otro. Sincero pidi perdon para puede tu hace bira con el de tuyu buen relacion con ese persona. Y queda determinao que hace si cosa el justo.

18. Na cosa kita puede asigura?

¹⁸ Ta rindi gayot kita gracias cay ya dale kanaton ejemplo si Jesus! Si mas imita kita con el de suyu pensamiento y custumbre, mas facil para kanaton que actua igual con ele. Si mas hay actua kita igual con Jesus, mas puede kita visti con el nuevo personalidad. Na este articulo, ya discuti kita con el cuatro lang del maga aspeto del fruta del espiritu del Dios. Pruba dale tiempo para man repaso con el otro pa maga aspeto del fruta del espiritu y medita si paquemodo tu ta demonstra con ese maga calidad. Puede tu incuntra un lista del maga articulo acerca na ese topico na Research Guide for Jehovah’s Witnesses bajo na tema “Christian Life” y despues “Fruitage of the Spirit.” Puede tu asigura que si hace tu el de tuyu parte, hay ayuda contigo si Jehova para visti con el nuevo personalidad y gendeh con este quita.