1-2. Paquemodo el ejemplo de apostol Pablo puede ayuda con el maga anciano ahora?

 TA AMA si apostol Pablo con el de suyu maga hermano. Ta trabaja gayot le enbuenamente para cuida kanila. (Act. 20:31) Poreso, ta ama gayot con ele el de suyu maga hermano y hermana. Na un ocasion, “ya llora” el maga anciano de Efeso cuando ya sabe sila que gendeh mas sila puede mira con ele otravez. (Act. 20:37) El diaton maga trabajador anciano ta ama tambien gayot con el diila maga hermano y hermana y ta hace sila el todo para ayuda kanila. (Fil. 2:16, 17) Pero tiene vez, ta experiencia dificultad el maga anciano. Cosa puede ayuda kanila para enfrenta con ese?

² Puede considera el diaton maga trabajador anciano con el ejemplo de Pablo. (1 Cor. 11:1) Nuay le maga abilidad igual del angel. Un imperfecto gente si Pablo quien tiene vez tan dificil hace si cosa el justo. (Roma 7:18-20) Y tiene le manada problema. Pero, nuay descanza si Pablo o perde el de suyu alegria. Si imita el maga anciano con Pablo, puede tambien sila enfrenta con el maga dificultad y mentena el diila alegria mientras ta sirvi con Jehova. Mira kita si paquemodo.

3. Cosa kita hay examina na este articulo y cosa pa kita hay aprende?

³ Na este articulo, hay examina kita cuatro dificultad que ta enfrenta el maga anciano: si paquemodo (1) queda balance na trabajo predicacion y otro responsibilidad, (2) queda amable anciano, (3) enfrenta con el diila mismo kamali y (4) enfrenta el imperfeccion del otro. Hay discuti kita si paquemodo si Pablo ya puede enfrenta con el cada dificultad y si paquemodo el maga anciano puede imita con el de suyu ejemplo.

4. Porque posible dificil para na maga anciano que guia na trabajo predicacion?

⁴ Si porque este gendeh facil. Puera que guia na trabajo predicacion, tiene pa manada responsibilidad el maga anciano. Por ejemplo, yan assign con el cuanto para man chairman na midweek miting y para conduci con el Estudiada del Congregacion na Biblia. Posible, ta dale tambien sila maga talk. Activo sila tan train con el maga siervo ministerial y alegre sila ta continua anima con el maga hermano y hermana. (1 Ped. 5:2) El cuanto anciano ta trabaja na construida y mentenada del maga Kingdom Hall y otro maga teocratico facilidad. Maskin pa ansina, igual con el todo na congregacion, el de con todo importante trabajo que ta hace el maga anciano amo el predicacion del buen noticia.​—Mat. 28:19, 20.

5. Cosa ejemplo ya dale si Pablo como un predicador?

⁵ El ejemplo de Pablo. El secreto de Pablo para tene buen exito na trabajo predicacion puede incuntra na Filipo 1:10, NWT. Ele ta anima kanaton: “Asigura el maga cosas que mas importante.” Ya aplica si Pablo con el de suyu mismo consejo. Ya dale con ele assignment para predica y por cuanto decada, ta mira le con ese ministerio como uno del maga mas importante cosas. Ya predica le “na publico y na maga casa.” (Act. 20:20) Nuay le predica na un especifico tiempo lang del dia o un dia lang na un semana. Ya usa le con el cada oportunidad para predica! Por ejemplo, mientras ta espera con el de suyu maga uban na Atenas, ya introduci le con el buen noticia na un educao grupo de maga gente y ya tiene se buen resulta. (Act. 17:16, 17, 34) Maskin pa de “cadena” na preso, ya predica si Pablo con aquellos alrededor con ele.​—Fil. 1:13, 14; Act. 28:16-24.

6. Cosa training ya dale si Pablo?

⁶ Ya usa enbuenamente si Pablo con el de suyu tiempo. Pirmi le ta invita con otro que man junto con ele na ministerio. Por ejemplo, na de suyu primer viaje como misionario, ya lleva le con Juan Marcos; y na de suyu segundo viaje, ya lleva le con Timoteo. (Act. 12:25; 16:1-4) Asigurao, ya hace le el todo para enseña con ese maga hombre si paquemodo organiza con el congregacion, si paquemodo man shepherding y si paquemodo queda un efectivo maestro.​—1 Cor. 4:17.

7. Paquemodo puede sigui el maga anciano con el cosa ya habla si Pablo na Efeso 6:14, 15?

⁷ El leccion. Puede imita el maga anciano con Pablo gendeh lang por medio na predicacion na casa en casa sino por medio que queda tambien preparao para predica na maskin cosa ocasion. (Le con el Efeso 6:14, 15.) Por ejemplo, puede sila predica si ta anda man compra  o na lugar onde sila ta trabaja. O si ta ayuda sila na construida del maga teocratico facilidad, puede sila predica na maga vecinos y maga gente quien ta vende. Igual con Pablo, puede usa el maga anciano con el tiempo na ministerio para man train con otro, incluido con el maga siervo ministerial.

8. Na cuanto tiempo, cosa posible necesita hace el un anciano?

⁸ Gendeh debe queda bien ocupao el maga anciano na assignment na congregacion o na circuito que nuay mas ya sila tiempo para predica. Para esta balance, posible necesita sila habla “gendeh” na cuanto maga assignment. Despues pensa y reza acerca con este, posible sila realiza que si acepta sila con ese trabajo, nuay mas sila tiempo para hace con el maga mas importante cosas. Incluido alli el conducida del de familia adoranza cada semana, activo participacion na trabajo predicacion o man train con el diila maga anak na ese actividad. El cuanto tan dificil que gendeh acepta con el un responsibilidad pero puede sila asigura que ta entende si Jehova con el diila deseo que queda balance na todo cosas.

9. Cosa dificultad ta enfrenta el maga ocupao anciano?

⁹ Si porque este gendeh facil. El maga siervo de Jehova ta experiencia manada probanza. Durante na este ultimo maga dia, todo kita necesita que tiene quien anima, suporta y dale comforta kanaton. Y tiene vez, necesita ayuda el cuanto para evita con el gendeh justo conducta. (1 Tes. 5:14) Siempre, gendeh puede quita el maga anciano con el todo probanza que ta enfrenta el maga siervo de Jehova. Maskin pa ansina, quierre si Jehova que hace el maga anciano el cosa sila puede para anima y protege con el de suyu maga carnero. Paquemodo el maga ocupao anciano puede dale tiempo para ayuda con el maga hermano y hermana?

10. Uyun na 1 Tesalonica 2:7, paquemodo si Pablo ya cuida con el maga siervo de Jehova?

¹⁰ El ejemplo de Pablo. Ya busca maga manera si Pablo para comenda y hace fuerte con el de suyu maga hermano. Bueno para na maga anciano si imita sila con el de suyu ejemplo y trata con el maga siervo de Jehova con cariño. (Le con el 1 Tesalonica 2:7.) Ya asigura si Pablo con el de suyu maga hermano y hermana que ta ama le kanila y ta ama kanila si Jehova. (2 Cor. 2:4; Ef. 2:4, 5) Ya trata si Pablo con aquellos na congregacion como de suyu maga amigo y ya dale tiempo para man junto kanila. Ya dale le mira que ta confia le kanila cuando ya habla le acerca el de suyu maga lingasa y imperfeccion. (2 Cor. 7:5; 1 Tim. 1:15) Pero, nuay man focus si Pablo na de suyu maga problema. Sino, quierre le ayuda con el de suyu maga hermano.

11. Porque ta dale consejo si Pablo con el de suyu maga hermano y hermana?

¹¹ Tiene vez, necesita dale consejo si Pablo con el de suyu maga hermano y hermana. Pero, nuay le se hace por causa na de suyu rabia. Ta dale le consejo cay ta ama le kanila y quierre le  protege kanila desde na diferente maga peligro. Ta pricura le dale con el de suyu consejo que facil para entende y ta pensa le si paquemodo sila ricibi con este. Por ejemplo, na de suyu carta para na maga de Corinto, ya dale pesao consejo si Pablo. Despues escribi con aquel carta, ya imbia le con Tito kanila. Malingasa si Pablo si cosa el diila reaccion na de suyu carta. Bien alegre le cuando ya sabe le que ya acepta sila enbuenamente con aquel consejo y ya aplica con ese!​—2 Cor. 7:6, 7.

12. Paquemodo el maga anciano puede hace fuerte con el diila maga hermano y hermana?

¹² El leccion. Puede sigui el maga anciano con el ejemplo de Pablo si dale sila tiempo para man junto con el diila maga hermano y hermana. El un manera que puede hace con este amo si anda sila temprano na maga miting na congregacion para puede sila man cuento con otro. Cuanto minuto lang el necesita para puede anima con el un hermano o hermana quien necesita ayuda. (Roma 1:12; Ef. 5:16) El un anciano quien ta sigui con el ejemplo de Pablo puede tambien hace fuerte con el de suyu maga hermano y hermana si usa le con el Palabra del Dios para hace fuerte con el diila fe y asigura kanila que ta ama kanila el Dios. Omento pa, ta dale le mira que ta ama le kanila. Pirmi le tan cuento kanila y ta busca oportunidad para comenda kanila. Si debe dale consejo el un anciano, tan base le con ese na Palabra del Dios. Especifico el de suyu consejo pero ta dale le con ese na buen manera cay quierre le que el de suyu hermano o hermana hay aplica con el de suyu consejo.​—Gal. 6:1.

13. Cosa posible el efecto na un anciano del de suyu mismo kamali?

¹³ Si porque este gendeh facil. Gendeh perfecto el maga anciano. Igual con otro, ta puede sila man kamali. (Roma 3:23) Tiene vez, posible tan dificil sila tene balance mirada na diila maga imperfeccion. El cuanto posible sobra tan focus na diila maga limitacion que ta causa kanila para man luya. El otro posible ta pensa que gendeh serioso el diila maga kamali poreso ta queda sila campante y gendeh ta hace maga necesita cambio.

14. Asegun na Filipo 4:13, paquemodo el humildad ya puede ayuda con Pablo para enfrenta con el de suyu maga kamali?

¹⁴ El ejemplo de Pablo. Con humildad ya admiti si Pablo que gendeh le solo-solo puede enfrenta con el de suyu maga kamali. Necesita le el fuerza estaba con Dios. Del primero, si Pablo grabe ya persigui con el maga Cristiano. Pero na uliji, ya admiti le con el de suyu maga kamali y preparao hace cambio na de suyu custumbre y personalidad. (1 Tim. 1:12-16) Na ayuda de Jehova, si Pablo ya queda amable, lastimoso  y humilde pastor. Sabe le que manada le maga imperfeccion pero ya confia le na perdon de Jehova en vez de pirmi pensa con el de suyu maga kamali. (Roma 7:21-25) Nuay le expecta queda perfecto. En vez, ya hace le esfuerzo para mejora con el de suyu Cristiano personalidad y con humildad ya confia na ayuda de Jehova para hace con el de suyu trabajo.​—1 Cor. 9:27; le con el Filipo 4:13, NWT.

15. Cosa balance mirada debe tene el maga anciano acerca na diila kamali?

¹⁵ El leccion. Nuay iscuji con el maga anciano cay perfecto sila. Pero, ta expecta si Jehova que admiti sila con el diila maga kamali y mejora con el diila Cristiano personalidad. (Ef. 4:23, 24) El un anciano debe examina con el de suyu mismo cuerpo base na Palabra del Dios y hace el maga necesita cambio. Despues, hay ayuda con ele si Jehova para queda alegre y queda un buen anciano.​—Sant. 1:25.

16. Cosa posible sucede si el un anciano hay man focus na imperfeccion del otro?

¹⁶ Si porque este gendeh facil. Si pirmi man junto el maga anciano con el maga hermano na congregacion, posible facil sila puede mira con el diila maga imperfeccion. Pero si gendeh con cuidao el maga anciano, posible sila consumi, gendeh trata enbuenamente o juzga con el diila maga hermano y hermana. Ya dale aviso si Pablo con el maga Cristiano que si Satanas quierre que hace se sila.​—2 Cor. 2:10, 11.

17. Cosa el mirada de Pablo na de suyu maga hermano y hermana?

¹⁷ El ejemplo de Pablo. Tiene le un positivo mirada na de suyu maga hermano y hermana. Sabe le que tan kamali sila cay tiene vez ta afecta con ele el diila maga accion. Maskin pa ansina, sabe si Pablo que si ta puede hace kamali el un persona, gendeh se quierre decir que mal gente le. Ta ama le con el de suyu maga hermano y tan focus le na diila maga buen calidad. Si tan dificil el de suyu maga hermano y hermana hace si cosa el justo, ta pensa le que bueno el diila motivo y necesita lang sila ayuda.

18. Cosa tu ya aprende na manera si paquemodo si Pablo ya ayuda con Evodia y Sintique? (Filipo 4:1-3)

¹⁸ Por ejemplo, considera si paquemodo si Pablo ya ayuda con el dos hermana na congregacion de Filipo. (Le con el Filipo 4:1-3.) Posible, si Evodia y Sintique ya permiti con el diila personal diferencia para hace perde el diila buen relacion con uno y otro. Nuay kanila juzga si Pablo sino yan focus le na diila maga buen calidad. Este maga fiel hermana ya sirvi con Jehova por largo tiempo. Sabe si Pablo que ta ama kanila si Jehova. Por causa na positivo mirada de Pablo con este maga hermana, ya motiva este con ele que anima kanila para arregla con el diila diferencia. El de suyu positivo mirada ya ayuda tambien con ele para mentena el de suyu alegria y fuerte relacion con aquellos na congregacion.

19. (a) Paquemodo puede mentena un positivo mirada el maga anciano na diila maga hermano y hermana? (b) Cosa tu puede aprende na letrato del un anciano quien ta limpia con el Kingdom Hall?

 ¹⁹ El leccion. Maga anciano, mira el maga buen calidad que tiene el de ustedes maga hermano y hermana. Imperfecto el cada uno pero tiene sila maga buen calidad. (Fil. 2:3) Deverasan, tiene vez posible necesita dale consejo el maga anciano con el un hermano o hermana. Pero igual con Pablo, el maga anciano debe hace esfuerzo que gendeh man focus na gendeh buen palabra y accion del un persona. Sino, man focus sila na amor de ese persona para con Jehova, si paquemodo le ta aguanta para sirvi con Dios y el de suyu potencial que hace si cosa el bueno. El maga anciano quien tan focus na maga buen calidad del otro ta ayuda con el diila maga hermano y hermana para sinti que ta ama kanila el todo na congregacion.

20. Paquemodo puede continua beneficia el maga anciano na ejemplo de Pablo?

²⁰ Maga anciano, puede con ustedes ayuda si continua ustedes estudia con el ejemplo de Pablo. Por ejemplo, na Watch Tower Publications Index, puede ustedes incuntra informacion bajo na heading “Paul” y despues na subheading “example for elders.” Mientras ta le ustedes con ese cuanto material, pregunta na de ustedes mismo cuerpo, ‘Paquemodo conmigo puede ayuda el ejemplo de Pablo para mentena con el de mio alegria mientras ta hace con el de mio trabajo como un anciano?’

21. Na cosa puede asigura el maga anciano?

²¹ Maga anciano, acorda que gendeh si Jehova ta pidi con ustedes que queda perfecto; ta pidi le con ustedes que queda fiel. (1 Cor. 4:2) Ya aprecia si Jehova con el trabajo y pagka-fiel de Pablo. Puede tambien ustedes asigura que valoroso con Dios el cosa ustedes ta hace na servicio con ele. Si Jehova nunca “ay olvida el de ustedes maga trabajo y el amor que ya dale ustedes mira con Ele por medio del servicio que ya hace, y ta hace pa ustedes ahora, con el maga santo [“sagrao,” NWT].”​—Heb. 6:10.