1. Cosa el de tuyu vida antes tu principia estudia con el Biblia?

 COSA el de tuyu vida antes tu principia estudia con el Biblia junto con el maga Testigo de Jehova? Manada kanaton el no quierre pensa acerca con ese. El diaton mirada y personalidad posible influenciao na este sistema de maga cosas​—el cosa ta habla el mundo que justo y mali. Si ansina, “noay [kita] Dios y noay esperanza.” (Ef. 2:12) El estudiada na Biblia ya cambia con ese todo!

2. Cosa tu ya sabe cuando ya estudia tu con el Biblia?

² Cuando ya estudia tu con el Biblia, ya sabe tu que tiene tu un Tata na cielo quien ta ama gayot contigo. Ya realiza tu que si quierre tu hace alegre con Jehova y queda parte del de suyu familia quien ta adora con ele, necesita tu hace grande cambio na de tuyu manera de vida, mirada y pensamiento. Necesita tu aprende vivi asegun na de suyu maga alto principio.​—Ef. 5:3-5.

3. Asegun na Colosa 3:9, 10, cosa quierre si Jehova que hace kita y cosa kita hay discuti na este articulo?

³ El diaton Creador y Tata na cielo, si Jehova, tiene el derecho para determina si paquemodo debe actua el maga miembro del de suyu familia. Y ta pidi le que antes kita bautiza, necesita kita hace esfuerzo que quita con el diaton daan personalidad junto con el maga custumbre de este. * (Le con el Colosa 3:9, 10.) Este articulo hay ayuda con aquellos quien quierre bautiza para contesta con el tres pregunta: (1) Cosa el daan personalidad? (2) Porque si Jehova quierre que quita kita con ese? (3) Paquemodo kita puede hace con ese? Para kanaton quien maga bautizao ya, este articulo hay ayuda kanaton para gendeh bira el diaton daan personalidad.

4. Paquemodo el un persona ta actua si tiene le el daan personalidad?

⁴ El persona quien tiene el daan personalidad ta pensa y ta actua asegun na deseo de laman. Posible, ta pensa lang le con el de suyu mismo cuerpo, pronto rabia, no sabe rindi gracias y orgulloso. Posible, quierre-quierre le mira pornografia y maga salida que imoral o violente. Asigurao, tiene le maga buen calidad y posible le man conciencia na maga mal cosas que ya habla le o ya hace. Pero, falta le el motivacion para cambia con el de suyu pensamiento y conducta.​—Gal. 5:19-21; 2 Tim. 3:2-5.

5. Cosa razonable mirada el debe kita tene si acerca na quitada del daan personalidad? (Maga Actividad 3:19)

⁵ Maga imperfecto kita poreso nuay ni uno kanaton el completamente puede quita con el mal pensamiento y deseo na diaton corazon y pensamiento. Tiene vez, ta puede kita hace o habla maga cosas que ta arripinti kita. (Jer. 17:9; Sant. 3:2) Pero si quita kita con el daan personalidad, el maga mal practica y custumbre gendeh mas puede controla kanaton. Hay queda kita diferente clase de persona.​—Isa. 55:7; le con el Maga Actividad 3:19.

6. Porque si Jehova ta anima kanaton que quita con el mal pensamiento y practica del daan personalidad?

⁶ Ta anima kanaton si Jehova que quita con el mal pensamiento y practica cay ta ama gayot le kanaton y quierre le que queda kita alegre. (Isa. 48:17, 18) Sabe le que aquellos quien gendeh ta resisti con el diila mal deseo ta hace sinti duele con el diila mismo cuerpo y con aquellos quien ta ama kanila. Duele para con ele si mira le que ta sinti kita duele y el otro.

7. Asegun na Roma 12:1, 2, cosa decision kita debe hace?

⁷ Posible, el cuanto del diaton maga amigo y familia hay gangguia kanaton na primero cay ta pricura kita hace cambio na diaton personalidad. (1 Ped. 4:3, 4) Posible, habla sila que tiene kita el derecho para hace si cosa kita quierre y gendeh kita debe permiti con otro que habla kanaton si cosa kita hace. Pero, aquellos quien gendeh ta acepta con el maga principio de Jehova gendeh deverasan independiente. Cay el deverasan, ta permiti sila con el mundo que ya domina si Satanas para influencia kanila. (Le con el Roma 12:1, 2.) Todo kita necesita iscuji: Continua kita na diaton daan personalidad que influenciao na culpa y mundo de Satanas  o permiti kita con Jehova que cambia kanaton para queda el de con todo buen persona que puede kita queda.​—Isa. 64:8.

8. Cosa kanaton puede ayuda para evita con el mal pensamiento y practica?

⁸ Sabe si Jehova que necesita tiempo y esfuerzo para puede kita evita con el mal pensamiento y practica. (Sal. 103:13, 14) Pero por medio na de suyu Palabra, de suyu espiritu y de suyu organizacion, ta dale si Jehova kanaton el sabeduria, fuerza y suporta que necesita kita para cambia si quien kita. Asigurao, ya ayuda ya le contigo. Considera kita ahora con el cuanto practical cosas que puede tu hace para continua quita con el daan personalidad y cualifica para na bautismo.

9. Cosa el Palabra del Dios puede ayuda contigo para hace?

⁹ Usa con el Biblia para examina enbuenamente con el de tuyu mismo cuerpo. El Palabra del Dios igual na un espejo; puede este ayuda contigo examina el manera si paquemodo tu ta pensa, ta converza y ta actua. (Sant. 1:22-25) El quien tan Bible study contigo y el otro experienciao Cristiano puede dale contigo consejo. Por ejemplo, puede sila usa con el Escritura para ayuda contigo identifica si onde tu fuerte y si onde tu mahina. Puede sila enseña contigo si paquemodo busca maga informacion que base na Biblia que tiene practical consejo si paquemodo quita con el mal practica. Y si Jehova pirmi preparao para ayuda contigo. Sabe le si cosa el de con todo buen manera para ayuda contigo; sabe le si cosa el na de tuyu corazon. (Prov. 14:10; 15:11) Poreso, hace anad con el de tuyu mismo cuerpo que reza con ele y estudia con el de suyu Palabra cada dia.

10. Cosa tu ya aprende na experiencia de Elie?

¹⁰ Queda convincido que el maga principio de Jehova amo el de con todo bueno. Puede kita beneficia na todo cosas que ta pidi kanaton si Jehova que hace. Aquellos quien ta vivi harmonia na de suyu maga principio ya tiene respeto na diila mismo cuerpo, proposito na vida y deverasan alegria. (Sal. 19:7-11) Pero, aquellos quien gendeh ta acepta con el maga principio de Jehova ta sufri na consequencia cay ta hace sila con el maga trabajo de laman. Nota si cosa ya habla el un hombre que si Elie acerca si gendeh kita acepta con el maga principio del Dios. Ya hace con ele engranda el de suyu mayores quien ta ama con Jehova. Pero cuando teenager si Elie, ya iscuji le man junto na mal asosacion. Ya principia le usa droga, tiene imoral vida y ta ruba. Si Elie ya habla que ya puede le nota con el de suyu mismo cuerpo que mas pronto rabia y violente. “El deverasan, ya hace yo el todo cosas que ya enseña con el maga Cristiano que gendeh hace,” ele ya admiti. Pero, nuay ulvida si Elie si cosa le ya aprende cuando joven le. Nuay tarda, ya principia le man Bible study otravez. Ya hace le esfuerzo que quita con el de suyu maga mal practica y ya bautiza del 2000. Paquemodo le ya beneficia cay ya vivi le asegun na maga principio de Jehova? Si Elie ya habla: “Tiene ya yo ahora paz na pensamiento y un limpio conciencia.” * Como cosa ya dale mira na este experiencia, aquellos quien gendeh ta acepta con el maga principio de Jehova ta hace sinti duele con el diila mismo cuerpo. Pero maskin pa ansina, preparao si Jehova ayuda kanila para hace cambio.

11. Cosa el maga cosas que ta odia si Jehova?

¹¹ Aprende odia si cosa si Jehova ta odia. (Sal. 97:10) El Biblia ta habla que ta odia si Jehova con el “ojos orgulloso, un lenggua imbustero y mano que ta mata maga inocente.” (Prov. 6: 16, 17) Detestable tambien con ele el “maga violente y engañador.” (Sal. 5:6) Ta odia gayot si Jehova con este maga custumbre y accion poreso ya destroza le con el todo malo na tiempo de Noe cay ya llena sila de violencia con el tierra. (Gen. 6:13) Considera kita otro ejemplo. Por medio con profeta Malaquias, si Jehova ya habla que ta odia Le con aquellos quien pa-escondido ta plaña man divurcio con el diila inocente marido o mujer. Gendeh ta acepta el Dios con el diila adoranza y hay juzga le kanila na cosa sila ta hace.​—Mal. 2:13-16; Heb. 13:4.

12. Cosa quierre decir que “odia el maga cosa-cosa malo”?

¹² Quierre si Jehova que “odia [kita] el maga cosa-cosa malo.” (Roma 12:9) El palabra “odia” amo un fuerte emocion; quierre decir de este que ta asquia gayot tu con el un cosa. Imagina si cosa tu sinti si tiene quien ya pidi contigo que come un comida buluk. Ta queda ya malo el de tuyu resuello si ta pensa pa lang con ese. Na igual manera, debe ta asquia ya kita si ta pensa pa lang kita hace con el un cosa que ya habla si Jehova que malo.

13. Porque kita debe guarda con el diaton pensamiento?

¹³ Guarda con el de tuyu pensamiento. El diaton pensamiento ta influencia con el diaton maga accion. Poreso, ya enseña kanaton si Jesus que evita pensa con el maga cosas que puede guia kanaton para comete un serioso culpa. (Mat. 5:21, 22, 28, 29) Gendeh ba quierre kita hace alegre con el diaton Tata na cielo? Poreso, bien importante que quita dayun kita con el maskin cosa malo que ta entra na diaton pensamiento!

14. Cosa ta revela el diaton converzada y cosa maga pregunta kita debe contesta?

¹⁴ Controla con el de tuyu converzada. Si Jesus ya habla: “El cosa ta sale na boca, ta sale adentro del corazon.” (Mat. 15:18) Si, el diaton converzada ta revela si cosa kita clase de persona. Poreso, pregunta este na de tuyu mismo cuerpo: ‘Ta evita ba yo man imbusterias, maskin pa hay causa problema si habla yo el verdad? Como casao, con cuidao ba yo que gendeh man flirt con el gendeh de mio marido o mujer? Ta evita ba yo completamente con el imoral converzada? Ta contesta ba yo na calma manera si tiene quien ya manda rabia conmigo?’ Puede ayuda contigo si pensa tu enbuenamente con este maga pregunta. El de tuyu converzada puede compara na maga boton na ropa. Si quita tu con el maga boton, mas facil ya para contigo que quita con el ropa. Na igual manera, si  pricura tu quita con el maga duele palabra, imbusterias y imoral converzada, mas facil para contigo que quita con el daan personalidad.

15. Cosa quierre decir que clava con el diaton daan personalidad na estaca?

¹⁵ Queda preparao que hace el maskin cosa necesita. Si apostol Pablo ya usa un ilustracion para enseña kanaton si paquemodo de serioso que cambia con el diaton manera de vida. Ele ya escribi que debe kita clava con el diaton daan personalidad na estaca. (Roma 6:6) Quierre decir, quierre kita sigui con el ejemplo del Cristo. Necesita kita quita con el maga custumbre y practica que ta odia si Jehova. Debe kita hace con este maga cosas para tene kita un limpio conciencia y tene el esperanza que vivi hasta para cuando. (Juan 17:3; 1 Ped. 3:21) Acorda que gendeh cambia si Jehova con el de suyu maga principio para hace kanaton alegre. Sino, necesita kita cambia con el diaton personalidad y sigui con el de suyu maga principio.​—Isa. 1:16-18; 55:9.

16. Porque tu debe queda determinao que continua resisti con el maga mal deseo?

¹⁶ Continua resisti con el maga mal deseo. Maskin despues tu bautiza, necesita tu continua resisti con el maga deseo de laman. Nota con el experiencia del un hombre que el nombre Maurício. Cuando joven, ya principia le vivi como un homosexual. Nuay tarda, ya conoce le con el maga siervo de Jehova y ya principia estudia con el Biblia. Despues hace cambio na de suyu vida, ya bautiza le del 2002. Maskin pa ya sirvi ya le con Jehova por manada año, si Maurício ya habla: “Ta admiti yo que tiene vez necesita yo resisti con el maga gendeh justo deseo.” Nuay le deja que hace este luya con ele. Sino, ele ya habla: “Tiene yo el coraje cay sabe yo que si iscuji yo que gendeh actua asegun na de mio deseo, puede yo hace alegre con Jehova.” *

17. Cosa contigo ya puede anima acerca na experiencia de Nabiha?

¹⁷ Pidi ayuda con Jehova na rezo y confia con el de suyu espiritu, gendeh na de tuyu mismo fuerza. (Gal. 5:22; Fil. 4:6) Debe kita queda determinao si quierre kita quita con el daan personalidad y gendeh mas visti con ese. Considera con el experiencia del un mujer que si Nabiha. Ya abandona con ele el de suyu tata cuando seis año pa lang le. “Ya causa gayot este conmigo dolor na emocion,” ya habla le. Mientras ta engranda si Nabiha, ya queda le rabiona y agresivo. Ya principia le vende droga poreso ya arresta  con ele y ya hace preso por cuanto año. El maga Testigo quien ta visita na preso ya principia man Bible study con ele. Ya principia hace maga grande cambio si Nabiha. “El cuanto del de mio maga vicio pronto lang quita,” ya habla le. “Pero, bien dificil quita con el pumada.” Yan dificil si Nabiha por mas de un año pero na uliji ya puede le descanza puma. Paquemodo le con ese ya hace? “El mas importante,” ya habla le, “el de mio regular rezo con Jehova ya ayuda conmigo para quita con el de mio maga vicio.” Ahora, ta habla le con otro: “Grande el de mio confianza que si ya puede yo hace cambio para hace alegre con Jehova, puede tambien se hace el maskin quien!” *

18. Asegun na 1 Corinto 6:9-11, cosa ya puede hace el manada del maga siervo del Dios?

¹⁸ Del primer siglo, el cuanto del maga hombre y mujer con quien ya iscuji si Jehova para rula junto con el Cristo ya puede hace maga mal cosas de antes. Por ejemplo, el otro ya comete adulterio, homosexual y ladron. Pero na ayuda del sagrao espiritu del Dios, ya puede sila cambia con el diila personalidad. (Le con el 1 Corinto 6:9-11.) Na igual manera, el Biblia ya puede ayuda con el millones de gente ahora para hace cambio na diila vida. * Ya puede sila descanza hace con el maga mal practica que dificil quita. El diila ejemplo ta dale prueba que puede tambien tu hace cambio na de tuyu personalidad y quita con el maga mal practica para cualifica tu na bautismo.

19. Cosa hay discuti na siguiente articulo?

¹⁹ Puera que quita con el daan personalidad, aquellos quien quierre bautiza debe hace esfuerzo que visti con el nuevo personalidad. El siguiente articulo hay discuti si paquemodo kita hace con ese y si paquemodo el otro puede ayuda kanaton.