1. Cosa maka-alegre suceso el ta espera el maga Judio quien yan destierro?

 BIEN alegre el maga Judio. “Ya manda move si Jehova con el corazon” del rey del Persia que si Ciro para libra con el maga Israelita, quien ya queda cautivo na Babilonia por cuanto decada. Ya anuncia el rey que el maga Judio puede ya bira na diila lugar “y planta otravez con el casa de Jehova, el Dios de Israel.” (Esd. 1:1, 3) Bien maka-alegre gayot ese tiempo cay puede ya sila adora otravez con el verdadero Dios na lugar que ya dale le con el de suyu maga siervo.

2. Cosa el primer cosa que ya puede hace el maga Judio cuando ya bira sila na Jerusalem?

² Del 537 B.C.E., el primer grupo del maga Judio destierro ya llega na Jerusalem, el centro del reino de Juda. Ya ayuda sila planta otravez con el templo y del 536 B.C.E., ya acaba ya sila hace con el fundacion de este!

3. Cosa oposicion ya enfrenta el maga Judio?

³ Pero despues sila principia construi otravez con el templo, ya enfrenta sila grabe oposicion. El maga gente alrededor kanila “ta continua hace luya con el maga gente del Juda para descanza sila construi.” (Esd. 4:4) Un dificil situacion quel para con el maga Judio pero mas ya agraba pa ese. Del 522 B.C.E., ya tiene nuevo rey el Persia, si Artajerjes. * Aquellos quien tan contra con el maga Judio ya pensa que oportunidad este para permanente sangga con el trabajo de construida poreso ya busca sila “manera para causa gulu por medio de ley.” (Sal. 94:20) Ya habla sila con Rey Artajerjes que el maga Judio ta plaña man rebelde contra con ele. (Esd. 4:11-16) Ya  creé el rey con el diila imbusterias y ya prohibi con el construida del templo. (Esd. 4:17-23) Por causa con ese, el maga Judio ya descanza con el construida del templo.​—Esd. 4:24.

4. Cosa ya hace si Jehova despues prohibi construi con el templo? (Isaias 55:11)

⁴ El maga pagano na aquel lugar y el cuanto na gobierno de Persia determinao hace descanza con el construida del templo. Pero, determinao si Jehova que continua construi con el templo y pirmi le ta cumpli con el de suyu proposito. (Le con el Isaias 55:11.) Ya iscuji le con el un animoso profeta que si Zacarias y ya dale con ele ocho sunod-sunod vision que hay habla le con el maga Judio para anima kanila. Aquel maga vision ya ayuda kanila para mira que gendeh sila necesita tiene miedo con el maga tan contra kanila y ya anima este kanila para continua hace con el trabajo de Jehova. Na ika-cinco vision, ya mira si Zacarias un candelario y dos pono de olivo.

5. Cosa kita considera na este articulo?

⁵ Todo kita tan luya tiene vez. Poreso, puede kita beneficia si considera kita con el cosa ya habla si Jehova con el maga Israelita por medio na ika-cinco vision de Zacarias. Si entende kita con este vision, puede este ayuda kanaton para fiel sirvi con Jehova si ta enfrenta kita oposicion, si ya cambia el diaton circumstancia y si ya ricibi kita direccion que gendeh kita ta entende.

6. Paquemodo el vision acerca na candelario y dos pono de olivo que puede le na Zacarias 4:1-3 ya dale coraje con el maga Judio? (Mira con el letrato na cover.)

⁶ Le con el Zacarias 4:1-3. El vision acerca na candelario y dos pono de olivo ya dale coraje con el maga Judio para enfrenta oposicion. Paquemodo? Ya nota ba tu que gendeh ta acaba el aceite del candelario? El aceite estaba na dos pono de olivo ta cae na un tazon y despues ta corre na cada uno del siete lampara na candelario. Ta continua arde el maga lampara por causa del aceite. Ya pregunta si Zacarias: “Cosa quierre decir de este maga cosas?” Ya habla el angel con el mensaje estaba con Jehova: “‘Gendeh por medio na fuerza militar ni por medio na poder, sino por medio na de mio espiritu,’ ya habla si Jehova de maga soldao.” (Zac. 4:4, 6) El aceite estaba na maga pono ta representa con el poderoso sagrao espiritu de Jehova que nunca ta acaba. El todo soldao na Imperio del Persia gendeh puede compara con el poder del espiritu del Dios. Ciendo na lao diila si Jehova, el maga quien ta construi con el templo hay puede resisti con el maskin cosa oposicion y completa con el diila trabajo. Ese mensaje ya puede gayot anima kanila! El cosa lang necesita hace el maga Judio amo que confia con Jehova y bira na trabajo. Ese mismo el cosa sila ya hace, maskin pa prohibido siempre el diila trabajo.

7. Cosa ya sucede que ya dale alivio con el maga quien ta construi con el templo?

⁷ Ya tiene alivio aquellos quien ta construi con el templo cuando ya tiene cambio. Cosa cambio? Del 520 B.C.E., el nuevo rey, si Dario I amo el quien ya rula na Persia. Na segundo año del de suyu rulanza, ya discubri le que ilegal el mandato que prohibi construi con el templo. Poreso, ya aproba si Dario que hace acaba con el trabajo. (Esd. 6:1-3) Nuay expecta el todo con ese decision pero tiene pa cosa ya sucede. Ya manda el rey con el maga gente que no entramete con el construida del maga Judio y dale pondo y material para suporta kanila! (Esd. 6:7-12) Como resulta, ya acaba construi con el templo el maga Judio despues del maga cuatro año, del 515 B.C.E.​—Esd. 6:15.

8. Porque tu puede tene coraje si ta enfrenta tu oposicion?

 ⁸ Ahora, manada tambien del maga quien ta adora con Jehova el ta enfrenta oposicion. Por ejemplo, el cuanto ta queda na maga lugar donde tiene restriccion el diaton trabajo. Na ese maga lugar, posible arresta con el diaton maga hermano y lleva kanila na “presensia del maga gobernador y maga rey” para man testigo kanila. (Mat. 10:17, 18) Tiene vez, posible tiene alivio el maga hermano si tiene cambio na gobierno. O el un buen juez puede hace decision que favorable na diaton trabajo. El otro maga Testigo ta enfrenta diferente clase de oposicion. Ta queda sila na un nacion donde tiene sila libertad para adora con Jehova pero ta enfrenta siempre sila oposicion estaba na diila maga familia quien determinao sangga kanila para sirvi con Dios. (Mat. 10:32-36) Na manada ocasion, cuando ya realiza el maga tan contra que gendeh sila puede sangga con el diila maga Testigo pariente para sirvi con Jehova, gendeh mas sila tan contra. Y na cuanto situacion, aquellos quien grabe tan contra ya queda maga activo Testigo na uliji. Si ta enfrenta tu oposicion, no descanza! Tene coraje. Ayuda contigo si Jehova por medio na de suyu poderoso sagrao espiritu poreso gendeh tu necesita tene miedo!

9. Porque triste el cuanto Judio cuando ya acaba el fundacion del nuevo templo?

⁹ Cuando ya acaba el fundacion del nuevo templo, ya llura el cuanto del maga de edad Judio. (Esd. 3:12) Ya mira sila con el glorioso templo que ya construi si Solomon y ya sinti sila que el templo que nuevo ya construi ‘nuay mas ya valor compara’ con el una. (Hag. 2:2, 3) Bien triste sila cay ya compara sila con el nuevo templo con el daan. El vision de Zacarias hay ayuda kanila para puede bira otravez el diila alegria. Paquemodo?

10. Paquemodo el maga palabra del angel na Zacarias 4:8-10 ya ayuda con el maga Judio para queda otravez alegre?

¹⁰ Le con el Zacarias 4:8-10. Cosa quierre decir del angel cuando ya habla le que el maga Judio ‘hay queda alegre y hay mira con el plomo na mano de Zorobabel [el Judio gobernador]’? El plomo amo un herramienta que ta usa para determina si bien derecho ba parao el un cosa. Entonces, ta asigura el angel con el maga siervo del Dios que maskin pa bien simple el templo para con otro, hay acaba este y hay queda este si cosa quierre si Jehova. Hay queda alegre si Jehova con ese templo poreso porque man gendeh sila queda alegre con ese?  El importante con Jehova amo que hace con el adoranza na nuevo templo na manera que quierre le. Si man focus el maga Judio si paquemodo adora con Jehova na aceptable manera y si paquemodo tene el de suyu favor, hay queda sila otravez alegre.

11. Cosa el maga dificultad que ta enfrenta el cuanto del maga siervo de Jehova ahora?

¹¹ Dificil para con el manada kanaton si ta cambia el diaton circumstancia. Ya ricibi un nuevo assignment el cuanto quien ta sirvi por largo tiempo na un clase de special full-time service. El otro necesita descanza na diila privilegio por causa na diila edad. Normal lang que sinti triste si ya sucede kanaton este maga cambio. Posible na primero, gendeh kita ta entende o tan uyun con el decision. Posible, ta sinti kita que mas bonito el maga cosas que yan anad kita. Y posible triste kita y ta sinti que por causa na diaton nuevo circumstancia, diutay ya lang el cosa kita puede hace para con Jehova. (Prov. 24:10) Paquemodo el vision de Zacarias puede ayuda kanaton para continua dale el diaton de con todo bueno para con el diaton Dios?

12. Paquemodo el vision de Zacarias puede ayuda kanaton para esta alegre maskin pa cambia el diaton circumstancia?

¹² Mas puede kita man adjust na diaton nuevo circumstancia si mira kita con el maga cosas na manera si paquemodo con ese ta mira si Jehova. Ta puede le cumpli maga grande cosas ahora y tiene kita el bonito privilegio que trabaja junto con ele. (1 Cor. 3:9) Posible, cambia el diaton maga responsibilidad pero nunca el amor de Jehova para kanaton. Si ya queda tu afectao na un cambio na organizacion, evita pirmi pensa con el maga razon si porque se ya sucede. En vez de pirmi pensa con el maga cosas “de antes,” reza para puede tu mira si cosa el bueno na ese cambio. (Ecl. 7:10) En vez de pensa con el maga cosas que gendeh mas tu puede hace, pensa con el todo maga cosas que puede tu hace. Na vision de Zacarias, ya puede kita aprende que importante mentena un positivo mirada. Como resulta, hay esta kita alegre y fiel maskin pa cambia el diaton circumstancia.

13. Porque posible ya pensa el cuanto Israelita que un mal decision que construi otravez con el templo?

¹³ Ya prohibi que construi otravez con el templo. Maskin pa ansina, el maga hombre con quien ya iscuji para guia​—si Alto Sacerdote Jesua (Josue) y Gobernador Zorobabel—​“ya principia construi otravez con el casa del  Dios.” (Esd. 5:1, 2) Posible, ya pensa el cuanto Judio que mal decision se. Gendeh sila puede esconde que ta construi sila otravez con el templo y el diila maga enemigo hay hace el todo para pricura hace descanza con el trabajo. El dos responsable hombre, si Josue y si Zorobabel, necesita asiguranza que tiene sila el suporta de Jehova. Ya ricibi sila con ese. Paquemodo?

14. Asegun na Zacarias 4:12, 14, cosa asiguranza el ya ricibi si Alto Sacerdote Josue y si Gobernador Zorobabel?

¹⁴ Le con el Zacarias 4:12, 14. Na este parte del vision de Zacarias, ya revela el angel con el fiel profeta del Dios que el dos pono de olivo ta representa con “el dos iscujido”—con Josue y Zorobabel. Ya habla el angel que ese dos hombre na figurativo manera “ta para junto con el Señor del entero mundo,” si Jehova. Un grande privilegio gayot se! Tiene kanila confianza si Jehova. Poreso, el diila maga uban Israelita puede gayot confia con el diila maga decision y na direccion del Dios, maskin cosa pa ese direccion.

15. Paquemodo kita puede dale mira que ta respeta kita con el direccion de Jehova que puede incuntra na de suyu Palabra?

¹⁵ El un manera que ta continua dale direccion si Jehova con el de suyu maga siervo ahora amo por medio na de suyu Palabra, el Biblia. Na ese sagrao libro, ta habla le kanaton si paquemodo adora con ele na aceptable manera. Paquemodo kita dale mira que ta respeta kita con el direccion que ta ricibi kita estaba na Palabra del Dios? Si dale kita tiempo para le con ese enbuenamente y entende con ese. Pregunta na de tuyu mismo cuerpo: ‘Si ta le yo con el Biblia o con el uno del diaton maga publicacion, ta descanza ba yo y ta medita? Ta pricura ba yo entende con el maga verdad na Biblia que “dificil para entende”? O paspas lang yo ta le con ese?’ (2 Ped. 3:16) Si dale kita tiempo para medita si cosa kanaton ta enseña si Jehova, hay puede kita sigui con el de suyu direccion y cumpli con el diaton trabajo predicacion.​—1 Tim. 4:15, 16.

16. Si gendeh kita ta entende con el direccion que ya ricibi kita estaba na “fiel y sabio esclavo,” cosa puede ayuda kanaton para sigui con ese?

¹⁶ El otro manera que ta dale kanaton direccion si Jehova amo por medio del “fiel y sabio esclavo.” (Mat. 24:45, NWT) Tiene vez, ese esclavo posible dale direccion que gendeh kita ta entende. Por ejemplo, posible kita ricibi maga especifico instruccion que ta ayuda kanaton para prepara na un natural calamidad que ta pensa kita que gendeh sucede na diaton  lugar. O posible kita sinti que ese esclavo por demas de con cuidao durante el pandemic. Cosa kita debe hace si ta sinti kita que gendeh practical el maga instruccion que ya dale kanaton? Puede kita pensa si paquemodo ya beneficia el maga Israelita cay ya sigui sila con el consejo que ya dale por medio con Josue y Zorobabel. Puede tambien kita pensa acerca con el otro istoria na Biblia que ya le kita. Tiene vez, ya ricibi direccion el maga siervo del Dios que dol gendeh practical na mirada del maga gente pero ya puede salva con el diila vida.​—Juez 7:7; 8:10.

17. Cosa el efecto na maga Judio del vision acerca na candelario y dos pono de olivo?

¹⁷ Corto lang el ika-cinco vision que ya mira si Zacarias pero ya ayuda quel con el maga Judio para tene positivo mirada na diila trabajo y adoranza. Y cuando ya actua sila harmonia na cosa ya mira si Zacarias, ya sinti sila con el amable suporta y direccion de Jehova. Por medio na poderoso sagrao espiritu de Jehova, ya ayuda le kanila para continua na diila trabajo y para bira otravez el diila alegria.​—Esd. 6:16.

18. Paquemodo el vision de Zacarias puede afecta con el de tuyu vida?

¹⁸ Puede tene positivo efecto na de tuyu vida el vision de Zacarias acerca na candelario y dos pono de olivo. Como cosa kita ya discuti, puede se ayuda contigo para tene el fuerza que necesita tu para enfrenta oposicion, el alegria que necesita tu si cambia el de tuyu circumstancia y el confianza que necesita tu para queda obediente si ricibi tu direccion que gendeh tu ta entende. Cosa tu debe hace si ta experiencia tu maga dificultad na de tuyu vida? Una, mira si cosa ya mira si Zacarias​—maga evidencia que ta cuida si Jehova con el De Suyu maga siervo. Despues, actua base na cosa tu ya mira por medio de confia con Jehova y continua adora con ele con todo corazon. (Mat. 22:37) Si hace tu se, hay ayuda contigo si Jehova para sirvi con ele hasta para cuando con alegria.​—Col. 1:10, 11.