El cuanto quien ya le con ese istoria yan libug acerca con ese. Pero, dos diferente gente el tiene nombre Mefiboset y tiene kita cosa puede aprende si man repaso kita si cosa ya sucede.

Si Rey Saul de Israel tiene nueve anak​—siete hombre y dos mujer. El de suyu primer anak hombre amo si Jonatan. Despues, ya tiene anak hombre el rey que si Mefiboset na otro mujer de Saul que si Rizpa. Si Jonatan tiene tambien un anak hombre que el nombre Mefiboset. Poreso, si Rey Saul ya tiene anak y apu que igual Mefiboset el nombre.

Ya llega el tiempo, yan contra si Rey Saul con el maga Gibeonita quien ta queda junto con el maga Israelita y ya pricura mata kanila todo. Ta sale que manada kanila el ya muri. Gendeh gayot se justo. Porque? Cay na tiempo de Josue, el maga lider na Israel ya hace un contrata de paz con el maga Gibeonita.​—Jos. 9:3-27.

Valido siempre ese contrata na tiempo de Rey Saul. Maskin pa ansina, el rey ya pricura mata con el todo Gibeonita. Poreso, ya queda “culpable de sangre si Saul y aquellos na de suyu casa.” (2 Sam. 21:1) Despues de cuanto tiempo, ya queda rey si David. Yan cuento con ele el maga Gibeonita quien ya salva acerca na kamali que ya hace kanila. Ya pregunta kanila si David si cosa debe hace para compone con el cosa ya hace si Saul y para bendici si Jehova con el tierra. En vez de pidi sen, el maga Gibeonita ya pidi que dale kanila el siete anak hombre del gente quien “ya plaña para elimina” kanila para puede sila mata. (Num. 35:30, 31) Ya dale si David el cosa sila ya pidi.​—2 Sam. 21:2-6.

Na aquel tiempo, muerto ya si Saul y Jonatan por causa na guerra pero vivo pa el anak de Jonatan que si Mefiboset. No puede le camina por causa na un accidente cuando bata le y gendeh le envuelto na plano del de suyu aguelo contra con el maga Gibeonita. Ya hace un contrata si David junto con el de suyu amigo que si Jonatan que hay dale tambien beneficio con el de suyu maga anak, incluido ya con el anak de Jonatan que si Mefiboset. (1 Sam. 18:1; 20:42) El Biblia ya habla: “El rey [si David] ya dale mira compasion con Mefiboset, el anak de Jonatan que anak de Saul, por causa na juramiento que ya hace . . . adelante de Jehova.”​—2 Sam. 21:7.

Maskin pa ansina, ya conforma si David na cosa ya pidi el maga Gibeonita. Ya dale le kanila el dos anak hombre de Saul​—uno ya si Mefiboset—​y el cinco del maga hombre apu de Saul. (2 Sam. 21:8, 9) Por causa na cosa ya hace si David, gendeh mas culpable de sangre el nacion de Israel.

Este suceso gendeh lang basta parte del history. Claro el ley del Dios. Este ta habla: “Gendeh debe mata con el maga anak por causa na cosa ya hace el diila maga tata.” (Deut. 24:16) Asigurao, gendeh aproba si Jehova con el cosa ya hace con el dos anak de Saul y cinco apu si inocente sila. Ese ley ya omenta: “Hay mata lang con el persona si ele mismo el culpa.” Ta sale que ya participa el siete descendiente de Saul na matanza que ya hace le na maga Gibeonita. Poreso, ya cosecha el siete con el resulta del diila mal trabajo.

Este istoria ta ilustra que gendeh puede man razon el un persona que ya hace le malo cay ta sigui lang le direccion. Responsable le na de suyu mismo accion. El un proverbio ta habla: “Hace patag con el de tuyu camino, y el todo de tuyu paso hay queda asigurao. No disvia na derecha o na izquierda. Hace lejos na de tuyu pies el maldad.”​—Prov. 4:24-27; Ef. 5:15.