1. Cosa ta nota el maga gente si ta atende sila na diaton maga miting por primer vez? (Mira tambien con el letrato.)

 IMAGINA con el un man maridable quien ya atende na miting na Kingdom Hall del maga Testigo de Jehova por primer vez. Ya aprecia gayot sila si paquemodo kanila yan welcome y ya nota sila con el amor que tiene aquellos quien ya atende. Cuando pabolbida ya sila, ya habla el mujer con el de suyu marido, ‘Bien diferente gayot el maga Testigo de Jehova y ya gusta yo man junto kanila.’

2. Porque el cuanto ya descanza sirvi con Jehova?

² Deverasan, puede nota con el amor que tiene el maga hermano y hermana na congregacion. Pero siempre, gendeh perfecto el maga Testigo de Jehova. (1 Juan 1:8) Poreso si mas conoce kita con el maga hermano na congregacion, grande el posibilidad que puede kita mira con el cuanto na diila maga kamali. (Roma 3:23) Maka-triste cay el cuanto ya descanza sirvi con Jehova por causa na imperfeccion del otro.

3. Paquemodo puede identifica con el maga verdadero siguidores de Jesus? (Juan 13:34, 35)

³ Considera otravez con el texto donde yan base el tema de este articulo. (Le con el Juan 13:34, 35.) Paquemodo puede identifica con el maga verdadero siguidores del Cristo? Por medio na amor que ta dale sila mira con uno y otro y gendeh cay perfecto sila. Puera con ese, nuay habla si Jesus: ‘Ansina hay sabe ustedes que ustedes de mio maga dicipulo.’ Sino, ya  habla le: “Ansina ay sabe todo el maga gente cay ustedes dimio maga dicipulo.” Na ansina manera, ya dale mira si Jesus que gendeh lang el de suyu maga siguidores el puede identifica con el maga verdadero Cristiano por medio na diila amor con uno y otro sino maskin aquellos apuera na congregacion.

4. Cosa posible el cuanto quierre sabe acerca na maga verdadero Cristiano?

⁴ El cuanto de aquellos gendeh Testigo de Jehova posible pensa: ‘Paquemodo el amor puede ayuda kanaton para identifica con el maga verdadero siguidores de Jesus? Paquemodo si Jesus ya demonstra amor na de suyu maga apostoles? Y paquemodo kita puede imita con el ejemplo de Jesus ahora?’ Necesita el maga Testigo de Jehova medita con el contestacion de ese maga pregunta. Si hace kita se, puede se ayuda kanaton para mas demonstra amor especialmente si ya puede man kamali kanaton el otro.​—Ef. 5:2.

5. Explica con el maga palabra de Jesus na Juan 15:12, 13.

⁵ Ya hace claro si Jesus que tiene un especial clase de amor el de suyu maga siguidores. (Le con el Juan 15:12, 13.) Nota que ya manda kanila si Jesus: “Ama ustedes con uno y otro, igual como ta ama yo con ustedes.” Cosa se quierre decir? Como cosa ya explica si Jesus, este amo el amor que conforme hace sacrificio​—amor que hay manda move con el un Cristiano para muri pa gane para con el de suyu hermano y hermana si necesita. b

6. Paquemodo ya hace claro el Palabra del Dios que importante el amor?

⁶ El Palabra del Dios ya hace claro que bien importante el amor. Para na manada gente, este el cuanto del diila maga favorito texto na  Biblia: “El Dios amor.” (1 Juan 4:8) “Ama con el dituyo vecinos, como ta ama tu con el dituyo mismo cuerpo.” (Mat. 22:39) “El amor ta puede tapa con mucho maga pecado.” (1 Ped. 4:8) “El amor hasta para cuando.” (1 Cor. 13:8) Este maga texto y otro pa ta hace claro que bien importante que cultiva y demonstra con este bonito calidad.

7. Porque si Satanas nunca puede hace unido con el maga gente por medio na amor?

⁷ Manada ta pregunta: ‘Paquemodo kita puede identifica con el verdadero religion? Todo religion ta clama que ta enseña sila el verdad pero otro-otro el cosa sila ta enseña acerca con Dios.’ Ya puede hace libug si Satanas con el maga gente por medio na maga falso organizacion de religion que ya hace le. Pero, nunca le puede hace unido con el maga gente na entero mundo na un organizacion quien ta ama con uno y otro. Solamente si Jehova el quien con ese puede hace. Porque? Cay el deverasan amor estaba con Jehova. Aquellos lang quien tiene de suyu sagrao espiritu y bendicion el puede demonstra deverasan amor. (1 Juan 4:7) Poreso, ya habla si Jesus que el deverasan amor amo el identificacion del de suyu maga deverasan siguidores.

8-9. Para con el cuanto, cosa el efecto kanila cuando ya puede sila mira el amor entre el maga Testigo de Jehova?

⁸ Como cosa ya predicta si Jesus, manada el quien ya puede identifica con el de suyu maga verdadero siguidores por medio na deverasan amor que ta dale sila mira con uno y otro. Por ejemplo, el un hermano que si Ian ya acorda con el primer convencion que ya atende le que ya hace na un sports stadium cerca kanila. Maga cuanto meses antes quel, talla tambien si Ian na aquel mismo stadium para mira con el un juego. Ya habla le: “Otro gayot ese convencion. Bueno el maga Testigo y decente el mudada, y el diila maga anak gendeh tan salawayun.” Omento pa, ele ya habla: “Mas pa na todo, ese maga gente dol alegre y tiene paz​—ese el cosa que quierre yo. Gendeh yo ta acorda el maga talk na ese dia pero nuay yo ulvida con el conducta del maga Testigo.” c Siempre, ese clase de conducta amo resulta del deverasan amor que tiene kita para na uno y otro. Por causa cay ta ama kita con el diaton maga hermano y hermana, ta trata kita kanila enbuenamente y con respeto.

⁹ Ansina tambien el cosa ya sinti el un hermano que si John cuando ya principia le atende na maga miting de congregacion: “Yan bilib yo cay bien friendly gayot sila. . . . El diila deverasan amor ya convinci conmigo que ya incuntra ya yo con el verdadero religion.” d Este y el otro pa maga experiencia ta dale mira que el maga Testigo de Jehova amo maga deverasan Cristiano.

10. Na cosa situacion kita tiene oportunidad para demonstra Cristiano amor? (Mira tambien con el footnote.)

¹⁰ Como cosa ya menciona enante, el diaton maga hermano y hermana gendeh perfecto. Tiene vez, puede sila habla o hace cosas que puede hace sinti duele kanaton. e (Sant. 3:2) Na ansina maga situacion, tiene kita el oportunidad para demonstra Cristiano amor por medio na diaton reaccion. Cosa kita puede aprende na ejemplo de Jesus acerca con ese?​—Juan 13:15.

11. Cosa gendeh buen custumbre el ya dale mira si Santiago y Juan? (Mira tambien con el letrato.)

¹¹ Nuay expecta perfeccion si Jesus na de suyu maga siguidores. Sino, na amable manera le ya ayuda kanila para corecta con el diila gendeh buen custumbre para puede sila obtene el favor de Jehova. Na un ocasion, el dos apostoles, si Santiago y Juan, ya habla na diila nana que pidi con Jesus que dale kanila prominente posicion na Reino. (Mat. 20:20, 21) Si Santiago y Juan ya dale mira que orgulloso sila y quierre sila queda mas importante contra con otro.​—Prov. 16:18.

12. Si Santiago y Juan lang ba el ya dale mira gendeh buen custumbre? Explica.

¹² Gendeh lang si Santiago y Juan el ya dale mira gendeh buen custumbre na aquel ocasion. Nota si cosa el reaccion del otro maga apostoles: “Cuando el otros dies maga Apostol ya puede oi este, ya rabia sila con el dos man hermano.” (Mat. 20:24) Puede kita imagina que yan purpiajan kanda Santiago, Juan y el otro maga apostoles. Posible, el otro ya habla igual ansina: ‘Quien man ustedes para pidi prominente posicion na Reino? Gendeh lang ustedes el quien ta hace grande esfuerzo junto con Jesus. Cualificao tambien kame para tene especial privilegio!’ Na ese situacion, ya ulvida el maga apostoles que  debe sila pirmi dale mira amor y pagka-bueno con uno y otro.

13. Cosa el reaccion de Jesus na maga kamali del de suyu maga apostoles? (Mateo 20:25-28)

¹³ Cosa ya hace si Jesus na aquel situacion? Nuay le rabia. Nuay le habla que busca le otro maga apostoles, aquel mas humilde y quien pirmi hay trata con uno y otro con amor. Sino, con paciencia le yan cuento kanila cay sabe le que quierre sila hace si cosa el justo. (Le con el Mateo 20:25-28.) Ya continua le trata kanila na amable manera maskin gendeh se el primer vez o ultimo vez que el maga apostoles yan purpiajan si quien kanila el mas alto.​—Mar. 9:34; Luc. 22:24.

14. Cosa el background del maga apostoles de Jesus?

¹⁴ Asigurao, ya considera si Jesus el background del maga apostoles. (Juan 2:24, 25) Ya engranda sila na lugar donde el maga religioso lider ya enseña con el maga gente que bien importante que tene prominente posicion. (Mat. 23:6; compara na video The Front Seats in the Synagogue na study note na Mateo 23:6.) El maga Judio religioso lider ta pensa tambien que mas recto sila contra con otro. f (Luc. 18:9-12) Sabe si Jesus que ese clase de pensamiento ya puede afecta con el manera si paquemodo el maga apostoles ta mira con el diila mismo cuerpo y con otro. (Prov. 19:11) Nuay le pensa que nunca man kamali el de suyu maga dicipulo y cuando yan kamali sila, paciencioso le kanila. Sabe le que quierre sila hace si cosa el bueno poreso con paciencia le ya enseña kanila que queda mas humilde y dale mira amor en vez que pirmi pensa que mas alto sila contra con otro.

15. Cosa kita puede aprende na cosa ya sucede entre con Santiago, Juan y con el otro maga apostoles?

¹⁵ Manada kita cosa puede aprende na cosa ya sucede entre con Santiago, Juan y otro maga apostoles. Mali el man hermano cuando ya pidi sila que tene prominente posicion na Reino. Pero mali tambien el otro maga apostoles cay ya permiti sila que destorba el diila unidad. Pero, ya trata si Jesus con el todo 12 apostoles na bueno y amable manera. Cosa el leccion para kanaton? Gendeh lang importante si cosa el otro ya hace sino importante tambien si cosa el diaton reaccion na diila maga kamali. Cosa puede ayuda kanaton? Si ya consumi kita na un hermano o hermana, puede kita pregunta na diaton mismo cuerpo: ‘Porque bien consumido yo na cosa le ya hace? Ta dale ba se mira que tiene yo negativo custumbre que necesita yo quita? Posible gaha que tiene maga problema el persona quien ya manda consumi conmigo? Maskin ta sinti yo que tiene yo razon para rabia, puede ba yo dale mira amor y perdona con el persona?’ Si ta dale kita mira amor con uno y otro, ta dale kita mira que deverasan siguidores kita de Jesus.

16. Cosa pa kita puede aprende na ejemplo de Jesus?

¹⁶ El ejemplo de Jesus ta enseña tambien kanaton que pricura entende con el diaton maga hermano y hermana. (Prov. 20:5) Ta puede le si Jesus maga corazon pero kita gendeh. Maskin pa ansina, puede kita queda paciencioso na diaton maga hermano y hermana si tan kamali sila. (Ef. 4:1, 2; 1 Ped. 3:8) Mas pronto se hace si sabe kita el diila background. Considera un ejemplo.

17. Paquemodo ya beneficia el un circuit overseer cuando mas ya conoce le con el un hermano?

¹⁷ El un circuit overseer quien ta sirvi na East  Africa ya acorda que el de suyu impresion na un hermano amo que tiene este agresivo personalidad. Cosa ya hace este circuit overseer? Ele ya habla: “En vez de evita con este hermano, ya decidi yo que mas conoce con ele.” Cuando ya hace le este, ya puede aprende el circuit overseer cuanto cosas acerca na background de este hermano que ya influencia con el de suyu personalidad. El circuit overseer ya continua: “Cuando ya puede yo sabe si paquemodo de dificil para con ele que hace maga cambio para tene buen relacion con otro y si cosa maga cambio ya le ya puede hace, yan bilib yo con ele. Ya queda kame man amigo.” Si pricura kita entende con el diaton maga hermano y hermana, mas pronto para kanaton que dale mira amor kanila.

18. Cosa kita puede pregunta na diaton mismo cuerpo si yan kamali kanaton el un hermano o hermana? (Proverbio 26:20)

¹⁸ Tiene vez, ta sinti kita que necesita kita man cuento con el un hermano o hermana quien yan kamali kanaton. Pero antes con ese hace, debe kita pregunta na diaton mismo cuerpo: ‘Sabe ba yo el todo detalle?’ (Prov. 18:13) ‘Posible ba que gendeh intencional el cosa le ya hace?’ (Ecl. 7:20) ‘Ya puede ba tambien yo hace semejante kamali?’ (Ecl. 7:21, 22) ‘Si man cuento yo con el persona, hay queda lang ba mas grande el problema?’ (Le con el Proverbio 26:20.) Si considera kita anay con este maga pregunta, el amor puede motiva kanaton que ignora ya lang con el kamali.

19. Cosa tu determinao hace?

¹⁹ Como maga Testigo de Jehova, ta dale kita prueba que maga deverasan dicipulo kita de Jesus. Como individual, ta hace kita se si ta dale kita mira amor na diaton maga hermano y hermana maskin ta hace sila maga kamali. Y si hace kita con ese, puede kita ayuda con otro para realiza que tiene kita el deverasan religion y para man junto sila kanaton adora con Jehova, el Dios de amor. Ojala determinao kita que continua dale mira el amor que ta identifica con el maga verdadero Cristiano.