1. Cosa el un manera que mas ya conoce si Job con Jehova?

 MANADA con quien ya puede man cuento si Job na de suyu entero vida pero gendeh gayot le puede ulvida cuando ya puede le man cuento con Dios Jehova. Para hace fuerte el confianza de Job na sabeduria y abilidad de Jehova para cuida con el De Suyu maga siervo, ya habla si Jehova con Job que mira con el cuanto extraordinario cosas que ya crea Le. Por ejemplo, ya hace acorda el Dios con Job que ta cuida Le con el maga animal poreso puede tambien Le cuida con Job. (Job 38:39-41; 39:1, 5, 13-16) Cay ya observa le con el maga creacion, ya puede aprende si Job acerca na maga calidad del de suyu Dios.

2. Porque posible dificil para examina con el maga creacion de Jehova?

² Puede tambien kita aprende mas acerca na diaton Dios si examina kita con el maga cosas que ya crea le. Pero, tiene vez gendeh se facil para hace. Si ta queda kita na un ciudad, posible gendeh kita puede mira manada creacion. Y maskin ta queda kita lejos na ciudad, posible sinti kita que nuay kita tiempo para estudia con ese. Poreso, discuti kita si porque bueno que dale tiempo y hace esfuerzo para observa con el maga creacion. Hay considera kita si paquemodo ya usa si Jehova y Jesus con el creacion para enseña y si cosa kita puede hace para mas aprende acerca na creacion.

3. Cosa ta dale mira que quierre si Jehova que man enjoy si Adan con el maga creacion?

³ Quierre si Jehova que el primer gente man enjoy na cosa Le ya crea. Cuando ya crea el Dios con Adan, ya pone con ele na un bonito paraiso onde le queda y ya manda con ele que cuida y hace ancho con el paraiso. (Gen. 2:8, 9, 15) Imagina si  paquemodo de excited si Adan mientras ta mira que ta crici el maga similla y ta florea el maga siembra. Un privilegio gayot para con Adan que cuida con el jardin de Eden! Ya pidi tambien si Jehova con Adan que nombra con el diferente maga animal. (Gen. 2:19, 20) Puede era nombra mismo si Jehova kanila pero ya dale le se trabajo con Adan. Asigurao, antes decidi si cosa llama kanila, ya estudia anay enbuenamente si Adan con el maga animal y ya observa el diila ichura y movimiento. Yan enjoy gayot si Adan mientras ta hace con ese. Puede kita asigura que ya queda mas hondo el de suyu apresacion para na sabeduria y abilidad del de suyu Tata.

4. (a) Cosa el un razon si porque debe kita observa con el maga creacion? (b) Cosa creacion el quierre-quierre gayot tu?

⁴ El un razon si porque debe kita observa con el maga creacion amo cay quierre si Jehova que hace kita con ese. Ele ya habla: “Man tanga ustedes na cielo y mira.” Despues, ya pregunta le: “Quien ya crea con este maga cosas?” Claro el contestacion. (Isa. 40:26) Ya hace si Jehova bien manada bonito creacion gendeh lang na cielo sino na tierra y na mar tambien. Y tiene kita cosa puede aprende con ese todo. (Sal. 104:24, 25) Pensa tambien si paquemodo kanaton ya hace el Dios. Ya hace le posible que puede kita aprecia con el maga bonito cosas alrededor kanaton. Mas pa, ya dale le kanaton el abilidad para mira, oi, sinti, saborea y ole para puede kita man enjoy con el maga cosas que ya crea le.

5. Asegun na Roma 1:20, cosa el beneficio si estudia kita con el maga creacion de Jehova?

⁵ El Biblia ta habla otro importante razon si porque kita debe observa con el maga creacion. Ta enseña este kanaton acerca na maga calidad de Jehova. (Le con el Roma 1:20, NWT.) Por ejemplo, considera con el maga diseño que claro kita puede mira alrededor kanaton. Gendeh ba ta enseña este kanaton que bien sabio el Dios? Pensa tambien con el diferente clase de comida que tan enjoy kita. Claro este ta dale mira que ta ama gayot le kanaton. Si ta puede kita mira con el personalidad de Jehova na maga cosas que ya crea le, mas ta puede kita conoce con ele y ta motiva este kanaton para queda mas cerca con ele. Ahora, discuti kita con el cuanto importante leccion que ya enseña si Jehova con el maga gente por medio na maga creacion.

6. Cosa kita puede aprende con el maga pajaro que ta cambia lugar?

⁶ Ya determina si Jehova si cuando sucede el maga cosas. Cada año, na fin de Febrero hasta  na media-media de Mayo, el maga Israelita ta puede mira con el maga stork o cigueña que ta bula para cambia lugar para na norte. “El cigueña na cielo sabe el de suyu tiempo,” ya habla el Dios con el maga Israelita. (Jer. 8:7) Igual si paquemodo ya determina si Jehova si cuando cambia lugar este maga pajaro, ya determina tambien le si cuando le juzga con el maga gente. Ahora, si ta puede kita observa con el maga pajaro que ta cambia lugar, ta hace este acorda kanaton que puede kita confia que tiene “iscujido tiempo” si Jehova si cuando le destroza con este mal mundo.​—Hab. 2:3.

7. Cosa kita puede aprende na manera si paquemodo ta bula el un pajaro? (Isaias 40:31)

⁷ Ta dale fuerza si Jehova con el de suyu maga siervo. Por medio con Isaias, ya promete si Jehova que hay hace Le fuerte con el De Suyu maga siervo si maluya sila o triste para “bula sila pa-arriba que dol tiene maga alas igual na aguila.” (Le con el Isaias 40:31.) El maga Israelita pirmi ta mira con el maga aguila que ta bula pa-arriba que nuay tanto esfuerzo y ta sigui lang na aire que ta subi. Ta manda este acorda kanaton que puede dale kanaton fuerza si Jehova igual con este maga pajaro. Si ta mira tu un pajaro que ta bula pa-arriba na cielo que gendeh tanto ta hace menea con el de este maga alas, acorda que si Jehova puede dale contigo fuerza para enfrenta con el de tuyu maga problema.

8. Cosa ya aprende si Job na maga creacion del Dios y cosa kita puede aprende?

⁸ Puede kita confia con Jehova. Ya ayuda si Jehova con Job para tene mas grande confianza con Ele. (Job 32:2; 40:6-8) Cuando yan cuento Le con Job, ya refiri el Dios con el manada aspeto del De Suyu creacion, incluido el maga estrellas, celaje y kirlat. Ya menciona tambien si Jehova acerca na maga animal igual na toro y caballo. (Job 38:32-35; 39:9, 19, 20) Este maga cosas ta dale evidencia, gendeh lang acerca na grande poder del Dios, sino na de suyu amor y sabeduria tambien. Por causa con este, mas ya confia si Job con Jehova. (Job 42:1-6) Na igual manera, si estudia kita con el maga creacion, hay manda este acorda kanaton que mas sabio y mas poderoso si Jehova contra kanaton. Puede tambien le termina con el diaton maga probanza y hay hace gayot le con ese. Este verdad puede ayuda kanaton para mas confia con ele.

9-10. Cosa ta enseña kanaton el sol y ulan acerca con Jehova?

⁹ Manada cosa sabe si Jesus acerca na maga creacion. Como “un buen trabajador,” ya tiene le el privilegio que trabaja junto na de suyu Tata cuando ya crea Le con el universo. (Prov. 8:30) Na uliji, cuando taqui si Jesus na tierra, ya usa le con el creacion para enseña con el de suyu maga dicipulo acerca na de suyu Tata. Considera con el cuanto leccion que ya enseña le.

¹⁰ Si Jehova ta dale mira el de suyu amor con todo. Na Sermon na Monte, ya menciona si Jesus na de suyu maga dicipulo el dos creacion que posible gendeh ta aprecia el manada gente: el sol y ulan. Importante este para puede kita continua vivi. Puede era gendeh este dale si Jehova con aquellos gendeh ta sirvi con ele. Pero, ya dale le sol y ulan con todo. (Mat. 5:43-45) Ya usa si Jesus este leccion para enseña con el de suyu maga dicipulo que si Jehova quierre que dale kita mira amor con todo. Cada vez ta puede kita mira un bonito sunset o ulan, puede kita pensa con el imparcial amor de Jehova. El de suyu ejemplo puede motiva kanaton para dale mira amor y predica con todo.

11. Si observa kita con el maga pajaro, paquemodo se puede anima kanaton?

¹¹ Ta dale si Jehova el diaton fisical necesidad.  Na mismo sermon, ya habla tambien si Jesus: “Mira ustedes con el maga pajaro na cielo: Gendeh sila ta siembra ni ta cosecha, ni ta pone maga grano na tambobo, pero el de ustedes Tata na cielo ta cuida canila.” El maga quien ta oi con Jesus posible ta puede mira con el maga pajaro que ta bula arriba kanila cuando ya habla le: “Gendeh ba ustedes mas importante pa que con el maga pajaro?” (Mat. 6:26) Un amable manera este para asigura kanaton que hay dale si Jehova el diaton maga fisical necesidad! (Mat. 6:31, 32) Este leccion que estaba na maga creacion ta continua anima con el maga fiel siervo del Dios. El un joven pioneer hermana na Spain ta sinti triste cay gendeh le ta puede incuntra un lugar onde queda. Pero cuando ya mira le con el maga pajaro que ta come maga pipita y fruta, ya anima este con ele. Ele ya habla, “Aquel maga pajaro ya manda acorda conmigo que ta cuida kanila si Jehova y hay cuida tambien le conmigo.” Nuay dura despues quel, ya puede incuntra el hermana un lugar onde le queda.

12. Asegun na Mateo 10:29-31, cosa ta enseña kanaton el maga maya acerca con Jehova?

¹² Precioso kita con Jehova como individual. Antes imbia con el de suyu maga apostoles para predica, ya ayuda si Jesus kanila para enfrenta con el diila miedo na oposicion. (Le con el Mateo 10:29-31.) Ya discuti le acerca na uno na de con todo comon pajaro na Israel: el maya. Diutay lang el valor de este maga pajaro na tiempo de Jesus. Pero, ya habla le con el de suyu maga dicipulo que “ni uno de esos gendeh ta cai na tierra” que no sabe el diila Tata. Despues, ele ya omenta: “Mas caro pa ustedes contra un montonada de maga maya.” Na este manera, ya asigura si Jesus con el de suyu maga dicipulo que precioso sila con Jehova como individual poreso gendeh sila debe tene miedo na persecucion. Asigurao, ya puede acorda el maga dicipulo con el maga palabra de Jesus cuando ya mira sila con el maga maya mientras ta predica sila na maga pueblo y barrio. Cada vez ta mira tu un diutay pajaro, acorda que precioso tu con Jehova como individual cay etu tambien “mas caro pa . . . contra un montonada de maga maya.” Na de suyu suporta, puede tu enfrenta con el oposicion con confianza.​—Sal. 118:6.

13. Cosa puede ayuda kanaton para aprende maga leccion na creacion?

¹³ Puede kita aprende manada otro leccion acerca con Jehova na creacion. Paquemodo? Una, necesita kita dale tiempo para observa con el maga creacion. Despues, necesita kita pensa si cosa este ta enseña kanaton acerca con Jehova. Posible gendeh se pirmi facil para hace. Si Géraldine, un hermana de Cameroon, ya habla, “Ya engranda yo na ciudad poreso necesita yo hace esfuerzo para puede observa con el maga creacion.” El un anciano que si Alfonso ya explica, “Ya realiza yo que necesita yo man schedule tiempo para solo-solo yo  observa con el creacion de Jehova y medita si cosa este ta enseña acerca con ele.”

14. Cosa ya aprende si David cuando ya medita le con el maga creacion del Dios?

¹⁴ Ya medita enbuenamente si David con el maga creacion del Dios. Ele ya habla con Jehova: “Si ta mira yo con el de tuyu cielo, el maga trabajo del de tuyu mano, el luna y el maga estrellas que ya prepara tu, cosa ba el gente para pensa tu con ele?” (Sal. 8:3, 4) Mientras ta mira si David con el cielo si denoche, nuay lang le aprecia si paquemodo de bonito el universo. Ya medita tambien le si cosa el maga estrellas ta enseña acerca con Dios. Ya aprende le si paquemodo de poderoso si Jehova. Na otro tiempo, ya medita si David si paquemodo ya forma el de suyu cuerpo na barriga del de suyu nana. Mientras ta medita le con este, mas ya aprecia le con el sabeduria de Jehova.​—Sal. 139:14-17.

15. Dale ejemplo si paquemodo tu ya puede mira el maga calidad de Jehova na creacion. (Salmo 148:7-10)

¹⁵ Igual con David, gendeh ya tu necesita anda lejos para puede tu mira maga creacion que puede tu medita. Tiene manada cosas alrededor que puede ayuda contigo para mas conoce con Jehova. Por ejemplo, pensa acerca na poder de Jehova si ta sinti tu el calor del sol. (Jer. 31:35) Pensa acerca na de suyu sabeduria si ta mira tu el un pajaro ta hace pugaran. Acorda que un alegre Dios si Jehova si ta mira tu un perro que ta hace lagas con el de este rabo. Y rindi gracias con Jehova na de suyu amor cada vez ta puede tu mira un nana que ta juga con el de suyu baby. Tiene kita bien manada oportunidad para aprende acerca con Jehova cay el de suyu maga creacion​—grande y diutay, cerca y lejos​—ta alaba con ele.​—Le con el Salmo 148:7-10.

16. Cosa kita debe determinao hace?

¹⁶ El diaton Dios bien inteligente, amable, poderoso y ma-abilidad. Este maga calidad y otro pa claro puede mira na maga creacion si dale kita tiempo para observa con ese. Ojala regular kita dale tiempo para man enjoy con el maga creacion y pensa si cosa este ta enseña acerca con Jehova. Si hace kita se, hay queda kita mas cerca con el diaton Creador. (Sant. 4:8) Na sunod articulo, hay mira kita si paquemodo el maga mayores puede usa con el creacion para ayuda con el diila maga anak queda cerca con Jehova.