1-2. Cosa ta sucede durante el bautismo y cosa kita hay considera?

 YA PUEDE ya ba tu mira un grupo de maga candidato de bautismo? Asigurao, ya puede tu oi el conviccion na diila voz cuando ya contesta sila con el dos pregunta antes sila bautiza. Alegre el diila maga familia y amigo. Cuando ya sale sila na agua, ya puede tu oi que ya tuca mano el maga gente y bien alegre aquellos maga nuevo bautizao. Cada semana, maga miles el quien ta bautiza como maga dedicao Testigo de Dios Jehova.

² Ta pensa ba tambien tu que bautiza? Si ansina, un especial persona tu na este mal mundo cay “ta busca [tu] con Jehova.” (Sal. 14:1, 2) Para contigo este articulo, joven man tu o de edad. Pero, aquellos quien bautizao ya quierre tambien hace fuerte con el diila determinacion que sirvi con Jehova hasta para cuando. Poreso, considera kita junto tres razon si porque kita quierre sirvi con Jehova.

3. Porque el maga siervo de Jehova ta ama con el verdad y pagka-recto? (Salmo 119:128, 163)

³ Ya manda si Jehova con el de suyu maga siervo que “ama . . . con el verdad.” (Zac. 8:19) Ya anima si Jesus con el de suyu maga siguidores que hace si cosa el justo. (Mat. 5:6) Este quierre decir que el un persona necesita tene fuerte deseo para hace si cosa el justo, bueno y limpio na mirada del Dios. Ta ama ba tu con el verdad y pagka-recto? Asigurao, ta ama tu con ese. Ta odia tu con el imbusterias y con el todo cosas que malo. (Le con el Salmo 119:128, 163.) Aquellos quien tan imbusterias ta imita con Satanas, el quien ta rula con este mundo. (Juan 8:44; 12:31) Uno na maga cosa quierre hace si Satanas amo que hace malo con el reputacion de Dios Jehova. Ta  hace le calayat maga imbusterias acerca na diaton Dios desde na rebellon na Eden. Ta manda le creé con el maga gente que si Jehova canalla, deshonesto y tiene maga buen cosas que ta esconde na maga gente. (Gen. 3:1, 4, 5) El maga imbusterias de Satanas contra con Jehova ta continua siempre afecta con el mirada del maga gente con Dios. Si el maga gente gendeh ta “ama . . . con el verdad,” puede si Satanas influencia kanila para hace maga mal cosas.​—Roma 1:25-31.

4. Paquemodo si Jehova ya dale mira que ele “el Dios de verdad”? (Mira tambien con el letrato.)

⁴ Si Jehova “el Dios de verdad” y ta enseña le el verdad con aquellos quien ta ama con ele. (Sal. 31:5) Por causa con ese, ta ayuda le kanila para gendeh mas creé con el maga imbusterias de Satanas. Ta enseña tambien si Jehova con el de suyu maga siervo que queda honesto y recto. Ta ayuda se kanila para tene dignidad y paz na pensamiento. (Prov. 13:5, 6) Ansina ba tambien tu ya experiencia cuando ya estudia tu con el Biblia? Ya puede tu aprende que el maga manera de Jehova amo el de con todo bueno para na todo maga gente y para contigo mismo. (Sal. 77:13) Poreso, quierre tu hace si cosa el justo na mirada del Dios. (Mat. 6:33) Quierre tu defende con el verdad y dale mira que gendeh deverasan el maga imbusterias contra con el diaton Dios, si Jehova. Paquemodo tu se puede hace?

5. Paquemodo tu puede suporta con el verdad y pagka-recto?

⁵ Puede tu vivi na manera que dol ta habla tu: “Gendeh yo creé con el maga imbusterias de Satanas y suporta yo con el verdad. Quierre yo que si Jehova el de mio Soberano y hace yo si cosa el ta habla ele que justo.” Paquemodo tu se puede hace? Atraca con Jehova na rezo y dedica el de tuyu vida con ele y despues, manda se sabe na publico por medio de bautismo. El amor na verdad y pagka-recto puede gayot manda move con el un persona para bautiza.

6. Base na Salmo 45:4, cosa maga razon tu tiene para ama con Jesucristo?

⁶ Porque tu ta ama con Jesucristo? Nota con el cuanto bonito razon que ya menciona na Salmo 45:4. (Le.) Ta ama si Jesus con el verdad, humildad y pagka-recto. Si ta ama tu con el verdad y pagka-recto, natural lang que ta ama tambien tu con Jesucristo. Con coraje ya defende si Jesus con el verdad  y pagka-recto. (Juan 18:37) Pero, paquemodo le ya dale mira que ta ama le con el humildad?

7. Cosa tu ta gusta na humildad de Jesus?

⁷ Ya dale mira si Jesus que ta ama le con el humildad por medio na de suyu ejemplo. Gane, nuay le acepta gloria estaba con otro sino ya dale le se todo na de suyu Tata. (Mar. 10:17, 18; Juan 5:19) Cosa tu ta sinti na humildad de Jesus? Asigurao, ta manda se move contigo para ama con el Anak del Dios y sigui con ele. Porque humilde si Jesus? Cay ta ama le y ta imita con el de suyu Tata quien humilde tambien. (Sal. 18:35; Heb. 1:3) Gendeh ba quierre tu queda cerca con Jesus quien perfecto ta imita con el maga calidad de Jehova?

8. Porque kita ta ama con Jesus como el diaton Rey?

⁸ Ta ama kita con Jesus como el diaton Rey cay ele el de con todo buen Lider. Si Jehova mismo el quien yan train y ya iscuji con el de suyu Anak para rula. (Isa. 50:4, 5) Acorda tambien el sacrificio que ya hace si Jesus. (Juan 13:1) Cay si Jesus el diaton Rey, conviene le ricibi el diaton amor. Ya explica le que ta llama le con aquellos quien deverasan ta ama con ele y ta obedece con el de suyu maga mandamiento como de suyu maga amigo. (Juan 14:15; 15:14, 15) Un grande honor gayot que queda amigo del Anak de Jehova!

9. Na cosa manera semejante el bautismo del maga Cristiano na bautismo del Cristo?

⁹ Uno na maga mandamiento de Jesus para na de suyu maga siguidores amo que bautiza. (Mat. 28:19, 20) Gane, ele mismo ya hace con ese. Na cuanto manera, diferente el bautismo de Jesus na bautismo del de suyu maga siguidores. (Mira con el cajon “ Cosa el Diferencia del Bautismo de Jesus na Bautismo del De Suyu Siguidores?”) Pero, semejante tambien este na cuanto manera. Cuando ya bautiza con ele, ya dale mira si Jesus que preparao le para hace el voluntad del de suyu Tata. (Heb. 10:7) Na igual manera, si ta bautiza el maga siguidores del Cristo, ta dale sila mira na publico que ya dedica sila el diila vida con Dios Jehova. Centro ya ahora el diila vida na hacida del voluntad del Dios y gendeh na diila mismo querrer. Entonces, ta sigui sila con el ejemplo de Jesus.

10. Na cosa manera el amor para con Jesus puede motiva contigo para bautiza?

¹⁰ Ta creé tu que si Jesus el unico Anak de Jehova y alegre tu que ele el Rey con quien ya iscuji el Dios para rula kanaton. Ya puede tu mira que humilde si Jesus y perfecto le ta imita con el de suyu Tata. Ya sabe tu que ya dale le come con el maga con hambre, ya dale comforta con el maga yan luya y ya cura pa gane con el maga enfermo. (Mat. 14:14-21) Ya puede tu mira si paquemodo le ta guia con el congregacion ahora. (Mat. 23:10) Y sabe tu que manada pa le cosas que hay hace na futuro como Rey del Reino del Dios. Paquemodo tu puede dale mira que ta ama tu con ele? Sigui con el de suyu ejemplo. (Juan 14:21) Puede tu se hace si dedica tu el de tuyu vida con Jehova y bautiza.

11. Cosa el de con todo importante razon para bautiza y porque?

¹¹ Cosa el de con todo importante razon para bautiza? Ya revela si Jesus si cosa el de con todo importante mandamiento del Dios cuando ya habla le: “Ama con el Señor, el dituyo Dios con todo el dituyo corazon, con todo el dituyo alma, con todo el dituyo pensamiento y con todo el dituyo fuerza.” (Mar. 12:30) Ansina ba el de tuyu amor para con Jehova?

12. Porque tu ta ama con Jehova? (Mira tambien con el letrato.)

¹² Bien manada razon si porque kita ta ama  con Jehova. Por ejemplo, ya sabe tu que ele “el tuburan del vida” y con ele estaba “todo el regalo bueno y perfecto.” (Sal. 36:9; Sant. 1:17) El todo buen cosas que tan enjoy tu amo estaba na diaton bondadoso y amable Dios.

13. Porque un bien bonito regalo el rescate?

¹³ El rescate amo un bien bonito regalo que ya dale si Jehova kanaton. Porque se kita puede habla? Considera con el cerca relacion que tiene si Jehova y el de suyu Anak. Si Jesus ya habla: “El Tata ta ama conmigo” y “yo ta ama con el Tata.” (Juan 10:17; 14:31) Ya queda sila bien cerca con uno y otro cay yan junto sila por billones de maga año. (Prov. 8:22, 23, 30) Ahora, imagina si paquemodo de duele para con Jehova que permiti que sufri y muri el de suyu Anak. Ta ama gayot si Jehova con el maga gente​—incluido ya contigo​—poreso ya dale le el de suyu precioso Anak como un sacrificio para tene tu y el otro vida hasta para cuando. (Juan 3:16; Gal. 2:20) Amo se el de con todo importante razon si porque kita ta ama con Dios.

14. Cosa el de con todo buen goal que puede tu tene?

¹⁴ Ta queda mas grande el de tuyu amor con Jehova mientras mas ta conoce tu con ele. Asigurao, quierre tu que queda pa mas cerca con ele ahora y hasta para cuando. Y puede tu se hace. Ta anima le contigo que hace  alegre con el de suyu corazon. (Prov. 23:15, 16) Puede tu se hace gendeh lang por medio na de tuyu maga palabra sino na de tuyu tambien maga accion. Hay puede mira na de tuyu manera de vida que ta ama gayot tu con Jehova. (1 Juan 5:3) Amo se el de con todo buen goal que puede tu tene.

15. Paquemodo tu puede dale mira el de tuyu amor para con Jehova?

¹⁵ Paquemodo tu puede dale mira el de tuyu amor para con Jehova? Una, ofrece un especial rezo donde dedica tu el de tuyu vida con el solamente verdadero Dios. (Sal. 40:8) Despues, dale mira ese dedicacion na publico por medio na bautismo. Como cosa kita ya discuti enante na este articulo, un alegre y importante ocasion este na de tuyu vida. Hay principia tu un nuevo vida donde hay vivi tu gendeh para na de tuyu mismo cuerpo sino para con Jehova. (Roma 14:8; 1 Ped. 4:1, 2) Dol un bien grande decision se para hace. Deverasan se pero por causa con ese, hay puede tu tene el de con todo buen vida. Paquemodo?

16. Como cosa ta indica el Salmo 41:12, paquemodo si Jehova hay bendici con aquellos quien ya dedica el diila vida para sirvi con ele?

¹⁶ Si Jehova el de con todo bondadoso Persona. Maskin grande el cosa tu dale con ele, pirmi mas grande el cosa le debolbe contigo. (Mar. 10:29, 30) Hay dale le contigo el de con todo alegre y bonito vida que posible, maskin ahora pa lang na este mal mundo. Y principio pa lang se. Despues del de tuyu bautismo, puede tu continua sirvi con el de tuyu amable Tata hasta para cuando. Hay continua queda mas fuerte el relacion de ustedes del de tuyu Tata. Y gane igual con ele, hay vivi tu hasta para cuando.​—Le con el Salmo 41:12.

17. Cosa tu puede dale con Jehova que nuay pa le tene?

¹⁷ Si dedica tu el de tuyu vida y bautiza, tiene tu el privilegio que dale con el de tuyu Tata un cosa que bien precioso. Ya dale le contigo el alegria y todo buen cosas que tiene tu. Por causa na de tuyu apresacion, puede tu dale con el Creador del cielo y tierra un cosa que nuay pa le tene​—el de tuyu con todo corazon servicio. (Job 1:8; 41:11; Prov. 27:11) Amo se  el de con todo buen manera de vida. Claro que el de tuyu amor para con Jehova amo el de con todo buen razon para bautiza.

18. Cosa maga pregunta tu puede considera?

¹⁸ Entonces, cosa el de tuyu contestacion na pregunta, Hay bautiza ba tu? Etu lang se puede contesta. Pero, puede ayuda contigo si pregunta tu na de tuyu mismo cuerpo, ‘Porque gendeh pa yo ta bautiza?’ (Act. 8:36) Acorda con el tres cosas que ya discuti kita. Una, ta ama tu con el verdad y pagka-recto. Pregunta con el de tuyu mismo cuerpo, ‘Quierre ba yo experiencia con el tiempo cuando el todo hay habla ya el verdad y hace si cosa el justo?’ Ika-dos, ta ama tu con Jesucristo. Pregunta con el de tuyu mismo cuerpo, ‘Quierre ba yo que el Anak del Dios el queda de mio Rey y quierre ba yo que sigui con el de suyu ejemplo?’ El ika-tres y el mas importante, ta ama tu con Jehova. Pregunta con el de tuyu mismo cuerpo, ‘Quierre ba yo sirvi con Jehova como de mio Dios para hace alegre con ele?’ Si oo el de tuyu contestacion na este maga pregunta, porque gendeh pa tu bautiza? Porque pa tu espera?​—Act. 16:33.

19. Porque gendeh tu debe man alang-alang bautiza? Ilustra. (Juan 4:34)

¹⁹ Si tan alang-alang tu bautiza, considera con el un ilustracion que ya dale si Jesus. (Le con el Juan 4:34.) Nota que ya compara si Jesus na comida con el hacida del voluntad del de suyu Tata. Porque? Cay bueno para kanaton el comida. Sabe si Jesus que bueno para kanaton el todo cosa ta pidi si Jehova que hace kita. No quierre si Jehova que hace kita cosas que gendeh bueno para kanaton. Quierre ba si Jehova que bautiza tu? Si. (Act. 2:38) Poreso, puede tu confia que si bautiza tu, hay beneficia tu. Asigurao, gendeh tu man alang-alang come un sabroso comida. Entonces, porque man tu man alang-alang bautiza?

20. Cosa kita considera na sunod articulo?

²⁰ Porque pa tu espera? El manada posible contesta, “Gendeh pa yo preparao.” El decision que dedica el de tuyu vida con Jehova y bautiza amo el de con todo importante decision que hay hace tu. Poreso, necesita tu pensa enbuenamente y necesita tambien tiempo y esfuerzo para queda tu preparao. Pero si sincero tu quierre bautiza, cosa tu puede hace ahora para prepara? Hay considera kita con ese pregunta na sunod articulo.