Porque ya habla el un hombre que hay “guinda na peligro” el de suyu mismo herencia si casa le con Rut? (Rut 4:1, 6)

Na tiempo del Biblia, si el un casao hombre ya muri que nuay anak, tiene cuanto pregunta que necesita contesta: Cosa sucede na de suyu tierra? Hay perde ya ba hasta para cuando el nombre del de suyu familia? El Ley de Moises ta ayuda contesta con ese maga pregunta.

Cosa sucede con el tierra del un hombre quien ya muri o quien ya queda pobre y ya vende el de suyu tierra? El de suyu hermano o cerca pariente puede rescata o cumpra otravez con ese tierra. Como resulta, hay esta se na diila familia.​—Lev. 25:23-28; Num. 27:8-11.

Paquemodo puede preserva el nombre del familia del quien ya muri? El un hombre hay casa con el mujer del de suyu hermano quien ya muri para puede tene un anak quien hay lleva con el nombre del quien ya muri y hay hereda este con el de suyu propiedad. Hay asigura tambien este que hay dale el necesidad del mujer del quien ya muri.​—Deut. 25:5-7; Mat. 22:23-28.

Considera con el situacion de Noemi. Casao le con el un hombre que si Elimelec. Cuando ya muri este y el diila dos anak hombre, nuay mas hombre na familia quien puede cuida con Noemi. (Rut 1:1-5) Cuando ya bira sila na Juda, ya habla si Noemi con el de suyu yerna que si Rut que pidi con Boaz que rescata con el diila tierra. Si Boaz un cerca pariente de Elimelec. (Rut 2:1, 19, 20; 3:1-4) Pero, ya puede le realiza que tiene pa un pariente que mas cerca familia de Elimelec y mas tiene este derecho para queda como un rescatador.​—Rut 3:9, 12, 13.

Del primero, conforme ayuda este cerca pariente. (Rut 4:1-4) Maskin pa gasta le, sabe le que gendeh mas puede tene anak si Noemi quien hay hereda con el tierra de Elimelec. Como resulta, el tierra hay queda siempre parte del de suyu herencia poreso conforme le gasta.

Pero, ya cambia el de suyu pensamiento cuando ya sabe le que con Rut le casa. Ele ya habla: “Gendeh yo quel puede rescata cay baka guinda na peligro el de mio mismo herencia.” (Rut 4:5, 6) Porque le ya cambia de suyu pensamiento?

Si casa el un persona con Rut y hay tene le un anak hombre, ese anak hay hereda con el tierra de Elimelec. Paquemodo “guinda” na peligro el de suyu “herencia”? Nuay habla el Biblia pero este el cuanto posibilidad.

• Una, dol man sayang lang el de suyu sen cay na uliji, gendeh man guinda con ele el tierra de Elimelec. Hay guinda este na anak hombre de Rut.

• Ika-dos, tiene le responsibilidad que cuida con Noemi y Rut.

• Ika-tres, si hay tene pa sila maga anak de Rut, este maga anak tiene parte na de suyu herencia y hay queda diutay el herencia del de suyu otro maga anak.

• Ika-cuatro, si nuay le otro anak, el anak hombre que hay pari si Rut hay hereda con el de suyu tierra y de Elimelec. Poreso si muri le, el tierra hay guinda na anak quien ta lleva con el nombre de Elimelec. No quierre el cerca pariente que guinda na peligro el de suyu herencia poreso nuay le ayuda con Noemi. Ya dale le el derecho na sunod rescatador que si Boaz para hace con ese. Y ya hace se si Boaz cay quierre le que “el nombre del quien ya muri hay bira na de suyu herencia.”​—Rut 4:10.

Poreso, ta sale que mas interesao este cerca pariente na de suyu mismo nombre y herencia. Canalla le clase de persona. Pero en vez de preserva el de suyu nombre, nuay ni uno ahora el sabe si cosa el de suyu nombre. Nuay tambien le puede ricibi con el especial privilegio que ya tiene si Boaz​—que queda uno del maga tatarabuelo del Mesias, si Jesucristo. Gendeh gayot bueno el resulta na este cerca pariente cay canalla le y gendeh conforme ayuda con otro!​—Mat. 1:5; Luc. 3:23, 32.