1-2. Si gendeh pa tu preparao para na bautismo, porque tu gendeh debe man luya? (Mira con el letrato na cover.)

 SI QUIERRE tu bautiza, un bonito goal gayot se. Preparao ya ba tu que hace con ese? Si ta pensa tu que preparao ya tu y uyun el maga anciano, no man alang-alang que hace con ese na sunod asemblea. Hay tene gayot tu un alegre vida na servicio con Jehova.

² Pero paquemodo si habla contigo que necesita pa tu progresa antes tu puede bautiza o posible etu mismo ya puede realiza con ese? No man luya. Puede siempre tu alcanza con ese goal, joven man tu o de edad.

3. Cosa ya pregunta el un oficial de Etiopia con Felipe y cosa pregunta kita hay considera? (Maga Actividad 8:36, 38)

³ Le con el Maga Actividad 8:36, 38. El un oficial na palacio de Etiopia ya pregunta con el un evangelizador que si Felipe: “Tiene ba cosa ta sangga conmigo para recivi el bautismo?” Este gente quierre bautiza pero preparao ya ba gayot le para con ese?

4. Paquemodo ya dale mira el oficial que quierre le aprende mas?

⁴ El oficial “ya anda na Jerusalem para adora con el Dios.” (Act. 8:27) Entonces, posible un proselita le quien ya acepta con el religion del maga Judio. Asigurao, ya aprende le acerca con Jehova na Hebreo Escritura. Maskin pa ansina, quierre le aprende pa mas. Gane, cuando yan encuentro si Felipe con este oficial na camino, cosa ya mira si Felipe? Ta le este oficial con el rollo de profeta Isaias. (Act. 8:28) Maga hondo verdad quel. Gendeh le conforme que aprende lang con el cuanto verdad sino quierre pa le aprende mas.

5. Cosa ya hace el oficial na cosa le ya aprende?

 ⁵ Este persona amo un alto oficial quien ta sirvi con Reina Candace de Etiopia y “ele el encargao de todo el maga riqueza del reina.” (Act. 8:27) Poreso, asigurao que ocupao le y manada responsibilidad. Maskin pa ansina, ya dale le tiempo para adora con Jehova. Gendeh le contento que aprende lang con el verdad sino ya actua le base na cosa le ya aprende. Poreso, ya viaja le estaba na Etiopia para na Jerusalem para adora con Jehova na templo. Asigurao que ya gasta le grande tiempo y sen para hace con aquel viaje pero conforme se hace el oficial para puede adora con Jehova.

6-7. Paquemodo ya queda mas hondo el amor del oficial para con Jehova?

⁶ El oficial ya aprende con Felipe cuanto maga nuevo y importante verdad, incluido ya si quien el Mesias. (Act. 8:34, 35) Asigurao que alegre gayot este oficial cuando ya sabe le si cosa ya hace si Jesus para con ele. Cosa le ya hace? Puede lang era le esta como un Judio proselita. Pero, ya queda mas hondo el de suyu amor para con Jehova y Jesus. Poreso, ya manda este move con ele para hace el decision que bautiza como siguidores de Jesucristo. Ya mira si Felipe que preparao ya este oficial poreso ya bautiza le con este.

⁷ Si sigui tu con el ejemplo de este oficial, puede tu queda preparao para na bautismo. Con confianza tambien tu puede habla, “Tiene ba cosa ta sangga conmigo para recivi el bautismo?” Considera kita si paquemodo tu puede hace con el cosa le ya hace: Ya continua le aprende, ya actua le base na cosa le ya aprende y ya continua queda hondo el de suyu amor para con Dios.

8. Asegun na Juan 17:3, cosa tu debe hace?

⁸ Le con el Juan 17:3. Ya ayuda ba contigo este maga palabra de Jesus para decidi que estudia con el Biblia? Deverasan se para con el manada kanaton. Pero ta anima ba tambien este kanaton que continua aprende? Si. Gane, gendeh kita descanza “conoce . . . [con] el unico y deverasan Dios.” (Ecl. 3:11) Hay continua kita aprende acerca con ele hasta para cuando. Si mas manada kita cosa ta aprende, mas queda kita cerca con Jehova.​—Sal. 73:28.

9. Cosa kita necesita hace despues aprende con el maga simple verdad na Biblia?

⁹ Cuando ya principia kita aprende acerca con Jehova, ya aprende kita con el maga simple enseñanza del Biblia. Na de suyu carta para na maga Hebreo, ya refiri si apostol Pablo con ese maga enseñanza como “el primero maga leccion.” Gendeh le ta hace de menos  con ese maga enseñanza; ya compara le con ese na leche que ta dale sustancia con el baby. (Heb. 5:12; 6:1) Pero, ya anima tambien le con el todo Cristiano que no queda contento na maga simple enseñanza sino aprende maga hondo verdad na Palabra del Dios. Tiene ba tu el deseo que aprende acerca na maga hondo enseñanza na Biblia? Quierre ba tu aprende mas acerca con Jehova y de suyu maga proposito?

10. Porque tan dificil el cuanto que estudia?

¹⁰ Pero para con el manada kanaton, gendeh facil que estudia. Ansina ba tambien tu ta sinti? Na escuela, ya aprende ba tu si paquemodo le y estudia enbuenamente? Tan enjoy ba tu estudia y ta sinti que tiene este beneficio? O ya acepta ya tu que gendeh gayot tu bueno na estudiada? Si ansina, gendeh tu solo. Pero, puede contigo ayuda si Jehova. Perfecto le y ele el de con todo buen Maestro.

11. Paquemodo ya dale mira si Jehova que ele el “Grande Instructor”?

¹¹ Si Jehova ya llama con el de suyu mismo cuerpo como el “de tuyu Grande Instructor.” (Isa. 30:20, 21) Paciencioso le, bueno y tiene consideracion. Ta mira le si cosa el bueno kanaton. (Sal. 130:3) Y gendeh le ta expecta mas na cosa kita puede hace. Acorda que ele el quien ya diseña con el diaton utuk y un bonito regalo este. (Sal. 139:14) Normal para kanaton que quierre aprende. El diaton Creador quierre que continua kita aprende hasta para cuando y man enjoy kita mientras ta hace con ese. Poreso bueno que ahora pa lang, “busca [kita] con ansias” con el maga verdad na Biblia. (1 Ped. 2:2) Hace maga goal que puede tu alcanza y sigui con el de tuyu schedule de lehida y estudiada de Biblia. (Jos. 1:8) Na ayuda de Jehova, puede tu mas man enjoy le y aprende acerca con ele.

12. Porque kita debe estudia acerca na vida y ministerio de Jesus?

¹² Regular dale tiempo para medita acerca na vida y ministerio de Jesus. Para puede kita sirvi con Jehova, bien importante que sigui kita con el ejemplo de Jesus, especialmente na este dificil tiempo. (1 Ped. 2:21) Franca ya habla si Jesus que hay experiencia dificultad el de suyu maga siguidores. (Luc. 14:27, 28) Pero, asigurao le que el de suyu maga deverasan siguidores hay puede esta fiel con Dios igual con ele. (Juan 16:33) Estudia con el maga detalle acerca na vida de Jesus y hace goal que imita con ele cada dia.

13. Cosa tu debe continua pidi con Jehova y porque?

¹³ Gendeh bastante que tene lang tu saber. El razon si porque tu necesita con este amo para puede tu aprende mas acerca con Jehova y cultiva maga calidad igual na amor y fe. (1 Cor. 8:1-3) Mientras ta continua tu aprende, continua pidi con Jehova que ayuda contigo para tene tu mas fuerte fe. (Luc. 17:5) Hay contesta gayot le con el maga rezo igual ansina. El deverasan fe que base na exacto saber acerca con el diaton Dios hay puede ayuda contigo para progresa pa mas.​—Sant. 2:26.

14. Paquemodo ya hace claro si apostol Pedro que importante que actua kita base na cosa kita ya aprende? (Mira tambien con el letrato.)

¹⁴ Ya hace claro si apostol Pedro si paquemodo de importante para na maga siguidores del Cristo que actua base na cosa sila ya aprende. Ya menciona le con el istoria de Noe na Biblia. Ya habla si Jehova con Noe que por medio na un avenida, hay destroza Le con el maga mal gente na aquel tiempo. Para salva, gendeh bastante que sabe lang kanda Noe y el de suyu familia que tiene avenida sucede.  Nota que cuando ya discuti si Pedro acerca con el tiempo antes el Avenida, ya menciona le que “si Noe ta hace pa el barco.” (1 Ped. 3:20) Si Noe y el de suyu familia ya actua base na cosa sila ya sabe con Dios; ya construi sila un bien grande arca. (Heb. 11:7) Ya compara tambien si Pedro con el cosa ya hace si Noe na bautismo cuando ya escribi le: “Ese . . . amo un simbolo del bautismo que ta salva con ustedes ahora.” (1 Ped. 3:21) Entonces, puede kita habla que el cosa tu ta hace ahora para prepara na bautismo ta semeja na trabajo que ya hace si Noe y el de suyu familia por cuanto año para construi con el arca. Cosa tu necesita hace ahora para queda preparao na bautismo?

15. Cosa kita necesita hace si deverasan kita ta arripinti?

¹⁵ El uno na maga primer cosas que debe kita hace amo sincero arripinti na diaton maga pecado. (Act. 2:37, 38) Si deverasan kita ta arripinti, deverasan kita ta hace maga cambio. Ya puede ya ba tu quita con el maga practica que no quierre si Jehova igual na imoral vida, usada de tabaco y usada de maga mal palabra? (1 Cor. 6:9, 10; 2 Cor. 7:1; Ef. 4:29) Si nuay pa, continua pricura hace maga cambio. Man cuento con el quien tan Bible study contigo o pidi guia y ayuda con el maga anciano na congregacion. Si joven tu y ta queda junto con el de tuyu mayores, continua pidi ayuda kanila si paquemodo quita con el maga gendeh buen practica que posible ta sangga contigo para bautiza.

16. Cosa kita necesita hace para tene un buen espiritual rutina?

¹⁶ Importante tambien que tiene kita un buen espiritual rutina. Incluido aqui que atende y participa na maga miting. (Heb. 10:24, 25) Y si ya queda ya tu cualificao para participa na ministerio, hace tambien con ese como parte del de tuyu rutina. Si mas ta predica tu, mas man enjoy tambien tu con ese. (2 Tim. 4:5) Si joven tu, pregunta con el de tuyu mismo cuerpo: ‘Necesita pa ba conmigo hace acorda el de mio mayores que atende na miting o participa na ministerio? O iyo ya mismo el ta hace con ese?’ Si ta hace tu se maskin gendeh ya contigo ta habla, ta dale tu mira que tiene tu fe, amor y apresacion con Dios Jehova. Este amo “maga trabajo de  devocion con Dios” y maga regalo que ta dale tu con Dios Jehova. (2 Ped. 3:11, NWT; Heb. 13:15) Alegre el diaton Dios si con todo corazon kita con ele ta dale regalo y gendeh cay ya forza lang kanaton. (Compara na 2 Corinto 9:7.) Ta hace kita con ese cay alegre kita dale con Jehova el diaton de con todo bueno.

17-18. Cosa importante calidad el puede ayuda contigo para progresa na bautismo y porque? (Proverbio 3:3-6)

¹⁷ Mientras ta continua tu progresa para na bautismo, hay enfrenta tu maga dificultad. El cuanto maga gente posible gangguia contigo na cosa tu ta creé; baka man contra o persigui pa gane sila contigo. (2 Tim. 3:12) Mientras ta pricura tu quita con el un gendeh buen practica, posible falla tu na cuanto ocasion. O baka ta perde el de tuyu paciencia y tan luya cay gendeh tu ta puede alcanza con el de tuyu goal. Cosa puede ayuda contigo para aguanta? El un bien importante calidad​—el amor con Jehova.

¹⁸ Un bien bonito calidad gayot el de tuyu amor para con Jehova. (Le con el Proverbio 3:3-6.) El de tuyu hondo amor para con Dios puede ayuda contigo para enfrenta con el maga dificultad. El Biblia manada beses ta menciona acerca na amor leal de Jehova para na de suyu maga siervo. Por causa na este calidad, nunca le abandona con el de suyu maga siervo o descanza ama kanila. (Sal. 100:5) Ya hace contigo na imagen del Dios. (Gen. 1:26) Paquemodo tu puede imita con ese clase de amor?

19. Cosa tu hace para queda mas hondo el de tuyu apresacion na todo cosa ya hace si Jehova para contigo? (Galacia 2:20)

¹⁹ Dale mira apresacion. (1 Tes. 5:18) Cada dia, pregunta con el de tuyu mismo cuerpo, ‘Paquemodo si Jehova ya dale mira el de suyu amor conmigo?’ Despues, rindi gracias con Jehova na de tuyu maga rezo y menciona maga especifico cosas que ya hace le para contigo. Queda convincido que el maga buen cosas que ta hace si Jehova amo personal regalo de suyu para contigo, igual como cosa ya realiza si apostol Pablo. (Le con el Galacia 2:20.) Pregunta na de tuyu mismo cuerpo, ‘Quierre ba tambien yo dale mira el de mio amor con ele?’ El de tuyu amor para con Jehova hay ayuda contigo para continua resisti maga tentacion y aguanta maskin pa na maga dificultad. Hay motiva tambien este contigo que mentena con el de tuyu espiritual rutina  y dale mira el de tuyu amor con el de tuyu Tata cada dia.

20. Cosa tu debe hace si quierre tu dedica el de tuyu vida con Jehova y paquemodo de importante ese decision?

²⁰ Llega el tiempo, el de tuyu amor para con Jehova hay motiva contigo para ofrece con ele un especial rezo. Hay dedica tu el de tuyu mismo cuerpo con Dios. Si dedicao ya tu con Jehova, tiene tu este bien bonito esperanza: Puede tu queda de suyu siervo hasta para cuando. El de tuyu dedicacion ta dale mira que ya promete tu que sirvi con Jehova, enbuenamente man el situacion o gendeh. Una vez lang tu hace con este promesa. Deverasan, si ta dedica kita el diaton vida con Jehova, ta hace kita un serioso decision. Pero considera con este: Hay hace tu manada decision na de tuyu vida y el cuanto de ese maga buen decision. Pero, el de tuyu dedicacion el de con todo buen decision que puede tu hace. (Sal. 50:14) Si Satanas hay pricura hace perde el de tuyu amor para con el de tuyu Tata para gendeh mas tu puede esta fiel con Ele. No gayot permiti que sucede se! (Job 27:5) El de tuyu grande amor para con Jehova hay ayuda contigo para cumpli con el de tuyu dedicacion y queda pa mas cerca con el de tuyu Tata na cielo.

21. Porque kita puede habla que principio pa lang el bautismo?

²¹ Si ya dedica ya tu el de tuyu vida con Jehova, man cuento con el maga anciano na de ustedes congregacion acerca na bautismo. Pero, pirmi acorda que principio pa lang el bautismo. Alli principia el de tuyu hasta para cuando servicio con Jehova. Poreso, hace mas fuerte con el de tuyu amor para con el de tuyu Tata ahora. Hace maga goal para queda mas fuerte el de tuyu amor cada dia. Si hace tu se, hay motiva este contigo para bautiza. Un especial dia gayot se. Pero principio pa lang se. Ojala hay continua queda fuerte el de tuyu amor para con Jehova y con el de suyu Anak!