1. Cosa quierre el maga mayores para na diila maga anak?

 MAGA mayores, sabe kame que quierre ustedes ayuda con el de ustedes maga anak que conoce y ama con Jehova. Pero gendeh kita ta puede mira con Dios. Paquemodo ustedes puede ayuda con el de ustedes maga anak para mira con ele como un deverasan Persona y queda cerca con ele?​—Sant. 4:8.

2. Paquemodo el maga mayores puede enseña con el diila anak acerca na maga calidad de Jehova?

² El un importante manera que puede ustedes ayuda con el de ustedes maga anak para queda cerca con Jehova amo si estudia ustedes el Biblia junto kanila. (2 Tim. 3:14-17) Pero, el Biblia ta dale tambien mira otro manera que puede el maga jovenes aprende acerca con Jehova. Na libro de Proverbio, el un tata ya habla con el de suyu anak que no ulvida con el maga calidad de Jehova que puede mira na maga creacion. (Prov. 3:19-21) Hay considera kita si paquemodo el maga mayores puede usa con el maga creacion para ayuda con el diila anak aprende acerca na personalidad de Jehova.

3. Na cosa manera debe ayuda el maga mayores con el diila maga anak?

³ El Biblia ta habla que el “maga invisible calidad [del Dios] claro puede mira desde el creacion del mundo, cay este . . . puede mira na maga cosas que ya hace le.” (Roma 1:20, NWT) Maga mayores, asigurao tan enjoy ustedes man junto apuera con el de ustedes maga anak. Usa con ese tiempo para ayuda kanila mira el coneccion entre na “maga cosas que ya hace” si Jehova y na de suyu maga bonito calidad. Considera kita si cosa puede aprende el maga mayores na manera que ya enseña si Jesus.

4. Paquemodo si Jesus ya usa con el maga creacion para enseña con el de suyu maga dicipulo? (Lucas 12:24, 27-30)

 ⁴ Nota si paquemodo si Jesus ya usa con el maga creacion para enseña. Un dia, ya manda le con el de suyu maga dicipulo que observa con el maga uwak y maga flores que ta llama lily. (Le con el Lucas 12:24, 27-30.) Puede era si Jesus menciona maskin cosa animal o siembra pero ya iscuji le un pajaro y flores que familiar el de suyu maga dicipulo. Posible, ta puede sila mira con el maga uwak que ta bula y con el maga flores que ta florea. Puede tambien kita imagina que ta insiña si Jesus con este maga cosas mientras ta converza le. Cosa le ya hace despues le menciona con este maga ejemplo? Ya enseña le con el de suyu maga dicipulo un importante leccion acerca na pagka-bondadoso y pagka-bueno del diila Tata na cielo: Si Jehova hay dale comida y ropa con el de suyu maga fiel siervo igual si paquemodo ta cuida le con el maga uwak y maga flores.

5. Cosa maga ejemplo na creacion el puede usa el maga mayores para enseña con el diila anak acerca con Jehova?

⁵ Maga mayores, hay imita ba ustedes con el manera de enseñada de Jesus? Puede ustedes menciona na de ustedes maga anak un creacion que ta aprecia gayot ustedes, igual na de ustedes favorito animal o siembra. Asigura que explica kanila si cosa se creacion ta enseña acerca con Jehova. Despues, puede tambien ustedes pregunta acerca na diila favorito animal o siembra. Si usa ustedes un creacion que quierre-quierre sila, posible mas pone sila atencion si ta enseña ustedes acerca na maga calidad de Jehova.

6. Cosa kita puede aprende na ejemplo del nana de Christopher?

⁶ Necesita ba el maga mayores usa grande tiempo para man research acerca na un particular animal o siembra antes discuti si cosa se ta enseña acerca con Jehova? Gendeh. Nuay si Jesus dale un largo explanacion acerca si paquemodo ta come el maga uwak o paquemodo ta crici el maga lily. Maskin quierre el de ustedes maga anak aprende maga detalle acerca na creacion, tiene vez bastante ya el un simple comento o pregunta para ayuda kanila entende con el punto. Nota si cosa ya acorda el un hermano que si Christopher acerca cuando bata le: “Pirmi tiene cosa ta menciona el de mio nana para ayuda kanamon que aprecia con el maga creacion alrededor. Por ejemplo, si cerca kame na maga monte, ta habla le: ‘Mira ustedes con el maga bien alto y bonito monte! Gendeh ba maka-bilib gayot si Jehova?’ O si cerca kame na mar, ta habla le: ‘Mira ustedes con el maga bien grande marijada! Gendeh ba bien poderoso gayot el Dios?’” Si Christopher ya habla: “Aquel maga simple comento ya puede gayot kanamon manda pensa.”

7. Paquemodo ustedes puede man train con el de ustedes anak para medita acerca na creacion?

⁷ Mientras ta engranda el de ustedes maga anak, puede ustedes man train kanila para principia medita acerca na creacion y aprende acerca con Jehova. Puede ustedes menciona un creacion del Dios y pregunta kanila, “Cosa este ta enseña contigo acerca con Jehova?” Baka espanta ustedes na cosa sila hay contesta.​—Mat. 21:16.

8. Cosa oportunidad tiene el maga Israelita mayores si ta camina sila “na camino”?

⁸ Ya manda con el maga Israelita mayores que enseña con el diila maga anak el maga mandamiento de Jehova si ta camina sila “na camino.” (Deut. 11:19) Na maga camino na Israel, puede mira manada clase de maga animal, pajaro y flores. Mientras ta camina el maga familia na camino, puede el maga mayores man cuento na  diila maga anak acerca na maga creacion de Jehova. Tiene tambien semejante oportunidad el maga mayores ahora para enseña con el diila maga anak usando el maga creacion. Considera si paquemodo se ya hace el cuanto maga mayores.

9. Cosa tu ya aprende con Punitha y Katya?

⁹ El un nana que si Punitha, quien ta queda na un grande ciudad na India, ya habla: “Si ta visita kame con el diamon maga pariente na barrio, ta considera kame con ese como un oportunidad para ayuda con el diamon maga anak aprende acerca na maga bonito creacion de Jehova. Ta mira yo, mas ta puede sila aprecia con el maga creacion si lejos sila na ciudad.” Maga mayores, posible gendeh gayot ulvida el de ustedes maga anak el tiempo que tan junto ustedes kanila na maga bonito lugar. Si Katya, un hermana de Moldova, ya habla: “Ta acorda gayot yo con el tiempo cuando bata yo que junto kame del de mio mayores na un lugar que lejos na pueblo. Ta rindi yo gracias cay ya enseña sila conmigo desde bata para observa con el maga cosas que ya hace si Jehova y conoce con ele por medio con ese.”

10. Cosa puede hace el maga mayores si gendeh sila puede man viaje para na un lugar que lejos na ciudad? (Mira con el cajon “ Ayuda Para na Maga Mayores.”)

¹⁰ Paquemodo si gendeh posible para con ustedes que man viaje para na un lugar que lejos na ciudad? Si Amol, quien ta queda tambien na India, ya habla: “Na lugar onde yo ta queda, necesita trabaja el maga mayores por manada hora y caro si man viaje para na un lugar que lejos na ciudad. Pero, puede siempre observa con el maga creacion y man cuento acerca na maga calidad de Jehova na maga diutay park o rooftop.” Si vicia lang ustedes enbuenamente, puede tambien ustedes incuntra manada creacion que cerca na de ustedes casa que puede ustedes dale mira na de ustedes anak. (Sal. 104:24) Baka incuntra ustedes maga pajaro,  insecto, siembra y otro pa. Si Karina, de Germany, ya habla: “Quierre-quierre el de mio nana maga flores poreso cuando bata yo, ta dale le conmigo mira maga bonito flores si ta camina kame.” Maga mayores, puede tambien ustedes usa con el manada maga video y publicacion acerca na creacion que ya produci el diaton organizacion. Si, maskin onde ustedes ta queda, puede ustedes enseña con el de ustedes maga anak que observa con el maga cosas que ya hace el Dios. Ahora, considera kita con el cuanto maga calidad de Jehova que puede ustedes enseña kanila.

11. Paquemodo el maga mayores puede ayuda con el diila maga anak para entende con el amor de Jehova?

¹¹ Para ayuda con el de ustedes anak entende con el amor de Jehova, puede ustedes menciona si paquemodo el manada animal ta cuida con el maga anak de este. (Mat. 23:37) Puede tambien ustedes menciona el clase-clase de maga creacion que tan enjoy kita. Si Karina que ya menciona enante ya habla: “Si ta camina kame junto del de mio nana, ta manda le conmigo mira si paquemodo de diferente el cada flores y si paquemodo el pagka-bonito de este ta dale mira el amor de Jehova. Despues del manada año, ta observa siempre yo con el maga flores y ta nota si paquemodo de diferente el diila maga color y diseño. Ta manda se acorda conmigo que ta ama gayot kanaton si Jehova.”

12. Paquemodo el maga mayores puede ayuda con el diila anak para aprecia con el sabeduria del Dios? (Salmo 139:14) (Mira tambien con el letrato.)

¹² Ayuda con el de ustedes maga anak para mira el sabeduria del Dios. Mas sabio gayot si Jehova si compara kanaton. (Roma 11:33) Por ejemplo, puede ustedes menciona si paquemodo el agua ta subi na cielo y ta forma maga celaje, y si paquemodo se pronto lang ta puede move na cielo. (Job 38:36, 37) Puede tambien ustedes menciona con el bien bonito diseño del cuerpo del gente. (Le con el Salmo 139:14.) Considera si paquemodo el un tata que si Vladimir ya hace con ese. Ya habla le: “Un dia, ya tumba el diamon anak na bike y ya iri le. Despues del cuanto dia, ya queda bueno el irida. Ya explica kame del de mio mujer que ya crea si Jehova con el diaton cuerpo que tiene el abilidad para queda bueno solo-solo. Ya dale kame mira que nuay ansina abilidad el cosas que ta crea el maga gente, igual na coche. Despues del  un accidente, necesita pa gente para compone con este. Este experiencia ya ayuda con el diamon anak para aprecia con el sabeduria de Jehova.”

13. Paquemodo el maga mayores puede ayuda con el diila anak para aprecia con el poder del Dios? (Isaias 40:26)

¹³ Ta invita kanaton si Jehova que man tanga na cielo y pensa acerca na de suyu poder que ya hace posible para puede esta el maga estrellas na diila lugar. (Le con el Isaias 40:26.) Puede ustedes anima con el de ustedes anak que mira na cielo y medita. Nota si cosa ya acorda si Tingting, un hermana de Taiwan, acerca cuando bata le: “Un dia, ya lleva conmigo si Mamang man camping y ya puede kame mira manada estrellas na cielo cay lejos kame na ciudad. Aquel tiempo, malingasa yo por causa na pressure del de mio maga classmate y no sabe yo si puede ba yo esta fiel con Jehova. Ya manda conmigo si Mamang pensa acerca na poder que ya usa si Jehova para crea con aquel todo estrellas y acorda que puede tambien Le usa con ese mismo poder para ayuda conmigo na maskin cosa probanza. Despues observa con el maga creacion, ya manda quel move conmigo que conoce pa mas con Jehova y ya queda yo mas determinao que sirvi con ele.”

14. Paquemodo el maga mayores puede usa con el creacion para ayuda con el diila anak mira que un alegre Dios si Jehova?

¹⁴ El maga creacion de Jehova ta dale mira que un alegre Dios le y quierre le que queda tambien kita alegre. Ya puede observa el maga cientista que ta juga el mayoria del maga animal, incluido el maga pajaro y pescao. (Job 40:20) Ya puede ba re el de ustedes anak mientras ta mira con el un perro que ta hace apas bola o con el maga gato que tan jugajan? Si tan enjoy el de ustedes maga anak mira con el maga animal que ta juga, puede ustedes hace acorda kanila que el Dios con quien kita ta sirvi un alegre Dios.​—1 Tim. 1:11, NWT.

15. Cosa puede ayuda con el maga mayores para sabe si cosa ta pensa el diila anak? (Proverbio 20:5) (Mira tambien con el letrato.)

¹⁵ Tiene vez, no sabe el mayores si cosa hace para man cuento el diila anak acerca na maga problema que ta enfrenta le. Si ansina el de  tuyu situacion, posible necesita tu busca manera para sabe si cosa el na pensamiento del de tuyu anak. (Le con el Proverbio 20:5.) Para na cuanto mayores, mas facil se hace si apuera sila junto con el diila maga anak. Porque? Un razon amo que ta puede sila mas man cuento enbuenamente cay nuay tanto cosa ta destorba kanila y con el diila maga anak. El un tata na Taiwan que si Masahiko ya menciona tambien otro razon: “Si tan junto kame con el diamon maga anak​—man hiking na monte o camina na aplaya​—mas ta sinti sila relax. Poreso, mas facil kanila manda man cuento y sabe si cosa sila ta pensa.” Si Katya que ya menciona enante ya habla: “Despues del clase, ta lleva conmigo si Mamang para na un bonito parque. Cay relax yo, mas facil para conmigo que habla con ele si cosa ya sucede na escuela o si cosa yo tan lingasa.”

16. Paquemodo el maga familia puede man relax y man enjoy mientras ta observa con el creacion de Jehova?

¹⁶ Si observa el maga familia con el creacion de Jehova, puede se ayuda kanila para man relax, man enjoy y queda tambien cerca el diila relacion con uno y otro. El Biblia ta habla que tiene “tiempo para re” y “tiempo para brinca.” (Ecl. 3:1, 4, ftn.) Por medio na de suyu creacion, ya dale si Jehova kanaton maga bonito lugar onde puede kita hace el maga cosas que tan enjoy kita. Manada familia el quierre man junto-junto y anda na maga monte, aplaya o busay. El cuanto maga bata quierre-quierre corre y juga na parque, observa con el maga animal o nada na rio o mar. Entonces, manada kita oportunidad para man enjoy con el maga cosas que ya crea si Jehova!

17. Porque el maga mayores debe ayuda con el diila anak para aprecia con el maga creacion del Dios?

¹⁷ Na nuevo mundo del Dios, el maga familia hay puede ya man enjoy con el maga creacion de Jehova na manera que gendeh kita ta puede hace ahora. Gendeh mas kita tene miedo na maga animal y gendeh mas sila tene miedo kanaton. (Isa. 11:6-9) Gendeh mas limitao el diaton tiempo para man enjoy con el maga cosas que ya hace si Jehova. (Sal. 22:26) Pero maga mayores, no espera que llega pa ese tiempo antes ustedes ayuda con el de ustedes maga anak que aprecia con el maga creacion. Si usa ustedes con el maga creacion para enseña kanila acerca con Jehova, asigurao hay man uyun sila con el cosa ya habla si Rey David: “O Jehova, nuay onde puede compara el de tuyu maga trabajo.”​—Sal. 86:8.