1-2. Paquemodo el diaton vida ta queda mas enbuenamente despues del bautismo?

 ALEGRE kita cay bautizao ya kita y parte ya del familia de Jehova. Asigurao que man uyun kita con el cosa ya habla el salmista que si David: “Alegre el persona con quien tu ya iscuji y ya hace cerca contigo para esta na de tuyu maga patio.”—Sal. 65:4.

² Gendeh ta lleva si Jehova maskin con quien lang na de suyu maga patio. Como cosa ya discuti del ya pasa articulo, ta iscuji le queda cerca con aquellos quien ya dale mira que quierre gayot sila tene cerca relacion con ele. (Sant. 4:8) Si ya dedica tu de tuyu vida con Jehova y ya bautiza, ta queda tu cerca con ele na especial manera. Puede tu asigura que hay “vacia [le contigo] el bendicion hasta nuay mas cosa falta.”—Mal. 3:10; Jer. 17:7, 8.

3. Cosa serioso responsibilidad tiene el maga dedicao y bautizao Cristiano? (Eclesiastes 5:4, 5)

³ Pero siempre, principio pa lang el bautismo. Despues de ese, asigurao que hay tene tu el deseo que hace el todo para puede cumpli con el de tuyu promesa maskin enfrenta tu maga tentacion o probanza. (Le con el Eclesiastes 5:4, 5.) Como un dicipulo de Jesus, necesita tu sigui enbuenamente con el de suyu ejemplo y obedece con el de suyu maga mandamiento. (Mat. 28:19, 20; 1 Ped. 2:21) Este articulo puede ayuda contigo para hace se.

 “CONTINUA SIGUI” CON JESUS MASKIN TIENE PROBANZA Y TENTACION

4. Na cosa manera el maga dicipulo de Jesus ta carga un “estaca de sufrimiento”? (Lucas 9:23)

⁴ No pensa que despues del bautismo, gendeh mas tu enfrenta maga problema. Gane, ya hace claro si Jesus que el de suyu maga dicipulo hay carga un “estaca de sufrimiento.” Y necesita sila se hace “cada dia.” (Le con el Lucas 9:23, NWT.) Quierre decir ba ta habla si Jesus que el de suyu maga siguidores pirmi ya lang sufri? Gendeh. Ta hace lang le claro que puera con el maga bendicion que hay ricibi sila, hay enfrenta tambien sila maga probanza. El cuanto de ese posible bien dificil para enfrenta.—2 Tim. 3:12.

5. Cosa maga bendicion ya promete si Jesus que hay ricibi aquellos quien ta hace maga sacrificio?

⁵ Posible ya enfrenta ya tu oposicion estaba na de tuyu maga familia o tiene tu cosa ya sacrificia na material para hace una con el Reino del Dios. (Mat. 6:33) Si ansina, puede tu asigura que si Jehova ta nota con el maga sacrificio que ya hace tu. (Heb. 6:10) Posible ya experiencia tu que deverasan gayot el cosa ya habla si Jesus: “Todo aquellos quien ya deja el diila casa, o maga hermano, o hermana, o tata, o nana, o maga anak, o maga tierra por causa dimio y del Evangelio, ay recivi sila otra vez con esos cien veces mas pa cuando na este mundo—maga casa, maga hermano y hermana, maga nana, maga anak, y maga tierra, junto tamen con el maga persecusion—y na mundo que ay vene ay recivi sila Vida Eterno.” (Mar. 10:29, 30) Mas manada el maga bendicion que ya ricibi tu compara na maga sacrificio que ya hace tu.—Sal. 37:4.

6. Porque tu necesita continua resisti con el “deseo del cuerpo” despues del bautismo?

⁶ Necesita siempre tu resisti con “el maga mal deseo de cuerpo” despues del de tuyu bautismo. (1 Juan 2:16) Por causa se cay un imperfecto descendiente tu de Adan. Tiene vez, posible tu sinti igual na cosa ya sinti si apostol Pablo. Ele ya escribi: “Adentro conmigo ta ama gayot yo con el Ley del Dios, pero ta puede experiencia otro ley na mi cuerpo que ta pelea contra con el ley del dimio pensamiento. Y este amo el ta manda comigo queda un muchacho del ley del pecado que taqui adentro na mi cuerpo.” (Roma 7:22, 23) Baka tan luya tu cay tiene tu maga gendeh justo deseo. Pero si pensa tu con el promesa que ya hace tu cuando ya dedica tu de tuyu vida con Jehova, puede este hace fuerte con el de tuyu determinacion para resisti con el tentacion. El deverasan, el promesa que ya hace tu na de tuyu dedicacion hay ayuda contigo si enfrenta tu maga tentacion. Paquemodo?

7. Paquemodo el de tuyu dedicacion con Jehova ayuda contigo para esta fiel con ele?

⁷ Cuando ya dedica tu de tuyu vida con Jehova, ya desconoce tu con el de tuyu mismo cuerpo. Quierre decir, ya iscuji tu gendeh hace una con el de tuyu personal deseo o ambicion que posible hace triste con Jehova. (Mat. 16:24) Poreso si enfrenta tu probanza, gendeh mas tu necesita pensa si cosa tu hace. Ya decidi ya tu daan si cosa tu hace—esta fiel con Jehova y hace alegre con ele. Si hace tu se, hay queda tu igual con Job. Maskin pa ya enfrenta le maga bien dificil probanza, ya habla le: “Gendeh yo hace perde el de mio integridad!”—Job 27:5.

8. Si pensa tu con el de tuyu dedicacion, paquemodo se ayuda contigo que resisti tentacion?

⁸ Si pensa tu acerca con el de tuyu rezo cuando ya dedica tu de tuyu vida con Jehova, puede se ayuda contigo resisti con el maskin cosa tentacion. Por ejemplo, hay man flirt ba tu con el mujer o marido del un persona? Siempre gendeh! Ya promete ya tu con Jehova que  gendeh tu se hace. Por causa con ese, gendeh mas tu man dificil quita con el gendeh justo sentido cay nuay tu deja con ese crici. Na ese manera, puede tu “desaleja con el camino del maga malo.”—Prov. 4:14, 15.

9. Si pensa tu con el de tuyu dedicacion, paquemodo se ayuda contigo que hace una con el maga espiritual actividad?

⁹ Paquemodo si ya ofrece contigo un trabajo que hay afecta con el de tuyu atendida na maga miting? Sabe ya tu si cosa tu debe hace. Antes pa se ofrece contigo, ya promete ya tu que gendeh tu ricibi ansina clase de trabajo. Poreso, gendeh mas tu necesita pensa si posible ba tene buen exito el un mal decision. Si acorda tu con el determinacion de Jesus para hace alegre con el de suyu Tata, hay resisti tu dayun con el maskin cosa que puede hace triste con Jehova—el Dios con quien tu ya dedica de tuyu vida.—Mat. 4:10; Juan 8:29.

10. Paquemodo si Jehova hay ayuda contigo despues del bautismo para “continua sigui” con Jesus?

¹⁰ El deverasan, el maga probanza y maga tentacion ta dale contigo oportunidad para dale mira que determinao tu “continua sigui” con Jesus. Mientras ta hace tu se, puede tu asigura que hay ayuda contigo si Jehova. El Biblia ta habla: “Puede ustedes tene comfianza con Dios cay gendeh Ele ay permiti que ustedes ay tene tentacion mas grande pa que con el de ustedes fuerza. Na contrario, junto con el tentacion, Ele ay dale con ustedes el fuerza para aguanta el tentacion y el manera para desaleja con ese.”—1 Cor. 10:13.

SI PAQUEMODO TU CONTINUA SIGUI CON JESUS

11. Cosa el uno del maga buen manera para continua sigui con Jesus? (Mira tambien con el letrato.)

¹¹ Con todo corazon ya sirvi si Jesus y ya esta le cerca con Jehova na rezo. (Luc. 6:12)  Gane, el uno na maga buen manera que puede ayuda contigo continua sigui con Jesus amo que continua hace el maga cosas que puede ayuda contigo queda mas cerca con Jehova. El Biblia ta habla: “Continua kita siempre obedece el mismo verdad que ya sigui ya kita.” (Fil. 3:16, El Nuevo Testamento) Tiene vez, puede tu oi maga experiencia del maga hermano y hermana quien ya hace pa mas na diila servicio con Jehova. Posible ya atende sila na School for Kingdom Evangelizers o ya sirvi onde tiene mas grande necesidad. Si ta permiti el de tuyu circumstancia, puede tu hace con ese como un goal. Bien quierre el maga siervo de Jehova que hace pa mas na diila ministerio. (Act. 16:9) Pero, paquemodo si gendeh pa tu se puede hace ahora? No pensa que mas menos tu compara con aquellos quien ta puede hace con ese. El importante con Jehova amo que continua kita aguanta. (Mat. 10:22) Si ta hace tu el maskin cosa que puede tu hace asegun na de tuyu abilidad y circumstancia, puede tu asigura que ta aprecia se si Jehova. Puede se ayuda contigo para continua sigui con Jesus despues del de tuyu bautismo.—Sal. 26:1.

12-13. Cosa tu hace si ta principia perde el de tuyu gana na servicio con Jehova? (1 Corinto 9:16, 17) (Mira tambien con el cajon “ Esta na Carrera.”)

¹² Paquemodo si tiene tiempo ta sinti tu que dol rutina ya lang el de tuyu rezo o gendeh mas tu tan enjoy con el de tuyu ministerio? Paquemodo si nuay mas tu gana le con el Biblia? Si sucede se despues del de tuyu bautismo, no pensa que gendeh mas contigo ta guia el espiritu de Jehova. Imperfecto tu y posible cambia-cambia el de tuyu sentido. Si ta perde el de tuyu gana, pensa acerca na ejemplo de apostol Pablo. Maskin pa ya pricura le imita con Jesus, sabe le que tiene maga tiempo que posible perde el de suyu gana. (Le con el 1 Corinto 9:16, 17, NWT.) Ya habla le: “Maskin pa hace yo con  ese contra gusto, ya encarga siempre conmigo este trabajo.” Quierre decir, determinao si Pablo cumpli el de suyu ministerio maskin pa na cosa le ta sinti na aquel tiempo.

¹³ Na igual manera, no hace maga decision base lang na cosa tu ta sinti. Queda determinao hace si cosa el justo maskin pa gendeh gayot tu quierre hace con ese. Si continua tu se hace, posible cambia el de tuyu sentido na uliji. Si mentena tu un buen espiritual rutina, hay ayuda este contigo continua sigui con Jesus despues del bautismo. Puede tambien se anima con el maga hermano y hermana.—1 Tes. 5:11.

CONTINUA “EXAMINA EL DE USTEDES CUERPO”

14. Cosa tu debe regular examina y porque? (2 Corinto 13:5)

¹⁴ Puede tambien ayuda contigo si regular tu examina de tuyu mismo cuerpo despues del bautismo. (Le con el 2 Corinto 13:5.) Examina si ta reza ba tu cada dia, ta le y ta estudia con el Biblia, ta atende maga miting y ta participa na ministerio. Busca maga manera para mas man enjoy y mas beneficia tu con este maga aspeto de adoranza. Por ejemplo, puede tu pregunta con este na de tuyu mismo cuerpo: ‘Ta puede ba yo explica con el maga simple enseñanza del Biblia con otro? Puede ba yo hace mas maka-enjoy con el de mio ministerio? Paquemodo de especifico el de mio maga rezo y ta dale ba este mira que completamente yo ta confia con Jehova? Pirmi ba yo ta atende na maga miting? Cosa yo puede hace para mas man focus y puede man comento na maga miting?’

15-16. Cosa tu ya aprende na experiencia del un hermano si ta enfrenta tentacion?

¹⁵ Necesita tambien tu honesto examina si onde tu mahina. El experiencia del un hermano que si Robert ta hace claro con este punto: “Cuando maga 20 año yo, ya tiene yo un part-time trabajo. Un dia despues del trabajo, ya invita conmigo el de mio uban mujer na de suyu casa. Ya habla le que kame lang dos alla y puede kame hace maskin cosa kame quierre. Del una, ya dale lang yo razon para evita con ese. Pero na uliji, ya habla yo claro que gendeh yo hace con ese y ya explica yo si porque.” Ya resisti si Robert con el tentacion y bueno gayot el cosa le ya hace. Pero cuando ya pensa le otravez acerca con ese, ya realiza le que puede era le enfrenta con ese situacion na mas buen manera. Ya admiti le: “Nuay yo dayun puede resisti con el invitacion igual na cosa ya hace si Jose na mujer de Potifar. (Gen. 39:7-9) Gane, ya espanta yo cay yan dificil gayot yo con aquel resisti. Este experiencia ya ayuda conmigo  mira que necesita yo hace mas fuerte el de mio relacion con Jehova.”

¹⁶ Puede tambien ayuda contigo si examina tu de tuyu mismo cuerpo igual na cosa ya hace si Robert. Maskin pa ya puede tu resisti con el tentacion, pregunta na de tuyu mismo cuerpo, ‘Paquemodo de tarda antes yo ya resisti con ese?’ Si ya mira tu que necesita tu hace cambio, no man luya. Bueno cay ya puede tu realiza con ese. Reza con Jehova y hace fuerte con el de tuyu determinacion que sigui con el maga principio de Jehova na moral.—Sal. 139:23, 24.

17. Na cosa manera envuelto el nombre de Jehova na experiencia de Robert?

¹⁷ Tiene pa kita cosa puede aprende na experiencia de Robert. Ya habla le: “Cuando nuay yo acepta con el invitacion del de mio uban na trabajo, ya habla le conmigo, ‘Ya pruba lang yo quel contigo!’ Ya pregunta yo con ele si cosa le quierre decir. Ya habla le que tiene le amigo que uno del maga Testigo de Jehova de antes. Ya habla el de suyu amigo que todo maga joven Testigo tiene doble manera de vida y pronto lang para kanila que man compromiso. Poreso ya habla le na de suyu amigo que pruba le mira si ansina yo. Bien alegre yo na aquel tiempo cay ya puede yo honra con el nombre de Jehova.”

18. Cosa tu determinao hace despues del de tuyu bautismo? (Mira tambien con el cajon “ Un Serie que Man Enjoy Tu.”)

¹⁸ Cuando ya dedica tu de tuyu vida con Jehova y ya bautiza, ya dale tu mira que quierre tu sanctifica con el de suyu nombre maskin cosa pa pasa. Puede tu asigura que sabe si Jehova con el maga probanza que ta enfrenta tu y con el maga tentacion que ta resisti tu. Hay bendici le contigo cay ta pricura tu esta fiel. Puede tu confia que por medio na de suyu sagrao espiritu, puede tu tene el fuerza para hace con ese. (Luc. 11:11-13) Por medio na ayuda de Jehova, puede tu continua sigui con Jesus despues del de tuyu bautismo.