1-2. (a) Cosa el circumstancia de Pablo cuando ya escribi le na maga de Efeso? (b) Cosa maga pregunta kita hay considera?

 MIENTRAS preso na un casa na Roma, quierre anima si apostol Pablo con el de suyu maga hermano y hermana. Gendeh le puede visita kanila poreso ya escribi le maga carta. Ya escribi le uno de ese del maga 60 o 61 C.E. para na maga de Efeso.—Ef. 1:1; 4:1.

² Cerca diez año antes le escribi con ese carta, ya esta si Pablo por cuanto tiempo na Efeso para predica y enseña con el buen noticia. (Act. 19:1, 8-10; 20:20, 21) Ta ama gayot le con el de suyu maga hermano y hermana, y quierre le ayuda kanila para esta fiel con Jehova. Pero porque le ya escribi na maga iscujido Cristiano acerca na iscuridad y claridad? Cosa maga leccion puede aprende el todo Cristiano na este consejo? Considera kita el maga contestacion na ese maga pregunta.

ESTABA NA ISCURIDAD PARA NA CLARIDAD

3. Cosa maga palabra ya usa si Pablo na de suyu carta para na maga de Efeso?

³ Si Pablo ya escribi para na maga Cristiano de Efeso: “Estaba ustedes [na] escuridad; pero ahora . . . , ya queda ustedes luz.” (Ef. 5:8) Ya usa si Pablo con el maga palabra “iscuridad” y “luz” para ilustra si paquemodo de grande el cambio que ya hace el maga de Efeso. Considera kita si porque ya puede habla si Pablo que ‘estaba na iscuridad’ ese maga Cristiano.

4. Na cosa manera na espiritual iscuridad el maga de Efeso?

 ⁴ Espiritual iscuridad. Antes aprende el verdad y queda maga Cristiano, ta creé el maga de Efeso na maga falso enseñanza y supersticion. Puede incuntra na ciudad de Efeso el conocido templo de Artemisa que ta considera el maga gente de antes como uno na maga de con todo bonito estructura que ya planta el gente. Ta anda el maga gente na ese templo para adora na maga idolo. Mas pa, manada sen el ta puede hace aquellos quien ta vende y ta hace maga estatua del templo y de Artemisa. (Act. 19:23-27) Puera con ese, comon tambien na ciudad el practica de magica.—Act. 19:19.

5. Na cosa manera na moral iscuridad el maga de Efeso?

⁵ Moral iscuridad. Bien imoral el maga gente de Efeso y gendeh sila ta tiene huya na cosa sila ta hace. Puede oi na maga teatro el maga bastos palabra y gane maskin na maga religioso celebracion. (Ef. 5:3) Manada kanila el “no sabe mas . . . si cosa el bueno o el malo,” un expresion que quierre decir “gendeh mas ta sinti dolor.” (Ef. 4:17-19) Antes aprende acerca na maga principio de Jehova, gendeh tan conciencia el maga de Efeso ni pensa que responsable sila con Jehova na cosa sila ta hace. Poreso, ya puede habla si Pablo que “el diila maga pensamiento sumido na escuridad. El diila ignorancia ya desaleja canila na vida del Dios.”

6. Porque ya puede habla si Pablo que na claridad ya el maga de Efeso?

⁶ Pero, nuay esta na iscuridad el cuanto na maga de Efeso. Ya escribi si Pablo que “ahora unido con el Señor, ya queda [sila] luz.” (Ef. 5:8) Ya acepta sila el verdad na Escritura que igual na un claridad que ta guia kanila. (Sal. 119:105) Este maga de Efeso ya abandona con el diila maga falso religioso practica y imoral conducta. Ya ‘pricura sila imita con Dios’ y ya hace el todo para adora con Jehova y hace alegre con ele.—Ef. 5:1.

7. Na cosa manera semejante el diaton situacion na maga Cristiano de Efeso?

⁷ Na igual manera, antes kita aprende el verdad, talli kita na espiritual y moral iscuridad.  El cuanto kanaton ta celebra maga falso celebracion y el otro tiene imoral vida de antes. Pero cuando ya aprende kita acerca na maga principio de Jehova, ya hace kita maga cambio. Ya principia kita vivi harmonia na cosa le quierre. Y como resulta, ya experiencia kita manada bendicion. (Isa. 48:17) Maskin pa ansina, ta enfrenta siempre kita maga dificultad. Necesita kita continua desaleja na iscuridad y “vivi un vida comforme con el maga anak del luz.” Paquemodo se kita puede hace?

EVITA CON EL ISCURIDAD

8. Asegun na Efeso 5:3-5, cosa debe evita el maga de Efeso?

⁸ Le con el Efeso 5:3-5. Para esta lejos na iscuridad, necesita continua evita el maga Cristiano de Efeso con el maga practica que gendeh ta hace alegre con Jehova. Incluido alli, gendeh lang el imoralidad, sino pati el maga bastos palabra. Ya hace acorda si Pablo con el maga de Efeso que necesita sila evita con ese maga cosas para “ay tene [sila] parte na herencia del Reino del Dios y de Cristo.”

9. Porque kita debe queda con cuidao que gendeh hace maskin cosa que puede resulta na imoralidad?

⁹ Debe tambien kita continua evita “tene parte na maga trabajo sin provecho que el maga gente ta hace na escuridad.” (Ef. 5:11) Manada experiencia el ta dale mira que si mas ta mira, ta oi o ta converza el un persona acerca na maga mabuling y imoral cosas, mas facil para con ele hace si cosa el malo. (Gen. 3:6; Sant. 1:14, 15) Na un nacion, manada Testigo el yan join na un group chat. Del primero, manada kanila el tan cuento acerca na maga espiritual cosas. Pero, hinay-hinay ya queda umalin el cosa sila ta discuti. Acerca na sex ya lang el cosa sila tan cuento. Na uliji, manada kanila el ya admiti que por causa con ese, ya comete sila sexual imoralidad.

10. Paquemodo kanaton ta pricura engaña si Satanas? (Efeso 5:6)

¹⁰ Ta pricura engaña kanaton el mundo de Satanas para creé que gendeh malo el maga imoral y mabuling practica. (2 Ped. 2:19) Gendeh mas se kita debe estraña. Uno se na maga tactica que ya dura ya ta usa si Satanas para man libug el maga gente si cosa el justo y si cosa el malo. (Isa. 5:20; 2 Cor. 4:4) Poreso, manada salida, programa na television y website el ta dale mira maga cosas que contra na maga principio de Jehova. Ta pricura kanaton engaña si Satanas para pensa que aceptable lang, gendeh peligroso y puede dale alegria el maga mabuling practica y imoral manera de vida.—Le con el Efeso 5:6.

11. Paquemodo el experiencia de Angela ta dale mira que importante aplica con el consejo na Efeso 5:7? (Mira tambien con el letrato.)

¹¹ Quierre si Satanas que man junto kita con aquellos quien influencia kanaton para mas man dificil kita sigui na maga principio de Jehova. Amo se el razon si porque ya anima si Pablo con el maga de Efeso: “No gayot ustedes man junto canila” que ta refiri con aquellos quien ta practica maga mal cosas na ojos de Jehova. (Ef. 5:7) Pero, necesita kita queda mas con cuidao compara na maga de Efeso. Porque? Cay ahora puede ya kita man junto na maga gente, gendeh lang na personal, sino maskin por medio na social media. Si Angela, a quien ta queda na Asia, ya puede sabe si paquemodo de peligroso el social media. Ele ya habla: “Un trampa se y puede se cambia con el de tuyu pensamiento. Gane, ya llega na punto que dol nuay ya lang conmigo  que tene ‘maga amigo’ quien gendeh ta respeta con el maga principio na Biblia. Na uliji, ya principia yo pensa que OK lang tene un manera de vida que gendeh aceptable con Jehova.” Bueno ya lang, ya ayuda con Angela el maga amable anciano para hace maga cambio. Ele ya habla: “Ahora, tan focus ya yo na maga espiritual cosas en vez na social media.”

12. Cosa puede ayuda kanaton para continua sigui na maga principio de Jehova?

¹² Debe kita resisti con el pensamiento del mundo que aceptable lang el imoral conducta. Sabe kita que gendeh gayot se justo. (Ef. 4:19, 20) Bueno si pregunta kita na diaton mismo cuerpo: ‘Si gendeh necesita, ta pricura ba yo evita man junto na maga uban na trabajo, classmate o con otro quien gendeh ta respeta con el maga alto principio de Jehova? Tiene ba yo el animo sigui na maga principio de Jehova maskin cosa pa habla el otro conmigo?’ Como cosa ta habla na 2 Timoteo 2:20-22, posible necesita tambien kita queda con cuidao si ta iscuji maga amigo na congregacion. Debe kita acorda que gendeh todo puede ayuda kanaton para esta fiel na diaton servicio con Jehova.

VIVI COMO “MAGA ANAK DEL LUZ”

13. Cosa quierre decir que “vivi un vida comforme con el maga anak del luz”? (Efeso 5:7-9)

¹³ Puera que ya anima si Pablo con el maga Cristiano de Efeso que evita con el iscuridad, ya anima tambien le kanila que continua “vivi un vida comforme con el maga anak del luz.” (Le con el Efeso 5:7-9.) Cosa este quierre decir? Quierre decir de este que actua kita como maga verdadero Cristiano na todo tiempo. El un manera para puede se hace amo si regular kita le y estudia con el Biblia y con el diaton maga publicacion que base na Biblia. Puede tambien ayuda si estudia kita con el ejemplo y enseñanza de Jesucristo, “el Luz del mundo.”—Juan 8:12; Prov. 6:23.

14. Paquemodo el sagrao espiritu puede ayuda kanaton?

¹⁴ Necesita tambien kita el ayuda del sagrao espiritu del Dios para puede kita continua  vivi como “maga anak del luz.” Porque? Cay gendeh facil esta limpio na este imoral mundo. (1 Tes. 4:3-5, 7, 8) El sagrao espiritu puede ayuda kanaton para resisti con el pensamiento del mundo, incluido el maga filosofia y opinion que contra na principio del Dios. El sagrao espiritu puede tambien ayuda kanaton para tene el “todo maga cosa-cosa bueno, el santidad y el verdad.”—Ef. 5:9.

15. Na cosa maga manera kita puede ricibi con el sagrao espiritu? (Efeso 5:19, 20)

¹⁵ El un manera para puede kita tene sagrao espiritu amo si pidi kita con ese na rezo. Si Jesus ya habla que hay dale si Jehova sagrao espiritu “con aquellos quien ta pidi con ele.” (Luc. 11:13) Y si ta alaba kita con Jehova na maga miting, ta puede tambien kita ricibi el de suyu sagrao espiritu. (Le con el Efeso 5:19, 20.) El buen efecto del sagrao espiritu puede ayuda kanaton para vivi na manera que ta hace alegre con Dios.

16. Cosa hay ayuda kanaton para hace maga justo decision? (Efeso 5:10, 17)

¹⁶ Si ta hace maga importante decision, necesita kita pensa “si cosa ba el querer del Dios” y actua harmonia con ese. (Le con el Efeso 5:10, 17.) Si ta busca kita maga principio na Biblia que aplicable na diaton situacion, ta dale se mira que ta considera kita si cosa ta pensa el Dios acerca con ese. Y si aplica kita con el de suyu maga principio, grande el posibilidad que puede kita hace maga justo decision.

17. Paquemodo kita puede usa enbuenamente con el diaton tiempo? (Efeso 5:15, 16) (Mira tambien con el letrato.)

¹⁷ Ya conseja tambien si Pablo con el maga Cristiano na Efeso que usa con el diila tiempo enbuenamente. (Le con el Efeso 5:15, 16.) Quierre el diaton enemigo, si Satanas, que queda kita bien ocupao na maga cosas de este mundo para nuay mas kita tiempo na servicio con Dios. (1 Juan 5:19) Posible, el un Cristiano principia man focus na sen,  educacion o na trabajo en vez na manada oportunidad que puede le sirvi con Jehova. Si sucede se, puede se dale mira que ta afecta ya con ele el pensamiento del mundo. Siempre, gendeh malo este maga cosas pero gendeh este debe queda el prioridad na diaton vida. Para puede kita actua como “maga anak del luz,” necesita kita “usa el tiempo embuenamente” na maga cosas que mas importante.

18. Cosa ya hace si Donald para puede usa enbuenamente con el de suyu tiempo?

¹⁸ Busca maga oportunidad para puede sirvi mas con Jehova. Amo se el cosa ya hace si Donald, quien ta queda na South Africa. Ele ya habla: “Ya examina yo con el de mio situacion y ya suplica con Jehova que ayuda conmigo queda mas productivo na ministerio. Ya reza yo que tene yo trabajo que permiti conmigo que tene mas grande tiempo na predicacion. Na ayuda de Jehova, ya puede yo incuntra ese trabajo. Por causa con ese, ya puede yo principia sirvi full-time junto con el de mio mujer.”

19. Paquemodo kita puede esta na claridad?

¹⁹ Asigurao, ya puede gayot ayuda el carta de Pablo na maga de Efeso para puede sila esta fiel con Jehova. Y ese instruccion puede tambien ayuda kanaton. Como cosa ya discuti, puede este ayuda kanaton para iscuji enbuenamente el diaton entretenimiento y asosacion. Puede este motiva kanaton para continua beneficia na claridad del verdad por medio na regular estudiada del Biblia. Y ya hace este claro con el importancia del sagrao espiritu que puede ayuda kanaton para tene maga bonito calidad. Si aplica kita con el cosa ya escribi si Pablo, puede se ayuda kanaton para hace maga justo decision que uyun na pensamiento de Jehova. Si hace kita con este, puede kita evita con el iscuridad de este mundo y esta na claridad!