1. Cosa el cuanto bendicion cay parte kita del organizacion de Jehova?

 ALEGRE gayot kita cay parte kita del organizacion de Jehova na este bien dificil tiempo. Maskin pa ta queda mas grabe el condicion na mundo, tiene kita un unido espiritual familia de maga hermano y hermana. (Sal. 133:1) Ta ayuda kanaton si Jehova que tene mas fuerte relacion na diaton familia. (Ef. 5:33–6:1) Y ta dale le kanaton hondo entendimiento y sabeduria para tene kita paz na pensamiento.

2. Cosa kita necesita hace y porque?

² Pero, debe kita hace esfuerzo para continua fiel sirvi con Jehova. Porque? Cay tiene vez, posible kita sinti duele por causa na imperfeccion del otro. Baka tan dificil tambien kita na diaton mismo maga kamali, especialmente si pirmi kita ta puede hace con ese. Necesita kita continua sirvi con Jehova (1) si ya sinti kita duele na cosa ya hace el un hermano o hermana, (2) si ya queda kita desmayao na diaton marido o mujer y (3) si ya queda kita desmayao na diaton mismo cuerpo. Na este articulo, hay considera kita con este cada situacion. Hay considera tambien kita si cosa kita puede aprende na un fiel caracter na Biblia.

SI YA SINTI TU DUELE NA UN HERMANO O HERMANA

3. Cosa dificultad ta enfrenta el maga siervo de Jehova?

³ El dificultad. El cuanto maga hermano o hermana tiene maga custumbre que ta consumi kita. Posible ya queda kita desmayao na cosa ya hace el otro o ya trata sila kanaton na gendeh buen manera. Puede tambien man kamali aquellos quien ta guia. Por causa na ese maga razon, el cuanto tan duda si organizacion ba gayot este del Dios. En vez continua sirvi  con Dios junto na maga hermano y hermana “con unidad,” nuay mas sila man junto con aquellos quien ya hace sinti duele kanila. Gane el otro, ya descanza ya atende na maga miting. (Sof. 3:9) Justo ba se? Considera si cosa kita puede aprende na un caracter na Biblia quien ya experiencia semejante problema.

4. Cosa maga dificultad ya enfrenta si apostol Pablo?

⁴ Ejemplo na Biblia. Sabe si apostol Pablo que imperfecto el de suyu maga hermano y hermana. Por ejemplo, cuando ya queda le parte del congregacion, ya juzga con ele el otro. (Act. 9:26) Na otro ocasion, el cuanto ya habla maga mal cosas acerca con ele para hace malo con el de suyu reputacion. (2 Cor. 10:10) Ya puede tambien mira si Pablo que nuay hace justo decision el un anciano que posible ya causa con otro para man tisut. (Gal. 2:11, 12) Y ya queda gayot desmayao si Pablo na de suyu amigo que si Marcos. (Act. 15:37, 38) Puede era pensa si Pablo que gendeh mas man junto con aquellos quien ya hace sinti duele con ele. Pero, nuay le se hace sino ya mentena le positivo mirada na de suyu maga hermano y hermana, y ya esta activo na servicio con Jehova. Cosa ya puede ayuda con Pablo para continua?

5. Cosa ya ayuda con Pablo para perdona con el de suyu maga hermano y hermana? (Colosa 3:13, 14) (Mira tambien con el letrato.)

⁵ Ta ama si Pablo con el de suyu maga hermano y hermana. Por causa con ese amor, nuay le man focus na diila maga kamali sino na diila maga buen calidad. El amor ya ayuda tambien con Pablo para hace con el cosa le mismo ya escribi na Colosa 3:13, 14. (Le.) Considera si paquemodo le se ya demonstra con Marcos. Maskin pa ya abandona si Marcos con Pablo durante el de suyu primer viaje, nuay esta rabiao si Pablo. Gane, cuando ya escribi si Pablo un carta para na congregacion na Colosa, ya menciona le que ya dale con ele “grande . . . consuelo” si Marcos. (Col. 4:10, 11) Cuando preso le na Roma, ya pidi si Pablo con Marcos que anda ayuda con ele. (2 Tim. 4:11) Claro que ya perdona si Pablo con el de suyu maga hermano y yan junto siempre kanila. Cosa kita puede aprende con Pablo?

6-7. Paquemodo kita puede continua dale mira amor na diaton maga hermano y hermana maskin pa na diila imperfeccion? (1 San Juan 4:7)

⁶ El leccion. Quierre si Jehova que continua kita dale mira amor con el diaton maga hermano y hermana. (Le con el 1 San Juan 4:7.) Si tiene quien ya trata kanaton na gendeh buen manera, no pensa que intencional le quierre  hace sinti duele kanaton sino pensa que ta pricura le sigui na maga principio na Biblia. (Prov. 12:18) Ta ama el Dios con el de suyu maga fiel siervo maskin pa na diila imperfeccion. Si tan kamali kita, gendeh le ta abandona o ta esta rabiao kanaton. (Sal. 103:9) Poreso, importante gayot que imita kita con el diaton Tata quien sabe perdona.—Ef. 4:32–5:1.

⁷ Acorda tambien que mientras mas ta queda cerca el fin, necesita kita mentena buen relacion na diaton maga hermano y hermana. Puede kita expecta que queda mas grabe el persecucion. Baka man preso pa gane kita por causa na diaton fe. Si sucede se, mas necesita ya gayot kita con el diaton maga hermano y hermana. (Prov. 17:17) Considera si cosa ya sucede con Josep, a un anciano na Spain. Por causa na neutralidad, yan preso le y el otro maga hermano. Ele ya habla: “Cay junto kame na un celda, pronto lang para kanamon que consumi con uno y otro. Necesita kame aprende aguanta y perdona. Ya ayuda se kanamon para esta unido y protege con uno y otro ciendo junto kame na maga preso quien gendeh ta sirvi con Jehova. Na un ocasion, ya balda el de mio brazo poreso gendeh yo ta puede hace solo-solo con el cuanto cosas. Pero el un hermano ya laba con el de mio ropa y ya cuida conmigo na practical manera. Ya experiencia yo deverasan amor na tiempo que bien necesita yo con ese.” Tiene gayot maga buen razon si porque ahora pa lang, necesita ya kita arregla con el maga problema na diaton maga hermano y hermana!

SI YA QUEDA TU DESMAYAO NA DE TUYU MARIDO O MUJER

8. Cosa dificultad ta enfrenta el maga man maridable?

⁸ El dificultad. El todo man maridable ta experiencia problema. El Biblia franca ya habla que el maga man maridable hay ‘tene maga problema na diila vida casao.’ (1 Cor. 7:28) Porque? Cay imperfecto sila y diferente el diila custumbre y si cosa sila quierre. Posible tambien que otro-otro el diila cultura o background. Poreso, posible que hay sale el maga custumbre que nuay sila puede nota antes sila casa. Todo este puede causa problema na matrimonio. En vez admiti que tiene sila cosa ya hace para causa el problema y pricura solva con ese, posible sila disculpa con uno y otro. Baka pensa pa gane sila que man separtajan o man divurcio ya lang. Pero hay solva ba se con el diila problema? b Discuti kita ahora un caracter na Biblia quien ya aguanta maskin pa ya experiencia le dificultad na de suyu matrimonio.

9. Cosa dificultad ya enfrenta si Abigail?

⁹ Ejemplo na Biblia. Casao si Abigail con Nabal, con quien ya menciona el Biblia como violente y mal custumbre. (1 Sam. 25:3) Asigurao que dificil el vida de Abigail junto con ese hombre. Ya tiene ba oportunidad si Abigail para termina con el de suyu matrimonio? Si! Ya sucede se cuando ya mata era si David con el de suyu marido cay ya insulta este con ele y con el de suyu maga gente. (1 Sam. 25:9-13) Puede lang era deja si Abigail que hace si David con el de suyu plano. Pero, nuay se hace si Abigail sino ya convinci le con David que no mata con Nabal. (1 Sam. 25:23-27) Porque le se ya hace?

10. Cosa posible ya motiva con Abigail para aguanta maskin pa ya experiencia le dificultad na de suyu matrimonio?

¹⁰ Ta ama si Abigail con Jehova y ta sigui con el De Suyu principio na matrimonio. Asigurao,  ta acorda si Abigail con el cosa ya habla el Dios con Adan y Eva cuando ya dale Le casa kanila. (Gen. 2:24) Sabe si Abigail que sagrao na ojos de Jehova el matrimonio. Quierre le hace alegre con Dios y asigurao amo se el ya motiva con ele para salva con el maga gente na diila casa, incluido el de suyu marido. Ya actua dayun le para gendeh mata si David con Nabal. Preparao le pidi despensa maskin pa nuay le cosa ya hace mali. Claro que ya ama gayot si Jehova con este animosa y amable mujer. Cosa puede aprende el maga mujer y el maga marido na ejemplo de Abigail?

11. (a) Cosa quierre si Jehova que hace el man maridable? (Efeso 5:33) (b) Cosa tu ya aprende na cosa ya hace si Carmen para salva con el de suyu matrimonio? (Mira tambien con el letrato.)

¹¹ El leccion. Quierre si Jehova que el man maridable hay sigui con el de suyu principio na matrimonio maskin pa bien dificil ya man junto con el diila marido o mujer. Asigurao que alegre el Dios si ta mira le con el man maridable que ta pricura solva con el diila problema y ta dale mira amor y respeto con uno y otro. (Le con el Efeso 5:33.) Considera con el ejemplo de Carmen. Maga seis año despues le casa, ya principia le man Bible study junto na maga Testigo de Jehova y ya bautiza na uliji. “Nuay gusta el de mio marido con el de mio decision,” ya habla si Carmen. “Dol yan celos le con Jehova. Ta insulta le conmigo y ta habla que deja le conmigo.” Maskin pa ansina, ya aguanta siempre si Carmen na de suyu matrimonio. Por 50 año, ya hace le esfuerzo para demonstra amor y respeto con el de suyu marido. “Mientras ta pasa el tiempo, ya acerta yo entende si cosa ta sinti el de mio marido y man cuento con ele na amable manera. Cay sabe yo que sagrao el matrimonio na ojos de Jehova, ya hace yo el todo para salva con ese. Nuay yo deja con el de mio marido cay ta ama yo con Jehova.” c Si ya experiencia tu problema na de tuyu matrimonio, puede tu asigura que suporta y ayuda contigo si Jehova para puede tu aguanta.

SI DESMAYAO TU NA DE TUYU MISMO CUERPO

12. Cosa dificultad kita posible enfrenta si ya comete kita serioso culpa?

¹² El dificultad. Si ya puede kita comete serioso culpa, posible que man luya gayot kita. El Biblia ya habla que si culpa kita, hay queda kita bien “dolorido.” (Sal. 51:17) El un hermano que si Robert ya hace grande esfuerzo por cuanto año para queda cualificao sirvi como un siervo ministerial. Pero, ya comete le un serioso culpa y ya realiza que ya traiciona le con Jehova. “Yan conciencia gayot yo,” ya habla  le. “Ya sinti gayot yo desmayao. Despues, ya llura yo y ya reza con Jehova. Ya pensa yo que gendeh mas le oi conmigo cay ya hace yo con ele sinti duele.” Si ya puede kita comete serioso culpa, posible kita queda bien triste y pensa que abandona ya kanaton si Jehova. (Sal. 38:4) Si ta sinti tu igual ansina, considera con el un fiel caracter na Biblia quien ya continua sirvi con Jehova maskin pa ya comete le un serioso culpa.

13. Cosa serioso culpa ya comete si apostol Pedro y cosa otro kamali le ya hace antes con ese?

¹³ Ejemplo na Biblia. Na noche antes mata con Jesus, ya puede hace sunod-sunod kamali si apostol Pedro que ya causa con ele para comete con el de con todo serioso culpa na de suyu vida. Una, bien grande el confianza de Pedro na de suyu mismo cuerpo poreso yan hambug le que hay esta le fiel maskin pa el otro maga apostoles hay abandona con Jesus. (Mar. 14:27-29) Ika-dos, mientras talla sila na jardin de Getsemani, manada beses si Pedro nuay puede esta dispierto. (Mar. 14:32, 37-41) Despues cuando ya arresta con Jesus, ya deja con ele si Pedro. (Mar. 14:50) Na uliji, tres beses ya desconoce si Pedro con Jesus y ya jura pa gane acerca con ese. (Mar. 14:66-71) Cosa ya hace si Pedro cuando ya realiza le que ya comete le serioso culpa? Ya queda gayot le dolorido y ya llura posible cay yan conciencia gayot le. (Mar. 14:72) Imagina si paquemodo de triste si Pedro cuando ya mata con el de suyu amigo cuanto hora despues. Asigurao, ya sinti gayot si Pedro que nuay le valor!

14. Cosa ya ayuda con Pedro para continua sirvi con Jehova? (Mira con el letrato .)

¹⁴ Ya puede si Pedro continua sirvi con Jehova por causa na manada razon. Nuay le separta con el de suyu mismo cuerpo; ya anda le con el de suyu maga espiritual hermano y asigurao, ya dale sila comforta con ele. (Luc. 24:33) Mas pa, despues resucita si Jesus, ya aparece le con Pedro—posible para anima con ele. (Luc. 24:34; 1 Cor. 15:5) Na otro ocasion, en vez de regaña con Pedro por causa na de suyu maga kamali, ya habla si Jesus con el de suyu amigo que hay ricibi este mas grande responsibilidad. (Juan 21:15-17) Sabe si Pedro que serioso el de suyu culpa pero nuay le descanza sirvi con Jehova. Porque? Cay convincido le que ta ama siempre con ele si Jesus y ya continua con ele suporta el de suyu maga espiritual hermano. Cosa kita puede aprende na ejemplo de Pedro?

15. Na cosa quierre si Jehova que queda kita convincido? (Salmo 86:5; Roma 8:38, 39) (Mira tambien con el letrato.)

¹⁵ El leccion. Quierre si Jehova que queda  kita convincido que ta ama y ta perdona le kanaton. (Le con el Salmo 86:5; Roma 8:38, 39.) Si ya culpa kita, normal lang que man conciencia kita. Pero, gendeh kita debe pensa que gendeh mas kanaton ama o perdona si Jehova. Sino, debe kita dayun pidi ayuda. Si Robert que ya menciona enante ya habla: “Ya culpa yo cay ya confia lang yo con el de mio mismo cuerpo cuando ya enfrenta yo tentacion.” Ya realiza le que necesita le man cuento con el maga anciano. Ele ya habla: “Cuando ya hace yo se, ya sinti dayun yo con el amor de Jehova. Nuay gayot conmigo abandona el maga anciano. Ya ayuda sila conmigo para mira que nuay tambien conmigo abandona si Jehova.” Na igual manera, puede kita queda convincido que ta ama gayot kanaton y ta perdona si Jehova si arripinti kita na diaton maga culpa, pidi ayuda con otro y hace esfuerzo para gendeh repiti con el diaton kamali. (1 Juan 1:8, 9) Si convincido kita con ese, gendeh kita descanza sirvi con Jehova maskin pa ya culpa kita.

16. Porque tu determinao continua sirvi con Jehova?

¹⁶ Ta aprecia gayot si Jehova cay ta hace kita esfuerzo para sirvi con ele na este ultimo maga dia. Na ayuda de Jehova, puede kita continua sirvi con ele maskin pa desmayao kita con otro y na diaton mismo cuerpo. Puede kita continua ama con el diaton maga hermano y hermana, y perdona kanila maskin pa ya puede sila hace sinti duele kanaton. Puede kita dale mira que ta ama gayot kita con el diaton Dios y ta sigui con el de suyu maga principio si hace kita el todo para solva con el problema na diaton matrimonio. Y si ya puede kita comete culpa, pidi el ayuda de Jehova, acepta con el de suyu amor y perdon, y continua na diaton servicio con ele. Puede kita asigura que hay bendici gayot le kanaton si gendeh kita “descansa de hace el maga cosa-cosa bueno.”—Gal. 6:9.