1. Na cosa posible tan duda el cuanto fiel siervo de Jehova?

 MAKA-ALEGRE para sabe que ta aproba si Jehova con el de suyu maga siervo como un grupo! El Biblia ta habla: “Alegre si Jehova na de suyu maga siervo.” (Sal. 149:4) Pero tiene vez, el cuanto tan luya y posible ta pensa, ‘Ta aproba ba gaha conmigo si Jehova como individual?’ Manada del maga fiel siervo de Jehova que ya menciona na Biblia el ya sinti ansina tiene vez.—1 Sam. 1:6-10; Job 29:2, 4; Sal. 51:11.

2. Con quien ta aproba si Jehova?

² Claro ta dale mira el Biblia que el maga imperfecto gente puede obtene el favor de Jehova. Paquemodo? Debe kita demonstra fe con Jesucristo y bautiza. (Juan 3:16) Na ese manera, ta dale kita mira con otro que ya arripinti ya kita na diaton maga culpa y ya hace un promesa con Dios para hace el de suyu voluntad. (Act. 2:38; 3:19) Alegre si Jehova si hace kita con este maga cosas para puede tene buen relacion con ele. Si pricura kita hace el todo para cumpli el diaton dedicacion, hay aproba kanaton si Jehova y considera kanaton como de suyu maga amigo.—Sal. 25:14.

3. Cosa kita ahora hay discuti?

³ Pero, porque posible ta sinti el cuanto que gendeh kanila ta aproba el Dios? Paquemodo si Jehova ta dale mira el de suyu favor kanaton? Y paquemodo puede hace fuerte el un Cristiano con el de suyu confianza que tiene le el favor del Dios?

SI PORQUE TA SINTI EL CUANTO QUE GENDEH KANILA TA APROBA SI JEHOVA

4-5. Si ta sinti kita nuay valor, na cosa kita puede asigura?

⁴ Manada kanaton el posible ya sinti nuay valor desde cuando bata kita. (Sal. 88:15) El un hermano que si Adrián ya habla: “Pirmi yo ta sinti que nuay yo valor. Cuando bata yo, ta  acorda yo que ta reza yo que ojala el de mio familia hay queda na Paraiso maskin pa asigurao yo que gendeh yo cualificao para vivi alla.” Si Tony, quien ya engranda na un familia que gendeh Testigo, ya habla: “Nuay gayot yo puede oi con el de mio mayores que ya habla que ta ama sila conmigo o proud sila conmigo. Ya manda se conmigo sinti que nuay yo cosa puede hace para hace alegre kanila.”

⁵ Si tiene vez ta sinti kita nuay valor, debe kita acorda que si Jehova mismo el ya hace manera para queda kita cerca con ele. (Juan 6:44) Ta mira le con el diaton maga buen calidad que posible gendeh kita mismo ta puede mira y mas sabe le si cosa clase gayot kita de persona. (1 Sam. 16:7; 2 Cron. 6:30) Poreso, si ya habla le que precioso kita, puede kita confia con ese.—1 Juan 3:19, 20.

6. Cosa ya sinti si apostol Pablo acerca na de suyu maga culpa de antes?

⁶ Antes kita aprende el verdad, el cuanto kanaton ya hace maga cosas que posible tan conciencia siempre kita hasta ahora. (1 Ped. 4:3) Gane, maskin el maga fiel Cristiano ta continua siempre resisti con el diila mal inclinacion. Ta condena ba contigo el de tuyu corazon? Si ansina, ta dale kanaton comforta que el maga fiel siervo de Jehova ta sinti tambien ansina. Por ejemplo, ya sinti miserable si apostol Pablo por causa na de suyu maga imperfeccion. (Roma 7:24) Siempre, ya arripinti ya si Pablo na de suyu maga culpa y ya bautiza. Pero maskin pa ansina, ya refiri siempre le con el de suyu mismo cuerpo como “el menos con todo” y el de con todo “grande pecador.”—1 Cor. 15:9; 1 Tim. 1:15.

7. Cosa kita debe acorda acerca na diaton maga culpa de antes?

⁷ Ta promete kanaton el diaton Tata na cielo que perdona le kanaton si arripinti kita. (Sal. 86:5) Poreso si deverasan gayot kita ta sinti triste na maga culpa que ya puede kita hace, puede gayot kita confia con Jehova si ya habla le que ya perdona ya le kanaton.—Col. 2:13.

8-9. Paquemodo kita evita pensa que gendeh kita puede hace alegre con Jehova?

⁸ Quierre kita hace el todo para puede sirvi con Jehova. Pero, ta sinti el cuanto que gendeh bastante el diila esfuerzo para obtene el de suyu favor. El un hermana que si Amanda ya habla: “Ta pensa yo que puede lang yo dale el de mio de con todo bueno con Jehova si pirmi yo hace mas. Poreso ta pricura yo hace mas pa na cosa yo ta puede hace. Si ya falla yo, ta pensa yo que desmayao conmigo si Jehova igual na cosa yo ta sinti na de mio mismo cuerpo.”

⁹ Paquemodo kita evita pensa que gendeh kita puede hace alegre con Jehova? Acorda que razonable si Jehova. Nunca le pidi mas pa na cosa kita puede dale. Ta aprecia le con el maskin cosa kita ta hace para con ele si amo se el diaton de con todo bueno. Pensa tambien con el maga ejemplo na Biblia quien ya sirvi con Jehova con todo corazon. Por ejemplo, pensa con Pablo. Por manada año, ya hace gayot le esfuerzo para viaja largo distancia y ayuda establicia manada congregacion. Pero cuando ya cambia el de suyu circumstancia y gendeh mas le tanto ta puede predica igual de antes, ya perde ba el favor del Dios con ele? Nuay. Ya continua le hace si cosa le puede hace y ya bendici con ele si Jehova. (Act. 28:30, 31) Na igual manera, puede tambien cambia el diaton circumstancia. Pero el cosa mas importante para con Jehova amo el diaton motivo si porque kita ta sirvi con ele. Considera kita ahora con el cuanto manera que ta dale mira si Jehova el de suyu favor kanaton.

 PAQUEMODO TA DALE MIRA SI JEHOVA EL DE SUYU FAVOR?

10. Na cosa manera kita puede “oi” que ta aproba kanaton si Jehova? (Juan 16:27)

¹⁰ Por medio na Biblia. Ta dale mira si Jehova con el de suyu favor con aquellos con quien le ta ama. Tiene dos ocasion na Escritura donde ya habla Le con Jesus que ta ama y ta aproba Le con este. (Mat. 3:17; 17:5) Quierre ba tu que habla contigo si Jehova que ta aproba le contigo? Gendeh kanaton directa tan cuento si Jehova pero tan cuento le kanaton por medio na de suyu Palabra. Puede kita “oi” que ta aproba kanaton si Jehova si le kita con el maga palabra de Jesus na Evangelio. (Le con el Juan 16:27.) Perfecto ya puede imita si Jesus con el personalidad del de suyu Tata. Poreso si le kita con el maga palabra de Jesus cuando ya menciona le que ta aproba le con el de suyu maga fiel siervo maskin pa imperfecto sila, ta puede kita imagina con Jehova que ta habla con ese maga palabra kanaton.—Juan 15:9, 15.

11. Porque kita puede habla que tiene siempre kita el favor de Jehova maskin ta experiencia kita maga probanza? (Santiago 1:12)

¹¹ Por medio na de suyu maga accion. Quierre gayot ayuda kanaton si Jehova na diaton maga material necesidad y na otro pa manera. Tiene vez, ta permiti si Jehova que experiencia kita maga dificultad, igual na cosa ya sucede con Job. (Job 1:8-11) Si experiencia kita maga probanza, gendeh se quierre decir que ya perde el favor del Dios kanaton. Sino, ta dale se kanaton oportunidad para dale mira si paquemodo de hondo el diaton amor con Dios y el diaton confianza con ele. (Le con el Santiago 1:12.) Hay experiencia kita el de suyu amable cuidada y suporta mientras ta ayuda le kanaton para aguanta.

12. Cosa kita puede aprende na experiencia de Dmitrii?

¹² Considera con el un hermano na Asia que si Dmitrii. Ya queda le nuay trabajo y nuay le puede incuntra nuevo trabajo por manada meses. Pero, ya dale le mira el de suyu confianza con Jehova y ya decidi que mas participa na ministerio. Cuanto meses ya el ya pasa, nuay le siempre puede incuntra trabajo. Despues, ya tiene le problema na salud hasta na punto ya queda le bedridden. Ya principia le sinti que gendeh mas le un buen marido o tata y yan duda si tiene pa ba le el favor de Jehova. Despues, un noche, el de suyu anak mujer  ya escribi na un papel con el Isaias 30:15: “Puede ustedes tene fuerza si esta ustedes calmao y dale mira confianza.” Ya lleva le con este na de suyu tata y ya habla, “Pang, si ta sinti tu triste, puede tu acorda con este texto.” Ya puede realiza si Dmitrii que por causa na ayuda de Jehova, tiene siempre sila casa, bastante comida y ropa. “El cosa yo necesita hace,” ele ya habla, “amo que esta calmao y continua confia con el de mio Dios.” Si ta experiencia tu semejante probanza, puede tu confia que cuida contigo si Jehova y hay ayuda le contigo para aguanta.

13. Con quien posible puede usa si Jehova para dale mira el de suyu favor kanaton y paquemodo?

¹³ Por medio na maga hermano y hermana. Ta usa si Jehova con el diaton maga hermano y hermana para dale mira el de suyu favor kanaton. Por ejemplo, posible le usa con otro para anima kanaton na justo tiempo. Ese el cosa ya experiencia el un hermana na Asia cuando ya enfrenta le dificultad. Ya queda le nuay trabajo y ya tiene grabe enfermedad. Despues, ya comete un serioso culpa el de suyu marido y ya quita con ele como un anciano. “Gendeh yo ta entende si porque este ta sucede,” ele ya habla. “Ya pensa yo que baka tiene yo cosa ya hace malo y nuay mas yo el favor de Jehova.” Ya pidi el diaton hermana con Jehova que asigura con ele que tiene siempre le el De Suyu favor. Paquemodo se ya hace si Jehova? Ele ya habla, “Yan cuento conmigo el maga anciano na congregacion y ya dale conmigo asiguranza que ta ama conmigo si Jehova.” Nuay dura, ya pidi le otravez ayuda con Jehova. “Aquel mismo dia, ya ricibi yo un carta estaba na un grupo de maga hermano y hermana na congregacion,” ya habla le. “Mientras ta le yo con el diila carta, ya sinti yo que ya oi conmigo si Jehova.” Ta dale  mira si Jehova el de suyu favor por medio na maga buen palabra del otro.—Sal. 10:17.

14. Cosa el otro manera que ta dale mira si Jehova que ta aproba le kanaton?

¹⁴ Ta dale tambien mira si Jehova el de suyu favor kanaton por medio na maga consejo que ta dale el maga hermano y hermana. Por ejemplo, del primer siglo, ya usa si Jehova con apostol Pablo para escribi 14 inspirao carta para na de suyu maga hermano y hermana. Este maga carta tiene franca pero amable consejo. Porque si Jehova ya manda con Pablo que inclui con ese? Un buen Tata si Jehova y ta disciplina le con el de suyu maga anak con “quien le ta ama.” (Prov. 3:11, 12) Poreso, si ya ricibi kita consejo que base na Biblia, un prueba se que tiene siempre kita el favor del Dios. (Heb. 12:6) Cosa pa el otro evidencia que tiene kita el favor de Jehova?

OTRO EVIDENCIA QUE TA APROBA KANATON SI JEHOVA

15. Con quien si Jehova ta dale el de suyu sagrao espiritu y porque se ta dale kanaton asiguranza?

¹⁵ Ta dale si Jehova con el de suyu sagrao espiritu con aquellos con quien le ta aproba. (Mat. 12:18) Puede kita pregunta na diaton mismo cuerpo, ‘Ya puede ya ba yo dale mira con el cuanto calidad del fruta del sagrao espiritu na de mio vida?’ Mas paciencioso ya ba tu ahora si compara de antes cuando nuay pa tu conoce con Jehova? El deverasan, si mas ta cultiva tu con el maga bonito calidad del sagrao espiritu, mas claro tu puede mira que tiene tu el favor de Jehova!—Mira con el cajon “ El Fruta del Espiritu Amo . . . ”

16. Con quien si Jehova ta usa para predica con el buen noticia y cosa tu ta sinti acerca con ese? (1 Tesalonica 2:4)

¹⁶ Alegre si Jehova dale el privilegio que predica con el buen noticia con aquellos con quien le ta aproba. (Le con el 1 Tesalonica 2:4.) Nota si paquemodo el un hermana que si Jocelyn ya beneficia cuando ya predica le con el buen noticia con otro. Un dia, cuando ya dispierta si Jocelyn, ya sinti le depress. “Nuay yo gana y ta sinti yo que nuay yo sirvi,” ele ya habla. “Pero pioneer yo y schedule quel de mio para predica. Poreso ya reza yo y ya sale na ministerio.” Aquel aga, ya puede conoce si Jocelyn con Mary, quien ya acepta un Bible study. Despues del cuanto meses, ya habla si Mary que cuando yan tuktuk si Jocelyn na diila puerta, ta reza le con Dios para pidi ayuda.  Cosa ya aprende si Jocelyn na este experiencia? Ele ya habla, “Ya sinti yo que dol ta habla conmigo si Jehova, ‘Ta aproba yo contigo.’” Siempre, gendeh todo el ta acepta con el mensaje que ta predica kita. Pero puede kita asigura que alegre si Jehova si hace kita el todo para predica con el buen noticia con otro.

17. Cosa tu ya puede aprende na cosa ya habla si Vicky acerca na rescate? (Salmo 5:12)

¹⁷ Puede beneficia na rescate aquellos con quien si Jehova ta aproba. (1 Tim. 2:5, 6) Pero paquemodo si ta sinti siempre kita que gendeh kanaton ta aproba si Jehova, maskin pa tiene kita fe na rescate y bautizao ya? Acorda que gendeh kita puede pirmi confia con el diaton mismo sentido pero puede kita confia con Jehova. Ta considera le como maga recto con aquellos tiene fe na rescate y ya promete le que bendici le que kanila. (Le con el Salmo 5:12; Roma 3:26) El meditacion na rescate ya ayuda con Vicky. Un dia, ya puede le realiza: “Hasta na este maga tiempo, tan paciencia si Jehova conmigo. . . . Pero dol ta habla yo con ele: ‘El de tuyu amor gendeh bastante para ayuda conmigo. El sacrificio del de tuyu Anak gendeh bastante para tapa con el de mio pecado.’” Pero cay ya medita le acerca na regalo del rescate, ya principia le sinti que ta ama con ele si Jehova. Puede tambien kita sinti que ta ama y ta aproba kanaton si Jehova si medita kita con el rescate.

18. Cosa kita puede asigura si continua kita ama con el diaton Tata na cielo?

¹⁸ Maskin pa pricura kita aplica con el cosa kita ya aprende na este articulo, posible siempre kita man luya y pensa si tiene ba kita el favor de Jehova. Si sucede se, acorda que ta aproba le “con aquellos quien ta ama con Ele.” (Sant. 1:12) Poreso, continua queda cerca con Jehova y pensa con el todo maga manera que ta dale le mira que ta aproba le contigo. Y pirmi acorda que si Jehova “gendeh . . . lejos canaton.”—Act. 17:27.