1. Na cosa kita puede asigura?

SI Dios Jehova ta ama con el de suyu maga siervo. Nunca gayot perde ese amor. Ta ama tambien le con el justicia. (Sal. 33:5) Poreso, puede kita asigura con este dos cosas: (1) Duele con Jehova si gendeh enbuenamente ta trata con el de suyu maga siervo. (2) Asigura le que hay ricibi justicia el de suyu maga siervo. Na primer articulo na este serie, * ya aprende kita que base na amor el Ley que ya dale el Dios con el maga Israelita por medio de Moises. Ya anima este con el maga gente que trata con justicia con todo, maskin con aquellos quien gendeh puede protege con el diila mismo cuerpo. (Deut. 10:18) Ese Ley ta revela si paquemodo de hondo el amor de Jehova para con el de suyu maga siervo.

2. Cosa maga pregunta kita contesta?

² Ya termina el Ley de Moises del 33 C.E. cuando ya establicia con el Cristiano congregacion. Pero gendeh este quierre decir que gendeh ta anima con el maga Cristiano que trata con otro con justicia y nuay mas sila ley que base na amor. Tiene nuevo ley el maga Cristiano. Na este articulo, discuti kita una si cosa este nuevo ley. Despues, contesta kita con este maga pregunta: Porque kita puede habla que base na amor este nuevo ley? Porque kita puede habla que ta anima este kanaton que trata con otro con justicia? Bajo na este ley, paquemodo debe trata con otro aquellos quien tiene autoridad?

3. Como cosa ya menciona na Galacia 6:2, cosa el incluido na “Ley de Cristo”?

³ Le con el Galacia 6:2. Bajo el maga Cristiano na “Ley de Cristo.” Nuay escribi si Jesus un lista de ley para na de suyu maga siguidores pero ya dale le kanila instruccion, mandamiento y principio para guia kanila. “El Ley de Cristo” ta inclui con el todo que ya enseña si Jesus. Para mas entende kita con este ley, considera kita con este na siguiente parapo.

4-5. Na cosa maga manera ya enseña si Jesus y cuando le se ya hace?

⁴ Paquemodo ya enseña si Jesus? Una, ya enseña le con el maga gente por medio na cosa le ya habla. Poderoso el de suyu maga palabra cay ya habla le si cosa el verdad acerca con Dios, si cosa el deverasan proposito del vida y ya enseña le que el Reino del Dios amo el solucion na todo sufrimiento del maga gente. (Luc. 24:19) Ya enseña tambien le por medio na de suyu ejemplo. El de suyu manera de vida ya dale mira si paquemodo debe vivi el de suyu maga siguidores.​—Juan 13:15.

⁵ Cuando ya enseña si Jesus? Ya enseña le durante de suyu ministerio na tierra. (Mat. 4:23) Ya enseña tambien le con el de suyu maga siguidores despues del de suyu resureccion. Por ejemplo, ya aparece le con el un grupo de maga dicipulo​—posible mas de 500 gente—​y ya manda kanila “hace maga dicipulo.” (Mat. 28:19, 20; 1 Cor. 15:6) Como el cabeza del congregacion, ya continua enseña si Jesus con el de suyu maga siguidores despues le bira na cielo. Por ejemplo, maga 96 C.E., ya dale le direccion con apostol Juan que anima y dale consejo con el maga iscujido Cristiano.​—Col. 1:18; Rev. 1:1.

6-7. (a) Onde escribido el maga enseñanza de Jesus? (b) Paquemodo kita puede obedece con el ley del Cristo?

⁶ Onde escribido el maga enseñanza de Jesus? Puede le na cuatro Evangelio el manada cosas que ya habla y ya hace le aqui na tierra. El resto del Cristiano Griego Escritura ta ayuda tambien kanaton entende si paquemodo ta pensa si Jesus cay el maga hombre quien ya escribi con este, bajo na guia del sagrao espiritu y tiene “el pensamiento de Cristo.”​—1 Cor. 2:16.

⁷ Leccion: Puede ayuda kanaton el maga enseñanza de Jesus na todo aspeto del diaton vida.  Poreso, el ley del Cristo ta afecta con el todo cosa kita ta hace na casa, na trabajo, na escuela y na congregacion. Ta aprende kita este ley si ta le kita con el Cristiano Griego Escritura y ta medita con ese. Ta obedece kita con este ley si ta obedece kita con el instruccion, mandamiento y principio na este maga libro del Biblia. Si ta obedece kita con el ley del Cristo, ta obedece kita con Jehova cay con ele estaba el todo que ya enseña si Jesus.​—Juan 8:28.

8. Cosa el fundacion del ley de Cristo?

⁸ El un casa que tiene fuerte fundacion ta dale proteccion con el maga gente quien ta queda alli. Na igual manera, el ley que base na fuerte fundacion ta ayuda con aquellos quien ta sigui con ese que sinti protegido. Base el ley de Cristo na de con todo buen fundacion​—el amor. Porque kita se puede habla?

9-10. Cosa ya hace si Jesus que ta dale mira que tiene le amor y paquemodo kita puede imita con ele?

⁹ Una, amor el ya manda move con Jesus para hace maga cosas. El lastima o compasion amo un expresion de amor. Por causa na lastima de Jesus, ya enseña le con el maga gente, ya cura con el maga enfermo, ya dale come con el maga con hambre y ya resucita con el maga muerto. (Mat. 14:14; 15:32-38; Mar. 6:34; Luc. 7:11-15) Maskin pa necesita tiempo y fuerza para hace con ese, si Jesus conforme hace una con el necesidad del otro contra con el de suyu mismo necesidad. Mas pa, ya dale le mira grande amor cuando ya dale le de suyu vida para con otro.​—Juan 15:13.

¹⁰ Leccion: Puede kita imita con Jesus si hace kita una con el necesidad del otro. Puede tambien kita imita con ele si cultiva kita compasion para na maga gente na diaton teritorio. Si el diaton compasion hay move kanaton para predica y enseña con el buen noticia, ta obedece kita con el ley del Cristo.

11-12. (a) Cosa ta dale mira que ta ama gayot kanaton si Jehova? (b) Paquemodo kita puede imita con el amor de Jehova?

¹¹ Ika-dos, ya revela si Jesus el amor del de suyu Tata. Durante del ministerio de Jesus, ya dale le mira si paquemodo de hondo el amor de Jehova para con el de suyu maga siervo. Ya enseña si Jesus el siguiente: Precioso el cada uno kanaton con el diaton Tata na cielo. (Mat. 10:31) Si Jehova con ansias ricibi otravez con el maga carnero quien ta arripinti y ta bira na congregacion. (Luc. 15:7, 10) Ya dale mira si Jehova que ta ama le kanaton cuando ya dale le con el de suyu Anak como rescate para kanaton.​—Juan 3:16.

¹² Leccion: Paquemodo kita puede imita con el amor de Jehova? (Ef. 5:1, 2) Ta mira kita con el cada uno del diaton hermano y hermana que precioso y alegre kita ricibi otravez con el “un perdido carnero” quien ya bira con Jehova. (Sal. 119:176) Ta dale kita mira que ta ama kita con el diaton maga hermano y hermana si ta usa kita diaton tiempo y fuerza para ayuda kanila especialmente si bien necesita sila. (1 Juan 3:17) Si ta dale kita mira amor con otro, ta obedece kita con el ley del Cristo.

13-14. (a) Asegun na Juan 13:34, 35, cosa ya manda si Jesus que dale mira el de suyu maga siguidores y porque este un nuevo mandamiento? (b) Paquemodo kita puede obedece con el nuevo mandamiento?

¹³ Ika-tres, ya manda si Jesus con el de suyu maga siguidores que dale mira amor que conforme hace sacrificio. (Le con el Juan 13:34, 35.) Nuevo el mandamiento de Jesus cay necesita kita dale mira el clase de amor que nuay pidi el Ley de Moises: Debe kita ama con el diaton maga hermano igual si paquemodo ta ama si Jesus kanaton. Necesita kita demonstra amor que conforme hace sacrificio. * Necesita kita ama con el diaton maga hermano y hermana  mas pa na diaton mismo cuerpo. Debe kita tiene el clase de amor que manda move kanaton para conforme muri para kanila, igual na cosa ya hace si Jesus.

¹⁴ Leccion: Paquemodo kita obedece con el nuevo mandamiento? Puede kita se hace si hace kita maga sacrificio para na diaton maga hermano y hermana. Conforme kita hace, gendeh lang el maga grande sacrificio igual como dale diaton vida para kanila, sino hace tambien maga diutay sacrificio. Por ejemplo, ta obedece kita con el ley del Cristo si regular kita ta hace esfuerzo para ayuda con el un de edad hermano o hermana para puede atende na miting, conforme hace una el querrer del otro para queda sila alegre o tan vacacion kita na diaton trabajo para puede ayuda na disaster relief. Ta ayuda tambien kita que sinti protegido el cada uno na diaton congregacion.

15-17. (a) Paquemodo el maga accion de Jesus ta dale mira si cosa de suyu mirada na justicia? (b) Paquemodo kita puede imita con Jesus?

¹⁵ Na Biblia, el “justicia” quierre decir hace si cosa el Dios ta considera como justo y nuay con quien tan afavor. Porque kita puede habla que el ley del Cristo ta anima kanaton que trata con justicia con todo?

¹⁶ Una, pensa si paquemodo el maga accion de Jesus ta dale mira si cosa de suyu mirada na justicia. Na de suyu tiempo, el maga Judio religioso lider ta odia con el maga gendeh Judio, tiene bajo mirada na maga comon Judio y nuay respeto na maga mujer. Pero si Jesus, ta trata enbuenamente con todo y nuay con quien tan afavor. Ya permiti le que sigui con ele el maga gendeh Judio quien tiene fe con ele. (Mat. 8:5-10, 13) Ya predica le con todo, rico man o pobre. (Mat. 11:5; Luc. 19:2, 9) Nuay le trata con el maga mujer na gendeh justo manera. Sino, enbuenamente y con respeto le ya trata kanila incluido con aquellos ta mira el otro que nuay valor.​—Luc. 7:37-39, 44-50.

¹⁷ Leccion: Ta imita kita con Jesus si nuay kita con quien tan afavor y ta predica con todo quien quierre oi​—maskin cosa pa el diila estado na vida y religion. El maga Cristiano hombre ta sigui con el de suyu ejemplo si ta trata sila con el diila maga mujer con respeto. Si ta hace kita con este maga cosas, ta obedece kita con el ley del Cristo.

18-19. Cosa si Jesus ya enseña acerca na justicia y cosa maga leccion kita ya aprende?

¹⁸ Ika-dos, considera si cosa ya enseña si Jesus acerca na justicia. Ya enseña le maga principio que puede ayuda con el de suyu maga siguidores que trata con otro na buen manera. Pensa por ejemplo con el principio na Mateo 7:12. Todo kita quierre que trata kanaton na buen manera. Entonces, debe kita trata kanila na ansina manera. Si hace kita se, posible que trata sila kanaton na buen manera. Pero paquemodo si ya queda kita victima de injusticia? Ya enseña tambien si Jesus con el de suyu maga siguidores que confia que si Jehova “ay dale justicia con [aquellos] quien ta suplica con Ele de dia y de noche.” (Luc. 18:6, 7) Este maga palabra amo un promesa: El diaton Dios sabe si cosa maga probanza kita ta enfrenta na este ultimo maga dia y asigura le que hay ricibi kita justicia na de suyu justo tiempo.​—2 Tes. 1:6.

¹⁹ Leccion: Si ta sigui kita con el maga principio que ya enseña si Jesus, hay trata kita con otro na buen manera. Y si ya queda kita victima de injusticia na mundo de Satanas, puede kita sinti alivio ciendo si Jehova hay dale el justicia que debe para kanaton.

20-21. (a) Paquemodo debe trata con otro aquellos quien tiene autoridad? (b) Paquemodo el un marido puede dale mira amor que conforme hace sacrificio y paquemodo el un tata debe trata con el de suyu maga anak?

²⁰ Bajo na ley del Cristo, paquemodo debe trata con otro aquellos quien tiene autoridad?  Ciendo ese ley base na amor, debe sila trata con amor y dignidad con aquellos quien ya pone bajo na diila autoridad. Debe sila acorda que quierre el Cristo que dale kita mira amor na todo cosa kita ta hace.

²¹ Na familia. El un marido debe ama con el de suyu mujer “igual como cosa ta hace el Cristo con el congregacion.” (Ef. 5:25, 28, 29, NW) El un marido debe imita con el amor que ya dale mira el Cristo por medio de hace una el necesidad y bien del de suyu mujer y gendeh el de suyu. Posible que dificil para con el cuanto hombre que dale mira ese clase de amor cay cuando ya engranda sila, nuay sila mira que ta trata con otro na bueno y amable manera. Posible que dificil para kanila que quita con este gendeh buen practica pero debe sila hace con este maga cambio para puede sila obedece con el ley del Cristo. El un marido quien ta dale mira amor que conforme hace sacrificio hay ganá el respeto del de suyu mujer. El un tata quien deverasan ta ama con el de suyu maga anak nunca kanila hace sinti duele por medio na de suyu palabra y accion. (Ef. 4:31) En vez, ta dale le mira con el de suyu maga anak que ta ama y ta aproba le kanila para sinti sila protegido. Como resulta, el de suyu maga anak hay ama y confia con ele.

22. Base na 1 Pedro 5:1-3, de quien el maga “carnero” y paquemodo kanila debe trata?

²² Na congregacion. Debe acorda el maga anciano que gendeh diila el maga “carnero.” (Juan 10:16; le con el 1 Pedro 5:1-3.) El expresion “el Dios ya confia con ustedes” y “ese amo el querer del Dios” ta hace acorda con el maga anciano que de Jehova el maga carnero. Quierre le que trata con el maga carnero na enbuenamente y amable manera. (1 Tes. 2:7, 8) El maga anciano quien ta hace con el diila responsibilidad na amable manera hay ganá el favor de Jehova. Hay ama y respeta tambien kanila el maga hermano y hermana.

23-24. (a) Cosa el responsibilidad del maga anciano si tiene na congregacion ya comete serioso culpa? (b) Cosa necesita acorda el maga anciano si ta agarra ansina clase de caso?

 ²³ Cosa el papel del maga anciano llega na maga caso que envuelto el serioso culpa? Gendeh igual el diila papel na maga juez y anciano que bajo na Ley de Moises. Bajo na ese Ley, el maga iscujido hombre gendeh lang ta agarra maga caso acerca na maga espiritual cosas sino maga caso tambien que gendeh directamente relatao na adoranza con Jehova. Pero bajo na ley del Cristo, si tiene serioso culpa que ya comete, el caso que agarra el maga anciano aquel lang relatao na espiritual cosas. Ta conoce sila que el Dios ya dale autoridad con el gobierno para agarra maga civil y criminal caso. Incluido aqui el dalida de castigo igual como pagada de multa o hace preso.​—Rom. 13:1-4.

²⁴ Cosa el responsibilidad del maga anciano si tiene na congregacion ya comete serioso culpa? Ta usa sila con el Escritura para examina maga cosas y hace decicion. Ta pone sila na pensamiento que base na amor el ley del Cristo. El amor amo manda move con el maga anciano para considera: Cosa necesita hace para puede ayuda con el maskin quien miembro del congregacion que ya queda victima de serioso culpa? Si acerca con el quien ya comete serioso culpa, el amor manda move con el maga anciano para considera: Ya arripinti ba le? Puede ba con ele ayuda para tiene le otravez buen relacion con Jehova?

25. Cosa hay discuti na siguiente articulo?

²⁵ Ta rindi gayot kita gracias cay bajo kita na ley del Cristo! Si todo kita ta hace esfuerzo para obedece con ese, ta ayuda kita para el cada miembro del congregacion hay sinti que valoroso, protegido y que ta ama kanila. Pero siempre, ta vivi kita na un mundo donde el maga “gente malo” ta queda “mas malo.” (2 Tim. 3:13) Pirmi kita debe esta alerto. Paquemodo el Cristiano congregacion puede reflecta con el mirada del Dios na justicia si tiene quien ya comete sexual abuso na maga bata? El siguiente articulo hay contesta con ese pregunta.