1-3. (a) Asegun na Salmo 5:4-6, cosa el sentido de Jehova na maldad? (b) Porque kita puede habla que contra gayot na “Ley de Cristo” el abuso na maga bata?

SI Dios Jehova ta odia todo clase de maldad. (Le con el Salmo 5:4-6.) Ta odia gayot le especialmente con el sexual abuso na maga bata cay este un detestable y maka-asco crimen! Cay maga Testigo kita de Jehova, ta imita kita con ele y ta odia con el sexual abuso na maga bata y gendeh kita ta permiti con ese na Cristiano congregacion.​—Rom. 12:9; Heb. 12:15, 16.

² Maskin cosa acto de sexual abuso na maga bata contra gayot na “Ley de Cristo”! (Gal. 6:2) Porque kita se puede habla? Como cosa kita ya puede aprende del ya pasa articulo, el ley del Cristo—el todo cosa ya enseña si Jesus por medio na de suyu palabra y ejemplo—base na amor y ta anima kanaton para trata con justicia con otro. Cay ta obedece el maga deverasan Cristiano con este ley, ta manda sila sinti protegido con el maga bata y deverasan kanila ta ama. Pero el sexual abuso na maga bata gendeh gayot justo. El quien ta hace con ese ta pensa lang el de suyu mismo cuerpo y ta manda sinti con el bata que nuay con ele quien ta protege y ta ama.

³ Maka-triste cay el sexual abuso na maga bata bien comon ya na entero mundo y maskin el maga deverasan Cristiano afectao con este serioso problema. Porque? Cay bien manada ya “maga gente malo y maga engañador” y el cuanto posible pricura entra na congregacion. (2 Tim. 3:13) Omento pa, el cuanto quien ta sirvi con Jehova del otro ya tiene sexual deseo y ya comete sexual abuso na maga bata. Discuti kita si porque un  serioso culpa el sexual abuso na maga bata. Despues, discuti kita si cosa ta hace el maga anciano si tiene na congregacion ya comete un serioso culpa incluido ya el abuso na maga bata y si paquemodo puede protege el maga mayores con el diila maga anak. *

4-5. Porque el abuso na bata un culpa na victima?

⁴ El efecto del abuso na maga bata ta esta por largo tiempo. Ta afecta este con el maga victima y con aquellos quien ta ama con el maga victima—diila familia y el maga hermano y hermana na fe. Un bien serioso culpa el abuso na maga bata.

⁵ Culpa na victima. * Un culpa si hace kita sinti duele con otro y causa sufrimiento kanila. Como cosa kita discuti na siguiente articulo, el quien ta abusa con el bata ta hace sinti duele con ele na grabe manera. Maskin pa ya confia con ele el bata, intencional le ya hace sinti duele con este y ya manda sinti con el bata que gendeh le protegido. Debe kita protege con el maga bata na este clase de maldad y el maga bata quien ya queda victima de ese necesita comforta y ayuda.​—1 Tes. 5:14.

6-7. Na cosa manera el abuso na bata un culpa na congregacion y na gobierno?

⁶ Culpa na congregacion. El un miembro del congregacion quien ya comete abuso na bata ta hace malo con el reputacion del congregacion. (Mat. 5:16; 1 Ped. 2:12) Gendeh justo habla que el Cristiano congregacion ta permiti con el abuso na maga bata cay millones de maga fiel Cristiano ta pricura actua na manera que ta dale gloria con Jehova. (Judas 3) Gendeh kita ta permiti con el un persona que esta na congregacion si ta hace le mal cosas y gendeh ta arripinti y ta hace malo con el reputacion del congregacion.

⁷ Culpa na gobierno. El maga Cristiano “necesita obedece con el autoridad del gobierno.” (Rom. 13:1) Ta somete kita na gobierno si ta respeta y ta obedece kita con el diila ley. Si el un miembro del congregacion ya comete crimen igual como abuso na maga bata, ta culpa le na gobierno. (Compara na Act. 25:8.) El maga anciano nuay autoridad para castiga con el un gente quien ya comete crimen pero gendeh sila ta protege con el quien ta abusa maga bata si castiga con ele el gobierno. (Rom. 13:4) Hay cosecha le con el cosa le ya siembra.​—Gal. 6:7.

8. Cosa el mirada de Jehova con el culpa que ya comete contra na otro persona?

⁸ Mas pa na todo, un culpa con Dios. (Sal. 51:4) Si el un persona ta culpa na otro persona, ta culpa tambien le con Jehova. Considera un ejemplo na Ley que ya dale el Dios na Israel. El Ley ya habla que si el un gente ya ruba o ya engaña con el de suyu vecinos, “nuay [le] esta fiel con Jehova.” (Lev. 6:2-4) Entonces, el un miembro del congregacion quien ya abusa bata, gendeh fiel con Dios y ta culpa con Jehova cay intencional le ya engaña con el bata. Ya usa le con el confianza del bata para hace sinti duele con este y como resulta, gendeh mas ta sinti protegido el bata. El quien ta abusa con el maga bata ta hace malo con el nombre de Jehova. Poreso, debe kita acorda que el sexual abuso na maga bata un detestable culpa con Dios.

9. Cosa informacion base na Biblia ya dale el organizacion de Jehova y porque?

 ⁹ Por largo tiempo, el organizacion de Jehova ta dale abundancia de informacion estaba na Biblia acerca na abuso na maga bata. Por ejemplo, el articulo na El Torre de Guardia y Awake! ta discuti si paquemodo puede enfrenta aquellos quien ya experiencia sexual abuso con el cosa ya sucede kanila, si paquemodo puede ayuda y anima kanila el otro y si paquemodo puede protege el maga mayores con el diila maga anak. El organizacion ya dale instruccion con el maga anciano estaba na Biblia si cosa hace si tiene quien ya comete abuso na maga bata. El organizacion ta continua man repaso con el manera del maga anciano si tiene quien ya comete abuso na maga bata. Porque? Para asigura que el manera si paquemodo sila ta enfrenta con ese, harmonia na ley del Cristo.

10-12. (a) Si tiene na congregacion ya comete serioso culpa, cosa ta acorda el maga anciano y cosa el diila goal? (b) Asegun na Santiago 5:14, 15, cosa ta pricura hace el maga anciano?

¹⁰ Si tiene na congregacion ya comete serioso culpa, el maga anciano ta acorda con el ley del Cristo que necesita sila trata con el maga carnero con amor y hace si cosa el justo na ojos del Dios. Como resulta, debe sila pensa enbuenamente acerca na cuanto cosas si ya sabe sila que tiene quien ya comete serioso culpa. El primer goal del maga anciano amo dale honor con Jehova y protege con el de suyu reputacion. (Lev. 22:31, 32; Mat. 6:9) Ta pensa tambien sila el espiritualidad del diila maga hermano y hermana na congregacion y quierre sila ayuda con maskin quien ya queda victima del un serioso culpa.

¹¹ Si el quien ya comete serioso culpa un miembro del congregacion, el maga anciano ta pricura determina si ya arripinti ba le y ayuda con ele hace bira de suyu buen relacion con Jehova si posible. (Le con el Santiago 5:14, 15.) El un Cristiano quien ya tiene mal deseo y ya comete serioso culpa, enfermo na espiritual. Este quierre decir que nuay mas le buen relacion con Jehova. * Puede kita compara con el maga anciano na un doctor. Ta pricura sila “cura con el emfermo [na este situacion, el quien ya comete serioso culpa].” El diila consejo estaba na Biblia puede con ele ayuda hace bira de suyu buen relacion con Dios pero posible lang este si deverasan le ya arripinti.​—Act. 3:19; 2 Cor. 2:5-10.

¹² Claro, tiene importante responsibilidad el maga anciano. Ta ama gayot sila con el maga carnero que ya entrega kanila el Dios. (1 Ped. 5:1-3) Quierre sila que sinti protegido el maga hermano y hermana na congregacion. Poreso, ta actua sila dayun si ta sabe sila que tiene quien ya comete serioso culpa, incluido ya el abuso na bata. Considera con el maga pregunta na principio del  parapo 13,  15 y  17.

13-14. Ta obedece ba el maga anciano con el ley del gobierno que reporta na maga autoridad si tiene quien ya abusa bata? Explica.

 ¹³ Ta obedece ba el maga anciano con el ley del gobierno que reporta na maga autoridad si tiene quien ya abusa bata? Si. Na lugar que tiene ese ley, el maga anciano ta obedece con ese y ta reporta si tiene quien ya abusa bata. (Rom. 13:1) Ese ley gendeh ta viola con el ley del Dios. (Act. 5:28, 29) Poreso, si tiene quien ya habla na maga anciano que tiene quien ya abusa bata, ta pidi dayun sila direccion na branch office si paquemodo sila obedece con ese ley.

 ¹⁴ Ta hace acorda el maga anciano con el victima, con el diila maga mayores y con aquellos quien sabe acerca con este situacion que puede sila reporta na autoridad si tiene ya sucede abuso. Pero paquemodo si el quien ya comete abuso un miembro del congregacion y ya sabe ya el comunidad acerca con este? Debe ba pensa el un Cristiano quien ya reporta que culpa de suyu cay ya hace le malo con el reputacion de Jehova? Gendeh. El quien ya abusa amo el ya hace malo con el nombre del Dios.

15-16. (a) Asegun na 1 Timoteo 5:19, porque necesita dos testigo el maga anciano para forma judicial committee? (b) Cosa hace el maga anciano si ya sabe sila que ya acusa con el un miembro del congregacion que ya abusa bata?

 ¹⁵ Porque necesita dos testigo el maga anciano na congregacion para dale prueba que tiene quien ya comete serioso culpa? Cay parte este del alto principio del Biblia acerca na justicia. Si ya acusa con el un persona que ya comete serioso culpa pero nuay le admiti con este, debe tiene dos testigo para puede forma judicial committee el maga anciano. (Deut. 19:15; Mat. 18:16; le con el 1 Timoteo 5:19.) Quierre decir ba de este que debe tiene dos testigo antes reporta na autoridad que tiene quien ya abusa bata? Gendeh necesita dos testigo si reporta el maga anciano o el otro acerca na un crimen.

¹⁶ Si ya sabe el maga anciano que ya acusa con el un miembro del congregacion que ya abusa bata, ta obedece sila con el ley del gobierno que reporta con ese y investiga sila si cosa gayot ya sucede. Despues de ese, base na cosa ta habla el Biblia, determina sila si necesita ba forma judicial committee. Si ya nega el persona con el acusacion, hay considera el maga anciano con el testimonia del maga testigo. Si el quien ta acusa y otro pa gente ya habla que este persona ya abusa con este bata o con otro pa bata, tiene ya bastante prueba el maga anciano para forma un judicial committee. * Si nuay el ika-dos testigo, gendeh se quierre decir que gendeh deverasan el acusacion. Maskin nuay dos testigo el puede confirma que el un persona ya comete sexual abuso na bata, el maga anciano sabe que posible el un persona ya comete serioso culpa y ya puede hace sinti duele con otro. El maga anciano hay continua dale comforta y suporta con aquellos afectao. Y el maga anciano hay esta alerto para protege con el congregacion na posible peligro que puede causa el un persona quien posible ya abusa bata.​—Act. 20:28.

17-18. Explica si cosa el papel del judicial committee.

 ¹⁷ Cosa el papel del judicial committee? El termino “judicial” gendeh quierre decir que juzga el maga anciano si debe ba castiga el maga autoridad con el persona quien ya desobedece con el ley. Gendeh ta entrevini el maga anciano sino ta deja sila con el autoridad para decidi si paquemodo castiga con aquellos quien ya desobedece con el ley. (Rom. 13:2-4; Tito 3:1) El maga anciano ta juzga o ta determina si puede ba esta na congregacion el un individual.

¹⁸ Si ta sirvi na judicial committee el maga anciano, ta juzga lang sila acerca na maga cosas que tiene que hace na relacion del un persona con Dios y na maga hermano y hermana na fe. Ta usa sila con el Biblia para ayuda kanila determina si ta arripinti ba el quien ya abusa o gendeh. Si gendeh le ta arripinti, hay man disfellow con ele y anuncia na congregacion. (1 Cor. 5:11-13) Si ta arripinti le, puede le esta na congregacion. Pero habla con ele el maga anciano que posible gendeh mas le cualificao ricibi privilegio o tiene responsibilidad na congregacion. Cay ta pensa el maga anciano con el bien del maga bata, hay habla sila na  privado con el mayores del maga bata que necesita sila esta alerto si el diila maga anak talli junto con ese persona. Si dale aviso el maga anciano na mayores, tiene sila cuidao que gendeh revela si con quien ya abusa ese persona.

19-22. Cosa puede hace el maga mayores para protege con el diila maga anak? (Mira con el letrato na cover.)

¹⁹ Quien tiene el primer responsibilidad para protege con el maga bata na peligro? El maga mayores. * El de tuyu maga anak un regalo estaba con Dios, un “herencia estaba con Jehova.” (Sal. 127:3) Ya dale si Jehova contigo el responsibilidad que protege con el de tuyu anak. Cosa tu puede hace para protege con el de tuyu anak na abuso?

²⁰ Una, sabe acerca na abuso. Aprende si cosa clase de maga gente el ta abusa bata y el manera si paquemodo sila ta engaña kanila. Queda alerto na posible peligro. (Prov. 22:3; 24:3) Acorda que na manada situacion, el quien ta abusa amo aquellos quien conoce y ta confia el bata.

²¹ Ika-dos, mentena el buen comunicacion na de tuyu anak. (Deut. 6:6, 7) Quierre decir, necesita tu oi enbuenamente con el de tuyu anak. (Sant. 1:19) Acorda que el un bata quien ya experiencia abuso tiene miedo habla con otro si cosa ya sucede. Tiene le miedo que gendeh con ele creé o baka ya amenaza con ele el quien ya abusa que tiene le cosa hace si avisa el bata. Si ta suspecha tu que tiene cosa ya sucede gendeh bueno, pregunta con el de tuyu anak y oi con paciencia si cosa le habla.

²² Ika-tres, enseña con el de tuyu maga anak. Habla kanila si cosa sila necesita sabe acerca na sexo. El informacion que debe tu habla kanila ta depende na diila edad y cosa sila puede entende. Enseña kanila si cosa sila habla o hace si tiene quien quierre agarra kanila na gendeh justo manera. Usa con el maga informacion que ya dale el organizacion del Dios si paquemodo protege con el de tuyu maga anak.—Mira con el cajon “ Informacion Para Contigo y na De Tuyu Anak.”

23. Cosa el diaton mirada na sexual abuso na maga bata y cosa pregunta hay contesta na siguiente articulo?

²³ Como maga Testigo de Jehova, ta mira kita con el sexual abuso na maga bata como un detestable culpa y bien serioso crimen. Ciendo bajo kita na ley del Cristo, gendeh kita ta protege con el quien ya abusa desde na consequencia del de suyu culpa. Pero cosa kita puede hace para ayuda con aquellos quien ya experiencia abuso? El siguiente articulo hay contesta con ese pregunta.