1-2. (a) Dale un ejemplo que ta dale mira que el maga gente ta necesita comforta y tiene abilidad dale comforta con otro. (b) Na cosa manera ya hace sinti duele con el cuanto bata?

TODO gente ta necesita comforta y tiene abilidad dale comforta con otro. Por ejemplo, si ya tumba el bata y ya casca el tuhud mientras ta juga, posible llurando le anda con Mamang o con Papang. El maga mayores gendeh puede cura con el irida pero puede sila dale comforta con el bata. Puede sila pregunta si cosa ya pasa, limpia el de suyu luha, supla de aire con el irida y pone medicina o bandage. Gendeh tarda, el bata gendeh mas llura y baka bira pa gane juga. Llega el tiempo, queda lang bueno el irida.

² Pero tiene vez, el bata ya sinti duele na mas grabe manera. El otro ya experiencia sexual abuso. Posible, ya sucede este una vez o manada beses por largo tiempo. Maskin cuanto beses pa se ya sucede, ese abuso ya causa sobra dolor na emocion que gendeh ta perde. Na cuanto caso, ya cuji y ya castiga con el quien ya abusa. Pero tiene vez, nuay cuji con el quien ya abusa o nuay gayot castiga. Pero maskin pa ya castiga dayun con el quien ya abusa, el victima posible siempre sufri maskin pa adulto ya le.

3. Como cosa ya menciona na 2 Corinto 1:3, 4, cosa el voluntad de Jehova y cosa maga pregunta kita considera?

³ Si el un Cristiano ya queda victima de abuso cuando bata le y ta sufri pa siempre na emocion maskin adulto ya, cosa puede ayuda con ele? (Le con el 2 Corinto 1:3, 4.) Asigurao, voluntad de Jehova que el de suyu maga carnero hay ricibi el  amor y comforta que ta necesita sila. Poreso, considera kita tres pregunta: (1) Porque ta necesita comforta aquellos quien ya queda victima de abuso cuando bata? (2) Quien puede dale comforta kanila? (3) Paquemodo kita dale comforta na efectivo manera?

4-5. (a) Porque importante acorda que el maga bata bien diferente na maga adulto? (b) Cosa el efecto del abuso na confianza del bata con otro?

⁴ El cuanto adulto quien ya queda victima de abuso cuando bata, ta necesita siempre comforta maskin pa manada año ya el ya pasa. Para puede kita entende si porque, debe kita acorda que el maga bata bien diferente na maga adulto. Otro el efecto del abuso na maga bata contra na maga adulto. Considera el cuanto maga ejemplo.

⁵ El maga bata necesita queda cerca y puede confia con aquellos quien ta hace engranda y ta cuida kanila. Si cerca sila y ta confia con aquellos quien ta cuida kanila, ta sinti el maga bata que protegido sila y hay aprende sila confia con todo quien ta ama kanila. (Sal. 22:9) Maka-triste, mayoria del abuso ta sucede na casa y mismo el miembro del familia y amigo o amiga del mayores el quien ta abusa. Si ya abusa con el bata el un persona con quien le ta confia, dificil ya para con ele confia con otro maskin cuanto año ya el ya pasa.

6. Porque el sexual abuso ta causa dolor y peligro?

⁶ El maga bata gendeh ta puede protege con el diila mismo cuerpo y el sexual abuso ta causa kanila dolor y peligro. Bien peligroso si forza con el maga bata hace maga sexual acto antes sila queda adulto. El abuso puede hace malo con el diila mirada na sexo y na diila mismo cuerpo. Puede tambien este manda move kanila para gendeh confia maskin con quien.

7. (a) Porque facil lang engaña con el maga bata y paquemodo se ta hace el maga quien ta abusa? (b) Cosa posible el maga resulta del diila maga imbusterias?

⁷ El maga bata nuay pa capacidad para pensa enbuenamente, hace maga decicion o identifica y evita peligro. (1 Cor. 13:11) Poreso, facil lang para con el un persona que engaña y abusa con el un bata. El maga quien ta abusa tan imbusterias con el maga bata igual como culpa del bata si porque ya abusa con ele, que debe esconde si cosa ya pasa, que nuay con ele quien creé o ayuda si avisa le. Ta manda tambien sila creé que el maga sexual acto entre na un adulto y un bata normal expresion lang de sincero amor. Puede lang realiza el bata que imbusterias este despues pa de cuanto año. Ese bata posible engranda que ta pensa que ele mabuling y gendeh con ele conviene dale amor o comforta.

8. Porque kita puede asigura que si Jehova puede dale comforta con aquellos quien ya sinti duele?

⁸ Poreso, gendeh maka-estraña que el sexual abuso ta causa peligro por largo tiempo. Bien terrible gayot este crimen! Comon ya este na entero mundo y evidencia este que ta vivi ya kita na ultimo maga dia donde manada el “noay lastima” y “el maga gente malo y maga engañador ay queda mas malo.” (2 Tim. 3:1-5, 13) Bien malo gayot el maga tactica de Satanas y maka-triste si ta hace el maga gente el querrer del Diablo. Pero, mas poderoso si Jehova contra con Satanas y con aquellos quien ta hace malo. Sabe si Jehova si cosa el maga tactica de Satanas. Puede kita asigura que sabe si Jehova si cosa dolor kita ta sinti y puede le dale el comforta que necesita kita. Un bendicion para kanaton que ta sirvi kita con “el Dios de todo clase de consuelo. Ele ta dale consuelo [kanaton] na todo [diaton] maga sufrimiento para [kita] tamen ay puede dale consuelo  con otros na diila maga sufrimiento, por medio del consuelo que [kita] mismo ya recivi con el Dios.” (2 Cor. 1:3, 4) Pero con quien man ta usa si Jehova para dale comforta con otro?

9. Como cosa ya menciona si Rey David na Salmo 27:10, cosa hace si Jehova con aquellos nuay protege el mayores?

⁹ Necesita comforta el maga victima que nuay protege el mayores maskin sabe sila acerca na abuso o quien ya queda victima de abuso de aquellos con quien sila ta confia. Sabe si Rey David que puede kita confia que si Jehova pirmi kanaton dale comforta. (Le con el Salmo 27:10.) Convincido si David que si Jehova hay cuida con aquellos quien ya experiencia maltratamiento na diila familia. Paquemodo se hace si Jehova? Ta usa le con el de suyu maga fiel siervo. El diaton maga hermano y hermana na congregacion amo el diaton espiritual familia. Por ejemplo, si Jesus ya habla que aquellos quien ya adora con Jehova junto con ele amo el de suyu maga hermano, hermana y nana.​—Mat. 12:48-50.

10. Cosa ya hace si apostol Pablo como un anciano?

¹⁰ Considera un ejemplo si paquemodo el congregacion puede queda igual na un familia. Si apostol Pablo un trabajador y fiel anciano. Ya dale le buen ejemplo y ya anima le con otro que imita con ele como ya imita le con el Cristo. (1 Cor. 11:1) Nota si cosa ya hace si Pablo como un anciano: “Ya queda came humilde entre con ustedes. Igual como un nana quien ta cuida con cariño con su maga anak.” (1 Tes. 2:7) El maga leal anciano ahora puede tambien usa maga buen palabra mientras ta usa sila con el Biblia para dale comforta con aquellos ta necesita ayuda.

11. Cosa ta dale mira que gendeh lang el maga anciano el puede dale comforta?

¹¹ El maga anciano lang ba el puede dale comforta con aquellos ya queda victima de abuso? Gendeh. Todo kita tiene responsibilidad para dale comforta con uno y otro. (1 Tes. 4:18) Grande ayuda el maga mature hermana  na congregacion especialmente con el maga hermana quien ta necesita comforta. Justo gayot que ya compara con Jehova na un nana quien ta dale comforta con el de suyu anak. (Isa. 66:13) El Biblia ta contene maga ejemplo del maga mujer quien ya dale comforta con aquellos quien ya experiencia dificultad. (Job 42:11) Bien alegre si Jehova mira ahora con el maga Cristiano mujer que ta dale comforta con el maga hermana quien ta sufri na emocion. Na cuanto situacion, el maga anciano posible pidi ayuda na privado con el un mature hermana si puede ba le ayuda con el un hermana quien ta sufri na ansina manera. *

12. Cosa kita debe evita hace?

¹² Siempre, si ta pricura kita ayuda con el un hermano o un hermana, evita kita pregunta maga cosas que no quierre le discuti. (1 Tes. 4:11) Cosa kita puede hace para con aquellos quien ta necesita ayuda y comforta? Considera kita cinco manera que puede kita aprende na Biblia para puede ayuda con otro.

13. Como cosa ya relata na 1 Rey 19:5-8, cosa ya hace el un angel de Jehova para con Elias y paquemodo kita puede imita con el angel?

¹³ Dale practical ayuda. Cuando si profeta Elias ya escapa cay tiene con ele quien quierre mata, ya queda le bien maluya y quierre ya lang le muri. Ya imbia si Jehova un angel para anima con Elias. Ya dale el angel practical ayuda. Ya dale le comida con el profeta y ya habla con ele que come con este. (Le con el 1 Rey 19:5-8.) Ese istoria ta enseña un importante verdad: Tiene vez, grande cosa puede ayuda el simple cosa que ta hace kita. Para dale mira el diaton amor, puede kita dale comida, un simple regalo o card para anima con el un hermano o hermana quien ta enfrenta dificultad. Si gendeh kita comfortable discuti bien personal cosas, puede siempre kita dale practical ayuda kanila.

14. Cosa leccion kita puede aprende na experiencia de Elias?

¹⁴ Asigura que comfortable el victima y ta sinti protegido. Puede kita aprende otro leccion na experiencia de Elias. Milagroso ya dale si Jehova el necesidad del profeta para puede le llega na Monte de Horeb. Posible, ya sinti protegido si Elias na ese lugar​—el lugar donde ya hace contrata si Jehova junto con el de suyu maga siervo cuanto siglo ya el ya pasa. Posible, ya sinti si Elias que lejos ya le na maga gente quien quierre mata con ele. Cosa kita puede aprende na este ejemplo? Si quierre kita dale comforta con el un victima de abuso, necesita kita una manda sinti con ele que protegido le. Por ejemplo, debe considera el maga anciano que baka mas comfortable el un hermana si na casa lang le en vez na Kingdom Hall. El otro tambien posible mas quierre na Kingdom Hall en vez na casa.

15-16. Cosa quierre decir que oi enbuenamente?

¹⁵ Oi enbuenamente. El Biblia ta dale este consejo: “Man alisto ustedes para oi, pero no conversa dayun.” (Sant. 1:19) Ta oi ba kita enbuenamente? Posible ta pensa kita que ta oi ya kita enbuenamente si ta mira kita con el persona y nuay kita cosa ta habla. Pero, mas pa con ese el necesita kita hace. Por ejemplo, ya habla si Elias con Jehova si cosa gayot le ta sinti y si Jehova ya oi gayot con ele. Ya mira si Jehova que si Elias tiene miedo, ta sinti solo y ta pensa que nuay valor el todo cosa le ya hace. Ya ayuda si Jehova na amable manera con Elias para perde el de suyu negativo sentido. Ya dale mira si Jehova que deverasan le ya oi con Elias.​—1 Rey 19:9-11, 15-18.

 ¹⁶ Paquemodo kita dale mira simpatia, compasion y amor mientras ta oi kita con el un persona? Tiene vez, na un poco pero con cuidao y bonito palabra ta puede kita dale mira el cosa kita ta sinti. Puede tu habla: “Bien triste yo na cosa ya pasa contigo. Gendeh se debe sucede na un bata!” Posible puede tu pregunta para asigura que ya entende tu con el cosa le ya habla. Puede tu pregunta, “Puede ba tu hace entende conmigo si cosa tu quierre decir?” o “Este el cosa yo ya entende na cosa tu ya habla . . . Justo ba yo?” Ese amable expresion puede asigura con el un persona que ta oi gayot tu y ta pricura entende con ele.—1 Cor. 13:4, 7.

17. Porque debe kita queda paciencioso y “no conversa dayun”?

¹⁷ Pero tiene cuidao y “no conversa dayun.” No man sabat para dale consejo o corecta el pensamiento del un persona. Y queda paciencioso! Cuando si Elias ya habla con Jehova si cosa le ta sinti, bien dolorido le y bien triste. Na uliji, despues anima si Jehova con Elias, ya habla otravez el profeta si cosa le ta sinti usando el igual palabra que ya habla le del primero. (1 Rey 19:9, 10, 13, 14) Cosa este ta enseña kanaton? Tiene vez, el maga dolorido persona necesita habla si cosa sila ta sinti gendeh lang una vez. Igual con Jehova, quierre kita oi con paciencia kanila. En vez de pricura dale solucion, dale kita mira simpatia y compasion.​—1 Ped. 3:8.

18. Porque puede dale comforta con el un persona si reza kita junto con ele?

¹⁸ Sincero reza junto con el maga depress. El un depress persona posible ta sinti que no puede ya le reza. Baka ta sinti le que nuay le valor poreso gendeh le ta reza con Jehova. Si quierre kita dale comforta con ese persona, puede kita reza junto con ele y menciona de suyu nombre. Puede kita habla con Jehova si paquemodo de hondo el diaton amor y del congregacion para con ese persona. Puede kita pidi con Jehova que dale alivio y comforta  con el de suyu precioso siervo. Ese clase de rezo ta dale gayot comforta.​—Sant. 5:16.

19. Paquemodo kita puede prepara para dale comforta con el un persona?

¹⁹ Iscuji palabra que ta dale alivio y comforta. Pensa antes de converza. Puede sinti duele el un persona si gendeh kita pensa si cosa kita habla. El maga bonito palabra ta puede dale alivio. (Prov. 12:18) Poreso, reza con Jehova para el maga palabra que usa tu puede dale comforta y alivio. Acorda que el maga palabra de Jehova na Biblia amo el mas puede ayuda con el persona.​—Heb. 4:12.

20. Cosa posible ta pensa aquellos quien ya queda victima de abuso y cosa kita quierre manda acorda kanila?

²⁰ El cuanto victima de abuso posible ta pensa que sila mabuling, nuay valor, nuay kanila quien ta ama y gendeh kanila conviene ama. Un imbusterias gayot se! Poreso, usa con el Palabra del Dios para manda acorda kanila que valoroso sila na vista de Jehova. (Mira con el cajon “ Comforta Estaba na Escritura.”) Acorda si paquemodo el un angel ya anima con profeta Daniel na tiempo que ele maluya y depress. Si Jehova quierre manda sabe con Daniel que precioso le. (Dan. 10:2, 11, 19) Na igual manera, el diaton maga depress hermano y hermana precioso con Jehova!

21. Cosa sucede con aquellos quien ya abusa y nuay arripinti y cosa kita determinao hace mientras tanto?

²¹ Si ta dale kita comforta con otro, ta hace kita acorda kanila que ta ama kanila si Jehova. Y gendeh kita debe ulvida que si Jehova un Dios de justicia. Nuay maskin cosa abuso el escondido con Jehova. Si Jehova ta mira todo y asigura le que hay castiga con todo quien ya abusa y nuay arripinti. (Num. 14:18) Mientras tanto, hace kita todo lo que puede para dale mira diaton amor con aquellos quien ya queda victima de abuso. Mas pa, ta dale gayot kanaton comforta cay sabe kita que si Jehova hay dale permanente alivio con aquellos quien ya queda victima de abuso na mano de Satanas y na de suyu mundo! Gendeh mas dura, gendeh ya sila acorda con el dolor que ya experiencia sila.​—Isa. 65:17.