1. Porque el otro posible nuay gana estudia?

BIEN dificil busca sen na este tiempo. Manada del diaton maga hermano ta dale mucho hora na trabajo para puede dale el necesidad del diila familia. El otro ta gasta largo hora na viaje para anda na trabajo y para bolbe na casa. Manada ta hace pesao trabajo para puede suporta con el diila familia. Poreso acaba el dia, bien cansao ya el diaton maga hermano y hermana! Como resulta, nuay sila gana estudia.

2. Cosa el de tuyu schedule para estudia?

² Pero el deverasan, debe kita dale tiempo para estudia enbuenamente con el Palabra del Dios y el diaton maga publicacion. El diaton relacion con Jehova y el diaton esperanza obtene vida hasta para cuando ta depende con ese! (1 Tim. 4:15, 16) El otro ta dispierta temprano todo’l dia y ta estudia mientras silencio el alrededor y relax el diila pensamiento. El los demas ta estudia y ta medita con el Biblia y diaton maga publicacion por cuanto minuto antes de durmi.

3-4. Cosa maga cambio ya hace na diaton maga publicacion y porque?

³ Asigurao, uyun tu que importante que dale kita tiempo para estudia. Pero cosa kita debe estudia? Baka habla tu: ‘Bien manada el cosa kita para le. Dificil le con ese todo.’ El cuanto ta puede estudia y beneficia na todo maga espiritual provision pero manada del diaton maga hermano y hermana tan dificil hace con ese. Sabe se el Cuerpo Gobernante. Poreso, ya dale sila direccion que menora con el diaton maga publicacion, printed man este o talli na Internet.

⁴ Por ejemplo, gendeh mas tan publish con el Yearbook of Jehovah’s Witnesses cay manada ya maga bonito experiencia que  puede incuntra na jw.org^® y na maga programa na JW Broadcasting^® cada mes. Y ahora, tres beses ya lang na un año tan publish con el publico edicion del magasin El Torre de Guardia y Awake! Nuay hace con este maga cambio para tiene kita tiempo para na otro actividad. Sino, ya hace con este para tiene kita tiempo man focus na “maga cosas que mas importante.” (Fil. 1:10, NW) Discuti kita si paquemodo tu determina si cosa una estudia y si paquemodo tu mas beneficia na de tuyu personal estudiada del Biblia.

5-6. Cosa maga publicacion el debe kita estudia enbuenamente?

⁵ Cosa kita debe estudia una? Debe kita dale tiempo cada dia para estudia con el Palabra del Dios. Mas poco versiculo ahora el necesita le na lehida de Biblia cada semana para tiene kita mas grande tiempo para medita y man research. Gendeh lang diaton goal que acaba le con el versiculo para na ese semana sino para alcanza na corazon el mensaje del Biblia y queda mas cerca con Jehova.​—Sal. 19:14.

⁶ Cosa pa kita debe estudia enbuenamente? Siempre, quierre kita prepara para na Estudiada del El Torre de Guardia y Estudiada del Congregacion na Biblia y con el otro informacion para na diaton midweek miting. Debe tambien kita le el cada issue del El Torre de Guardia y Awake!

7. Debe ba kita man luya si gendeh kita ta puede le o mira con el todo material na diaton website y na JW Broadcasting?

⁷ Posible habla tu: ‘OK. Pero paquemodo el maga articulo y video que puede incuntra na diaton website jw.org y na JW Broadcasting? Bien manada gayot quel!’ Considera con este ilustracion: Bien manada clase de sabroso comida el puede come na un eat-all-you-can restaurant. El maga customer gendeh puede pruba con el todo comida que talli. Poreso, come lang sila el cuanto de ese. Na igual manera, si no puede tu le o mira con el todo provision del organizacion na Internet, no man luya. Le y mira si cosa lang tu puede. Discuti kita ahora si cosa el envuelto na estudiada y si paquemodo kita mas beneficia con ese.

8. Cosa kita posible considera si ta estudia con El Torre de Guardia y paquemodo tu beneficia con ese?

⁸ Si ta estudia, debe tu man focus na cosa tu ta le para tiene tu cosa puede aprende. El estudiada gendeh lang basta le con el material y man underline con el maga contestacion. Por ejemplo, si ta prepara para na Estudiada del El Torre de Guardia, le una con el preview na principio del articulo. Acabar, considera con el titulo del articulo, maga subtitulo y repaso pregunta. Despues, le enbuenamente y hinay-hinay con el articulo. Pone atencion con el sentence que ta discuti si acerca na cosa el parapo. Mas mucho, amo este el primer sentence del cada parapo. Mientras ta le con el articulo, pensa si paquemodo el cada parapo ta suporta con el subtitulo y tema del articulo. Escribi con el maga palabra que gendeh tu familiar y con el maga punto que quierre tu man research.

9. (a) Porque y paquemodo kita pone atencion con el maga texto si ta estudia con El Torre de Guardia? (b) Base na Josue 1:8, cosa kita debe hace si ta le con el maga texto?

⁹ Si ta estudia kita con El Torre de Guardia, ta estudia tambien kita con el Biblia. Poreso, pone atencion con el maga texto, especialmente aquel para le durante el miting na congregacion. Nota si paquemodo el maga palabra o frase na texto ta suporta con el  importante punto na parapo. Mas pa, dale tiempo para medita con el maga texto que ya le tu y pensa si paquemodo tu puede aplica con ese na de tuyu vida.​—Le con el Josue 1:8.

10. Asegun na Maga Hebreo 5:14, porque el maga mayores debe dale tiempo durante el diila de familia adoranza para enseña con el diila maga anak si paquemodo estudia y man research?

¹⁰ Siempre, el maga mayores quierre que man enjoy el maga anak na diila De Familia Adoranza cada semana. Maskin necesita sila pirmi prepara para na de familia adoranza, gendeh se quierre decir que debe sila hace especial proyecto cada semana. Na diila De Familia Adoranza, puede sila mira con el programa na JW Broadcasting o tiene vez, hace especial proyecto igual como un representacion del arka de Noe. Pero, importante tambien enseña kanila si paquemodo estudia. Por ejemplo, necesita sila aprende si paquemodo prepara para na maga miting na congregacion o si paquemodo man research acerca na un issue que ya enfrenta sila na escuela. (Le con el Maga Hebreo 5:14.) Si ta dale sila tiempo para estudia un topico na Biblia na casa, mas facil para kanila pone atencion durante el maga miting, asemblea y convencion donde gendeh pirmi ta dale mira video. Siempre, el largor del cada estudiada ta depende na edad y personalidad del maga anak.

11. Porque importante enseña con el diaton Bible study si paquemodo enbuenamente estudia maskin solo-solo lang sila?

¹¹ El diaton maga Bible study necesita tambien aprende si paquemodo estudia. Cuando nuevo pa sila ta estudia con el Biblia, alegre ya kita si tan underline sila con el contestacion si ta prepara para na Bible study o miting na congregacion. Pero, necesita kita enseña kanila si paquemodo man research y paquemodo estudia enbuenamente maskin solo-solo lang sila. Na ansina manera, en vez de anda dayun na maga hermano na congregacion para pidi ayuda si tiene sila problema, sabe sila si paquemodo man research na diaton maga publicacion para busca informacion que puede ayuda kanila.

12. Cosa el diaton goal si ta estudia?

¹² Si gendeh tu anad estudia, baka ta pensa tu que imposible para contigo que man enjoy con ese. Pero puede siempre tu man enjoy. Na primero, puede tu estudia por corto tiempo y despues hinay-hinay tu omenta el hora  del de tuyu estudiada. Pensa si porque tu ta estudia. Siempre, el de con todo importante goal amo que queda kita mas cerca con Jehova. Y puede tambien kita hace goal que dale contestacion con el pregunta del un persona o man research acerca na un problema que ta enfrenta kita.

13. (a) Explica si cosa puede hace el un estudiante para defende con el cosa le ta creé. (b) Paquemodo tu puede aplica con el consejo na Colosa 4:6?

¹³ Como un ejemplo, un estudiante ba tu? Baka todo de tuyu classmate ta creé na evolucion. Quierre tu defende con el cosa ta enseña el Biblia pero ta pensa tu que gendeh tu se puede hace. Poreso, necesita tu estudia! Tiene tu dos razon para hace con ese: (1) para queda fuerte el de tuyu fe que ya crea el Dios con el todo las cosas y (2) para aprende si paquemodo tu defende con el verdad. (Rom. 1:20; 1 Ped. 3:15) Pensa tu una, ‘Porque gaha el de mio maga classmate ta creé na evolucion?’ Despues, man research tu enbuenamente na diaton maga publicacion. Baka puede tu realiza que gendeh ansina de dificil que defende con el cosa tu ta creé. Mayoria del maga gente ta creé na evolucion por causa lang cay amo se el cosa ta creé aquellos quien ta respeta sila. Si puede tu incuntra maskin uno o dos punto acerca con ese topico, baka puede tu ayuda con el un persona quien interesao sabe el verdad.​—Le con el Colosa 4:6.

14-16. (a) Cosa tu puede hace para mas entende con el un libro na Biblia que gendeh tu bien familiar? (b) Usando el maga texto que ya cita, explica si paquemodo este ayuda contigo mas entende con el libro de Amos. (Mira tambien con el cajon “ Conoce Kanila Como Maga Real Persona.”)

¹⁴ Pone kita que hay discuti na miting con el un libro na Biblia que ya escribi el uno del maga minor prophet que gendeh tu bien familiar. El primer cosa que puede tu hace amo cultiva interes con el cosa ya escribi el profeta. Paquemodo tu se hace?

¹⁵ Una, pregunta con el de tuyu mismo cuerpo: ‘Cosa yo sabe acerca con el escritor de este libro? Quien le, onde le ta queda y cosa el de suyu trabajo?’ Si mas manada kita sabe acerca con el escritor, posible mas puede kita entende si porque le ya usa maga particular palabra o ilustracion na libro que ya escribi le. Mientras ta le tu con el Biblia, nota con el maga frase que puede ayuda contigo sabe el de suyu personalidad.

¹⁶ Ika-dos, grande ayuda tambien si sabe tu si cuando ya escribi con ese libro. Puede tu se sabe si chequia tu con el “Table of the Books of the Bible” atras del New World Translation of the Holy Scriptures. Puede tambien tu mira con el chart acerca na maga profeta y rey na Appendix A6. Si acerca na profecia el libro na Biblia que ta estudia tu, mas bueno si sabe tu si cosa el situacion na tiempo que ya escribi con este. Cosa mal custumbre o practica del maga gente el necesita corecta el profeta? Quien otro maga gente el ya vivi na de suyu tiempo? Para puede mas entende con el situacion, posible que necesita tambien tu considera con el otro maga libro na Biblia. Por ejemplo, para sabe pa mas si cosa el situacion na tiempo de profeta Amos, puede tu le con el maga versiculo na libro de 2 Rey y 2 Cronicas que listao na marginal reference del Amos 1:1. Mas pa, puede tambien tu le con el libro de Oseas quien posible ya vivi tambien na tiempo de Amos. Si considera tu con ese otro maga libro, mas puede tu entende con el situacion na tiempo de Amos.​—2 Rey 14:25-28; 2 Cron. 26:1-15; Os. 1:1-11; Amos 1:1.

17-18. Usa el maga ejemplo na parapo o de tuyu mismo ejemplo para dale mira si paquemodo el maga informacion que dol gendeh importante puede ayuda contigo para mas man enjoy tu na de tuyu estudiada.

¹⁷ Si ta le kita con el Biblia, bueno si tiene kita el interes para aprende mas. Pone kita que ta le tu con el capitulo 12 del Zacarias que ta predicta acerca na muerte del Mesias. (Zac. 12:10) Cuando ya llega tu na versiculo 12, ya puede tu le que “el familia de Natan” hay queda bien dolorido na muerte del Mesias. En vez de pasa lang con ese, puede tu pensa y pregunta: ‘Cosa el coneccion del familia de Natan con el Mesias? Tiene ba manera para puede yo sabe mas informacion?’ Ahora, ya principia tu man research. Uno del maga marginal reference amo el 2 Samuel 5:13, 14 donde ya aprende tu que si Natan uno del maga anak de Rey David. El segundo marginal reference amo el Lucas 3:23, 31 donde ta habla que si Jesus un descendiente de Natan por medio de Maria. (Mira con el “Joseph, son of Heli,” study note na Lucas 3:23.) Ya queda tu interesao! Sabe tu que ya predicta ya daan que si Jesus hay queda descendiente de David. (Mat. 22:42) Pero mas de 20 el anak de David. Bien maka-bilib cay ya puede identifica si Zacarias que el familia de Natan el queda dolorido na muerte del Mesias.

¹⁸ Considera kita otro ejemplo. Puede kita le na primer capitulo del Lucas que el un angel, si Gabriel, ya visita con Maria y ya habla acerca con el anak que hay pari le: “Ele ay queda importante y ay llama con Ele Anak del Bien Alto Dios. El Señor Dios ay dale con Ele el trono del disuyo tata si David. Ay queda  Le el Rey del familia de Jacob hasta para cuando.” (Luc. 1:32, 33) Posible, man focus lang kita na primer parte del mensaje de Gabriel que hay llama con Jesus como “Anak del Bien Alto Dios.” Pero ya habla tambien si Gabriel que hay queda “Rey” si Jesus. Poreso, puede kita pensa si cosa posible ya pensa si Maria na cosa ya habla si Gabriel. Ya pensa gaha le que si Jesus el cambia con Rey Herodes o con el quien sunod rula na Israel? Si queda rey si Jesus, hay tiene especial posicion si Maria como el nana del rey y el de suyu familia hay queda na palacio. Pero nuay habla el Biblia que ya menciona si Maria igual ansina con Gabriel y nuay kita onde puede le que si Maria ya pidi posicion na Reino como cosa ya hace el dos dicipulo de Jesus. (Mat. 20:20-23) Este detalle ta ayuda kanaton queda mas convincido que bien humilde si Maria!

19-20. Base na Santiago 1:22-25 y 4:8, cosa el diaton maga goal si ta estudia?

¹⁹ Acorda kita que el de con todo importante razon si porque kita ta estudia con el Biblia y diaton maga publicacion amo para queda mas cerca con Jehova. Y quierre tambien kita sabe si cosa gayot kita clase de persona y cosa maga cambio el necesita hace para ganá el favor del Dios. (Le con el Santiago 1:22-25; 4:8.) Poreso cada vez principia kita estudia, debe kita pidi sagrao espiritu con Jehova. Debe kita pidi con ele que ayuda kanaton para mas beneficia na cosa kita estudia y para puede kita mira si cosa maga cambio el necesita kita hace.

²⁰ Ojala todo kita hay imita con el fiel siervo del Dios que ya menciona el salmista: “El de suyu alegria talli na ley de Jehova y ta le ele con el De Suyu ley na hinay voz dia y denoche. . . . Todo cosa le hace hay tiene buen exito.”​—Sal. 1:2, 3.