1. Cosa ta enseña kanaton el Palabra del Dios?

PUEDE kita incuntra solucion na maskin cosa problema cay si Jehova el diaton Grande Instructor. (Isa. 30:20, 21) El de suyu Palabra ta dale kanaton el todo kita necesita para queda kita “preparao para todo clase de trabajo bueno.” (2 Tim. 3:17) Si vivi kita harmonia na maga enseñanza na Biblia, queda kita mas sabio contra con aquellos quien ta habla que debe kita sigui con el “saber de este mundo.”​—1 Cor. 3:19; Sal. 119:97-100.

2. Cosa kita examina na este articulo?

² Como cosa kita aprende, el sabeduria de este mundo ta influencia con el diaton maga mal deseo. Poreso, dificil para kanaton que gendeh sigui si paquemodo ta pensa y ta actua aquellos na mundo. El Biblia ta habla: “Bicia para noay quien ay engaña con ustedes con el diila saber de filosofia y maga insiñanza falso que ta sale na saber del maga gente.” (Col. 2:8) Na este articulo, examina kita si paquemodo el maga gente ya principia acepta con el dos imbusterias de Satanas. Na cada situacion, mira kita si porque un locuras el sabeduria de este mundo y si paquemodo el sabeduria na Palabra del Dios mas bueno pa na todo cosas na mundo.

3-4. Cosa maga cambio na mirada del maga gente na moralidad el ya sucede na America del año 1900 hasta 1930?

³ Del año 1900 hasta 1930 na America, tiene grande cambio na mirada del maga gente na moralidad. De antes, manada gente ta creé que el sexo para lang na maga casao y gendeh debe discuti na publico. Pero, ya cambia el diila mirada. Ya queda ya normal el maga cosas que de antes gendeh aceptable para kanila.

 ⁴ Del año 1920 hasta 1929, ya tiene grande cambio na custumbre del maga gente acerca na sexo. Ya habla el un researcher: “El maga salida, drama na teatro, cancion, libro y advertisement ya principia dale mira maga cosas que tiene que hace na sexo.” Durante na ese decada, el maga estilo de bailada ta manda pensa con el maga gente acerca na sexo y el estilo de mudada gendeh mas decente. Como cosa ya predicta el Biblia acerca na ultimo maga dia, el maga gente “mas quiere na alegria.”​—2 Tim. 3:4.

5. Cosa ya sucede na mirada del maga gente na moralidad despues del 1960?

⁵ Na maga año despues del 1960, mas ya omenta el quien tan junto maskin gendeh pa casao y comon ya el homosexualidad y divurcio. Manada clase de entretenimiento el ya dale mira maga cosas que tiene que hace na sexo. Na reciente maga decada, ya puede mira con el maga mal efecto de este. El un autor ya escribi que manada mal resulta si el maga gente gendeh ta sigui con el principio na moral. Por ejemplo, tiene maga familia donde el maga mayores gendeh junto ta queda o el un mayores ya abandona con el de suyu familia. El cuanto ta experiencia dolor na emocion y el otro ya queda addict na pornografia. Manada tambien el ya tiene sexually transmitted disease como AIDS. Este todo ta dale lang mira que un locuras el sabeduria del mundo.​—2 Ped. 2:19.

6. Na cosa manera el mirada del maga gente na sexo uyun na querrer de Satanas?

⁶ Uyun na querrer de Satanas el mirada del maga gente na sexo. Asigurao, alegre le mira que manada gente ta usa con el sexual relacion na manera que gendeh uyun na querrer del Dios y nuay apreciacion na matrimonio que un regalo del Dios. (Ef. 2:2) Si ta hace imoral cosas el maga gente, gendeh sila ta aprecia con el regalo del Dios que puede sila tiene maga anak. Gendeh tambien sila puede obtene vida hasta para cuando.​—1 Cor. 6:9, 10.

7-8. Porque el mirada del Biblia na sexo mas bueno na mirada del mundo?

⁷ El maga gente quien ta sigui con el sabeduria de este mundo ta pensa que gendeh realistico el maga principio del Dios na moral. Posible pregunta sila, ‘Porque el Dios ya crea kanaton que tiene sexual deseo y despues ta habla kanaton que gendeh sigui con este?’ Ta pregunta sila con este cay ta pensa sila que si quierre sila hace un cosa, debe sila hace con ese. Pero otro el cosa ta habla el Biblia. Este ta enseña que tiene kita abilidad controla con el  diaton maga gendeh justo deseo. (Col. 3:5) Mas pa, si Jehova ya hace posible para puede satisfecha el maga gente con el diila sexual deseo adentro na matrimonio. (1 Cor. 7:8, 9) Na este manera, el marido y mujer puede usa con este regalo y gendeh man lingasa que un comon resulta del imoralidad.

⁸ Gendeh igual na sabeduria de este mundo, el Biblia ta enseña kanaton el justo mirada na sexo. Ta habla este que el sexo puede queda un causa de alegria. (Prov. 5:18, 19) Pero este ta habla: “Cada y cual de ustedes ay sabe controla con el disuyo cuerpo con respeto y santidad; que el mal deseo del cuerpo gendeh ay domina con ustedes, como ta sucede con el maga pagano [“nacion,” NW] quien gendeh ta conoce con el Dios.”​—1 Tes. 4:4, 5.

9. (a) Del año 1900 hasta 1930, cosa ya puede ayuda con el maga siervo de Jehova para sigui con el sabeduria na Biblia? (b) Cosa consejo kita puede incuntra na 1 San Juan 2:15, 16? (c) Asegun na Roma 1:24-27, cosa maga imoral practica el debe kita resisti?

⁹ Del año 1900 hasta 1930, el maga siervo de Jehova nuay queda influenciao na maga gente que ‘no sabe mas si cosa el bueno o el malo.’ (Ef. 4:19) Ya pricura sila sigui con el principio de Jehova. El Mayo 15, 1926, issue del Watch Tower ya habla que “el un hombre o mujer debe queda limpio na pensamiento y na de suyu accion especialmente entre na gendeh igual hombre y mujer.” Maskin cosa pa ta pasa na entero mundo, el maga siervo de Jehova ya sigui con el sabeduria que estaba na Biblia. (Le con el 1 San Juan 2:15, 16.) Ta aprecia gayot kita con el Palabra del Dios! Ta rindi tambien kita gracias cay ta dale kanaton si Jehova espiritual comida para ayuda kanaton resisti con el mirada del mundo na moralidad. *​—Le con el Roma 1:24-27.

10-11. Cosa ya predicta el Biblia que sucede na ultimo maga dia?

¹⁰ El Biblia ya predicta que na ultimo maga dia, el maga gente hay queda “canalla.” (2 Tim. 3:1, 2) Poreso, gendeh maka-estraña que el mundo ta influencia con el maga gente que con el diila mismo cuerpo lang ama. El un encyclopedia ya habla que del maga 1970 “ya queda manada el maga libro acerca si paquemodo el gente tiene buen exito na vida.” El cuanto libro “ya anima con el maga gente que conoce con el diila mismo cuerpo y acepta si quien gayot sila.” Considera si cosa ya habla na uno de ese maga libro: “Ama con el de tuyu mismo cuerpo cay etu el de con todo precioso persona que ya vivi.” Ese libro ta enseña que el persona debe decidi para na de suyu mismo cuerpo si paquemodo le actua y hace si cosa le ta pensa que justo y conveniente con ele.

¹¹ Familiar ba se idea contigo? Ansina tambien el cosa ya anima si Satanas con Eva. Ele ya habla que puede si Eva ‘queda igual con Dios que sabe el bueno y malo.’ (Gen. 3:5) Manada na diaton tiempo ahora el tiene bien alto mirada na diila mismo cuerpo y ta pensa que nuay quien puede habla kanila si cosa el justo y mali—maskin el Dios. Bien claro se si paquemodo ta mira el maga gente con el matrimonio.

12. Cosa el mirada del mundo na matrimonio?

¹² El Biblia ta dale instruccion con el marido y mujer que trata con respeto con uno y otro y cumpli con el promesa que ya hace sila na dia del diila casamiento. Ta anima este con el maga casao que queda determinao esta junto maskin cosa pa pasa. Este ta habla: “El hombre hay deja con el de suyu tata y nana y esta junto con el de suyu mujer y sila hay queda un laman.” (Gen. 2:24) Pero, aquellos ya queda influenciao na sabeduria de este mundo ta  habla que el marido y mujer debe man focus na diila maga individual necesidad. El un libro acerca na divurcio ta habla: “Na cuanto maga casamiento, ya cambia con el promesa del man maridable. En vez de esta casao ‘mientras kita dos ta vivi,’ ya hace con este ‘mientras kita dos ta ama.’” Por causa cay el maga gente ta sinti que gendeh permanente el matrimonio, manada mayores el tan separtajan y ta causa este dolor na familia. Claro gayot que un locuras el mirada de este mundo na matrimonio.

13. Cosa el un razon si porque ta odia si Jehova con el maga orgulloso?

¹³ El Biblia ta habla: “Ta odia si Jehova con aquellos quien tiene orgulloso corazon.” (Prov. 16:5) Porque si Jehova ta odia con el maga orgulloso? El un razon amo cay aquellos quien tiene ese custumbre ta queda arogante igual con Satanas. Imagina si paquemodo de arogante si Satanas cuando ya pensa le que debe con ele hinca y adora si Jesus—el quien ya usa el Dios para crea con el todo las cosas. (Mat. 4:8, 9; Col. 1:15, 16) Aquellos maga orgulloso ta pensa que sabio sila pero para con Dios, nuay sila saber.

14. Paquemodo el Roma 12:3 puede ayuda kanaton para tiene balance mirada na diaton mismo cuerpo?

¹⁴ El Biblia ta ayuda kanaton para tiene balance mirada na diaton mismo cuerpo. Este ta habla que justo lang que tiene kita amor na diaton mismo cuerpo. Si Jesus ya habla: “Ama con el dituyo vecinos como ta ama tu con el dituyo mismo cuerpo.” (Mat. 19:19) Este ta dale mira que debe kita dale propio atencion na diaton maga necesidad. Pero, gendeh ta enseña el Biblia que debe kita pensa que mas importante kita que con otro. Sino, este ta habla: “No ustedes hace nada por competencia ni orgullo, sino precura hace todo con humildad; y pone firmi na de ustedes maga pensamiento que el los demas mas bueno pa que con ustedes.”​—Fil. 2:3; le con el Roma 12:3.

15. Cosa ya puede convinci contigo que mas bueno si sigui con el consejo na Biblia acerca na balance mirada na diaton mismo cuerpo?

 ¹⁵ Manada gente ahora, maskin aquellos quien ta considera el otro como educao, ta habla que un locuras si sigui con el consejo na Biblia. Ta habla sila que si considera tu con otro como mas alto, hay abusa sila contigo. Pero cosa el resulta si sigui con el custumbre del mundo de Satanas? Cosa tu ya puede observa? Alegre ba aquellos quien ta ama con el diila lang mismo cuerpo? Alegre ba el diila familia? Tiene ba sila deverasan amigo? Tiene ba sila cerca relacion con Dios? Base na cosa tu ya puede observa, onde el mas tiene buen resulta—sigui con el sabeduria de este mundo o con el sabeduria na Palabra del Dios?

16-17. Na onde kita ta rindi gracias y porque?

¹⁶ El maga gente quien ta sigui con el consejo de aquellos con quien ta considera el mundo como sabio amo igual na un turista quien ta pregunta na otro turista acerca na direccion pero igual sila dos perdido. Acerca con el maga “sabio” na tiempo de Jesus, ele ya habla: “Sila maga bulag que ta guia con otro maga bulag. Y cuando un bulag ta guia con otro bulag, sila dos ay cai na canal.” (Mat. 15:14) Justo gayot que el sabeduria de este mundo un locuras para con Dios.

¹⁷ Puede gayot kita usa con el consejo na Biblia “para enseña, y para proba que hende amo el maga enseñanza falso, y para corregi [o corecta] el mal conducta, y para enseña acerca del vida bueno que debe kita vivi conforme el maga orden de Dios.” (2 Tim. 3:16, El Nuevo Testamento) Ta rindi gayot kita gracias cay si Jehova ta usa con el de suyu organizacion para protege kanaton na sabeduria de este mundo! (Ef. 4:14) El espiritual comida que ta dale le ta ayuda kanaton para sigui con el maga principio na de suyu Palabra. Un privilegio gayot que si Jehova ya dale kanaton el sabeduria y guia na Biblia!