“Huyain yo,” ya habla si Sara * “y nuay tanto confianza na cuerpo. Poreso, gendeh yo comfortable si tan junto yo con el maga gente quien tiene grande confianza na cuerpo y ta insisti con el diila opinion. Pero relax yo si tan junto yo con el un persona que calmao y humilde. Puede yo habla con ese persona si cosa yo ta sinti y si cosa el de mio maga problema. Ansina el de mio maga best friend.”

El cosa ya habla si Sara ta dale mira que quierre kanaton man amigo el otro si calmao kita. Alegre tambien si Jehova si tiene kita este calidad. El de suyu Palabra ta habla kanaton: “Dale ustedes mira . . . pagka-calmao.” (Col. 3:12, NWT) Cosa el pagka-calmao? Paquemodo con este ya dale mira si Jesus? Y porque kita queda mas alegre si tiene kita este calidad?

El pagka-calmao amo un calidad que resulta si el un persona tiene paz. Este persona ta trata enbuenamente con otro y ta esta calmao maskin pa tiene con ele cosa ta manda consumi.

Si calmao kita, gendeh se quierre decir que mahina kita. Gane, el Griego palabra para na “pagka-calmao” ya usa para refiri con el un caballo que ya queda manso. Mafuerza siempre este caballo pero yan train con este para controla de este fuerza. Na igual manera, si calmao kita, ta controla kita con el diaton maga gendeh bueno tendencia y ta mentena paz con otro.

Baka pensa kita, ‘Gendeh yo calmao clase de persona.’ Manada gente el agresivo y nuay paciencia, poreso posible tan dificil kita demonstra con este calidad. (Roma 7:19) Claro que necesita esfuerzo para queda calmao pero el sagrao espiritu de Jehova hay ayuda kanaton para pricura demonstra con ese. (Gal. 5:22, 23, NWT) Porque kita debe hace esfuerzo para cultiva con este calidad?

Quierre-quierre kanaton el maga gente si calmao kita. Igual con Sara, que ya menciona enante, quierre-quierre tambien kita man junto na maga calmao persona. Si Jesus amo el de con todo buen ejemplo de pagka-buen gente y pagka-calmao. (2 Cor. 10:1) Maskin pa el maga bata no conoce con Jesus, quierre-quierre sila man junto con ele.​—Mar. 10:13-16.

El pagka-calmao ta protege kanaton y con aquellos alrededor kanaton. Si kita calmao, gendeh kita pronto consumi o rabia. (Prov. 16:32) Poreso, puede  kita evita sinti culpable cay ya puede hace sinti duele con otro​—especialmente con el persona con quien kita ta ama. Y el pagka-calmao ta protege con aquellos alrededor kanaton cay ta puede kita controla con el diaton mismo cuerpo.

Maskin pa ocupao y tiene pesao responsibilidad si Jesus, calmao siempre le con todo. Manada na de suyu tiempo el ta sufri y cansao y necesita sila alivio. Poreso, asigurao que ya dale gayot kanila comforta el cosa ya habla si Jesus: “Atraca ustedes conmigo, . . . cay iyo calmao y humilde.”​—Mat. 11:28, 29, NWT.

Paquemodo kita cultiva con el pagka-calmao igual na cosa ya demonstra si Jesus? Estudia kita con el Palabra del Dios para aprende si paquemodo si Jesus ta trata con el maga gente y si cosa le ta hace si ta enfrenta maga dificil situacion. Y si ta enfrenta kita maga situacion que dificil queda calmao, ta pricura kita actua igual con Jesus. (1 Ped. 2:21) Considera kita tres cosas que ya ayuda con Jesus para queda calmao.

Deverasan humilde si Jesus. Ya habla si Jesus que ele “calmao y humilde.” (Mat. 11:29, NWT) Junto ya menciona el Biblia con este dos calidad cay el pagka-calmao conectao na humildad. (Ef. 4:1-3) Na cosa manera?

Si humilde kita, gendeh kita pensa que bien importante kita o queda sobra de sensitivo. Cosa ya hace si Jesus cuando ya juzga con ele que ele “un tragon y borachon”? Por medio na de suyu accion, ya dale le mira que gendeh se deverasan. Ya dale le prueba que “el Saber . . . por medio del disuyo mismo maga trabajo, ya dale prueba cay amo gayot.”​—Mat. 11:19.

Si tiene cosa gendeh bueno ya habla el un persona acerca na de tuyu raza, sexo o background, mas bueno si hace tu esfuerzo que esta calmao. Si Peter, que un anciano na South Africa, ya habla: “Si ta consumi yo con el cosa ya habla el un persona, ta pregunta yo con el de mio mismo cuerpo, ‘Cosa hace si Jesus?’” Ele ya omenta: “Ya aprende yo que no pensa que bien importante yo.”

Sabe si Jesus que imperfecto el maga gente. El maga dicipulo de Jesus quierre hace si cosa el justo pero gendeh se sila pirmi ta puede hace cay maga imperfecto sila. Por ejemplo, na noche antes muri si Jesus, si Pedro, Santiago y Juan nuay con ele puede dale emocional suporta que ya pidi le. Sabe si Jesus que “el espiritu dicidido, pero el cuerpo maluya.” (Mat. 26:40, 41) Cay ya entende si Jesus que imperfecto el maga apostoles, nuay le consumi kanila.

Del antes, el un hermana que si Mandy pronto lang consumi con otro. Pero ahora, ta pricura le imita con el pagka-calmao de Jesus. Ele ya habla, “Ta hace yo acorda con el de mio mismo cuerpo que imperfecto el todo gente y ta pricura yo man focus na diila buen calidad igual con el cosa ta hace si Jehova.” El mirada ba de Jesus na imperfeccion del maga gente puede ayuda contigo para trata enbuenamente con otro?

Si Jesus ya confia con Dios. Si Jesus ya experiencia maltratamiento cuando taqui le na tierra. Nuay con ele entende el otro, ya insulta y ya hace pa gane con ele pasipala. Maskin pa ansina, ya esta le calmao cay “ya pone Le su esperanza con el Juez justo.” (1 Ped. 2:23) Sabe si Jesus que hay ayuda con ele aguanta el de suyu Tata na cielo y hay castiga na justo tiempo con aquellos ya maltrata con ele.

Si ya trata kanaton na gendeh justo manera y rabia kita, posible kita hace agraba con el diaton situacion. Poreso, el Escritura ta hace acorda kanaton: “El rabia del gente gendeh ta hace el trabajo de justicia de Dios.” (Sant. 1:20) Maskin pa tiene kita razon para rabia, posible kita hace gendeh buen cosas por causa na diaton imperfeccion.

Del antes, el un hermana na Germany que si Cathy ya pensa, ‘Si gendeh tu defende con el de tuyu mismo cuerpo, nuay se quien hace para contigo.’ Pero cuando ya aprende le confia con Jehova, ya cambia el de suyu custumbre. “Ahora, gendeh ya necesita que pirmi yo defende con el de mio mismo cuerpo,” ele ya habla. “Puede yo queda calmao ciendo sabe yo que tiene cosa hace si Jehova.” Si ya puede tu experiencia injusticia, puede tu esta calmao si imita tu con el ejemplo de Jesus y confia con Dios.

Ya hace claro si Jesus que si quierre kita queda alegre, debe kita queda calmao. “Alegre el maga calmao,”  ele ya habla. (Mat. 5:5, NWT) Nota si paquemodo el pagka-calmao puede ayuda kanaton na siguiente maga situacion.

El pagka-calmao puede menora con el tension na matrimonio. “Manada yo cosa ya habla gendeh bueno con el de mio mujer que gendeh yo ta pensa,” ya admiti si Robert, un hermano na Australia. “Pero despues tu larga maga duele palabra, gendeh tu puede pidi con otro que ulvida lang con ese. Otro gayot yo ya sinti cuando ya mira yo que ya puede yo hace sinti duele con el de mio mujer.”

“Todo kita ta comete culpa muchas veces” na diaton converzada. (Sant. 3:2) Y si larga kita maga palabra que gendeh kita ta pensa, puede este causa problema na diaton matrimonio. Na este maga situacion, puede kita controla con el diaton lenggua si calmao kita.​—Prov. 17:27.

Ya hace esfuerzo si Robert para queda calmao y tiene control na cuerpo. Cosa el resulta? “Ahora, si tiene maga cosas que gendeh kame tan entendijan pati de mio mujer, ta hace yo grande esfuerzo para oi enbuenamente, calmao man cuento y gendeh rabia,” ele ya habla. “Mas enbuenamente ya el diamon relacion.”

El pagka-calmao puede ayuda kanaton para tiene mas buen relacion con otro. Poco lang el maga amigo de aquellos quien pronto rabia. Pero si calmao kita, puede este ayuda “para tene paz entre con uno y otro y . . . guarda el union.” (Ef. 4:2, 3) Si Cathy, que ya menciona enante, ya habla, “El pagka-calmao ya ayuda conmigo para queda alegre man junto con otro, maskin pa dificil ledia con el cuanto maga gente.”

El pagka-calmao puede ayuda kanaton para tiene paz. Na Biblia, tiene coneccion el “saber que ta sale na cielo” na pagka-calmao y paz. (Sant. 3:13, 17) Si calmao el un persona, tiene le “calmao corazon.” (Prov. 14:30) Si Martin, quien ya hace grande esfuerzo para queda calmao, ya habla, “Ahora, mas ta puede ya yo man adjust y gendeh ya yo pirmi ta insisti con el de mio opinion. Y mas tiene yo ahora paz y alegria.”

Posible, necesita kita hace grande esfuerzo para queda calmao. “El deverasan,” ya habla el un hermano, “maskin na este maga tiempo, ta hirvi siempre de mio sangre na cuanto situacion.” Pero si Jehova, el quien ta anima kanaton que queda calmao, hay ayuda kanaton. (Isa. 41:10; 1 Tim. 6:11) Puede le ayuda kanaton hace acaba el diaton training y ‘dale kanaton fuerza.’ (1 Ped. 5:10) Llega el tiempo, igual con apostol Pablo, puede kita imita con el “pagka-calmao y hacida de bueno con otro del Cristo.”​—2 Cor. 10:1, NWT.