1-2. Cosa kita considera na este articulo?

MAS manada ya evidencia ahora que ta vivi ya kita na fin del ultimo maga dia de este sistema de las cosas. Gendeh mas dura, hay destroza si Jehova y si Jesucristo con el todo gobierno que tan contra con el Reino. Pero antes se sucede, el rey del norte y el rey del sur hay continua man contra na uno y otro y con el maga siervo del Dios.

² Na este articulo, hay considera kita con el profecia na Daniel 11:40–12:1. Hay discuti kita si quien ahora el rey del norte y si porque kita puede enfrenta con confianza con el maga probanza na futuro.

3-4. Quien el rey del norte ahora? Explica.

³ Despues bungca el Soviet Union del 1991, el maga siervo del Dios ya tiene “poco ayuda” cuando ya experiencia sila temporario libertad. (Dan. 11:34) Como resulta, ya puede sila predica y nuay tarda miles el ya queda publisher na maga nacion que parte del Soviet Union de antes. Pero despues del cuanto año, el Russia y el maga aliado de este amo el ya queda el rey del norte. Como cosa ya discuti del ya pasa articulo, para el un gobierno queda el rey del norte o el rey del sur, debe este hace tres cosas: (1) tiene este grande efecto na maga siervo del Dios, (2) por medio na de este accion, ta dale este mira que tan contra este con Jehova y con el de suyu maga siervo y (3) tan contra este con el otro rey.

 ⁴ Nota si porque kita puede habla que el rey del norte ahora amo el Russia y el maga aliado de este. (1) Tiene sila grande efecto na maga siervo del Dios, cay ya prohibi sila con el trabajo predicacion y ya persigui con el miles del diaton maga hermano y hermana quien ta queda na diila nacion. (2) El diila maga accion ta dale mira que ta odia sila con Jehova y con el de suyu maga siervo. (3) Tan contra sila con el rey del sur que amo el Anglo-American World Power. Mira kita si paquemodo el Russia y el maga aliado de este ta dale mira que sila el rey del norte.

5. Acerca na cosa el Daniel 11:40-43 y cosa sucede durante ese tiempo?

⁵ Le con el Daniel 11:40-43. Este parte del profecia ta discuti acerca con el entero tiempo del fin. Este ta dale mira si paquemodo el rey del norte y el rey del sur tan contra na uno y otro. Como cosa ya predicta si Daniel, na tiempo del fin, el rey del sur y el rey del norte “hay man rimpujajan.”​—Dan. 11:40.

6. Cosa el maga evidencia que tan rimpujajan el dos rey?

⁶ El rey del norte y el rey del sur ta continua man contra na uno y otro si quien queda el de con todo poderoso na entero mundo. Por ejemplo, considera si cosa ya sucede despues del Guerra Mundial II cuando el Soviet Union y el maga aliado de este ya principia domina con el grande parte del Europe. El rey del sur ya forma alianza militar junto con el otro maga nacion para man contra con el rey del norte. Este alianza ta llama North Atlantic Treaty Organization (NATO).” El rey del norte y el rey del sur ya gasta grande cantidad para tiene el de con todo poderoso fuerza militar. El rey del norte ya suporta con el maga contrario del rey del sur na guerra na Africa, Asia y Latin America. Na reciente maga año, el Russia y el maga aliado de este ya queda bien poderoso na entero mundo. Yan contra tambien sila con el rey del sur usando el maga computer. Este dos rey ta acusa con uno y otro que ta usa maga computer program para hace malo con el diila economia y gobierno. Y como cosa ya predicta si Daniel, el rey del norte ta continua ataca con el maga siervo del Dios.​—Dan. 11:41.

7. Cosa el “tierra de Decoracion”?

⁷ El Daniel 11:41 ta habla que el rey del norte hay entra na “tierra de Decoracion.” Cosa se tierra? De antes, ta considera con el literal tierra del Israel como “el de con todo bonito na todo tierra.” (Eze. 20:6) Pero, ya queda este bien especial cay aqui ta adora el maga gente con Jehova. Desde Pentecostes 33 C.E., ese “tierra” gendeh un literal lugar ciendo el maga siervo de Jehova calayat na entero mundo. Sino, el “tierra de Decoracion” ahora amo el manera de vida del maga siervo de Jehova que ta inclui el adoranza con ele por medio na maga miting y ministerio.

8. Paquemodo ya entra el rey del norte na “tierra de Decoracion”?

⁸ Durante el ultimo maga dia, manada beses ya entra na “tierra de Decoracion” el rey del norte. Por ejemplo, cuando el Nazi Germany amo el ya queda el rey del norte, especialmente durante el ika-dos guerra mundial, ese rey ya entra na “tierra de Decoracion” cuando ya persigui y ya mata este con el maga siervo del Dios. Despues del Guerra Mundial II, cuando el Soviet Union ya queda  el rey del norte, ese rey ya entra na “tierra de Decoracion” cuando ya persigui este y ya hace destierro con el maga siervo del Dios.

9. Na reciente maga año, paquemodo el Russia y el maga aliado de este ya entra na “tierra de Decoracion”?

⁹ Na reciente maga año, el Russia y el maga aliado de este ya entra tambien na “tierra de Decoracion.” Paquemodo? Del 2017, este presente rey del norte ya prohibi con el trabajo del maga siervo de Jehova y ya pone na preso con el cuanto del diaton maga hermano y hermana. Ya prohibi tambien este con el diaton maga publicacion, incluido el New World Translation. Mas pa, ya confisca este con el branch office, maga Kingdom Hall y Assembly Hall na Russia. Despues de ese, del 2018, el Cuerpo Gobernante ya manda conoce que el Russia y el maga aliado de este amo el rey del norte. Pero maskin pa grabe ta persigui con el maga siervo de Jehova, nuay sila man contra o pricura cambia con el gobierno. En vez, ta sigui sila con el consejo del Biblia que reza para na “maga autoridad,” especialmente si ta hace este maga decision que puede afecta con el diaton libertad para adora con Dios.​—1 Tim. 2:1, 2.

10. El rey del norte ba hay ganá contra con el rey del sur? Explica.

¹⁰ El profecia na Daniel 11:40-45 mayoria tan focus na actividad del rey del norte. Quierre decir ba de este que hay ganá le contra con el rey del sur? Gendeh. El rey del sur hay esta “vivo” cuando si Jehova y si Jesus hay destroza con el todo gobierno de gente na guerra de Armagedon. (Rev. 19:20) Porque kita puede asigura con ese? Considera si cosa ta indica el profecia na Daniel y Revelacion.

11. Cosa ta indica el Daniel 2:43-45? (Mira con el letrato na cover.)

¹¹ Le con el Daniel 2:43-45. Tiene cosa ya menciona el profeta Daniel acerca na maga sunod-sunod gobierno de gente que tiene grande efecto na maga siervo del Dios. Ta representa sila con el diferente parte del grande imagen que hacido de metal. El pies del imagen que hacido de hierro y lodo pandayan ta representa con el ultimo gobierno del gente. Ese pies amo el Anglo-American World Power. Este profecia ta indica que ta rula siempre el Anglo-American World Power cuando el Reino del Dios hay destroza con el todo gobierno del gente.

12. Na cosa ta representa el ika-siete cabeza del grande animal y porque este importante sabe?

¹² Si apostol Juan ya menciona tambien acerca con el maga poderoso gobierno que tiene efecto na maga siervo de Jehova. Na profecia de Juan, el grande animal que tiene siete cabeza ta representa con este maga gobierno. El ika-siete cabeza de este animal ta representa con el Anglo-American World Power. Importante este cay nuay mas otro cabeza que hay abuya despues de ese. Ta rula siempre este ika-siete cabeza del animal cuando el Cristo junto con el maga soldao na cielo hay destroza con este grande animal. *​—Rev. 13:1, 2; 17:13, 14.

13-14. Quien el “Gog na tierra de Magog” y cosa el causa kanila para ataca con el maga siervo del Dios?

¹³ El profecia na Ezequiel ta dale kanaton idea si cosa posible sucede na ultimo maga dia del rey del norte y rey del sur. Si mira kita con el maga profecia na Ezequiel 38:10-23;  Daniel 2:43-45; 11:44–12:1; y Revelacion 16:13-16, 21 como ta refiri na igual tiempo y suceso, puede kita expecta con el siguiente suceso.

¹⁴ Cuanto tiempo despues principia el grande tribulacion, “todo el maga rey na mundo” hay forma alianza de maga nacion. (Rev. 16:13, 14; 19:19) El Escritura ta llama con ese alianza como el “Gog na tierra de Magog.” (Eze. 38:2) Este alianza de maga nacion hay ataca con maga siervo del Dios y pricura destroza kanila. Cosa el causa kanila para ataca? Acerca con ese tiempo, si apostol Juan ya mira que ta cae maga grande hielo na maga enemigo del Dios. Ese simbolico ulan de hielo posible representa con el mensaje de juzgamiento del maga siervo de Jehova. Posible, este mensaje amo el causa con el Gog de Magog para ataca con el maga siervo del Dios y pricura destroza kanila.​—Rev. 16:21.

15-16. (a) Na cosa suceso posible ta refiri el Daniel 11:44, 45? (b) Cosa sucede con el rey del norte y con el los demas de Gog de Magog?

¹⁵ Este mensaje de juzgamiento y el ultimo ataque del maga enemigo del Dios posible refiri con el igual suceso na Daniel 11:44, 45. (Le.) Na ese texto, si Daniel ya habla que el “maga noticia estaba na este y estaba na norte” hay destorba con el rey del norte poreso sale le que “bien rabiao.” Quierre el rey del norte que “destroza con el manada.” El “manada” que ya menciona aqui dol ta refiri con el maga siervo de Jehova. * Posible, ta refiri aqui si Daniel con el ultimo ataque na maga siervo del Dios.

¹⁶ Este ataque del rey del norte junto con el otro maga gobierno hay causa con el Dios Todopoderoso para rabia. Y despues, hay principia el guerra de Armagedon. (Rev. 16:14, 16) Na ese tiempo, hay destroza con el rey del norte junto con el otro maga nacion que amo el Gog de Magog y “nuay quien hay ayuda con ele.”​—Dan. 11:45.

17. Quien si Miguel que ya menciona na Daniel 12:1 y cosa le ta hace ahora y na futuro?

¹⁷ El siguiente versiculo na libro de Daniel  ta dale kanaton mas detalle acerca si paquemodo destroza con el rey del norte y de suyu maga aliado y si paquemodo kanaton salva. (Le con el Daniel 12:1.) Cosa quierre decir de este versiculo? Miguel el otro nombre del diaton Rey que si Cristo Jesus. “Ta actua” le para na bien del maga siervo del Dios desde 1914 cuando ya establicia con el Reino na cielo. Gendeh mas dura, ele “hay para” o destroza con el de suyu maga enemigo na guerra de Armagedon. Ese guerra amo el ultimo suceso na cosa ya llama si Daniel como “un tiempo de dificultad que nuay pa gayot sucede.” El profecia de Juan na Revelacion ta refiri con el tiempo que ta guia para na ese guerra como el grande tribulacion.​—Rev. 6:2; 7:14.

18. Porque kita puede enfrenta con el futuro con confianza?

¹⁸ Puede kita enfrenta con el futuro con confianza cay ya asigura si Daniel y si Juan que todo aquellos quien ta sirvi con Jehova y con Jesus hay sobrevivi na grande tribulacion. Si Daniel ya habla que el maga nombre que “escribido na libro” amo el quien hay sobrevivi. (Dan. 12:1) Cosa kita hace para escribi con el diaton nombre na ese libro? Debe kita dale prueba que tiene kita fe con Jesus, el Cordero del Dios. (Juan 1:29) Necesita kita dedica con el diaton vida con Dios y bautiza. (1 Ped. 3:21) Y debe kita dale mira que ta suporta kita con el Reino del Dios y hace el todo lo que puede para ayuda con otro aprende acerca con Jehova.

19. Cosa kita debe hace ahora y porque?

¹⁹ Este ya el tiempo para hace fuerte con el diaton confianza con Jehova y na de suyu organizacion. Este ya el tiempo para suporta con el Reino del Dios. Si hace kita se, hay salva kita si el Reino del Dios hay destroza ya con el rey del norte y con el rey del sur.